1 Corĩtu 16 - ꞌRe Ihâimana Uꞌâsi Mono Zadawa Wasuꞌu

Zeruzalẽ ãma isazei'wa norĩ ma, rob'uiprazé da te dasiwi i'rã'õtõzé wasu'u

¹ Isazei'wa norĩ ma, rob'uiprazé hã asiwi i'rã'õtõ aba zéb da na, wa za oto aima ãma roti za'ra wa'wa. Galasia na danhipti'a nho'õmo nhisi ãma isazei'wa norĩ, daza'rui mono bâ siré 're isi'rã'õtõ mono norĩ ma, te tãma iroti za'ra zém na, wa za aima ãma roti za'ra wa'wa, duré a norĩ wa'aba zama ãne hã 'manharĩ za'ra wa'aba da.

² Dumigu sidâpâsi 're sãmra aba mono da, te za rob'uiprazé hã 're ipo'o u'âsi za'ra wa'aba mo, aihâiba mono bâ wa'aba. Aipawa'â hã suru na 're waibui wa'aba mono wamhã, suru na te za 're ipo'o za'ra wa'aba mo. Duré sa'ẽtẽ na 're waibui wa'aba mono wamhã, sa'ẽtẽ na te za duré 're ipo'o za'ra wa'aba mo. Atẽme ĩwisi aba wapsi, asiwi 'rã'õtõ aba da, asima rosa'rata za'ra wa'aba õ di za. Ĩwana ré, te za asiwi 're i'rã'õtõ u'âsi aba mo dumigu sidâpâsi, ĩzô nomro siromo da.

³ Tawamhã atẽme za'ra wa'aba ãma ĩwisi wapsi, asiwi ipisutu za'ra wa'aba norĩ hã wa za iré satõrĩ za'ra Zeruzalẽ u, asõprubzéb za'ra wa'aba ré hã, te te siwi âri da. Rob'ui'éré ré zama, wa za duré satõrĩ za'ra, wa te iwẽsãmri za'ra norĩ wasu'u na rob'ui'éré hã.

⁴ Tawamhã ãté ĩzama wa za ĩsima rowẽ, Zeruzalẽ u ĩmorĩ da hã. Taha wapsi, wa za isiré ĩmorĩ za'ra, asiwi ipisutu za'ra wa'aba norĩ siré hã.

Paulu hã za datẽme imorĩzém na dama isiwasu'uzé wasu'u

⁵ Wa tô ĩsima rowairébé, Masédonia u, a'â ĩmorĩ da, tame isazei'wa norĩ siré a'â ĩnhamra hutu da. Tawamhã Masédonia hawip si, wa za oto ãma atẽme ĩmorĩ 'wa, tamomomhã.

⁶ Tawamhã atẽme ãma ĩwisi aba wamhã, ãté wa za a'â ai'ratab za'ra wa'aba ĩhâimana hâ. Ãté rowa'u'u wahâ 're sa'wari mono ré, wa za a'â ai'ratab za'ra wa'aba ĩnhamra hâ pese za. Tamep si, te za asiwi ĩpawaptob za'ra wa'wa, nimomo ĩmorĩzéb da hã, rowẽ na ĩmorĩ da, aihawi za'ra wa'aba.

⁷ Ãma atẽme ĩwisi za'ra wa'aba wamhã, ai'rata ĩnhamra hutu za'ra wa'aba da, te ĩsina roti õ di. Ai'rata ĩnhamra hâ za'ra wa'aba da si, wa tô ĩsima wẽ. Ãne na dâ'âsina, awa'awi ãma atẽme ĩwisi aba õ di za. Nimahã na si, wa za ãma atẽme ĩmorĩ za'ra wa'wa. Tawapsi, wa za ai'rata ĩnhamra hâ za'ra wa'wa, Wanhib'apito hã te te ĩma pisutu pese wamhã.

⁸ Tahawa, wa za a'â ãme nhamra Éfézu ãma, Pẽtecosti na bâtâ nhisi hã za iwa iwaptã'ãzéb u, datoi 'manharĩzéb u hã.

⁹ Ĩnhimiromhuri wẽ'õ'wa norĩ hã ahâ uptabi nherẽ, ma tô 'Re ihâimana u'âsi mono hã ĩnhowa ropese ĩma, ãme te tãma 're iromhuri mono zéb da hã. Tahawa, ãmemhã ĩma romhuri ahâ uptabi di za, Zezusihi wasu'uwẽ na te dama 're iromhuri mono zéb da hã.

¹⁰ Duré, Timotiu hã atẽme ãma wisi za'ra wa'aba wamhã, ma'ãpé asiwi sawi wẽ za'ra wa'aba za, sina hâtâ'â ãna ai'rata sãmra aba da. Wa hã Wanhib'apito ma, te 're iromhuri mono ne, te duré taha zama te te tãma 're romhuri. Tahawa, te za asiwi isawi pese za'ra wa'wa.

¹¹ Mreme wapu na 're hâimana mono newa, duré taré 're ihâimana mono newa, asiwi wẽ'õ za'ra wa'aba õ di za, ãma atẽme wisi za'ra wa'aba wamhã. Te za ãma ana wa'wa, rowẽ na aihawi wa'aba hã wei morĩ da apâ, we ĩtẽme wisi su'u da. Tahawa, wa zahadu a'â sô mapari za'ra, isiré romhuri'wa norĩ zô zama.

¹² Wasisãnawã Apolu hã wa za duré aima ãma wasu'u za'ra wa'wa. Wa tô aré nasi tãma roti u'âsi, wasiré isazei'wa norĩ siré ãma atẽme morĩ za'ra wa'aba da, te te asabu za'ra wa'aba da. Tane nherẽ, te te sima rowẽ õ di, ta norĩ siré ãma atẽme imorĩ za'ra wa'aba da hã. Marĩ hã tãma hâimana õ wapsi, te za, u, ãma atẽme timorĩ za'ra wa'wa, te te asabu za'ra wa'aba da.

Paulu hã roti na za te te oto dama i'rãsutuzém na rowasu'u

¹³ Asimiza'rese te za asimirosa'rata na 're aihâimana za'ra wa'aba mo. Cristuhu nhimiroti zarina si 're anomro u'âsi aba mono da, te za duré sada 're asiptete za'ra wa'aba mo. Aihâimana prédup sina te za 're aihâimana za'ra wa'aba mo, asina 're aihâtâ'â za'ra wa'aba mono ãna. Asiptete sina te za duré ãma 're anomro aba mo, tiwi 're aipizari za'ra wa'aba mono ãna.

¹⁴ 'Re asimizawi pese za'ra wa'aba mono zéb zarina, te za uburé marĩ hã dama 're i'manharĩ wẽ u'âsi za'ra wa'aba mo.

^15-16 Estéfanasihi ãma, wa za oto aipo're pu'u za'ra wa'wa, isõrõwa ãma isiré 're ihâimana za'ra mono norĩ ãma zama. Ta norĩ hã ma tô sazei 'rata za'ra, Ataza na danhipti'a nho'õmo nhisi ãma, 're isi'ubumroi mono norĩ hã. Ta norĩ hã, 'Re ihâimana u'âsi mono nhib'a'uwẽ 're ihâimana za'ra mono norĩ hã simi'ẽ na te te 're pawaptob u'âsi za'ra mono da si, ma tô 're si'madâ'â za'ra. Ãne hã aima waihu'u pese za'ra wa'aba di. Tahawa, ĩsisãnawã norĩ, ta norĩ nhimiroti hã te za 're i'madâ'â pese za'ra wa'aba mo, isiré norĩ hã simi'ẽ na te te 're iromhuri pese za'ra mono norĩ nhimiroti zama.

^17-18 Estéfanasi norĩ hã, Furtunatu norĩ me, Acaicuhu norĩ me, we ĩtẽme sihutu wamhã, ma tô ĩma rowẽ watobro. Wa hã ai'rata 're ĩnhamra aba mono õ wa, wa ai'ãma 're ĩpẽ'ẽzé u'âsi za'ra wa'wa. Tane nherẽ, ta norĩ hã ai'upana wa'aba we ĩtẽme sihutu wa, ma tô sina ĩma rowẽ wazere za'ra, te te sina aima 're irowẽ zani u'âsi za'ra wa'aba mono ne. Ta norĩ hã te za asima 're iwasu'u wẽ u'âsi za'ra wa'aba mo.

¹⁹ Azia na danhipti'a nho'õmo nhisi ãma isazei'wa norĩ, siré 're isi'rã'õtõ mono norĩ hã te ãma asawi za'ra wa'wa. Aquira hã te duré ãma asawi za'ra wa'wa, Prisilaha me. Uburé isõrõwa ãma rowahutu u siré 're isi'rã'õtõ u'âsi mono norĩ zama, te duré ãma asawi za'ra wa'wa. Simisutu, Wanhib'apito ãma oto 're anomro aba mono wa, te ãma asawi za'ra wa'wa.

²⁰ Ãme wasisãnawã norĩ 're isi'ubumroi mono norĩ hã te duré uburé ãma asawi za'ra wa'wa. Duré 're asi'rã'õtõ aba mono wamhã, te za uburé asiré isazei'wa na 're aihâimana za'ra wa'aba mono wa, asõ'utu na asisawi sina 're asitob'rata hârâ za'ra wa'aba mo.

²¹ Wa hã Paulu, ĩsi'uihâ na wa za oto aima rob'ui'éré na 'rãsutu za'ra wa'wa, ĩnhib'rata na te ãma asawi za'ra wa'aba zéb da hã.

²² Wanhib'apito zawi'õ'wa norĩ ma, 'Re ihâimana u'âsi mono hã, rowẽ'õ te te tãma 're apisutu mono za. Wanhib'apito, apâ we aimorĩ su'u za.

²³ Wanhib'apito Zezusihi ma, wa ai'ãma tãma 're ĩmreme u'âsi za'ra wa'wa, te te 're asawi pese za'ra wa'aba mono wa, te te 're aipawaptob u'âsi za'ra wa'aba mono da.

²⁴ Cristu Zezusihi ãma simisutu oto 're wanomro mono wa, wa asawi na ãma 'rãsutu za'ra wa'wa, ĩma asawi uptabi za'ra wa'aba wa.