1 Samuéu 10 - ꞌRe Ihâimana Uꞌâsi Mono Zadawa Wasuꞌu

Sau si'apito da, da te i'rãti'izé wasu'u

¹ Tawamhã Samuéu ma tô siré ti'â, simhi azeitona wa'u tob ré hã. Tawamhã iwa'u to hã ma tô sa'wa, Sauhu 'rã nhisiwi. Taha pari, ma tô tob'rata hârâ na sawi. Tawamhã te ãne tãma tinha: — Uburé Danhib'apito ma tô ai'rãti'i, asi'i'rãnho'õmo da, isib'a'uwẽ Izaraéu nhihudu norĩ ma. Duré taha wa, a hã te za 're i'ab'madâ'â mo, Izaraéu nhihudu norĩ hã. Te za duré 're i'anho'reptui mo, asitob'ru norĩ wi hã. Ãne te za 'Re ihâimana u'âsi mono te te i'aipisutu na hã da te 're waihu'u za'ra, asi'i'rãnho'õmozém na hã isib'a'uwẽ norĩ ma.

² Ã bâtâ na ã hawi aimorĩ wamhã, te za maparane aibâ norĩ hã isõpẽtẽ zahuré, Raqueu 'ru 'rata, Bẽzamihĩ nhihudu norĩ nhipti'a zada'ré, Ze'uza na romnhisi ãma. Tawamhã ta norĩ si te za aima wasu'u zahuré, awaru po'repore sipi'õ norĩ isimani za'ra, da te isõpẽtẽ za'ra zém na hã. Tawamhã te za duré aima wasu'u zahuré, aimama hã awaru po'repore ãma oto ihâtâ'â'õzém na hã duré ai'ãma si oto ihâtâ'âzém na hã. Tahawa, te za duré aima wasu'u zahuré, aimama te te ãne inharĩ na hã: “E marĩ wa za 'manha, ĩ'ra te isõpẽtẽzéb da hã.”

³ — Tawamhã te za aimo, aiwisi da, wede iwazéb zahi, 're isa mono u Tabo na romnhisi ãma. Tawamhã tame te za si'ubdatõ aibâ norĩ hã isõpẽtẽ za'ra, Bétéu na 'ri nho'õmo nhisi u isi'aba'ré hã, tame danhimizama zata na sõprub za'ra da, 'Re ihâimana u'âsi mono ma. Tawamhã aibâ imorĩ'rada hã te za tidu si'ubdatõ pone'ẽrebâ zéré uzé hã. Duré aibâ isãna'remhã te za tidu i'u'ẽtẽ wapu hã. Duré aibâ si'ubdatõ ãma hã abazei hâ 'manharĩ na ub'rẽ hã te za ti'â, uwa 'rãi wa'u isé ré i'masi hã.

⁴ Tawamhã ta norĩ hã te za siwi asawi. Te za duré i'u'ẽtẽ wapu hã maparane aima wẽ za'ra. Tawamhã a hã wẽ'õ õ di za, isibzari za'ra hã.

⁵ Tawamhã taha parimhã te za aimo, 'rinho'u Zibea na isisi ãma, 'Re ihâimana u'âsi mono te, ẽtẽ'rãihâ u, filisteu norĩ te te sima i'ri nhoré za'ra zéb u. Tawamhã 'ri nho'õmo u 're idanhisisi mono zéb ãma te za 'Re ihâimana u'âsi mono zadawa 'mahârâ'wa norĩ hã isõpẽtẽ za'ra, ẽtẽ nhisi wedezane 'manharĩ danhoprubzém hawi isi'aba'ré hã. Ta norĩ hã rowamremezé hã te te ta'a za'ra mono sina te za isõpẽtẽ za'ra, ropta'azé hã, ub'rãtã hi ne na danhimnhihârâzé hã, duré isõrõta'are hã. Tawamhã ã norĩ hã 'Re ihâimana u'âsi mono mreme na te te dama rowasu'u za'ra ré te za isõpẽtẽ za'ra.

⁶ Tawamhã Uburé Danhib'apito pẽ'ẽzani hã te za aiwa ãzé. Tawamhã a zama te za oto isiré aihâimana za'ra, 'Re ihâimana u'âsi mono zadawa 'mahârâ'wa ne. Taré oto a hã aimawi uptabi za.

⁷ Tawamhã ãne hã marĩ aima hâimana wamhã, uburé marĩ hã i'uwaibaba si 're ab'manharĩ mono za. E marĩ wa. 'Re ihâimana u'âsi mono hã za aime 're hâimana mono wa.

⁸ Ma'ãpé aimorĩ ĩnhowa Gilga na romnhisi u. Tawamhã tamep si wa za duré wa hã asõpẽtẽ, 'Re ihâimana u'âsi mono ma, ĩnhoprubzéb da danhimizama hã te zata pese da, ãma ĩmorĩ wamhã. Wa za duré tãma ãma ĩnhopru, danhoprubzém na ãma idapẽ'ẽ to za'ẽtẽ na hã. Tahawa, a'â ĩzô asimipari za, 7 bâtâ 'remhã wa hã ãma ĩwisizéb u, duré te aima waihu'u da, za marĩ i'manharĩzéb da hã.

⁹ Tawamhã Samuéu hawi sipi'rai wi morĩ da oto, ma tô 'Re ihâimana u'âsi mono hã ãma tiwi saprĩ, ipẽ'ẽ 'rem na hã. Tahawa, taha bâtâ na Samuéu hã te te tãma iwaihu'u mono zéb zarina, ma tô marĩ hã ãma tihâiba, Sauhu ãma hã.

¹⁰ Tawamhã Sau norĩ hã tite romhuri'wai me, Zibea na 'ri wa'õtõ nhisi u oto simasisi zahuré wamhã, ma tô sõpẽtẽ za'ra, 'Re ihâimana u'âsi mono zadawa 'mahârâ'wa norĩ hã. Tawamhã 'Re ihâimana u'âsi mono pẽ'ẽzani hã ma tô iwab ãzé, Sauhu wamhã. Tahawa, ma tô oto isiré tihâimana za'ra.

¹¹ Tawamhã iwaihu'u'wa norĩ te te siwi 'madâ'â wamhã, 'Re ihâimana u'âsi mono zadawa 'mahârâ'wa norĩ siré te te iromhurizém na hã ma tô ãma sisadanharĩ za'ra ãne: — E marĩ wamhã te dame tihâiba, Quisihi 'ra hã. E Sau zama ma tô aipi'ra, 'Re ihâimana u'âsi mono zadawa 'mahârâ'wa na romhuri'wai u hã.

¹² Tawamhã aibâ tame 're ihâimana mono hã ma tô ãma dazadanha ãne: — Isiré norĩ hã bété. E imama norĩ hã ma tô 'Re ihâimana u'âsi mono zadawa 'mahârâ'wa na hã 're hâimana za'ra. Ãne zarina te oto da te dasima 're nharĩ za'ra: “E Sauhu zama ma tô aipi'ra, 'Re ihâimana u'âsi mono zadawa 'mahârâ'wa na romhuri'wai u hã.”

¹³ Tawamhã Sau, 'Re ihâimana u'âsi mono zadawa wasu'u na te te romhuri pari, ma tô oto mo ẽtẽ'rãihâ ãma wedeza ne na 'Re ihâimana u'âsi mono ma 're idanhoprub za'ra mono zéb u.

¹⁴ Tawamhã Sau mama amo hã te sadanharĩ zahuré ãne, tãma iromhuri'wai me: — E momo te ane wa'wa. Tawamhã Sau te tãma siwasu'u ãne, timama amoi ma: — Awaru po'repore isimani za'ra zô wa 're warĩtĩ! Duré taha wa, niha wa te sõpẽtẽ za'ra õ wa, wa tô Samuéu u hã wanem ni, wa te sô sadanharĩ da.

¹⁵ Tawamhã imama amo te ãma sadanha ãne: — E niha tawamhã ma aima waihu'u 'wa, Samuéu hã.

¹⁶ — Ma tô wama wasu'u ãne: Ma tô u siwi sõpẽtẽ, awaru po'repore norĩ hã. — Ãne Sau te tãma rowasu'u, timama amoi ma hã. Tane nherẽ, uburé hã te te tãma rowasu'u õ di, Samuéu te te tãma inharĩzém na hã za isi'apitozém na Izaraéu nhihudu norĩ ma.

Sau hã isi'apitozé wasu'u, Izaraéu nhihudu norĩ ma

¹⁷ Tawamhã Samuéu ma tô uburé sô tihârâ za'ra, Izaraéu nhihudu norĩ zô, Mispa ãma si'rã'õtõ da.

¹⁸ Tahawa, te dama tinha ãne: — Uburé Danhib'apito Izaraéu nhihudu norĩ te 'Re ihâimana u'âsi mono hã te wama nharĩ za'ra ãne: “Wa hã wa tô Ezitu hawimhã asani za'ra wa'wa, te asõ'reptu za'ra wa'aba da, ezipsiu norĩ wi, duré uburé da te aima 're irob'manharĩ wasété za'ra mono wib zama.

¹⁹ Wa hã asib'apito za'ra wa'wa. Ĩwétési wa marĩ wi hã te 're asõ'reptu za'ra wa'wa, duré ropire hawimhã. Tane nherẽ, ãhã na hã ma tô asiwi ĩwẽ'õ wa'wa. Duré ma tô asiwi iwaptẽrẽ 'wa, apito hã te aima 'maipisutu za'ra wa'aba da hã. Wẽ di tô. Tahawa, ma'ãpé asi'rã'õtõ aba ĩnho're, aihi'rata norĩ nhihudu mono bâ duré aimama norĩ zarina ai'upsãtã aba mono bâ.”

²⁰ Tawamhã Samuéu hã ma tô uburé Izaraéu nhihudu norĩ zô hã hâ, 'râwi itẽme sihutu da, isihudu mono bâ. Tawamhã datozé dawaihu'uzéb da, te te siwi mei wamhã, ma tô watobro Bẽzamihĩ nhihudu norĩ wamri hã.

²¹ Tahawa, ma tô Samuéu hã tãma 'ru za'ra Bẽzamihĩ nhihudu norĩ 'remhã damama norĩ 'ra mono bâ, danhowa te te sina rotété za'ra da, itẽmemhã. Tawamhã Matrihi 'ra norĩ wamri hã ma tô duré watobro. Tawamhã Matrihi 'ra norĩ si'aibâ norĩ hã ma tô duré sina rotété za'ra, isãna'remhã. Tawamhã Sauhu nhisi hã ma tô watobro, Quisihi 'ra hã. Tawamhã ma tô oto sô 're rĩtĩ za'ra, Sauhu zô. Tane nherẽ, te te siwi sõpẽtẽ õ di.

²² Tahawa, te Samuéu Uburé Danhib'apito hã duré sadanha ãne: — E zahadu duré daré hã. Tawamhã 'Re ihâimana u'âsi mono ma ãma sada'â ãne: — Ĩhe, zahadu daré hã. Ma aima'u dawi, danhimarĩ wazari.

²³ Tawamhã te oto sô sisa're. Tahawa, te oto siwi saprõ apâ, Sau hã. Ta hã aibâ uburé danhipai u te te sina irowabzu. Tahawa, ma tô isisé hã watobro, Izaraéu nhihudu norĩ wa'wa sa wamhã.

²⁴ Tawamhã te Samuéu dama tinha ãne: — Ãhãta te za aibâ hã, Uburé Danhib'apito te te ipisudu hã! Ni'wa hã isine ihâimana õ, wa'reb za'ra hã. Ãne wa, te uburé Izaraéu nhihudu norĩ hã nharĩ za'ra: — Wanhib'apito a'â wama 're hâimana u'âsi za'ra mono!

²⁵ Tawamhã Samuéu hã ma tô oto ãma tãma rowasu'u za'ra, uburé Izaraéu nhihudu norĩ ma hã, apito nhimi'madâ'âzém na hã. Tawamhã ma tô duré ãma rob'ui'éré ibaihâ na, Uburé Danhib'apito nho'a 'ri 're te te siwi ihiri da hã. Taha pari, Samuéu hã ma tô oto apâ dazatõrĩ za'ra, 'ri tẽmemhã.

²⁶ Tahawa, Sauhu zama ma tô tinhorõwa u apâ mo, Zibea u. Tawamhã ma tô ime ai'aba'ré ni'wam norĩ aibâ ipẽ'ẽ nhiptete norĩ hã, ipẽ'ẽ 're, 'Re ihâimana u'âsi mono nhimipawaptobzé te te sina iwaihu'u za'ra norĩ hã.

²⁷ Tane nherẽ, te ni'wam norĩ hã 're ihâimana wasété za'ra mono hã nharĩ za'ra ãne: — E niha te za õ hã aibâ hã merẽ wa'anho'reptu. Tawamhã ta norĩ hã ma tô siwi wẽ'õ pese, Sau hã. Tahawa, tinhoprub za'ra zé hã te te tãma sõmri za'ra õ di. Tane nherẽ, Sau hã te ari'iwi tihâiba, te te nharĩ õ pese na.