1 Corĩtu 14 - ꞌRe Ihâimana Uꞌâsi Mono Zadawa Wasuꞌu

Damreme dama iwaihu'u'õ na, 'Re ihâimana u'âsi mono, da te dasima 're isadawa wasu'u za'ra mono zé wasu'u

¹ Asimizawi pese na 're aihâimana za'ra wa'aba mono zéb zô si, te za uburé dama 're iromhuri za'ra wa'aba mono zém nhipai u, asima sô 're irob'ruiwapari u'âsi za'ra wa'aba mo, iwẽ uptabi zô si. Tane nherẽ, 'Re ihâimana u'âsi mono pẽ'ẽzani, romhuri hã sipu'u pese na, isazei'wa norĩ ma, ãma 're sipawaptob za'ra mono da, te te tãma 're i'apisutu mono zéb zô zama hã, te za duré asima sô 're irob'ruiwapari u'âsi za'ra wa'aba mo. E marĩ ipire uptabi zô, te za tawamhã, asima sô 're irob'ruiwapari u'âsi za'ra wa'aba mo. 'Re ihâimana u'âsi mono zadawa wasu'u na, sena na isazei'wa norĩ ma, da te 're irowasu'u za'ra mono zéb zô si, te za asima 're irob'ruiwapari u'âsi za'ra wa'aba mo, iwẽ uptabi zô si.

² Ni'wam norĩ hã timreme nai õ nherẽ, damreme dama iwaihu'u'õ na te te dama ãma 're rowasu'u za'ra mono wamhã, 'Re ihâimana u'âsi mono ma si, mreme pibui pese za'ra di za, ta norĩ nhimirowasu'u hã damreme dama iwaihu'u'õ na hã. Ta norĩ hã te te dama ãma 're rowasu'u za'ra mono wamhã, taré te za da te 're wapari za'ra, dama sadaihu'u za'ra õ wa, 'Re ihâimana u'âsi mono pẽ'ẽzani nhimipawaptobzéb zarina, marĩ dama iwaihu'u'õ na si, 're mreme zusi mono wa, ta norĩ hã.

³ Tane nherẽ, ni'wam norĩ hã damreme uwaibaba, 'Re ihâimana u'âsi mono zadawa wasu'u na, sena na isazei'wa norĩ ma, te te ãma 're rowasu'u za'ra mono wamhã, taha na si te za isazei'wa norĩ hã 're sipawaptob u'âsi za'ra, Wanhib'apito ãma siptete sina 're nomro mono da, pẽ'ẽ wẽ na. Taha zarina si, te za duré tãma 're rowẽ wairébé apâ, tiwi 're irobzei'õ za'ra mono zém hawimhã.

⁴ Ni'wa hã simreme nai õ nherẽ, damreme dama iwaihu'u'õ na te te dama rowasu'u wamhã, 'râwip si te ta hã ãma sipawapto, Wanhib'apito ãma siptete na 're hâimana u'âsi mono da. Te te ãma dapawapto waihu'u õ di za, dama sadaihu'u õ wa. Tane nherẽ, ni'wa hã damreme uwaibaba, 'Re ihâimana u'âsi mono zadawa wasu'u na isazei'wa norĩ ma, te te rowasu'u wamhã, aihĩni te za wapari waihu'u za'ra, taha zarina oto ãma 're sipawaptob za'ra mono da, Wanhib'apito ãma ta norĩ hã siptete sina ãma 're hâimana za'ra mono da oto.

⁵ Wa hã wa tô ĩsima te 're aiwẽ za'ra wa'wa, uburé aimreme aba nai õ nherẽ, 'Re ihâimana u'âsi mono hã dama 're sadawa wasu'u za'ra wa'aba mono da, damreme dama iwaihu'u'õ na hã. Tane nherẽ, taha nhipai u, wa tô duré te ĩsima 're aiwẽ uptabi za'ra wa'wa, 'Re ihâimana u'âsi mono zadawa wasu'u na damreme uwaibaba si, dama 're rowasu'u za'ra wa'aba mono da. E marĩ wa. 'Re ihâimana u'âsi mono zadawa wasu'u na damreme uwaibaba, te te dama 're irowasu'u za'ra mono norĩ si, te za danhipai u pire na 're hâimana za'ra, isazei'wa norĩ ma. Ni'wam norĩ hã timreme nai õ nherẽ, damreme dama iwaihu'u'õ na, 'Re ihâimana u'âsi mono te te dama 're sadawa wasu'u za'ra mono pari, ta norĩ nhimirowasu'u nhipai u, sõ'awi da te oto dama 're wasu'u pese za'ra mono wapsi, tawapsi te za oto damreme dama iwaihu'u'õ na dama isadawa wasu'u'wa norĩ hã pire na 're hâimana za'ra, aiwa 'Re ihâimana u'âsi mono zadawa wasu'u na damreme uwaibaba, te te dama 're irowasu'u za'ra mono norĩ me. Tawapsi te za oto isazei'wa norĩ hã ãma 're sipawaptob u'âsi za'ra, siptete sina Wanhib'apito ãma 're nomro u'âsi mono da, ta norĩ hã.

⁶ Ĩsisãnawã norĩ, ãne wa za oto aima ãma rowasu'u za'ra wa'wa. Niwapsi wa za ãma atẽme ĩmorĩ 'wa, te aipawaptob za'ra wa'aba da. Tawamhã atẽme ãma ĩmorĩ aba wamhã, duré damreme dama iwaihu'u'õ na si, 'Re ihâimana u'âsi mono te aima sadawa wasu'u za'ra wa'aba wamhã, e tô i'uwaibaba, wa aré ãma aipawapto wẽ za'ra wa'wa. Mare di. Marĩ dai õ di aré ta hã, damreme dama iwaihu'u'õ na te aima isadawa wasu'u za'ra wa'aba zé hã. Aimreme aba na, te aima ãma rowasu'u za'ra wa'aba wapsi, te aré ĩwapari waihu'u za'ra wa'wa, 'râwi oto ãma 're asipawaptob za'ra wa'aba mono da hã, marĩ dama iwaihu'u'õ na 'Re ihâimana u'âsi mono te te ĩma iwaihu'uzém na hã, duré 'râwi 'Re ihâimana u'âsi mono nhimiroti te iwaihu'u na hã, duré 'Re ihâimana u'âsi mono zadawa wasu'u na hã, duré isazei'wa norĩ hâimanazém na roti na hã.

⁷ Ãne, wa za duré aima ãma romnhimiré'é za'ra wa'wa, iwaihu'u za'ra wa'aba zéb da hã. Danhimnhihârâzé isurure hã ãma 're danhimnhihãsi mono wamhã, iwapari pibui pese na ãma 're danhimnhihãsi mono õ nherẽ, da te 're wapari waihu'u za'ra mono õ di, danhimnhihârâzé hã. Duré, rowamremezé hã da te ãma 're rowamreme za'ra mono wamhã, iwapari pibui pese na, da te ãma 're rowamreme za'ra mono õ nherẽ, da te 're wapari waihu'u za'ra mono õ di, rowamremezé hã.

⁸ Duré da'wapéi'wa norĩ zô, danhimnhihârâzém na 're danhimnhihãsi mono wamhã, e siwa'ru sô 're danhimnhihãsi mono nherẽ, te za dasi'wapé da hã, sima 're sipese za'ra, da'wapéi'wa norĩ hã. Mare di.

⁹ Tane duré, a norĩ wa'wa hã damreme dama iwaihu'u'õ na si, dama 're rowasu'u za'ra wa'aba mono wamhã, e niha te za da te ãma 're asadaihu'u za'ra wa'wa, da te ãma 're aiwapari waihu'u za'ra wa'aba mono da hã. Da te ãma 're asadaihu'u za'ra wa'aba mono õ di za tô. Asimirowasu'u za'ra wa'aba na hã, rowa'u'u si te za taré te te ãma 're ropé za'ra, nimomomhã.

¹⁰ Daro mono bâ, te tô damreme mono bâ ahâ uptabi na dama 're hâimana za'ra, 'râwi ãma 're idasisadaihu'u za'ra mono zéb da hã, dasimremezém na.

¹¹ Tane nherẽ, ni'wa hã damreme ĩma iwaihu'u'õ na, te te ĩma rowasu'u wamhã, ĩsiré a'uwẽ'õ na, wa za ĩsina waihu'u, ĩma sadaihu'u õ wa. Duré wa hã isiré a'uwẽ'õ na, te za duré sina ĩwaihu'u, tãma ĩzadaihu'u õ wa. Tane duré, ni'wam norĩ hã timreme nai õ nherẽ, damreme dama iwaihu'u'õ na, 'Re ihâimana u'âsi mono te te dama 're sadawa wasu'u za'ra mono wamhã, da te ãma 're sadaihu'u za'ra mono õ di za. Taré te za da te 're wapari za'ra, dama sadaihu'u za'ra õ wa, ta norĩ hã.

¹² A norĩ wa'wa hã bété. Ma tô sô 're asõpré u'âsi aba mo, 'Re ihâimana u'âsi mono Tipẽ'ẽzani na hã, romhuri mono bâ te te aima 're ipisutu za'ra wa'aba mono zéb zô, ãma 're asipawaptob za'ra wa'aba mono zéb da hã. Romhuri hã õhõ si 're hâimana za'ra mono õ di, ipire uptabi na hã. Sisarina si õ di, romhuri hã. Tahawa, romhuri iwẽ uptabi zô si, te za asima 're irob'ruiwapari u'âsi za'ra wa'aba mo, ãma 're asipawaptob za'ra wa'aba mono zéb da, Wanhib'apito ãma asiptete sina 're anomro u'âsi aba mono da, taha ãma si.

¹³ Tahawa, ni'wam norĩ hã timreme nai õ nherẽ, damreme dama iwaihu'u'õ na, 'Re ihâimana u'âsi mono te te dama 're sadawa wasu'u za'ra mono wamhã, ta norĩ hã te za duré te te tiwi 're rowaptẽrẽ za'ra, Ipẽ'ẽzani si romhuri te te tãma 're pisutu pese za'ra mono da, ta norĩ ma hã, damreme dama iwaihu'u'õ na 'Re ihâimana u'âsi mono zadawa wasu'u hã, sõ'awi te te oto dama 're wasu'u pese za'ra mono da.

¹⁴ Wasiré isazei'wa norĩ hã 're wasi'rã'õtõ mono wamhã, wa hã damreme ĩma waihu'u õ nherẽ, 'Re ihâimana u'âsi mono ma, ãma 're ĩmreme mono wamhã, te ãma 're rosa'rata waihu'u mono õ di, ĩma waihu'u pese õ wa. 'Râwi ĩpẽ'ẽ na si, wa tãma 're ĩmreme.

¹⁵ E niha tawamhã, i'uwaibaba si te 're i'manharĩ mono zéb da hã. Ĩpẽ'ẽ na, wa za tô tãma 're ĩmreme 'râwi, damreme ĩma iwaihu'u'õ na hã. Tane nherẽ, wa za duré wamremezém na tãma 're ĩmreme, te ãma 're irosa'rata pibui pese mono zéb da hã. Duré wasiré isazei'wa norĩ siré 're ĩnho're mono wamhã, wa za tô 'râwi ĩpẽ'ẽ na 're ĩnho're, damreme ĩma iwaihu'u'õ na hã. Tane nherẽ, taha nhipai u, wa za duré wamremezém na 're ĩnho're, te ãma 're irosa'rata pibui pese mono zéb da hã. Tahawa, ãne te za duré a norĩ wa'wa hã 're i'manharĩ za'ra wa'aba mo.

¹⁶ A norĩ wa'wa hã asiré 're asi'rã'õtõ aba mono wamhã, ãté te za aipẽ'ẽ na si 'Re ihâimana u'âsi mono ãma 're aiwata za'ra wa'aba mo, damreme dama iwaihu'u'õ na si, tãma 're aimreme zusi aba mono ré. Ãne wamhã, e niha te za aiwapari'wa norĩ hã ãma 're aiwata za'ra wa'aba mono zém na, te te 're ai'uzei pese za'ra wa'wa, aimreme na te te 're asadaihu'u za'ra wa'aba mono õ nherẽ, ta norĩ hã.

¹⁷ Ãne hã 'Re ihâimana u'âsi mono ãma 're aiwata za'ra wa'aba mono zé hã wẽ nherẽ, tane nherẽ, asiré 're asi'rã'õtõ aba mono norĩ hã ãma 're sipawapto waihu'u za'ra mono õ di, siptete sina Wanhib'apito ãma 're inomro u'âsi mono zéb da hã.

¹⁸ Wa hã ĩsiwaprosi, wa asipai u wa'aba, damreme ĩma iwaihu'u'õ na 're ĩmreme u'âsi. Taha zarina, wa duré 'Re ihâimana u'âsi mono ãma 're ĩwata u'âsi.

¹⁹ Tane nherẽ, wasiré isazei'wa norĩ 're wasi'rã'õtõ mono ré, damreme dama iwaihu'u'õ na, ĩnhimirowasu'u hâ na te dama 're rowasu'u mono wamhã, e aré ibâ ãne hã, ãma 're idasipawaptob za'ra mono da hã. Mare di. Aré ibâi õ di, ĩma hã. Ĩnhimirowasu'u 'rutu na nherẽ, damreme dama isadaihu'u pese na te dama 're rowasu'u mono wapsi, aré iwẽ ĩma hã, 'Re ihâimana u'âsi mono nhimiroti na te dama ãma 're i'aroti mono zé hã.

²⁰ Ĩsisãnawã norĩ, ai'uté norĩ hã siwa'ru te te sima 're irosa'rata za'ra mono ne, asima ãma 're rosa'rata za'ra wa'aba mono õ di za, te aima ãma irowasu'u za'ra wa'aba zém na hã. Duré ai'utépré norĩ hã tiwasédé te te 're i'manharĩ za'ra mono õ ne, te za aiwasété ãna 're anomro aba mo. Aihâimana prédub sina, te za asima ãma 're irosa'rata u'âsi za'ra wa'aba mo.

²¹ Duréihã 'Re ihâimana u'âsi mono zadawa 'mahârâ'wa hã ma tô ãne na ãma rob'ui'éré, 'Re ihâimana u'âsi mono mreme na hã: “Darob amoi hawi te za ĩnhib'a'uwẽ norĩ ma, da te 're ĩzadawa wasu'u za'ra, dasimremezém na, ĩnhib'a'uwẽ norĩ ma, damreme tãma isa'rese'õ za'ra na. Tane nherẽ, ĩnhib'a'uwẽ norĩ hã te te 're ĩwapari za'ra mono õ di za, po're ãna 're nomro u'âsi mono wa, ta norĩ hã.”

²² Tahawa, damreme dama iwaihu'u'õ na 'Re ihâimana u'âsi mono, da te dasima 're isadawa wasu'u za'ra mono zé, isazei'õ'wa norĩ ma ropibu ma, ta norĩ hã 'Re ihâimana u'âsi mono waihu'u pe hã te te 're iwaihu'u za'ra mono zéb da hã. Isazei'wa norĩ ma, rowasu'uzéb dai õ di, ã hã. Tane nherẽ, damreme uwaibaba, dama iwaihu'u pese na ni'wam norĩ hã 'Re ihâimana u'âsi mono te te dama 're isadawa wasu'u za'ra mono zé hã, isazei'wa norĩ ma ropibu ma, 'Re ihâimana u'âsi mono za iwẽ na tãma 're isõprub za'ra mono zém na, te te sina 're iwaihu'u siromo za'ra mono zéb da hã, ã hã. Isazei'õ'wa norĩ ma, rowasu'uzéb dai õ di, ã hã.

²³ Ãté asiré isazei'wa norĩ me, te za asiré asi'rã'õtõ 'wa, uburé. Tawamhã ãté te za damreme aima iwaihu'u aba õ na, ai'ahâ wa'aba na asima irowasu'u za'ra wa'wa. Tawamhã ãté tane ré, te za isazei'õ'wa norĩ hã, atẽme za'ra wa'aba asisi, isazei'wai hâimanazé, te te waihu'u za'ra õ nherẽ, te te aiwapari za'ra wa'aba da. Ãne wamhã, e niha te za õ norĩ hã ai'ãma rosa'rata za'ra wa'wa. Ãté te za ai'ãma rosa'rata wasété za'ra wa'wa, ai'rã siwamnarĩ za'ra wa'aba newa.

²⁴ Tane nherẽ, ãté asiré asi'rã'õtõ aba ré, te za aimreme aba na si 'Re ihâimana u'âsi mono, dama isadawa wasu'u za'ra wa'wa, ai'ahâ wa'aba na. Tane ré, isazei'õ'wa norĩ hã atẽme sisisi aba wamhã, ta norĩ hã te za oto 'râwi tipẽ'ẽ na tiwasété na siwaihu'u za'ra, 'Re ihâimana u'âsi mono zadawa wasu'u hã timremezém na te te oto iwapari za'ra zéb zarina, isazei'wa norĩ 're ihâimana za'ra mono zé, te te iwaihu'u za'ra õ norĩ hã. Taha zarina, te za oto siwẽ'õ pese za'ra, tiwasété na isiwaihu'u za'ra zéb zarina.

²⁵ 'Râwi sima si, te te 're irosa'rata za'ra mono zé hã te za oto tiwi waihu'u za'ra ni, imana'rãmi hawimhã. Tawamhã 'Re ihâimana u'âsi mono hã, tãma ipire za'ra na te te oto sina waihu'u za'ra wa, te za oto hi'rãtitõ tãma ana, ãma wata za'ra da. Tawamhã ãne te za oto ta norĩ hã 'Re ihâimana u'âsi mono hã te te aima 're wasu'u za'ra wa'wa: “'Re ihâimana u'âsi mono hã te nare asõ'a wa'aba, aima 're hâimana za'ra wa'wa.” Ãne te za te te aima 're wasu'u za'ra wa'wa, isazei'õ'wa norĩ hã.

Isazei'wa norĩ hã 're si'rã'õtõ mono wa, marĩ i'uwaibaba si te te 're i'manharĩ za'ra mono zé wasu'u

²⁶ Ĩsisãnawã norĩ, ãhã wasu'u na, wa za oto aima 'rãsutu za'ra wa'wa. Asiré 're asi'rã'õtõ aba mono wamhã, ni'wam norĩ si te za aima 're sõ're za'ra wa'wa, isazei'wa nho'rezém na. Ni'wam norĩ si te za duré isazei'wa norĩ 're aihâimana za'ra wa'aba mono zém na, te te aima 're roti za'ra wa'wa. Ni'wam norĩ si te za duré marĩ iwaihu'u'õ hã te te aima 're waihu'u za'ra wa'wa, 'Re ihâimana u'âsi mono hã ta norĩ ma si, te te 're iwaihu'u za'ra mono zéb zarina. Timreme nai õ nherẽ, te za duré ni'wam norĩ si 'Re ihâimana u'âsi mono hã te te aima 're sadawa wasu'u za'ra wa'wa, damreme aima iwaihu'u za'ra wa'aba õ na hã. Ni'wam norĩ si te za duré aimreme aba na, te te aima ãma 're wasu'u pese za'ra wa'wa sõ'awi, aré damreme aima iwaihu'u za'ra wa'aba õ na 'Re ihâimana u'âsi mono, da te aima 're isadawa wasu'u za'ra wa'aba mono zé hã. Asimiromhuri aba mono bâ, te za ãma 're asipawaptob u'âsi za'ra wa'aba mo aihâiba mono bâ wa'aba, Wanhib'apito ãma si asiptete sina 're anomro aba mono da.

²⁷ Aihĩni 're ai'rã'õtõ aba mono ré, ni'wam norĩ hã damreme dama iwaihu'u'õ na te te aima 're rowasu'u za'ra wa'aba mono wamhã, maparane te za te te aima 're 'mairowasu'u wa'wa. Si'ubdatõ dahâiba na hã wamhã, wẽ di duré. Tane nherẽ, ta norĩ nhipai u hã asima 're 'mairowasu'u za'ra wa'aba mono õ di za, damreme aima iwaihu'u aba õ na hã. Si'ubdatõ haré te za asima 're i'mairowasu'u wa'aba mo. Duré sisarina si, te za ta norĩ hã atãma te te aima 're rowasu'u za'ra wa'wa. Taha parimhã, te za oto ni'wa hã sõ'awi te te aima ãma 're rowasu'u pese za'ra wa'wa, asimreme na oto 're iwaihu'u za'ra wa'aba mono zéb da hã, asi'uihâ na za'ra wa'aba.

²⁸ Tane nherẽ, ni'wa hã aimreme aba na aima iwasu'u pese aba 'wa da hã, asiré 're 'maihâimana aba mono õ wamhã, tawamhã, damreme dama iwaihu'u'õ na 'Re ihâimana u'âsi mono zadawa 'mahârâ'wa norĩ hã te za ari'iwi 're si'ubumro. Tipẽ'ẽ na si, te za 're mreme zusi, 'Re ihâimana u'âsi mono ma, damreme tãma iwaihu'u za'ra õ na hã.

²⁹ Asiré 're asi'rã'õtõ aba mono ré, ni'wam norĩ hã aimreme aba na 'Re ihâimana u'âsi mono te te aima 're sadawa wasu'u za'ra wa'aba mono wamhã, maparane te za tô te te aima 're 'mairowasu'u wa'wa. Si'ubdatõ dahâiba na hã wamhã, wẽ di duré. Ãne wamhã, ni'wam norĩ hã asiré isazei'wa norĩ hã te za isimirowasu'u za'ra zém na te te sima ãma 're rowasu'u pese za'ra, 'Re ihâimana u'âsi mono hawib zô, tô sena zô, te te ãma iwaihu'u pese za'ra zéb da hã.

³⁰ Tawamhã duré, ni'wa hã te te aima rowasu'u za'ra wa'aba ré, ãté ni'wa ihâiba amoi ma, te za 'Re ihâimana u'âsi mono hã tãma waihu'u, tizadawa wasu'u hã, taha zama te te oto aima sadawa wasu'u za'ra wa'aba da. Ãne wamhã, aima rowasu'u 'rata aba 'wa hã te za tinhimirowasu'u hã sazâ, õhõ si te te oto aima 're sadawa wasu'u za'ra wa'aba mono da.

³¹ Taha zarina si, te za oto 'Re ihâimana u'âsi mono hã sisãna'repsi asima 're isadawa wasu'u za'ra wa'aba mo, aihĩni oto ãma 're iwaihu'u pese za'ra wa'aba mono zéb da hã asi'uihâ na, duré aipẽ'ẽ wẽ wa'aba zarina, asiptete sina ãma 're anomro aba mono da oto.

^32-33 'Re ihâimana u'âsi mono hã, marĩ hã siwa'ru, wa te 're i'manharĩ za'ra mono zéb da hã, te te sima 're wa'awẽ mono õ di. Rowẽ na wawaimri wasiré 're wahâimana za'ra mono da si, ma tô te te sima 're wa'awẽ. Tahawa, ni'wam norĩ hã damreme uwaibaba si, 'Re ihâimana u'âsi mono zadawa 'mahârâ'wa na te te dama 're rowasu'u za'ra mono wamhã, te za 're si'madâ'â pese za'ra, siwa'ru te te dama 're rowasu'u za'ra mono tõ da, rowahutu u, 're dasi'rã'õtõ mono sidâpâsi, te te 're damreme nhihâri za'ra mono tõ da. Daro mono bâ isazei'wa norĩ, siré 're isi'rã'õtõ mono norĩ 're ihâimana za'ra mono zéb uwaibaba si, te za te te dama ãma 're rowasu'u za'ra, isadawa wasu'u'wa norĩ hã.

³⁴ Isazei'wa norĩ, asiré 're asi'rã'õtõ aba mono wamhã, pi'õ norĩ hã te za ari'iwi dame 're si'ubumro, 're iwahâimana za'ra mono zéb zarina. Timro norĩ zapari, te za tô 're hâimana za'ra pi'õ norĩ hã, duréihã 'Re ihâimana u'âsi mono nhimiroti na, Mozési ãne na te te ãma irob'ui'érézéb zarina. Tahawa, asiré 're asi'rã'õtõ aba mono wamhã, pi'õ norĩ hã te te sima 're robzanhamri za'ra mono õ di za, timreme na asima 're rowasu'u za'ra wa'aba mono ré, te te 're ro'wa'rutu tõ za'ra mono da.

³⁵ Pi'õ norĩ hã dasi'rã'õtõzéb ãma, rowahutu'wa norĩ nhimirowahudu hã te te 're wapari za'ra mono wamhã, tãma iwaihu'u za'ra õ hã te te oto 're waihu'u pese za'ra mono da, te te sima 're wẽ za'ra mono wamhã, 'rip si te za timro hã te te ãma 're sadanharĩ za'ra, waimri si. Isazei'wa norĩ hã aihĩni 're asi'rã'õtõ aba mono ré, pi'õ norĩ hã timreme na te te dawi 're sihâri za'ra mono wamhã, wẽ õ di za, pi'õ norĩ mreme hã.

³⁶ E 'Re ihâimana u'âsi mono zadawa wasu'u hã dawana waihu'u za'ra wa'aba bâ, te za ãne 're aihâimana za'ra wa'aba mo, isazei'wa norĩ 're ihâimana za'ra mono zéb zarinai õ nherẽ. E a norĩ wa'aba ma si, ma tô aima ãma rowasu'u za'ra wa'aba ni.

³⁷ Ãhã na te aima ãma irob'ui'éré za'ra wa'aba zé hã, ĩsi'uihâ na ĩnhimiroti na hãi õ di. Wanhib'apito zadawa para, wa aima ãma rob'ui'éré za'ra wa'wa, isimiroti zarina si. Ma'ãpé, ãne hã asi'uihâ na ãma waihu'u za'ra wa'aba, 'Re ihâimana u'âsi mono zadawa 'mahârâ'wa na asi'ãma 're irosa'rata za'ra wa'aba mono norĩ hã, duré aimawi romhuri mono bâ, Tipẽ'ẽzani na te te aima 're ipisutu za'ra wa'aba mono zém na asi'ãma 're irosa'rata za'ra wa'aba mono norĩ hã.

³⁸ Ãne na ĩnhimiroti na, ni'wam norĩ hã te te 're ĩzaze za'ra mono õ wamhã, tawamhã, isazei'õ'wa na te za ta norĩ ãma 're irosa'rata u'âsi za'ra wa'aba mo. Tahawa, a norĩ wa'wa hã ta norĩ nhimiroti hã 're 'madâ'â za'ra wa'aba mono õ di za oto.

³⁹ Ĩsisãnawã norĩ, ãne wa za ãhã wasu'u na hã aima ãma 'rãsutu za'ra wa'wa. Aimreme aba zém na, 'Re ihâimana u'âsi mono zadawa 'mahârâ'wa 're aihâimana za'ra wa'aba mono da, te za 'râwi 're asi'madâ'â za'ra wa'aba mo. Duré damreme dama iwaihu'u'õ na, 'Re ihâimana u'âsi mono, asima 're sadawa wasu'u za'ra wa'aba mono tõ da, 're asisadawa uwati za'ra wa'aba mono õ di za.

⁴⁰ Asiré 're asi'rã'õtõ aba mono wamhã, uburé marĩ hã te za i'uwaibaba si 're i'manharĩ za'ra wa'aba mo, ipibui pese zarina, aiwaimri wa'aba.