1 Corĩtu 8 - ꞌRe Ihâimana Uꞌâsi Mono Zadawa Wasuꞌu

Romhâiba 'manharĩ ma, dasazé da te tãma 're isõmri za'ra mono zé wasu'u

¹ Rob'ui'éré na we asiwi ĩzadanharĩ za'ra wa'aba zém na, wa za duré aima ãma roti za'ra wa'wa, waihu'u pese newa romhâiba 'manharĩ ãma 're idawata za'ra mono zéb da, dasa hã da te tãma 're isõmri za'ra mono zém na, romhâiba 'manharĩ ma hã. Ãne ma tô we ĩma asiwasu'u za'ra wa'wa, rob'ui'éré na hã: “Wa norĩ hã isazei'wa oto 're wanomro mono wa, wama waihu'u pese za'ra di, 'Re ihâimana u'âsi mono nhimiroti hã. Taha zarina, wa za marĩ hã dasiré, wa te 're 'manharĩ za'ra, wa te wasima 're iwẽ za'ra mono zéb zarina.” Ãne na ma tô we ĩma asiwasu'u za'ra wa'wa. Tane tô. Uburé wa norĩ ma hã wama waihu'u pese za'ra di tô, 'Re ihâimana u'âsi mono nhimiroti hã. Tane nherẽ, marĩ hã da te 're waihu'u pese za'ra mono wẽ te, te za 're dasi'madâ'â ze za'ra, 'râwi. Tane nherẽ, isazei'wa norĩ hã 're isisawi pese za'ra mono zéb zarina si, te za 're sipawaptob u'âsi za'ra, siptete sina siré ãma 're hâimana u'âsi za'ra mono da.

² Ni'wam norĩ hã rowaihu'u pese 'wa newa, 'râwi 're si'madâ'â ze za'ra mono wamhã, sena na ta norĩ hã, marĩ te te 're waihu'u za'ra mono õ di za. Mare di.

³ Ni'wam norĩ ma, 'Re ihâimana u'âsi mono, tãma isawi za'ra si, te za 'Re ihâimana u'âsi mono hã tinhib'a'uwẽ na te te sina 're awaihu'u.

⁴ Duré, waihu'u pese newa, romhâiba 'manharĩ ãma 're idawata za'ra mono zéb da, dasa, da te tãma 're isõmri za'ra mono na, wa za oto aima roti za'ra wa'wa. E romhâiba 'manharĩ ma, dasa, da te tãma 're isõmri za'ra mono na, te za a norĩ wa'wa hã dame ãma 're asaihuri aba mo, isazei'wa 're anomro aba mono nherẽ. E dame ãma 're asaihuri aba mono õ di za. Ãne, wa za aima ãma waihu'u za'ra wa'wa. Romhâiba 'manharĩ ãma 're idawata za'ra mono hã, 'Re ihâimana u'âsi mono nei õ di. Iwaihu'u pese zéb da hã, marĩ hã tãma hâimana õ di. Robaba uptabi di. Tarére ta hã rob'manharĩ. Ãne hã wama waihu'u pese za'ra di. Siwaprosi, te 'Re ihâimana u'âsi mono si 're hâimana, waihu'u pese uptabi na. Isine hã marĩ hã isipai u iwaihu'upe hã 're 'maihâimana mono õ di, aimawi hã. Robaba uptabi di. Ãne hã wama waihu'u pese za'ra di duré.

⁵ Tane nherẽ, ni'wam norĩ hã ma tô te te 're saze za'ra, 'Re ihâimana u'âsi mono nei õ nherẽ, waihu'u pese uptabi na 're hâimana za'ra mono newa, hâiwa nhirõtõ na, duré ti'ai ãma zama, ihâiba'õ norĩ hã. Isib'apito za'ra hã ahâ uptabi na tãma 're hâimana za'ra mono õ nherẽ, ma tô te te ãma 're saze za'ra.

⁶ Tane nherẽ, te siwaprosi wama 're hâimana, 'Re ihâimana u'âsi mono si, wasiré wa te 're isaze za'ra mono norĩ ma hã. Ta hã uburé Wamama, 'Re ihâimana u'âsi mono hã. Taha ma si, wa oto 're wahâimana za'ra. Wanhib'apito si te duré siwaprosi 're hâimana, Zezu Cristuhu si. Taha si, ma tô Timama zadawa para te te ro'apoto. Taha nhimipawaptobzéb zarina si, ma tô 'Re ihâimana u'âsi mono hã te te 're wa'anho'reptu, õhõ ãma si 're wahâimana u'âsi za'ra mono da oto.

⁷ Tane nherẽ, ni'wam norĩ hã isazei'wa na oto 're hâimana za'ra mono nherẽ, ãne na te te waihu'u za'ra õ di ta norĩ hã, rosa'rata nhib'uware na si 're hâimana za'ra mono wa. Te te 're saze za'ra mono õ ré, romhâiba 'manharĩ ãma, aré dame ãma 're wata u'âsi za'ra mono wa, te zahadu ta hawim haré te te ãma 're rosa'rata u'âsi za'ra, romhâiba 'manharĩ ãma hã, 'Re ihâimana u'âsi mono ne, waihu'u pese newa. Tahawa, dasa hã romhâiba 'manharĩ ma, da te 're isõmri za'ra mono hã te te duré dame 're huri mono wa, te ta norĩ hã rosa'rata na te te ãma 're upai u'âsi za'ra, ãne: “Ã hã dasa hã romhâiba 'manharĩ ma, da te 're isõmri za'ra mono na, 're wasaihuri mono wamhã, wa za wawasédé hã wa te ãma 're 'manharĩ za'ra.” Ãne te za ta norĩ hã 're siwẽ'õ za'ra, tinhimirosa'rata nhib'uware na 're hâimana za'ra mono wa. Romhâiba 'manharĩ hã 'Re ihâimana u'âsi mono ne, waihu'u pese newa, dasa hã da te tãma 're isõmri za'ra mono hã te te dasiré 're huri mono wamhã, te za ãne na hã 're siwẽ'õ za'ra, ta norĩ hã.

⁸ Tazahã, dasa hã wa te 're ihuri mono zéb zarina, duré wa te 're ihuri mono õ zéb zarina, te te 're wa'awẽsãmri mono õ di za, 'Re ihâimana u'âsi mono hã. Marĩ hã wa te 're huri tõ mono da, wa te wasima 're ipisutu za'ra mono zéb zarina, te te siwi 're wa'awẽ'õ mono õ di za. Duré marĩ hã wa te 're huri mono da, wa te wasima 're ipisutu za'ra mono zéb zarina, te te 're wa'awẽsãmri mono õ di za.

⁹ Ãté te za tô asima 're iwẽ za'ra wa'aba mo, dasa hã romhâiba 'manharĩ ma, da te 're isõmri za'ra mono na dame 're asaihuri aba mono da, 'Re ihâimana u'âsi mono hã za te te siwi 're aiwẽ'õ za'ra wa'aba mono õ na dâ'âsina. Tane nherẽ, te za 're asi'madâ'â u'âsi za'ra wa'aba mo, ta hã dasa hã 're huri aba mono wa, asiré isazei'wa nherẽ, sib'uware na 're inomro mono norĩ hã apâ tiwasété u 're rere'e mono tõ da.

¹⁰ Ãté dasa hã romhâiba 'manharĩ ma, da te tãma 're isõmri za'ra mono na, te za 're asaihuri aba mo dasiré, romhâiba 'manharĩ ãma 're idawata za'ra mono zéb ãma hã, 'ri paramhã. Ãté 'Re ihâimana u'âsi mono hã te te siwi 're aiwẽ'õ za'ra wa'aba mono õ na dâ'âsina, te za tô asina 're aihâtâ'â za'ra wa'aba mono ãna, dasiré ãma 're asaihuri aba mo. Tawamhã ãté asiré isazei'wa nherẽ, sib'uware na 're inomro mono norĩ hã te za te te 're ai'madâ'â za'ra wa'wa, dame ãma 're asaihuri aba mono ré hã. Tawamhã dasa hã romhâiba 'manharĩ ma, da te tãma 're isõmri za'ra mono hã te te 're huri mono tõ da, te te aré siwi 're wẽ'õ za'ra mono nherẽ, e te za te te sima 're wẽ za'ra, dame ãma 're saihuri mono da, asine za'ra wa'aba. Te za tô te te sima 're wẽ za'ra. E marĩ wa. Dame ãma 're asaihuri aba mono ré, te te ãma 're ai'madâ'â za'ra wa'aba mono wa.

¹¹ Tawamhã taha zarina, oto ãma 're saihuri mono wamhã, te za 'râwi 're siwẽ'õ za'ra, asiré isazei'wa nherẽ, sib'uware na 're inomro mono norĩ hã, te te aré siwi 're wẽ'õ za'ra mono nherẽ, te te oto dame 're huri mono wa. Tahawa, te za Cristu te te 're isaze za'ra mono zém na si'uihâ na 're sisimini za'ra, ta hã sada dâ'â za'ra nherẽ.

¹² Ãne hã 're 'manharĩ za'ra wa'aba mono wamhã, asiré isazei'wa norĩ wi, te za aiwasédé hã 're i'manharĩ za'ra wa'aba mo. Taha zarina, ta norĩ hã marĩ hã te te aré siwi 're wẽ'õ za'ra mono nherẽ, te te oto 're 'manharĩ za'ra mono wa, te za 're siwẽ'õ pese za'ra. Ãne na aiwasédé hã tiwi 're 'manharĩ za'ra wa'aba mono wamhã, ta norĩ hâiba siré te za Cristuhu wi zama aiwasédé hã 're i'manharĩ za'ra wa'aba mo.

¹³ Ãté ĩsisãnawã norĩ hã te za te te sima 're rosa'rata za'ra, dasa hã romhâiba 'manharĩ ma, da te 're isõmri za'ra mono na, dasiré ãma 're saihuri mono wa, tiwasédé te te 're i'manharĩ za'ra mono na hã. Ãne wamhã, taha na wa hã dame 're ĩsa zahu mono õ di za oto, ĩsisãnawã norĩ hã tiwasété u 're sipizari zahu za'ra mono tõ da, apâ.