1 Corĩtu 2 - ꞌRe Ihâimana Uꞌâsi Mono Zadawa Wasuꞌu

Cristu hã wedepo'o nhonhi'rãmi na dazada idâ'âzé wasu'u

¹ Ĩsisãnawã norĩ, ma'ãpé ĩ'ãma aipo're pu'u za'ra wa'aba. Wa hã atẽme ãma ĩmorĩ aba wamhã, 'Re ihâimana u'âsi mono nhimiroti hã aré dama iwaihu'u'õ hã, wa tô te aima 're wasu'u za'ra wa'wa. E tawamhã ĩmreme wapari ze na, 're ĩwapari za'ra wa'aba mono da si, wa tô te ĩsi'ãma 're rosa'rata, ĩnhimiroti wẽ wa, ĩ'ãma 're atob'uzu za'ra wa'aba mono da. Mare di. E ti'ai ãma danhimirowaihu'u pese na da te dama 're iroti za'ra mono ne, wa tô te aima 're rowasu'u za'ra wa'wa. Mare di. Tane hãi õ di, ĩnhimirowasu'u hã.

² Ai'rata 're ĩnhamra aba mono ré, wa tô ĩsima pisutu pese, Zezu Cristuhu wasu'uwẽ si te aima 're wasu'u za'ra wa'aba mono da, 'Re ihâimana u'âsi mono, Danho'reptui'wa da, Zezusi te te ipisudu hã wedepo'o nhonhi'rãmi na dazada idâ'âzé wasu'u si.

³ Te ãma asabu za'ra wa'aba wamhã, ĩpẽ'ẽ 'remhã ĩnhib'uware di. Tahawa, wa tô duré ĩpahi te hã, rẽrẽ, ĩnhimiromhuri na 'Re ihâimana u'âsi mono ma, te ãma 're i'uwaimrami mono zém na hã te 're 'wanhi'riti mono õ'umnhasite.

⁴ Zezusihi wasu'uwẽ, te aima 're wasu'u za'ra wa'aba mono wamhã, ti'ai ãma danhimirowaihu'u pese na da te dama 're iroti za'ra mono ne, te aima 're rowasu'u za'ra wa'aba mono õ di, ãma 're ĩzaze za'ra wa'aba mono da hã. 'Re ihâimana u'âsi mono pẽ'ẽzani hã tiwaihu'u pese na te te 're i'aipawaptob za'ra wa'aba mono na si, ma tô sena na 're isazei pese za'ra wa'aba mo, Zezusihi wasu'uwẽ hã.

⁵ Tahawa, ti'ai ãma danhimirowaihu'u pese zarina, Zezusi hã Danho'reptui'wa na 're saze za'ra wa'aba mono õ di. Mare di. 'Re ihâimana u'âsi mono, tiwaihu'u pese na te te 're i'aipawaptob za'ra wa'aba mono zéb zarina si, ma tô ãma 're isazei pese za'ra wa'aba mo.

'Re ihâimana u'âsi mono waihu'u pese na rowasu'u

⁶ Ti'ai ãma isazei'õ'wa norĩ nhimirowaihu'u zarina, te aima 're rowasu'u za'ra wa'aba mono õ di. Hâiwa hawi dahâimanazém na rowaihu'u na si, wa tô isazei'wa norĩ ma, te tãma 're rowasu'u za'ra, 'Re ihâimana u'âsi mono pẽ'ẽzani te te tãma 're iwaihu'u za'ra mono zéb zarina si, prédub sina ãma 're ihâimana za'ra mono norĩ ma hã. Ã hã roti hã ti'ai ãma isazei'õ'wa norĩ nhimiroti nei õ di. Daro mono bâ dama roti'wa norĩ nhimiroti nei õ di duré. Ta norĩ nhimiroti nhiptetezé hã daro mono bâ te za tiwi 're si'utõrĩ za'ra.

⁷ E 'wa iwaihu'u pese nhimiroti, te dama 're iwasu'u mono hã bété. 'Re ihâimana u'âsi mono nhimiroti hã aré dama iwaihu'u'õ si, wa wa hã te dama 're wasu'u u'âsi, iwaihu'u pese zarina isimiroti wẽ uptabi si. Ta hã ma tô aré dawi udâ, da te 're waihu'u za'ra mono tõ da a'â, isimiroti wẽ wasu'u hã. Tane nherẽ, te te aropoto mono õ ré, ma tô te te sima 're wa'apisutu siro, iwaihu'u pese siré si oto 're wahâimana u'âsi za'ra mono da, rowẽ uptabi na.

⁸ Tiwaihu'u pese zarina, 'Re ihâimana u'âsi mono nhimirowaihu iwẽ uptabi hã te te waihu'u za'ra õ di, ti'ai ãma dama roti'wa norĩ isazei'õ'wa norĩ hã. Te te waihu'u za'ra 'wa'âhã, Wanhib'apito, danhipai u iwaihu'u pe hã te te siwi wĩrĩ õ di aré, wedepo'o nhonhi'rãmi na hã.

⁹ Tane nherẽ, ta norĩ hã te te waihu'u za'ra õ di tô. Duréihã 'Re ihâimana u'âsi mono zadawa 'mahârâ'wa hã ma tô ãne na ãma rob'ui'éré siro: “'Re ihâimana u'âsi mono zawi pese 'wa norĩ ma, iwẽ hã te te tãma 're i'apisutu mono zé hã, te te tãma ãma 're i'a'uwaimrami mono zéb da hã, dasi'uihâ na datõmo na da te 're 'madâ'â waihu'u za'ra mono õ di. Duré dapo're na da te 're wapari waihu'u za'ra mono õ di. Duré dapẽ'ẽ na dasi'uihâ na da te dasina 're waihu'u za'ra mono õ di, da te dasina ãma 're i'uwaimrami za'ra mono zéb da hã, 'Re ihâimana u'âsi mono, iwẽ hã tinhib'a'uwẽ norĩ ma, te te 're i'apisutu mono hã.”

¹⁰ Wama si, ma tô tinhimiroti hã dama iwaihu'u'õ hã te te wama 're awaihu'u, 'Re ihâimana u'âsi mono hã. Tipẽ'ẽzani na si ma tô te te wama 're awaihu'u tô. 'Re ihâimana u'âsi mono pẽ'ẽzani ma si, waihu'u pese di tô, 'Re ihâimana u'âsi mono nhimiroti te te wama 're i'awaihu'u mono zéb da hã. E marĩ wa. Uburé marĩ hã tãma waihu'u pese wa, Ipẽ'ẽzani ma hã. 'Re ihâimana u'âsi mono, uburé te te sima 're i'aroti mono zé hã dama iwaihu'u'õ hã, tãma waihu'u pese di. Uburé marĩ na 're ihâimana mono zém na zama, tãma waihu'u pese di duré, Ipẽ'ẽzani ma hã.

¹¹ Ni'wa hã 'râwi tipẽ'ẽ na tihâimanazéb da, te te sima 're i'awaihu'u mono zé hã, e 'wa hã te za imana 'rãmi hawim nherẽ, tiwi waihu'u bété. Mare di. I'upana nherẽ, da te tiwi waihu'u õ di za, ihâimanazé hã. Marĩ na 'râwi sima irosa'rata'wai ma si, tãma waihu'u pese di, 're ihâimana mono zé hã. Tane duré, 'Re ihâimana u'âsi mono hâimanazé hã Ipẽ'ẽzani ma si, waihu'u pese di. Taha wi hã, ni'wa te te duré waihu'u õ di.

¹² Isazei'õ'wa norĩ nhimirosa'rata zarina, oto 're wahâimana za'ra mono õ di, wa norĩ hã. 'Re ihâimana u'âsi mono pẽ'ẽzani ré si, wa oto 're wahâimana za'ra, hâiwa hawi te te wei watẽme isatõrĩ ré si. Iwẽ hã te te wama 're i'anhomri mono na, wa te 're waihu'u za'ra mono da, ma tô Tipẽ'ẽzani hã wei watẽme satõrĩ za'ra, 'Re ihâimana u'âsi mono hã.

¹³ Tahawa, wa norĩ hã ti'ai ãma danhimirowaihu'u pese zarina, wa te oto dama 're rowasu'u za'ra mono õ di. 'Re ihâimana u'âsi mono pẽ'ẽzani te te wama 're i'aroti mono zéb zarina si, wa oto wa te dama 're rowasu'u za'ra. Ipẽ'ẽ 're, Ipẽ'ẽzani tãma 're ihâimana za'ra mono norĩ ma si, wa isimiroti wẽ hã wa te tãma 're wasu'u za'ra, 'Re ihâimana u'âsi mono hâimanazé wasu'uwẽ na hã.

¹⁴ 'Re ihâimana u'âsi mono pẽ'ẽzani te te wama 're i'aroti mono zé hã, te isazei'õ'wa norĩ hã te te siwi 're wẽ'õ pese za'ra, taré newa, 'râwi si'uihâ na rosa'rada hã te te ãma waihu'u pese za'ra õ wa, ta norĩ hã. 'Re ihâimana u'âsi mono pẽ'ẽzani, ipẽ'ẽ 're, tãma 're hâimana za'ra mono õ nherẽ, te te ãma 're waihu'u za'ra mono õ di tô. 'Re ihâimana u'âsi mono pẽ'ẽzani na si, te za da te ãma 're waihu'u za'ra.

¹⁵ 'Re ihâimana u'âsi mono pẽ'ẽzani, ipẽ'ẽ 're, tãma 're ihâimana za'ra mono norĩ si, te oto te te 're waihu'u za'ra, uburé te te tãma 're iroti za'ra mono zéb zarina, niha oto 're ihâimana za'ra mono zéb da hã. Tahawa, isazei'õ'wa norĩ hã te te oto 're wawaihu'u za'ra mono õ di, aimawi 're wahâimana za'ra mono wa oto.

¹⁶ Duréihã 'Re ihâimana u'âsi mono zadawa 'mahârâ'wa hã ma tô ãhã wasu'u na ãma rob'ui'éré siro, ãne na hã: “E 'wa hã, Wanhib'apito nhimirosa'rada hã te te tiwi iwaihu'u da bâ bété. Duré e 'wa hã te te tãma iroti da bâ bété.” Tane nherẽ, wa tô wa norĩ hã Cristuhu nhimirosa'rada hã waihu'u pese za'ra ni, 'Re ihâimana u'âsi mono pẽ'ẽzani, wapẽ'ẽ 're, oto wama 're hâimana za'ra mono wa, te te wama 're i'awaihu'u mono zém na hã.