1 Corĩtu 15 - ꞌRe Ihâimana Uꞌâsi Mono Zadawa Wasuꞌu

Cristu ihâiwa'utuzé wasu'u

¹ Ĩsisãnawã norĩ, ãne wa za duré ãma aipo're pu'u za'ra wa'wa. Duréihã Zezusihi wasu'uwẽ na, wa tô te aima 're rowasu'u za'ra wa'wa. Taha zarina, ma tô oto asima iwẽ za'ra wa'wa, asiptete sina ãma 're anomro u'âsi aba mono da hã oto.

² Ãhã wasu'uwẽ hã te aima ãma 're iwasu'u za'ra wa'aba mono zé hã, asiptete sina 're sazei utõrĩ za'ra wa'aba mono õ wapsi, te za 'Re ihâimana u'âsi mono te te 're asõ'reptu za'ra wa'aba mono zé hã asina 're i'uwaimrami za'ra wa'aba mo. Tane nherẽ, ãté 'Re ihâimana u'âsi mono, asina 're umnhasi uptabi za'ra wa'aba mono õ wamhã, te te 're i'asõ'reptu za'ra wa'aba mono zé hã asina 're uwaimrami za'ra wa'aba mono õ di za.

^3-4 Zezusihi wasu'uwẽ hã danhipai u ipire uptabi hã, wa tô te aima 're wasu'u za'ra wa'wa, da te ĩma 're irowasu'u za'ra mono zéb zarina. Ãne, Zezusihi wasu'u hã ipire uptabi hã: Cristu hã ma tô, u, wazada dârâ, uburé wawasété na 're iwahâimana za'ra mono norĩ zada. Taha pari, ma tô dasiwi sẽrẽ ni, u, ab're 're. Tawamhã bâdâ maparane ãma si'utõrĩ õ ré, ma tô duré Imama hã, u, hâiwa'utu, 'Re ihâimana u'âsi mono hã. Ãne ma tô tãma tiromhâiba, duréihã 'Re ihâimana u'âsi mono zadawa 'mahârâ'wa norĩ hã ibaihâ na te te ãma irob'ui'éré siromo za'ra zéb zarina.

⁵ Tawamhã Zezusi hã hâiwa'utu pari, Pedruhu ma, ma tô sihâi'ré. Taha pari, ma tô duré tizadawa wasu'u'wa norĩ ma zama sihâi'ré za'ra, 12 na aré isiré 're inomro mono norĩ ma hã.

⁶ Taha parimhã, ma duré tizazei'wa norĩ nho'a sihâi'ré, 500 na ihâiba za'ra norĩ nho'a, aihĩni norĩ siré ta norĩ hã si'ubumroi ré. Ta norĩ hã te zahadu dâ'â ãna 're hâimana za'ra. Ni'wam norĩ si, ma tô tidâ'â za'ra, umro na.

⁷ Taha pari, ma tô duré Tiaguhu ma sihâi'ré. Taha za'u si, ma duré dama isadawa wasu'u'wa da, za daro mono bâ te te isatõrĩ za'ra norĩ ma, sihâi'ré za'ra, uburé te te hâiba pibu za'ra da.

⁸ Ĩma zama, ĩma robduma si, ma tô duré sihâi'ré, Zezusi hã. Ni'wa hã daza'u si poto wa, marĩ iwẽ uptabi hã dasiré te te sina i'uwaimrami õ ne, wa tô wa hã daza'u si Zezusi hã 'madâ, ĩtõmo na, ĩma sihâi'ré wa.

⁹ Wa hã uburé ĩsiré Zezusihi zadawa wasu'u'wa norĩ zapari, wa 're ĩhâimana, tãma ĩwapu za'ra na. E marĩ wa. Te sazei õ ré, wa tô 'Re ihâimana u'âsi mono nhib'a'uwẽ ma, te tãma 're rob'manharĩ wasété u'âsi za'ra. Tahawa, ibâi õ di aré, isadawa wasu'u'wa na, da te 're ĩwaptẽrẽ za'ra mono zé hã.

¹⁰ Tane nherẽ, 'Re ihâimana u'âsi mono hã tinhimizawi pese zéb zarina si, ma tô ĩma tinhopru, tô õhõ na si dama 're ĩhâimana mono da oto, Cristuhu zadawa wasu'u'wa na. E tawamhã, taré ma tô ĩma tinhopru, 'Re ihâimana u'âsi mono hã. Mare di. Wa tô te ĩsina tãma 're uwaimrami u'âsi. Uburé ĩsiré Cristuhu zadawa wasu'u'wa norĩ hã, wa tô romhuri na te 're 'rãnhipai u'âsi za'ra. Tane nherẽ, ĩsi'uihâ na te dama 're romhuri mono õ di. 'Re ihâimana u'âsi mono si, ma tô te te 're ĩpawapto, ãne na te dama 're romhuri mono da, ĩma isõprubzéb zarina si.

¹¹ Ãté, wa hã wa tô aima wasu'u na'rata za'ra wa'wa, Zezusihi wasu'uwẽ hã. Ãté ĩsiré norĩ si ma tô aima wasu'u na'rata za'ra wa'wa. Ãne hã wẽ di, ĩma hã. E marĩ wa. Wa norĩ hã Cristuhu zadawa wasu'u'wa norĩ hã, misire Zezusihi wasu'uwẽ hã wa tô wa te dama 're wasu'u za'ra, tô õhõ si wa. Tô taha wasu'uwẽ si, ma tô oto 're isaze za'ra wa'aba mo, a norĩ wa'wa hã.

'Re dadâ'â za'ra mono nherẽ, apâ 're idahâiwa'utu za'ra mono zé wasu'u

¹² Ãne, wa za duré ãma aima rowasu'u za'ra wa'wa. Ni'wam norĩ hã asiré 're hâimana za'ra wa'aba mono nherẽ, te ãne ta norĩ hã te te sima 're nharĩ za'ra: “'Re dadâ'â za'ra mono wamhã, apâ 're dahâiwa'utu za'ra mono õ di za, niwamhã. Mare uptabi di za.” Ãne te ni'wam norĩ hã te te sima 're nharĩ za'ra. E ãne hã tô sena. Mare di. Cristu hã dâ'â nherẽ, 'Re ihâimana u'âsi mono apâ te te ihâiwa'utu na, sena na, wa te dama 're wasu'u za'ra mono nherẽ, e niha te bété ãne na te te ãma 're rosa'rata upa siroptub za'ra, asiré 're ihâimana za'ra wa'aba mono norĩ hã.

¹³ 'Re dadâ'â za'ra mono nherẽ, apâ idahâiwa'utu za'ra zé hã tô senai õ 'wa'âhã, e marĩ te aré wama wasu'u za'ra. Cristu, apâ ihâiwa'utuzé wasu'u hã, tô senai õ na, te aré tô wama wasu'u za'ra. Ãne hã aré tô, wama za'ra hã aiwa.

¹⁴ Duré, Cristu hã 'Re ihâimana u'âsi mono, sena na te te apâ hâiwa'utu õ 'wa'âhã, aré marĩ dai õ di, Zezusihi wasu'uwẽ, wa te dama 're iwasu'u za'ra mono zé hã. Taré 'wa'âhã, aré marĩ dai õ di duré, Cristuhu ãma 're isasõmri za'ra wa'aba mono zé hã. Taré te aré 're isaze za'ra wa'aba mo, marĩ dai õ nherẽ.

¹⁵ 'Re dadâ'â za'ra mono nherẽ, apâ 're idahâiwa'utu za'ra mono zé hã tô senai õ 'wa'âhã, Cristu hã 'Re ihâimana u'âsi mono, apâ te te ihâiwa'utuzé hã, aré tô senai õ di duré, ãne hã. Senai õ 'wa'âhã, wa norĩ hã wazadawa nhipese na, wa aré taré wa te dama 're wasu'u za'ra 'Re ihâimana u'âsi mono hã, Cristu apâ te te ihâiwa'utuzém na, wa te dama 're rowasu'u u'âsi za'ra mono wa. Tarére aré tô, dama wanhimirowasu'u za'ra hã.

¹⁶ 'Re dadâ'â za'ra mono nherẽ, apâ idahâiwa'utu za'ra zéb da hã tô senai õ 'wa'âhã, Cristu, apâ ihâiwa'utuzé wasu'u hã, tô senai õ na te aré wama wasu'u za'ra tô.

¹⁷ Duré, 'Re ihâimana u'âsi mono hã Cristu apâ te te ihâiwa'utuzé hã tô senai õ 'wa'âhã, aré tarére, Cristuhu ãma 're isasõmri za'ra wa'aba mono zé hã, aiwasété wa, asada idâ'â aba zém na, 're isaze za'ra wa'aba mono zé hã. Ihâiwa'utuzé hã senai õ 'wa'âhã, 'Re ihâimana u'âsi mono te te siwi 're aiwẽ'õ pese za'ra wa'aba mono haré, te aré tô zahadu aiwasété ré, 're anomro u'âsi aba mo, õne haré, aiwasédé hã te te aima 're pari za'ra wa'aba mono ãna.

¹⁸ Duré, Cristuhu hâiwa'utuzé hã senai õ 'wa'âhã, uburé isazei'wa, 're idâ'â za'ra mono norĩ hã te aré ipẽ'ẽ 're, dâ'â u'âsi 're hâimana za'ra, 'Re ihâimana u'âsi mono nhiti.

¹⁹ Cristu hã apâ hâiwa'utu õ 'wa'âhã, tô ibâre te aré wa'ãma 're dapẽ'ẽzé uptabi za'ra, wasiré isazei'wa 're iwahâimana za'ra mono norĩ ãma hã. E marĩ wa. Marĩ dai õ wa aré, wa te ãma 're isasõmri za'ra mono zé hã, marĩ da ne, wa te 're saze za'ra mono wa, ti'ab ré.

²⁰ Tazahã, 'Re ihâimana u'âsi mono hã ma tô apâ hâiwa'utu tô sena, Cristu hã. E marĩ te tawamhã, wama wasu'u za'ra, Cristu apâ ihâiwa'utuzé hã. Niwapsi uburé isazei'wa 're idâ'â za'ra mono norĩ hã, tô sena za apâ 'Re ihâimana u'âsi mono te te ihâiwa'utu za'ra zé, te wama wasu'u za'ra. Taréi õ di, ã hã.

^21-22 Duréihã aibâ hã ma tô tiwasété 'rata, Adã na isisi hã. Taha nhirã na, te oto dadâ'âzé hã uburé dama 're hâimana za'ra. E marĩ wa. Taha nhihudu si, 're dahâimana za'ra mono wa. Tane duré, aibâ marĩ iwẽ hã te te i'manharĩzéb zarina, te oto dahâiwa'utuzé hã dama 're hâimana za'ra, aiwab zahuré, ãne na hã. Cristu na isisi hã. Taha ãma si 're inomro mono ma, te za dahâiwa'utuzé hã tãma 're hâimana za'ra, õne u'âsi.

²³ Cristu hã ma tô tihâiwa'utu na'rata. Niwa ti'ai u, za we apâ dazô morĩ wapsi, te za isib'a'uwẽ norĩ hã tihâiwa'utu za'ra.

^24-25 Tawapsi, te za oto rob'rãsutuzé hã iwa waptãrã. Tawapsi te za uburé dama ipire norĩ nhiptetezé hã tiwi a'uprosi Cristu hã, ti'ai ãma uburé dama roti'wa norĩ wi hã, hâiwa nhirõtõ na uburé ihâiba'õ norĩ wib zama. 'Re ihâimana u'âsi mono hã uburé tinhitob'ru norĩ ãma te te i'ai'utézéb u si, te za Cristu hã te te 're da'ab'madâ'â, pire na. Taha parip si, te za oto Timama ma isib'a'uwẽ hã sõmri za'ra, õhõ si te te 're ab'madâ'â u'âsi mono da oto, pire uptabi na.

²⁶ Dadâ'âzé hã te dazada 're hâimana. Ta hã te za oto Cristu hã uprosi pese, da'rãsutu ãma hã.

²⁷ Duréihã apito Dawi hã ma tô ãne na ãma rob'ui'éré siro, Cristuhu ãma: “Ta hã ma tô 'Re ihâimana u'âsi mono hã pisutu, uburé marĩ hã pire na te te 're ab'madâ'â mono da, siwaprosi.” E tawamhã, pire na dama 're ihâimana mono zéb da, Cristuhu pisutu'wai ma zama, te za pire na tãma 're hâimana, 'Re ihâimana u'âsi mono ma. Mare di. Taha ma zama, te te wasu'u õ di, ãne hã. Tizapari'wai ma si, ma tô pisutu, 'Re ihâimana u'âsi mono hã. Ãhã wasu'u hã wama pibui pese za'ra di oto.

²⁸ 'Re ihâimana u'âsi mono hã te za te te 're da'apisutu, Cristuhu nhimi'madâ'â si oto 're dahâimana za'ra mono da. Tawapsi, te za oto ti'ra hã pisutu 'Re ihâimana u'âsi mono hã, isapari 're hâimana mono da oto, Imama si te te oto 're da'ab'madâ'â u'âsi mono da, danhipai u dama pire uptabi na.

²⁹ Ãne, wa za duré aima ãma rowasu'u za'ra wa'wa, za idahâiwa'utu za'ra zé wasu'u na hã. Ni'wam norĩ hã asiré 're ihâimana za'ra wa'aba mono norĩ hã ma tô â dawabzuri hã da te tãma 're 'manharĩ za'ra, isazei'wa norĩ, â dawabzuri da te tãma 're 'manharĩ za'ra mono õ ré, 're idâ'â za'ra mono norĩ upana, isazei'wa norĩ zu hâiwa'utu za'ra da. E marĩ da, ma tô bété ta norĩ hã ãne hã te te 're 'manharĩ za'ra, dahâiwa'utuzé wasu'u hã te te 're sazei uptabi za'ra mono õ nherẽ. Ãne wamhã, e tô i'uwaibaba, aima za'ra wa'aba hã.

³⁰ Wa norĩ hã bété, Cristuhu ma, wa te 're iromhuri pese za'ra mono norĩ hã. Wama romnhimimnhasi na, wa 're wahâimana u'âsi za'ra bâtâ sidâpâsi, iwasu'uwẽ hã wa te dama 're wasu'u za'ra mono 'ru te, niha da te wama 're rob'manharĩ za'ra mono õ'umnhasite, da te 're iwa'ruiwapari za'ra mono zéb zarina. Tawamhã dahâiwa'utuzé wasu'u hã senai õ 'wa'âhã, e marĩ da, wa aré bété wa te tãma 're romhuri za'ra Cristuhu ma hã, wama romnhimimnhasi uptabi za'ra nherẽ. Marĩ dai õ di tô aré, tãma wanhimiromhuri za'ra zé hã.

³¹ Ĩsisãnawã norĩ, awẽ sidâpâsi aré 're ĩdâ'â u'âsi mono nherẽ, wa tô te dama 're rowasu'u u'âsi, iwasu'uwẽ na. Wa norĩ hã Wanhib'apito Cristu Zezusihi ãma simisutu oto 're wanomro mono wa, tô sena aima 're ĩtoi uptabi za'ra wa'aba mono zéb zarina, wa tô sena na aima ĩsiwasu'u za'ra wa'wa, ãne na hã.

³² Éfézu ãma, ni'wam norĩ hã ma tô ĩzada tihâimana wasété za'ra, robzahi hã dazô 're iwairébé mono ne. Ta norĩ 'rata, ĩhâimana ré hã, ĩma romnhimimnhasi uptabi di, te te siwi ĩwĩrĩ da newa. Tawamhã dahâiwa'utuzé wasu'u hã taré wamhã, e sena aré ĩnhimiromhuri hã, Cristuhu ma hã, ĩma romnhimimnhasi nherẽ, te tãma romhuri wamhã aré. Ãne hã i'uwaibaba õ di tô aré, ĩma hã. Tarére aré, te 're iromhuri mono zé hã. Dahâiwa'utuzé wasu'u hã tô senai õ 'wa'âhã, ti'ai ãma 're wahâiba si'utõrĩ pese za'ra mono 'wa'âhã, i'uwaibaba wa aré danhimiroti wasété na, wa te da'ãma 're sasõmri za'ra. Ãne danhimiroti wasédé hã: “Ãté romhutu na, wa za wasi'utõrĩ. Ãté awẽm na niha wamhã. Tahawa, ãhã na hã watozém na si siwa'ru wato za'ra wa'aba, wanhirõiwi da, wasazém na, duré âzé na.” Ãne wamhã, wa aré tô ibâre, wa te da'ãma 're sasõmri za'ra, dahâiwa'utuzé wasu'u hã tô senai õ 'wa'âhã.

³³ Ãne wa, te za dawi 're asi'madâ'â pese za'ra wa'aba mo, danhimiroti wasédé hã tô sena newa, da'ãma 're sasõmri za'ra wa'aba mono tõ da. Taha na da'ãma 're sasõmri za'ra wa'aba mono wamhã, ta norĩ ne te za oto 're aihâimana wasété za'ra wa'aba mo.

³⁴ Ni'wam norĩ hã asiré 're ihâimana za'ra wa'aba mono norĩ hã 'Re ihâimana u'âsi mono hã 'râwi te te 're waihu'u za'ra mono õ di. E ãne na 're siséb za'ra mono ãna. Asimiza'rese ãna 're aihâimana za'ra wa'aba mono zém hawi, te za oto aipizari za'ra wa'wa, aiwasédé hã rẽme pese za'ra wa'aba da, aiwẽ uptabi na si 're anomro aba mono da oto.

'Re ihâimana u'âsi mono hã za te te da'ahâiwa'utu wa, dahâiba té wasu'u

³⁵ Ãté ni'wam norĩ hã asiré 're aihâimana za'ra wa'aba mono norĩ hã te za ãne 're sisadanharĩ za'ra: “E niha te za merẽ 'Re ihâimana u'âsi mono hã da'ahâiwa'utu. 'Re dadâ'â za'ra mono wa, 're dahâiba si'utõrĩ pese za'ra mono nherẽ, e niha te za merẽ ãne nherẽ, apâ da'ahâiwa'utu.”

³⁶ E niha te asimirosa'rata waihu'u ãna, ãne na 're i'upa za'ra wa'aba mo. Amnho potozém na, wa za pé aima ãma simiré'é za'ra wa'wa, waihu'u za'ra wa'aba da. Amnho hã da te 're zuri mono wamhã, itomhâ 're si'utõrĩ mono õ nherẽ, 're 'wanhipré za'ra mono õ di.

³⁷ Duré, trigu 'rã hã da te 're zuri mono wamhã, duré aimawi amnho hã da te 're zuri mono wamhã, e iteihi zama te za isu da te 're zuri. Mare di. Inhama uptabi si te za da te 're zuri, pibui pese na 're poto za'ra mono da, amnho hã.

³⁸ Amnho hã da te 're zuri mono wamhã, 'Re ihâimana u'âsi mono hã te te i'aropoto mono hawim haré, te te sima 're i'apisutu mono zéb zarina si, te za dama 're 'wanhipré wairébé, sipu'u pese na.

³⁹ Duré, ti'ai ãma uburé hâiba ré 're ihâimana za'ra mono hã aiwapsi õ di. A'uwẽ hâiba hã aimawi. Duré abaze norĩ hâiba hã aimawi. Duré pe'a norĩ hâiba hã, aimawi. Duré si norĩ hâiba hã aimawi.

⁴⁰ Duré, hâiwa ãma 're ihâimana za'ra mono norĩ hâiba hã aiwab õ di, ti'ai ãma 're idahâimana za'ra mono norĩ hâiba ne hã. Hâiwa ãma si, dahâiba hã wẽ uptabi di. Duré 'madâ'â zei uptabi di. Ti'ai ãma dahâiba hã wẽ nherẽ, duré 'madâ'â ze nherẽ, aiwab õ di, hâiwa ãma dahâiba ne hã.

⁴¹ Bâdâ hã bété. Ta hã 'madâ'â ze ti. Wẽ uptabi di. A'amo hã 'madâ'â zei uptabi di duré. Uburé wasi hã hâiwa na 're isimasa mono hã, 'madâ'â ze ti duré. Tane nherẽ, uburé aiwapsi 're hâimana za'ra mono õ di, i'madâ'â ze da hã. Duré uburé wasi norĩ hã aiwapsi 're simasa mono õ di, i'madâ'â ze da hã.

⁴² Tane duré, za niwa 'Re ihâimana u'âsi mono te te ida'ahâiwa'utuzé hã. Amnho hã da te 're zuri mono wamhã, itomhâ 're si'utõrĩ mono wapsi, te za 're 'wanhipré za'ra. Tane duré, ti'ab ré, 're dadâ'â za'ra mono pari, ab're 're, da te oto 're danheme mono wamhã, te za tô 're dahâiba si'utõrĩ za'ra. Tane nherẽ, 'Re ihâimana u'âsi mono te te oto da'ahâiwa'utu wamhã, dahâiba hã aiwa dama 're hâimana za'ra mono õ di za oto. 'Re dahâiba si'utõrĩ za'ra mono ãna, te za oto iré 're dahâimana u'âsi za'ra, õne u'âsi.

⁴³ 'Re dadâ'â za'ra mono wa, dahâiba hã ab're 're, da te 're séme mono wamhã, wasété uptabi di, dahâiba hã. Duré, marĩ hã te te 'manharĩ waihu'u õ di dahâiba hã, marĩ dai õ wa oto. Tane nherẽ, 'Re ihâimana u'âsi mono hã te te oto da'ahâiwa'utu wamhã, dahâiba hã wẽ uptabi di za oto. 'Madâ'â zei uptabi di za duré. Tawapsi, danhiptete uptabi na te za iré 're dahâimana u'âsi za'ra oto.

⁴⁴ 'Re dadâ'â za'ra mono wa, dahâiba hã ab're 're, da te 're iséme mono hã, ti'ai ãma ré hã, dahâiba si, danhi ré si, duré dahi ré si. Tazahã 'Re ihâimana u'âsi mono hã za te te da'ahâiwa'utu wamhã, dahâiba aimawi ré, te za oto 're dahâimana za'ra, Ipẽ'ẽzani nhimipisutuzéb zarina. Ti'ab ré, te tô dahâiba na 're dahâimana za'ra. Taha zarina, te duré hâiwa ãma dahâiba aimawi ré 're dahâimana za'ra, 'Re ihâimana u'âsi mono pẽ'ẽzani nhimipisutuzéb zarina.

⁴⁵ Duréihã Mozési hã ma tô ãne na ãma rob'ui'éré: “'Re ihâimana u'âsi mono hã ma tô aibâ hã poto 'rata, Adã na isisi hã. A'uwẽ hâiba na 're morĩ da, ma tô poto 'rata tô.” Tane nherẽ, Adãhã ne te tô 're hâimana, 'Re ihâimana u'âsi mono 'rata, dadâ'â ãna 're danomro mono da, te te dama 're i'apisutu mono hã, Ipẽ'ẽzani nhimipisutuzéb zarina. Ta hã Zezusi.

⁴⁶ E tawamhã hâiwa ãma hã dahâiba aimawi ré, ma tô 're dahâimana na'rata za'ra. Mare di. Ti'ai ãma dahâibazém na, te tô a'â iré 're dahâimana na'rata za'ra, ti'ai ãma ré hã. Niwapsi te za hâiwa ãma dahâiba iwẽ uptabi ré si 're dahâimana za'ra.

⁴⁷ Duréihã te te dama i'manharĩ 'rada hã aibâ na ma tô ti'a na 'manha, 'Re ihâimana u'âsi mono hã. Tane nherẽ, taha uirĩ na si, ma tô aibâ aimawi hã wei mo hâiwa hawimhã, ti'ai u, Adãhã ma ipire uptabi hã, duré iwẽ uptabi hã.

⁴⁸ Uburé ti'ai ãma 're idahâimana za'ra mono norĩ hã te Adãhã hâiba ne, iré 're dahâimana za'ra, ti'ai 'manharĩ na ihâiba 'manharĩ na'rata ne ré. Tane nherẽ, ni'wam norĩ si hâiwa ãma za 're ihâimana za'ra mono norĩ si, te za hâiwa ãma 're imorĩ hâiba ne ré 're hâimana u'âsi za'ra, tô Cristuhu hâiba 'manharĩ sine ré.

⁴⁹ Wa norĩ hã, aibâ ti'ai 'manharĩ na ihâiba na'rata ne ré, wa ti'ab ré iré 're wahâimana za'ra. Tane, wa za duré niwapsi hâiwa hawi we imorĩ hâiba ne iré 're wahâimana u'âsi za'ra. Tahawa, wa za oto isine 're wahâimana u'âsi za'ra, õne u'âsi.

⁵⁰ Ĩsisãnawã norĩ, ãne wa za aima ãma waihu'u za'ra wa'wa, sena na. Ti'ai ãma ré wahâiba hã wanhi ré hã duré wawaprui ré hã, taha ré, hâiwa u iré 're wanhisisi waihu'u mono õ di za, 'Re ihâimana u'âsi mono hã da'ãma 're isib'a'uwẽ mono zéb u hã. E marĩ wa. Ti'ai ãma ré wahâiba hã za wawi 're isi'utõrĩ za'ra mono hã, hâiwa ãma iré 're wahâimana waihu'u za'ra mono õ di za oto, 'Re ihâimana u'âsi mono 'rata iré 're iwahâimana u'âsi za'ra mono zéb da hã.

^51-52 Marĩ hã aré dama iwaihu'u'õ hã wa za oto aima wasu'u hâi'ré za'ra wa'wa, sõ'awi. Ma'ãpé ĩwapari pese za'ra wa'aba za. Wa norĩ hã Zezusihi zazei'wa norĩ hã, ti'ab ré uburé wasi'utõrĩ siromo õ di za, rob'rãsutuzé wana hã. Rob'rãsudu hã oto iwa iwaptã'ãzé waihu'uzéb da, danhimnhihârâzé da'rãsutu'wa, da te oto wapari za'ra wamhã, uburé ti'ai ãma zahadu wahâiba ré 're iwanomro mono norĩ hã, wa za awa'awi wahâiba na saprĩ za'ra ni, waptu na 're idatõmo si'rãmi za'ra mono ne. Danhimnhihârâ hã da te wapari za'ra wi, ni'wam norĩ isazei'wa dawana 're idâ'â za'ra mono hã te za apâ ahâiwa'utu, dâ'â ãna oto 're hâimana u'âsi za'ra mono da, ihâiba tiwi 're si'utõrĩ waihu'u za'ra mono ãna. Tawamhã wa norĩ zama wahâiba ré 're iwanomro mono norĩ hã, wa za duré wahâiba itém na isi'utõrĩ'õ na saprĩ za'ra ni.

⁵³ Ti'ai ãma ré hã, wahâiba hã si'utõrĩ pese di. Tane nherẽ, wa za tô niwapsi wahâiba itém na saprĩ za'ra ni, za oto wawi 're isi'utõrĩ waihu'u za'ra mono õ, u hã, iré 're wahâimana u'âsi za'ra mono da oto, õne u'âsi.

^54-55 Ãne hã niwa za wama romhâimana za'ra wamhã, 'Re ihâimana u'âsi mono zadawa 'mahârâ 'rata 'wa norĩ hã duréihã te te ãma irob'ui'éré siromo zahuré zéb zarina, te za tô wama ãma uwaimrami za'ra, 'Re ihâimana u'âsi mono hã, za apâ iwahâiwa'utu za'ra zém na hã. Ãne duréihã ãma irob'ui'éré siro hã: “'Re idadâ'â za'ra mono zém na, te za 'Re ihâimana u'âsi mono hã ãma ai'uté. Te za uprosi pese oto. 'Re idadâ'â za'ra mono zé hã, e mahãta tawamhã te te da'ãma i'ai'uté za'ra zéb da hã. Mare di oto. Baba uptabi di. Duré, e mahãta te isiptetezé hã tãma 're hâimana oto, te te ãma 're ida'a'uprosi mono zéb da hã, apa'apa 'wa nhi'oto nhipsari ne hã. Mare uptabi di oto, tãma hã.”

⁵⁶ E marĩ wa, ma tô aré 're iwadâ'â za'ra mono zé hã siptete na wazada 're hâimana za'ra. Wawasété na 're iwanomro mono zéb zarina, ma tô aré tô siptete na wazada 're hâimana za'ra, te te 're iwa'a'uprosi mono zéb da hã. Duré 'Re ihâimana u'âsi mono nhimiroti na Mozési te te ãma irob'ui'érézéb zarina, 're wanomro wẽ mono õ wa, ma tô aré te te siwi 're wa'awẽ'õ pese, 'Re ihâimana u'âsi mono hã.

⁵⁷ Tane nherẽ, 'Re ihâimana u'âsi mono ãma si, 're wawata u'âsi za'ra wa'aba mono za. E marĩ wa. Õhõ si, ma tô 're iwadâ'â za'ra mono zém na hã wama ãma ai'uté za'ra, Wanhib'apito Zezu Cristuhu si, iwẽ uptabi hã te te wazada i'manharĩzém na hã.

⁵⁸ Ĩsisãnawã norĩ, ĩma asawi pese za'ra wa'aba norĩ hã, tahawa, te za asiptete u'âsi Cristuhu ãma si 're anomro aba mo, tiwi 're aipizari za'ra wa'aba mono ãna. Wanhib'apito ma, 're iromhuri za'ra wa'aba mono zé hã taréi õ di. Ãne na asina waihu'u za'ra wa'aba wa, te za tãma 're iromhuri pese u'âsi za'ra wa'aba mo, asimi'ẽ na.