1 Corĩtu 7 - ꞌRe Ihâimana Uꞌâsi Mono Zadawa Wasuꞌu

Dasina damrozém na rowasu'u

¹ Rob'ui'éré na we asiwi ĩzadanharĩ za'ra wa'aba zém na, wa za oto aima roti za'ra wa'wa. E aibâ norĩ hã 're mro za'ra mono õ nherẽ, tãma 're rowẽ za'ra mono di za. Ãté mro õ nherẽ, tãma 're rowẽ za'ra mono di za tô.

² Tane nherẽ, aibâ norĩ hã mro ãna 're hâimana za'ra mono nherẽ, pi'õ na tiwasédé te te 're i'manharĩ za'ra mono zé hã, ahâ uptabi di. Duré pi'õ norĩ hã mro ãna 're hâimana za'ra mono nherẽ, aibâ na tiwasédé te te duré 're i'manharĩ za'ra mono zé hã, ahâ uptabi di. Tahawa, aibâ norĩ hã te za tô 're mro za'ra, timro me si 're hâimana za'ra mono da. Ãne hã wẽ uptabi di, pi'õ aimawi na tiwasédé te te 're 'manharĩ za'ra mono tõ da. Duré pi'õ norĩ hã te za tô 're mro za'ra aibâ na, timro me si 're hâimana za'ra mono da, ta norĩ zama, aibâ aimawi na tiwasédé te te 're 'manharĩ za'ra mono tõ da.

³ Aibâ norĩ hã pi'õ na oto 're mro za'ra mono wamhã, timro wi, tihâiba hã te te 're sawi za'ra mono õ di za oto. Duré pi'õ norĩ hã aibâ na oto 're mro za'ra mono wamhã, duré timro wi tihâiba hã te te 're sawi za'ra mono õ di za oto.

⁴ Pi'õ norĩ hã 're mro za'ra mono wamhã, ihâiba hã itei õ di oto. Imro te hã za oto, ihâiba hã. Tane duré aibâ norĩ hã 're mro za'ra mono wamhã, itei õ di oto, ihâiba hã. Imro te hã oto, ãne hã aiwa.

⁵ Tahawa, aimro ré 're i'aihâimana za'ra wa'aba mono norĩ, aimro wi aihâiba hã 're sawi za'ra wa'aba mono õ di za oto. Ãté nimahã bâtâ na si te za ãma 're asisaze za'ra wa'aba mo, aimro ma, aihâiba hã a'â 're sõmri za'ra wa'aba mono tõ da, 'Re ihâimana u'âsi mono ma si, a'â 're asisõmri za'ra wa'aba mono da, tãma 're aimreme zusi aba mono da. Ãne wamhã, 'Re ihâimana u'âsi mono ma, 're aimreme zusi aba mono pari, aihâiba hã aimro wi 're sawi za'ra wa'aba mono ãna, te za tô aihâiba na apâ asima ãma 're atob za'ra wa'aba mo, aiwasédé hã aihâiba na 'râwi nherẽ, aimro õ ne, asiwi 're 'manharĩ za'ra wa'aba mono tõ da, asina 're asiptete za'ra wa'aba mono õ wa, Satanasi hã te te 're aipibu za'ra wa'aba mono tõ da.

⁶ A norĩ wa'wa hã uburé asina 're aimro za'ra wa'aba mono da hã, te aima 'ru za'ra wa'aba õ di. Asi'uihâ na asima 're iwẽ za'ra wa'aba mono zarina, 're aimro za'ra wa'aba mono da hã, te duré aiwi wẽ'õ za'ra wa'aba õ di.

⁷ Tane nherẽ, wa hã ĩmro õ na 're ĩhâimana mono zéb zarina, aimro ãna 're aihâimana za'ra wa'aba mono zéb da hã, ĩma wẽ di aré. Tane nherẽ, 'Re ihâimana u'âsi mono hã aiwa te te dama 're apisutu mono õ di, dahâiba mono bâ, niha 're idahâimana za'ra mono zéb da hã. Dasisarina si 're idahâimana za'ra mono õ na hã, taha si te za te te dama 're apisutu, damro ré 're dahâimana za'ra mono da, duré damro ãna 're idahâimana za'ra mono da hã.

⁸ Aimro ãna 're aihâimana za'ra wa'aba mono norĩ ma, wa za oto aima roti za'ra wa'wa, duré pi'õi mrotõ norĩ ma zama. Õne haré, 're aihâimana za'ra wa'aba mono da hã, wẽ di, wa hã ĩmro õ na 're ĩhâimana mono ne. Ãne hã ĩma wẽ di.

⁹ Tane nherẽ, dahâiba na dawasété wi 're idanhiptete za'ra mono õ si, wẽ õ di. Tahawa, aihâiba na aiwasété wi, asina 're asiptete waihu'u za'ra wa'aba mono õ wamhã, te za tô asina 're aimro za'ra wa'aba mo, asisô 're rowasutu zahu za'ra wa'aba mono tõ da.

¹⁰ Aimro ré, 're aihâimana za'ra wa'aba mono norĩ ma, wa za oto aima roti pese za'ra wa'wa duré. Tane nherẽ, ĩsi'uihâ na ĩnhimirosa'rata na te aima roti za'ra wa'aba õ di za. Wanhib'apito nhimiroti na si, wa za aima roti za'ra wa'wa, ãne na hã: Pi'õ norĩ hã timro te te 're rẽme za'ra mono õ di za.

¹¹ Tane nherẽ, ãté pi'õ norĩ hã te za timro hã te te 're rẽme za'ra. Ãne hã te te 're 'manharĩ za'ra mono wamhã, aibâ aimawi na 're mro zahu za'ra mono õ di za. Timro 'rata u si, te za apâ 're sipizari za'ra. Ãne na te te ãma 're sahu ze za'ra mono õ wamhã, mro ãna te za tô 're hâimana u'âsi za'ra. Duré aibâ norĩ hã timro te te 're rẽme za'ra mono õ di za, ãne na hã tô aiwa.

¹² A norĩ wa'wa hã 're saze za'ra wa'aba mono õ ré, asina 're aimro za'ra wa'aba mono norĩ ma, wa za oto aima roti za'ra wa'wa. Wanhib'apito hã ti'ab ré, ãne na te te dama 're roti mono õ nherẽ, tane nherẽ, wa za aima ãma roti za'ra wa'wa, ãne na: Aibâ norĩ hã isazei'wa na 're hâimana za'ra mono nherẽ, imro hã isazei'õ'wa na tãma 're hâimana za'ra mono wamhã, duré pi'õ hã timro siré 're hâimana u'âsi za'ra mono da, te te sima 're sawi pese za'ra mono wamhã, ãne wamhã, aibâ norĩ hã timro hã te te 're rẽme za'ra mono õ di za.

¹³ Duré pi'õ norĩ hã isazei'wa na 're hâimana za'ra mono nherẽ, imro hã isazei'õ'wa na tãma 're hâimana za'ra mono wamhã, duré aibâ hã timro siré 're hâimana u'âsi za'ra mono da, te te sima 're sawi pese za'ra mono wamhã, ãne wamhã, pi'õ norĩ hã timro te te 're rẽme za'ra mono õ di za duré.

¹⁴ Duré aibâ norĩ hã isazei'õ'wa na 're hâimana za'ra mono nherẽ, imro hã isazei'wa na tãma 're hâimana za'ra mono wamhã, 'Re ihâimana u'âsi mono hã pi'õ norĩ ma, rowẽ te te tãma 're ipisutu za'ra mono zéb u'âbâ, te za tô duré aibâ norĩ ma, te te tãma 're pisutu za'ra rowẽ hã, imro hâiba u'âbâ, isazei'õ'wa na 're hâimana za'ra mono nherẽ, aibâ norĩ hã. Duré pi'õ norĩ hã isazei'õ'wa na 're hâimana za'ra mono nherẽ, imro hã isazei'wa na tãma 're hâimana za'ra mono wamhã, 'Re ihâimana u'âsi mono hã aibâ norĩ ma, rowẽ te te tãma 're ipisutu za'ra mono zéb u'âbâ, te za tô duré pi'õ norĩ ma, te te tãma 're pisutu za'ra rowẽ hã, imro hâiba u'âbâ, isazei'õ'wa na 're hâimana za'ra mono nherẽ, pi'õ norĩ hã. Ãnei õ 'wa'âhã, i'ra norĩ isazei'õ'wa norĩ 'ra ne, te aré tô 're hâimana za'ra, 'Re ihâimana u'âsi mono ma hã. Tazahã imama norĩ hâiba u'âbâ, te za tô rowẽ si te te tãma 're apisutu, 'Re ihâimana u'âsi mono hã.

^15-16 Duré, ni'wam norĩ hã isazei'õ'wa 're hâimana za'ra mono wamhã, timro hã isazei'wa te te 're rẽme za'ra mono da, te te sima 're wẽ za'ra mono wamhã, imro hã te te tiwi 're rosawi za'ra mono õ di za, isazei'wa si'uiwa sima 're hâimana za'ra mono õ wa. Si'uihâ na te za tô 're wairébé, isazei'õ'wa hã. 'Re ihâimana u'âsi mono hã ma tô te te sima 're aiwẽ za'ra wa'wa, robze sina ãma 're aihâimana za'ra wa'aba mono da. Tahawa, aimro hã isazei'õ'wa aima 're hâimana za'ra wa'aba mono wa, te te oto 're aiwẽ'õ za'ra wa'aba mono wamhã, te za tô tãma 're iwaprosi waré za'ra wa'aba mo, te te tô 're airẽme za'ra wa'aba mono da. Pi'õ norĩ, isazei'wa 're anomro aba mono wamhã, duré aimro hã Wanhib'apito te te 're saze za'ra mono õ nherẽ, e te za te te 're saze za'ra, nimahã bâtâ na hã, Cristu hã. Ãté te za tô te te 're saze za'ra. Ãté te te 're saze za'ra mono õ di za. Ãne hã aima waihu'u za'ra wa'aba õ di. Duré aibâ norĩ, isazei'wa 're anomro aba mono wamhã, aimro hã te te 're saze za'ra mono õ nherẽ, e te za te te 're saze za'ra, nimahã bâtâ na hã. Ãne hã aima waihu'u za'ra wa'aba õ di duré. Tahawa, aimro hã isazei'õ'wa na aima 're hâimana za'ra wa'aba mono wa, te te oto 're aiwẽ'õ za'ra wa'aba mono wamhã, ihâimanazéb zarina, te za tô tãma 're iwaprosi waré za'ra wa'aba mo, te te tô 're airẽme za'ra wa'aba mono da.

¹⁷ Wanhib'apito hã te te aima 're ipisutu za'ra wa'aba mono zéb zarina si, te za oto 're aihâimana u'âsi za'ra wa'aba mo. 'Re ihâimana u'âsi mono hã tinhib'a'uwẽ da, te te sima 're aipisutu za'ra wa'aba mono õ ré, niha 're i'aihâimana za'ra wa'aba mono zém hawi, 're aiwairébé aba mono zém na, 're asi'madâ'â za'ra wa'aba mono õ di za, zudeu na, duré zudeu'õ na. Õne haré te za oto 're aihâimana u'âsi za'ra wa'aba mo. Ãne na si, wa tô wa hã te dama 're aroti u'âsi, daro mono bâ isazei'wa norĩ hã siré 're isi'rã'õtõ u'âsi mono norĩ ma hã.

¹⁸ Ni'wam norĩ hã sihâiwata nhihâri ré, 're hâimana za'ra mono wamhã, 'Re ihâimana u'âsi mono hã tinhib'a'uwẽ da, te te oto sima 're pisutu za'ra mono wamhã, e taha zarina te za ta norĩ hã 're si'madâ'â ze za'ra, tinhihâiwata nhihârizé hã te te sima 're pari za'ra mono da, apâ sihâiwata nhihâri õ ré, 're inomro mono ne, 're hâimana za'ra mono da. Mare di. Ãne na hã 're si'madâ'â za'ra mono õ di za. Õhõ haré te za tô 're nomro. Duré ni'wam norĩ hã sihâiwata nhihâri õ nherẽ, 'Re ihâimana u'âsi mono hã tinhib'a'uwẽ da, te te oto sima 're pisutu za'ra mono wamhã, e taha zarina, te za ta norĩ hã 're sisihâiwata nhihâri za'ra. Mare di. 'Re sisihâiwata nhihâri za'ra mono õ di za. Õhõ haré te za tô oto 're nomro, ta norĩ hã.

¹⁹ Danhihâiwata nhihâri ré si 're idahâimana za'ra mono zé hã marĩ dai õ di, 'Re ihâimana u'âsi mono ma hã. Duré danhihâiwata nhihâri õ nherẽ, 're idahâimana za'ra mono zé hã marĩ dai õ di, 'Re ihâimana u'âsi mono ma hã, ãne hã tô aiwa. Ãne si tãma ipire hã, 're idahâimana za'ra mono zéb da hã. 'Re ihâimana u'âsi mono nhimiroti, da te 're 'madâ'â pese za'ra mono sina 're idanomro wẽ mono zép si, tãma ipire hã.

²⁰ 'Re ihâimana u'âsi mono hã tinhib'a'uwẽ da, te te sima 're aipisutu za'ra wa'aba mono wamhã, e niha za tawamhã 're i'aihâimana za'ra wa'aba mono zé hã. Õne haré te za tô aihâimanazém na 're aihâimana za'ra wa'aba mo, dapoto mono bâ da te 're aiwamri za'ra wa'aba mono zéb zarina, duré aipire na dama 're i'aihâimana za'ra wa'aba mono zéb zarina, duré aiwapu na dama 're i'aihâimana za'ra wa'aba mono zéb zarina.

^21-22 Ai'uipra'wa norĩ ma, aipawa'âbâ ãna tãma 're romhuri za'ra wa'aba mono ré, 'Re ihâimana u'âsi mono hã tinhib'a'uwẽ da, te te oto sima 're aipisutu za'ra wa'aba mono wamhã, aipawa'âbâ ãna 're iromhuri za'ra wa'aba mono zém na, asina 're aihâtâ'â za'ra wa'aba mono õ di za. Tane nherẽ, ãté nimahã bâtâ na si te za tô oto te te aima 're pisutu za'ra wa'wa, aipawa'âbâ ãna tãma 're romhuri za'ra wa'aba mono tõ da hã oto. Ãne zarina si, te za oto 'râwi 're asi'madâ'â za'ra wa'aba mo, tiwi 're aiwairébé aba mono da, romhuri hawi, asi'uihâ na oto asima 're romhuri za'ra wa'aba mono da. Ai'uipra'wa norĩ ma, aipawa'âbâ ãna tãma 're romhuri za'ra wa'aba mono ré, Cristuhu ãma oto 're anomro aba mono da, Wanhib'apito te te 're i'aipisutu za'ra wa'aba mono norĩ hã, te oto robzei u'âsi na 're aihâimana za'ra wa'aba mo. Da te 're i'uipra za'ra mono norĩ, wa'âbâ ãna te te oto dama 're romhuri za'ra mono tõ da, da te tãma 're ipisutu za'ra mono ne, ma tô Cristu hã te te 're aipisutu za'ra wa'wa, aiwasété u'âsi 're anomro aba mono tõ da, aiwasédé hã oto 're rẽme pese za'ra wa'aba mono da. Tane duré asi'uihâ na asima 're romhuri za'ra wa'aba mono ré, Cristuhu ãma 're anomro aba mono da, Wanhib'apito te te 're aipisutu za'ra wa'aba mono norĩ hã, te oto Cristuhu nhib'a'uwẽ si 're anomro aba mo. Taha zarina si, te oto isimiroti hã 're i'madâ'â pese za'ra wa'aba mo, da te 're i'uipra za'ra mono norĩ hã tinhib'apito nhimiroti si te te 're i'madâ'â pese za'ra mono ne.

²³ Tidâ'âzém na ma tô Cristu hã aiwa'âbâ za'ra wa'wa, aiwasété u'âsi 're anomro aba mono tõ da oto. Tahawa, isazei'õ'wa norĩ ma, 're aihâimana za'ra wa'aba mono õ di za oto.

²⁴ Ĩsisãnawã norĩ, 'Re ihâimana u'âsi mono hã tinhib'a'uwẽ da, te te sima 're aipisutu za'ra wa'aba mono wamhã, õne haré te za aihâimanazéb u'âsi za'ra wa'aba na si, 're aihâimana za'ra wa'aba mo, 'Re ihâimana u'âsi mono ãma si.

Mro ãna 're ihâimana za'ra mono zé wasu'u

²⁵ Rob'ui'éré na we asiwi ĩzadanharĩ za'ra wa'aba zém na, wa za duré ãma aima roti za'ra wa'wa, mro ãna zahadu 're ihâimana za'ra mono norĩ na hã. Wanhib'apito hã ti'ai ãma 're morĩ ré, ãne na te te dama ãma 're roti mono õ nherẽ, wa za aima ãma roti za'ra wa'wa. Wanhib'apito hã tinhoprubzéb zarina, ma tô te te 're ĩpawapto, dama ĩ'umnhasizéb zarina, isimiroti zarina si, te dama ãma 're roti mono da. Taha zarina, wa za tô oto aima ãma roti za'ra wa'wa.

²⁶ Ãhã na Zezusihi zazei'wa oto 're wanomro mono wa, te da te wama 're rob'manharĩ wasété za'ra, wa te 're robzépata za'ra mono da. Tahawa, wa za oto aima roti za'ra wa'wa, aimro ré 're aihâimana za'ra wa'aba mono wamhã, taha haré asima 're aihâimana u'âsi za'ra wa'aba mono da, duré aimro õ nherẽ, 're aihâimana za'ra wa'aba mono wamhã, õne haré 're aihâimana za'ra wa'aba mono da.

²⁷ Aibâ norĩ, aimro ré 're aihâimana za'ra wa'aba mono norĩ hã, asima 're rosa'rata wasété za'ra wa'aba mono õ di za, 're irẽme za'ra wa'aba mono zéb da na hã. Duré zahadu aimro ãna 're aihâimana za'ra wa'aba mono norĩ hã, asima 're rosa'rata za'ra wa'aba mono õ di za, 're i'aimro za'ra wa'aba mono zéb da na hã.

²⁸ Tane nherẽ, ãté te za tô asima 're iwẽ za'ra wa'aba mo, 're aimro za'ra wa'aba mono da. E tawamhã aiwasédé te za 're i'manharĩ za'ra wa'aba mo. Mare di. Iwẽ si te za tô 're i'manharĩ za'ra wa'aba mo. Duré pi'õi hâiba préduptém norĩ hã 're mro za'ra mono wamhã, e te za tiwasédé hã te te 're 'manharĩ za'ra. Mare di. Tiwasédé hã te te 're 'manharĩ za'ra mono õ di za. Ãne, wa hã wa tô aré te ĩsima 're aiwẽ za'ra wa'wa, asina 're aimro za'ra wa'aba mono wa, 're robzépata za'ra wa'aba mono tõ da. Ãne tõ da, wa tô aima roti za'ra wa'wa, asina 're aimro za'ra wa'aba mono tõ da hã.

²⁹ Ĩsisãnawã norĩ, tô sena, wa za ãne hã aima waihu'u za'ra wa'wa. Romhuture di oto, irob'rãsutuzéb u hã. Tahawa, taha õ ré, Wanhib'apito ma si, wa te 're iromhuri pese za'ra mono zéb da si, wa za 'râwi wasina 're wanhopré u'âsi. Tahawa, aibâ norĩ, aimro ré 're aihâimana za'ra wa'aba mono norĩ hã, aimro zawi na si 'râwi asima ãma 're rosa'rata za'ra wa'aba mono õ di za.

³⁰ Duré asisô 're aiwa'õ za'ra wa'aba mono wamhã, taha na si 're rosa'rata za'ra wa'aba mono õ di za. Duré aima 're irowẽ za'ra wa'aba mono zéb zarina, ato sina 're anomro aba mono wamhã, taha na si 're rosa'rata za'ra wa'aba mono õ di za. Duré marĩ hã asima 're uipra za'ra wa'aba mono wamhã, taha na si 're rosa'rata za'ra wa'aba mono õ di za, asima.

³¹ Ti'ai ãma uburé marĩ na 're romhuri za'ra wa'aba mono nherẽ, taha si asima 're wẽ uptabi za'ra wa'aba mono õ di za. E marĩ wa. Uburé marĩ hã ti'ai ãma, da te 're i'madâ'â za'ra mono hã te za dawi 're si'utõrĩ u'âsi za'ra. Tahawa, hâiwa ãma uburé marĩ iwẽ si 're ihâimana za'ra mono zô si, te za sô 're irob'ruiwapari u'âsi za'ra wa'aba mo.

³² Wa hã wa ĩsima te 're aiwẽ za'ra wa'wa, ti'ai ãma marĩ zô si asima 're asõpré wa'aba mono zarina, asina 're aihâtâ'â tõ za'ra wa'aba mono da. Aibâ norĩ hã mro ãna 're ihâimana za'ra mono norĩ hã Wanhib'apito ma, te te 're iromhuri za'ra mono zém na da si, te za sima 're sõpré u'âsi, taha zarina 'Re ihâimana u'âsi mono hã te te 're 'madâ'â ze za'ra mono da.

³³ Tane nherẽ, aibâ norĩ hã mro ré 're hâimana za'ra mono wẽ te, te za ti'ai ãma marĩ zô zama sima 're sõpré u'âsi, timro udâna, rowẽ na tãma 're ihâimana za'ra mono zéb da hã.

³⁴ Tahawa, maparane isimiromhuri te tãma 're hâimana za'ra, aibâ norĩ ma hã, te te sima sô 're irob'ruiwapari za'ra mono hã, Wanhib'apito ma, duré timro ma. Duré, pi'õi hâiba prédum norĩ, mro ãna 're ihâimana za'ra mono hã, duré pi'õ préduptém norĩ, mro ãna 're ihâimana za'ra mono hã ta norĩ hã te za simi'ẽ na Wanhib'apito ma si, te te tãma 're romhuri za'ra, wa'a ãna. Wanhib'apito ma si, tãma 're sihâiba nhomri u'âsi za'ra mono da, te za tô sena na te te sima 're wẽ za'ra, mro ãna 're hâimana za'ra mono wa, ta norĩ hã. Tane nherẽ, pi'õ norĩ, mro ré 're ihâimana za'ra mono norĩ hã, te za ti'ai ãma marĩ zô si sima 're sõpré u'âsi, timro udâna, robze na ãma 're hâimana za'ra mono da.

³⁵ Aiwi 're robzei'õ za'ra wa'aba mono wa, aihâiba zei õ na 're aihâimana za'ra wa'aba mono da, ãne na te aima roti za'ra wa'aba õ di. Taré iwẽ na si te aipawaptob za'ra wa'aba da, wa ãne na aima roti za'ra wa'wa. Wa duré te ĩsima te 're aiwẽ za'ra wa'wa, iwẽ si 're 'manharĩ za'ra wa'aba mono da, duré asimirosa'rata na Wanhib'apito ma 're asimi'ẽ za'ra wa'aba mono da, tãma 're romhuri pese za'ra wa'aba mono da, tiwi 're asihâiba zawi za'ra wa'aba mono ãna.

³⁶ Ãté ni'wam norĩ hã te za sina aiwẽ zahuré, sina mro zahuré da. Tawamhã sina mro zahuré õ ré, ãté aibâ hã te za pi'õi hâiba na si te te sima ãma 're rosa'rata u'âsi, za ãma imro hâiba na si, tiwasété wi siptete waihu'u ãna. Ãté te za duré te te sô 're rowasutu u'âsi. Ãne na siwaihu'u wamhã, te za tô ãma timro su'u, te te sima iwẽzéb zarina. Ãma mro su'u da hã tô. Tawamhã oto ãma mro wamhã, tiwasédé hã te te ãma 'manharĩ õ di za. Mare di.

³⁷ Duré aibâ hã ãté si'uihâ na te za sima pisutu, mro ãna a'â 're hâimana mono da. Ãne wamhã, ãté te za pi'õi wi, tihâiba na sina 're siptete u'âsi. Ãhã wamhã, te te sima iwẽzéb zarina, mro ãna a'â 're hâimana mono wamhã, wẽ di za tô. Ãne hã iwasété õ di.

³⁸ Tahawa, aibâ norĩ hã 're mro za'ra mono wamhã, iwẽ si te za tô te te 're 'manharĩ za'ra. Duré 're mro za'ra mono õ wamhã, iwẽ uptabi si te za tô te te 're 'manharĩ za'ra.

³⁹ Pi'õ norĩ hã imro tiwi 're dâ'â za'ra mono õ ré, te te 're rẽme waihu'u za'ra mono õ di za. Tiwi 're dâ'â za'ra mono wapsi, te za oto pibui pese na timro na te te 're sahu za'ra, aibâ aimawi na. Tane nherẽ, aibâ isazei'õ'wa na 're mro za'ra mono õ di za. Aiwa isazei'wa si'uiwa na te za tô sina 're mro za'ra apâ.

⁴⁰ Tane nherẽ, pi'õi mrotõ norĩ hã 're mro zahu za'ra mono õ wamhã, tãma 're rowẽ uptabi za'ra mono di za, ta norĩ ma hã. Ãne ta norĩ ãma ĩnhimirosa'rada hã. 'Re ihâimana u'âsi mono pẽ'ẽzani te te ĩma iwaihu'uzéb zarina, wa ãne na aima roti za'ra wa'wa, ãne si.