1 Corĩtu 5 - ꞌRe Ihâimana Uꞌâsi Mono Zadawa Wasuꞌu

Aibâ hã isazei'wa norĩ wazari, 're i'maihâimana wasété mono zé wasu'u

¹ Tawamhã wa tô duré aiwasu'u wasété 'wa hã wapa, ni'wa airob za'ra wa'aba ãma asiré wa'aba nherẽ, pi'õ na hâimana wasété na 're ihâimana mono na hã. Ta hã te, u, timama mro tém na 're hâimana. Ãne hã wasété uptabi di, 'Re ihâimana u'âsi mono ma hã. Isazei'õ'wa norĩ hã 're hâimana wasété uptabi za'ra mono nherẽ, ta norĩ ma zama, wẽ za'ra õ di, ãne hã. Tane nherẽ, te asiré isazei'wa hã dame 're 'maihâimana wasété, aibâ hã. Ãne hã wasété uptabi di.

² 'Re ihâimana u'âsi mono nhimiroti hã aima iwaihu'u pese za'ra wa'aba na, 'râwi 're asi'madâ'â ze za'ra wa'aba mono nherẽ, e marĩ wa, asiwi wẽ'õ za'ra wa'aba õ di bété, asõ'a za'ra wa'aba, aibâ tina waptém na isimisaihuri hã. Aibâ hâimana wasété zarina, aiwi irobzei'õ za'ra wa'aba na, te aré asiwaihu'u za'ra wa'wa, asiré isazei'wa 're hâimana mono wa. Taha zarina, te aré tiwi irosawi za'ra wa'wa, rowahutu u asiré 're hâimana za'ra wa'aba mono tõ da oto. E ãne hã tiwi sizâri za'ra wa'aba õ di bété.

^3-5 Wa hã ai'rata ĩnhamra aba õ nherẽ, wa tô romhâ hawim nherẽ, te ãma 're rosa'rata u'âsi, aibâ 're ihâimana wasété mono ãma hã. Tane nherẽ, ai'rata ĩnhamra za'ra wa'aba ne, wa za aima ãma roti za'ra wa'wa. Ãne wa tô waihu'u, Wanhib'apito Zezu Cristuhu zadawa para. Tahawa, te za misi bâtâ na asi'rã'õtõ 'wa, aibâ zada. Tawamhã asiré sébré aba wamhã, ĩnhimirosa'rata zarina, duré Wanhib'apito Zezu Cristuhu zadawa para, te za aibâ iwasédé hã asiwi isa'réi wa'wa a'â asisiti za'ra wa'aba, Satanasihi ma, ta hã te te tãma 're rob'manharĩ wasété mono wa, robzei'õ te te sina waihu'u da, tiwasédé hã te te oto rẽme pese da, tihâimana wasété na isiwaihu'uzém na hã. Ãne da, te za asiwi isa'réi wa'wa a'â, Satanasihi ma, Wanhib'apito hã nimahã bâtâ na apâ wei morĩ wapsi, te te sõ'reptu da.

⁶ Aiwaihu'u pese na 'râwi asina 're aiwata za'ra wa'aba mono zé hã, e wẽ di. Wẽ õ di. Ãne, wa za ãma aima romnhimiré'é za'ra wa'wa, asina iwaihu'u za'ra wa'aba zéb da hã. I'u'ẽtẽ wapuzé hã surure na te za ãma da te 're wazari za'ra, iduptobzéb da hã, i'u'ẽne hã. Suru na da te ãma 're wazari za'ra mono nherẽ, sa'ẽtẽ di za oto, i'u'ẽne hã. Tane duré, aibâ hã tiwasédé te te 're i'manharĩ mono hã misi nherẽ, te za asiré isazei'wa norĩ hã ãma 're hâimana wasété za'ra, te te ãma 're sasõmri za'ra mono wa, iwasété na hã. E ãne hã zahadu aima pibui prã za'ra wa'aba di bété.

^7-8 Ãne, wa za duré aima ãma romnhimiré'é za'ra wa'wa. 'Re ihâimana u'âsi mono, zudeu norĩ hi'rata norĩ hã Ezitu hawi te te isõ'reptu za'ra zém na, 're sipo're pu'u za'ra mono da, tisa te te 're huri mono wamhã, te za i'u'ẽtẽ wapuzé hã rob u te te 're sa'ra a'â, 'ri mono bâ, 'ri para 're isimi'wara mono hã. Taha zarina, te za i'u'ẽtẽ duptoi'õ na si tisa hã te te 're huri, Pascowa na dato nhisizém na hã. Tane duré, a norĩ wa'wa hã te za oto aiwasédé hã 're irẽme pese za'ra wa'aba mo, i'u'ẽtẽ wapuzé hã rob u da te dasisiti 're isani za'ra mono ne, 're aipoto téb za'ra wa'aba mono na si oto 're aihâimana za'ra wa'aba mono da. Zudeu norĩ hã, Pascowa na tisa te te 're huri mono wamhã, ihi'rata norĩ ma, 'Re ihâimana u'âsi mono, tinhimihâzé te te tãma iba'a za'ra zém na, ãma 're sipo're pu'u za'ra mono wamhã, te za ãma 're toi u'âsi za'ra. Tane ma tô duré Cristu hã wazada tidâ'â za'ra, wawasédé hã te te wama 're apari mono da, 'Re ihâimana u'âsi mono hã. Tahawa, zudeu norĩ hã Pascowa na tito te te 're i'manharĩ za'ra mono ne, wa za oto wa norĩ zama 're watoi u'âsi za'ra, Cristuhu ãma si oto 're wanomro mono wa. Zudeu norĩ hã i'u'ẽtẽ wapuzém na tisa te te 're huri mono õ di, Pascowa na tito te te 're 'manharĩ za'ra mono wamhã. I'u'ẽtẽ duptoi'õ na si, te tisa hã te te 're huri. Tane, wa norĩ hã wasiré isazei'wa norĩ hã, wa za wahâimanazéb 'rada iwasédé hã wa te 're rẽme pese za'ra. Wawasédé hã oto wa te 're 'manharĩ za'ra mono ãna, wa za 're wahâimana wẽ u'âsi za'ra, wanhimirosa'rada hã sena na si, duré wahâimanazé sena na si.

⁹ Ãne wana ré, ĩnhimi'ui'éré na, wa tô aré aima roti pese za'ra wa'wa, aibâ norĩ, pi'õ na tiwasédé te te 're i'manharĩ za'ra mono norĩ ãma 're asapa'a za'ra wa'aba mono tõ da, duré pi'õ norĩ, aibâ na tiwasédé te te 're i'manharĩ za'ra mono norĩ ãma zama 're asapa'a za'ra wa'aba mono tõ da.

¹⁰ Ãne na te aima roti za'ra wa'aba wamhã, isazei'õ'wa norĩ ãma, te aima roti za'ra wa'aba õ di, dahâiba na dawasédé, da te 're i'manharĩ za'ra mono norĩ ãma hã. 'Re simarĩ ahâ za'ra mono da, danhibrom na te te 're ida'ruiwapari za'ra mono norĩ ãma, te aima roti za'ra wa'aba õ di, duré danhibrom na dawi 're isipsaihuri za'ra mono norĩ ãma, duré 'Re ihâimana u'âsi mono upana romhâiba 'manharĩ ãma 're iwata za'ra mono norĩ ãma. Ta norĩ nhiti 're aihâimana za'ra wa'aba mono tõ da, te aima roti za'ra wa'aba õ di, isazei'õ'wa norĩ nhiti. Mare di. Uburé isazei'õ'wa norĩ nhiti 're aihâimana waihu'u za'ra wa'aba mono õ di tô.

¹¹ Ãne si, wa tô aima roti za'ra wa'wa, ni'wam norĩ hã Zezusihi zazei'wa na dama 're siwasu'u za'ra mono nherẽ, 're hâimana wasété za'ra mono wamhã, ta norĩ hâimanazém na ãma 're asapa'a za'ra wa'aba mono tõ da. Ãté isazei'wa na dama 're siwasu'u za'ra mono nherẽ, te pi'õi hâiba na tiwasédé te te 're 'manharĩ za'ra, aibâ wamhã. Duré pi'õi wamhã, ãté aibâ hâiba na te tiwasédé te te 're 'manharĩ za'ra. Duré ãté 're simarĩ ahâ za'ra mono da si, te danhibrom na te te 're da'ruiwapari za'ra. Duré ãté 'Re ihâimana u'âsi mono upana, te romhâiba 'manharĩ ãma si 're wata za'ra. Duré ãté dawasédé hã taré te te da'ãma 're isa'ra mono na, te ta norĩ hã te te dama 're rowasu'u wasété za'ra. Ãté âzézei'wa te duré 're hâimana za'ra. Ãté danhibrom na te duré dawi 're sipsaihuri za'ra. Ãne hã ni'wam norĩ hã zahadu tihâimana wasété na 're hâimana u'âsi za'ra mono nherẽ, asiré isazei'wa na aima 're siwasu'u za'ra wa'aba mono wamhã, ihâimanazém na ãma 're asapa'a za'ra wa'aba mono õ di za. Duré nimahã bâtâ na isiré 're asaihuri aba mono da hã, mare di za.

^12-13 Wa norĩ hã wasiré isazei'wa norĩ hã, isazei'õ'wa norĩ hâimanazé, wa te wasiwi 're waihu'u za'ra mono wa, wa te wasiwi 're iwẽ'õ za'ra mono da hã, 'râwi 're wasipisutu za'ra mono õ di za. Mare di. 'Re ihâimana u'âsi mono si, te za Zezusihi zazei'õ'wa norĩ hã te te 're awaihu'u, te te siwi 're i'awẽ'õ mono da hã. E tawamhã, ni'wam norĩ hã rowahutu u asiré 're asi'rã'õtõ aba mono nherẽ, marĩ iwasédé hã te te 're i'manharĩ za'ra mono zéb zarina, asiwi 're wẽ'õ za'ra wa'aba mono õ di za. Te za tô asiwi 're iwẽ'õ za'ra wa'aba mo, asiré 're aihâimana za'ra wa'aba mono wa. Duréihã 'Re ihâimana u'âsi mono zadawa 'mahârâ'wa hã ma tô ãne na ãma rob'ui'éré, ibaihâ na hã: “Ni'wam norĩ hã 're nomro wasété mono wamhã, te za oto asisiti tãma 're irob'ru za'ra wa'aba mo, asiré wa'aba 're hâimana za'ra mono tõ da.”