1 Corĩtu 12 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono, Tipẽ'ẽzani na romhuri mono bâ te te dama 're i'apisutu mono zé wasu'u

¹ Ĩsisãnawã norĩ, wasiré isazei'wa norĩ hã romhuri mono bâ, 'Re ihâimana u'âsi mono pẽ'ẽzani nhimipawapto waihu'u pese na, ãma 're isipawaptob za'ra mono zéb da hã, ta hã te te tãma 're ipisutu za'ra mono zém na, wa za oto aima ãma roti za'ra wa'wa, sena ãma 're iwaihu'u za'ra wa'aba mono zéb da hã, rosa'rata na ãma 're upa za'ra wa'aba mono tõ da.

² A norĩ wa'wa hã 'Re ihâimana u'âsi mono, 're waihu'u za'ra wa'aba mono õ ré, ma tô wa'uburé hã te te 're aiwada'uri u'âsi za'ra wa'wa, tô sena newa, romhâiba 'manharĩ hã tarére nherẽ, mreme õ nherẽ, ta norĩ ãma si 're aiwata za'ra wa'aba mono da, waihu'u pese newa. Ãne hã aima waihu'u pese za'ra wa'aba nherẽ, wa taré ãma aipo're pu'u za'ra wa'wa.

³ Tane nherẽ, wa ĩsima aiwẽ za'ra wa'wa, aimawi roti hã waihu'u za'ra wa'aba da oto. Ãté ni'wam norĩ hã te za ãne na Zezusi hã te te dama 're wasu'u za'ra: “Zezusihi ma, marĩ iwasétére si tãma 're hâimana mono neza, 'Re ihâimana u'âsi mono nhimirob'manharĩzém na.” Ãne na hã ni'wam norĩ hã 'Re ihâimana u'âsi mono pẽ'ẽzani nhimipawaptobzéb ré, 're inomro mono norĩ hã, te te dama 're wasu'u waihu'u za'ra mono õ di. Mare di. Duré ãté ni'wam norĩ hã te za ãne na te te dama 're wasu'u za'ra, Zezusi hã: “Zezusi hã, taha Wanhib'apito, danhipai u.” Ni'wam norĩ hã 'Re ihâimana u'âsi mono pẽ'ẽzani nhimipawaptobzéb zarinai õ nherẽ, ãne na tô sena te te dama 're wasu'u waihu'u za'ra mono õ di.

⁴ 'Re ihâimana u'âsi mono pẽ'ẽzani hã misi nherẽ, te isazei'wa norĩ ma, romhuri hã te te 're apisutu, tinhimiromhuri mono bâ sipu'u pese na ãma 're sipawaptob za'ra mono da.

⁵ Duré Wanhib'apito hã misire nherẽ, wasipu'u pese na, wa wa te tãma 're romhuri za'ra, wanhimiromhuri mono bâ, wasiré isazei'wa norĩ hã.

⁶ Duré, 'Re ihâimana u'âsi mono hã misi nherẽ, õhõ si te tiwaihu'u pese na te te 're wa'apawapto, romhuri hã sipu'u pese na, wa te tãma ãma 're irob'ma'wamarĩ za'ra mono zéb da hã.

⁷ Wahâiba mono bâ, ma tô romhuri hã te te wama 're apisutu 'Re ihâimana u'âsi mono hã, Ipẽ'ẽzani hã sena na wapẽ'ẽ 're, 're ihâimana za'ra mono na, wa te wasina 're waihu'u za'ra mono da, duré wasiré isazei'wa norĩ hã ãma 're wasipawapto wẽ u'âsi za'ra mono da.

⁸ 'Re ihâimana u'âsi mono pẽ'ẽzani hã ni'wam norĩ si, te za te te 're pisutu za'ra, tô sena ta norĩ hã tinhimirosa'rata waihu'u pese na te te dama ãma 're roti wẽ za'ra mono da, hâiwa hawi dahâimanazém na rowaihu'u na hã. Ni'wam norĩ si, te za duré te te 're pisutu za'ra, rowaihu dama iwaihu'u'õ na, te te dama ãma 're roti wẽ u'âsi za'ra mono da.

⁹ Ni'wam norĩ si, te duré 'Re ihâimana u'âsi mono hã te te 're pisutu za'ra, ta norĩ hã Cristu te te sina 're umnhasi pese za'ra mono da, tisiré isazei'wa norĩ nhipai u. Ni'wam norĩ si te duré te te 're pisutu za'ra, iwaihu'u pese zarina, te te ãma 're dapese za'ra mono da, 're dahâzé za'ra mono wa.

¹⁰ 'Re ihâimana u'âsi mono waihu'u pese na si, marĩ dama i'manharĩ waihu'u'õ hã te te dama 're 'manharĩ za'ra mono da, ni'wam norĩ si te duré te te 're pisutu za'ra. Duré 'Re ihâimana u'âsi mono zadawa wasu'u na, sena na te te dama ãma 're rowasu'u za'ra mono da, te duré ni'wam norĩ si te te 're pisutu za'ra. Ni'wam norĩ si, te duré te te 're pisutu za'ra, 'Re ihâimana u'âsi mono, da te dasima 're isadawa wasu'u za'ra mono zé hã te te ãma 're pibu za'ra mono da, tô sena uptabi na hã te te 're waihu'u za'ra mono da, wa'uburé norĩ hawim hãi õ'umnhasite. Damreme dama iwaihu'u'õ na zama, 'Re ihâimana u'âsi mono te te dama 're sadawa wasu'u za'ra mono da, te duré ni'wam norĩ si te te 're pisutu za'ra, timreme nai õ nherẽ, te te dama ãma 're isadawa wasu'u za'ra mono zéb da hã. Ni'wam norĩ si, te duré 'Re ihâimana u'âsi mono pẽ'ẽzani hã te te 're pisutu za'ra, damreme dama iwaihu'u'õ na 'Re ihâimana u'âsi mono, da te dasima 're isadawa wasu'u za'ra mono zé hã sõ'awi te te dama ãma 're wasu'u pese za'ra mono da oto, da te 're iwaihu'u za'ra mono zéb da hã.

¹¹ Tô õhõ si te misi nherẽ, 'Re ihâimana u'âsi mono pẽ'ẽzani hã romhuri te te dama 're apisutu, isazei'wai mono bâ, te te sima 're ida'awẽ mono zéb zarina, ãma 're idasipawaptob za'ra mono zéb da hã.

Dahâiba misi ne, isazei'wa norĩ hã 're ihâimana za'ra mono zé wasu'u

¹² Ãne, wa za aima ãma romnhimiré'é za'ra wa'wa, iwaihu'u za'ra wa'aba zéb da hã. Wahâiba hã misi nherẽ, wahâiba na marĩ hã wama 're ihâimana za'ra mono hã ahâ di, wapara hã duré wanhib'rada hã duré wapo're hã, duré aimawi hã. Tane nherẽ, misi te tô wahâiba hã wama 're hâimana za'ra, wahâiba mono bâ. Tane duré, wa norĩ hã wasiré isazei'wa norĩ hã wa'ahâ uptabi nherẽ, wa oto simisutu ãma 're wanomro, wahâiba misi ne.

¹³ Wa norĩ hã wasiré isazei'wa norĩ hã aiwa 're wahâimana za'ra mono õ di. Ni'wam norĩ hã zudeu. Duré ni'wam norĩ hã zudeu'õ. Duré ni'wam norĩ hã pawa'âbâ ãna iwada'uri zarina si, te te dama 're iromhuri za'ra mono. Duré ni'wam norĩ hã wada'uri ãna si'uihâ na 're ihâimana za'ra mono. Ãne hã aiwa 're wahâimana za'ra mono õ nherẽ, simisutu wa oto 're wahâimana za'ra, wahâiba misi ne, 'Re ihâimana u'âsi mono pẽ'ẽzani na â dawabzuri uburé, wa te 're 'manharĩ za'ra mono wa, duré 'Re ihâimana u'âsi mono hã, Tipẽ'ẽzani, uburé te te wama 're anhomri mono wa, wapẽ'ẽ 're, oto 're isãmra mono da hã.

¹⁴ Wahâiba na marĩ hã misi wama 're hâimana za'ra mono õ di. Marĩ hã ahâ na te tô wahâiba na hã wama 're hâimana za'ra, tite mono bâ te te 're iromhuri za'ra mono zéb da hã, wapara hã, duré wanhib'rada hã, duré wato hã, uburé iré 're iwahâimana za'ra mono hã. Tane ma tô duré 'Re ihâimana u'âsi mono pẽ'ẽzani hã romhuri hã sipu'u pese na te te wama 're apisutu, ãma 're iwasipawaptob za'ra mono zéb da hã.

¹⁵ Ãne, wa za duré aima ãma simiré'é za'ra wa'wa taré, wahâiba na marĩ hã wama 're ihâimana za'ra mono zém na hã. Ãté wapara, te aré wama te te 're nharĩ za'ra, ãne: “Wa hã asib'rata õ di. Tahawa, wa taré aihâiba na ai'ãma 're ĩhâimanare. Marĩ dai õre di, wa hã.” E ãne hã aré i'uwaibaba. Mare di. Pire na te tô wama 're hâimana u'âsi za'ra, wapara hã.

¹⁶ Ãté wapo're hã te aré duré wama te te 're nharĩ za'ra, ãne: “Wa hã atõmo õ di. Tahawa, wa taré aihâiba na ai'ãma 're ĩhâimanare. Marĩ dai õ di, wa hã.” E ãne hã aré duré i'uwaibaba. Mare di. Pire na te tô wama 're hâimana u'âsi za'ra, wapo're hã.

¹⁷ Duré, wahâiba na watõmo si wama 're hâimana za'ra mono 'wa'âhã, e niha wa aré 're wanhimipari za'ra. 'Re wanhimipari waihu'u za'ra mono õ di aré, tô. Duré wahâiba na wapo're si wama 're hâimana za'ra mono 'wa'âhã, e niha wa aré duré 're wanhimhã za'ra. 'Re wanhimhãi waihu'u za'ra mono õ di tô aré.

¹⁸ Tane nherẽ, ãne na hã 'Re ihâimana u'âsi mono te te 're wa'apoto mono õ di. Te te sima 're i'awẽ mono zéb zarina si, ma tô marĩ ahâ na te te wama 're ab'manharĩ, wahâiba na iré 're iwahâimana za'ra mono zéb da hã.

¹⁹ Wahâiba na marĩ hã ahâ na wama 're hâimana za'ra mono õ 'wa'âhã, aré wahâiba hã wama 're hâimana za'ra mono õ di.

²⁰ Tane nherẽ, marĩ ahâ na te tô wama 're hâimana za'ra wahâiba na hã, wahâiba misi nherẽ. Tahawa, wa tô 're wahâimana za'ra.

²¹ Ãté wato hã te aré wanhib'rata ma hã tinha, ãne: “A hã tarére hã. Marĩ dai õ di, ĩma hã.” E ãne hã aré i'uwaibaba. Ãté wa'rã hã te aré duré wapara ma hã tinha, ãne: “A hã tarére hã. Marĩ dai õ di, ĩma hã.” Ãne hã i'uwaibaba õ di tô duré aré.

²² Nima norĩ hã wahâiba na marĩ hã wama 're ihâimana za'ra mono hã sib'uware na wama 're hâimana za'ra mono newa. Tane nherẽ, te tô pire na wama 're hâimana za'ra.

²³ Duré nima norĩ si, wahâiba na wama 're ihâimana za'ra mono hã wama wapure na, tarére wama 're hâimana za'ra mono newa, wa za ta norĩ ma 're wanhipese za'ra, wa te 're ihâiba'ubu wẽ za'ra mono zém na hã, nimahã ma si, rowazéb tõ da.

^24-25 Nima norĩ ré si, wa ai'uréiwi iré 're wahâimana za'ra, rowazéb ãna. 'Re ihâimana u'âsi mono hã ma tô te te sima 're wa'awẽ, uburé marĩ hã wahâiba na wama 're ihâimana za'ra mono hã, si'u te te wama ãma 're iromhuri za'ra mono zéb da hã, sima 're siwanhizari za'ra mono ãna, aihĩni 're sisawi pese za'ra mono da. Ãne da si, ma tô 'Re ihâimana u'âsi mono hã wahâiba te te wama 're ab'manharĩ, wahâiba na hã nima norĩ si wama wapu ãna, pire na tô uburé wama 're hâimana za'ra mono da, simisutu haré. Tane duré, 'Re ihâimana u'âsi mono hã ma tô te te sima 're wa'awẽ, wasiré isazei'wa norĩ hã, simisutu haré wa te tãma 're romhuri za'ra mono da, wasiwi 're wasiwanhizari za'ra mono ãna. Ma tô te te sima 're wa'awẽ, wapire na wasima 're iwahâimana za'ra mono zéb da hã, aiwapsi.

²⁶ Wapara hã marĩ ãma sépu'u wa, te te robzépata wamhã, taha u'âbâ, te za uburé wahâiba hã isabâdâ robzépata za'ra. Tane duré, ni'wa hã wasiré isazei'wa, marĩ na te te robzépata wamhã, wa norĩ zama, wa za duré isabâdâ robzépata za'ra ni. Duré, ni'wa hã wasiré isazei'wa hã isimiromhuri wẽ na da te dasima wasu'u wẽ za'ra wamhã, wa norĩ zama, wa za duré isabâdâ 're wato za'ra.

²⁷ A norĩ wa'wa hã te tô simisutu haré, Cristuhu nhib'a'uwẽ asiré 're anomro aba mo, aihâiba misi aima 're ihâimana za'ra wa'aba mono ne. Duré dahâiba na marĩ hã tite mono bâ te te 're i'manharĩ za'ra mono zéb da hã, dama 're ihâimana za'ra mono ne, te a norĩ wa'wa hã aihâiba mono bâ tãma 're aihâimana za'ra wa'aba mo, Cristuhu ma si, asimiromhuri aba mono bâ, tãma 're 'manharĩ za'ra wa'aba mono da.

²⁸ Ãne ma tô 'Re ihâimana u'âsi mono hã romhuri hã te te wama 're apisutu, wate mono bâ isimipawapto waihu'u pese na tãma ãma 're iwasipawaptob za'ra mono zéb da hã, wasiré isazei'wa norĩ hã. Romhuri hã danhipai u ipire uptabi hã ma tô ni'wam norĩ ma si te te 're apisutu, Zezusi hã te te 're isadawa wasu'u za'ra mono zéb da hã, isazei'õ'wa norĩ ma, Zezusihi zadawa para. Romhuri aimawi hã ipire hã ma tô duré ni'wam norĩ ma si, te te 're apisutu, 'Re ihâimana u'âsi mono zadawa wasu'u na, sena na isazei'wa norĩ ma si te te ãma 're irowasu'u za'ra mono zéb da hã. Duré isazei'wa norĩ 're ihâimana wẽ za'ra mono zéb da hã, 'Re ihâimana u'âsi mono nhimiroti zarina, te te dama ãma 're iroti za'ra mono zéb da hã, ma tô duré ni'wam norĩ ma isimiromhurizéb da hã, te te tãma 're apisutu, 'Re ihâimana u'âsi mono hã. 'Re ihâimana u'âsi mono waihu'u pese na, marĩ dama i'manharĩ waihu'u'õ hã te te dama 're 'manharĩ za'ra mono da, ma tô duré ni'wam norĩ ma si te te 're apisutu, isimiromhurizéb da hã. Ma tô duré ni'wam norĩ si te te 're pisutu za'ra, iwaihu'u pese zarina te te ãma 're dapese za'ra mono da, 're dahâzé za'ra mono wa. Duré marĩ zô, tiwi 're irowaptâ'â za'ra mono norĩ ãma 're sina u'âsi mono da, ma tô duré ni'wam norĩ hã te te 're apisutu, isibrob'õ norĩ ãma hã, duré ihâzé ré norĩ ãma hã. Duré isazei'wa norĩ 'madâ'â'wa, dama 're hâimana za'ra mono da, ma tô duré ni'wam norĩ hã te te 're apisutu. Duré damreme dama iwaihu'u'õ na te te dama 're sadawa wasu'u za'ra mono da, ma tô ni'wam norĩ si te te 're apisutu, timreme nai õ nherẽ, te te dama ãma 're isadawa wasu'u za'ra mono zéb da hã.

²⁹ E tawamhã isazei'wa norĩ hã te uburé Zezusihi zadawa wasu'u'wa na 're hâimana za'ra, isazei'õ'wa norĩ ma hã. Mare di. Uburé ãne na dama 're hâimana za'ra mono õ di. E uburé te duré 'Re ihâimana u'âsi mono zadawa 'mahârâ'wa na 're hâimana za'ra, isazei'wa norĩ ma hã. Mare di. Duré e uburé te 'Re ihâimana u'âsi mono nhimiroti na dama roti'wa na 're hâimana za'ra, isazei'wa norĩ 're ihâimana wẽ za'ra mono zéb da, te te dama 're roti za'ra mono da hã. Mare di. Duré, e uburé te isazei'wa norĩ hã marĩ dama i'manharĩ waihu'u'õ hã te te dama 're 'manharĩ za'ra, 'Re ihâimana u'âsi mono waihu'u pese zarina. Mare di.

³⁰ Duré, e uburé te za te te 're dapese za'ra, 're dahâzé za'ra mono wamhã, 'Re ihâimana u'âsi mono waihu'u pese zarina hã. Mare di. Ni'wam norĩ si te za tô ãne na hã 're hâimana za'ra. Duré, e uburé te za damreme dama iwaihu'u'õ na te te dama 're sadawa wasu'u za'ra, 'Re ihâimana u'âsi mono hã. Mare di. Duré e uburé te za sõ'awi te te dama 're wasu'u pese za'ra, damreme dama iwaihu'u'õ na 'Re ihâimana u'âsi mono, da te dama 're isadawa wasu'u za'ra mono zém na hã. Mare di. Uburé ãne na dama 're hâimana za'ra mono õ di. Tite mono bâ, te za misi si isazei'wa norĩ hã romhuri hã te te ãma tãma 're 'manharĩ za'ra.

³¹ Tane nherẽ, romhuri hã danhipai u dama ipire norĩ zô si, te za sô 're irob'ruiwapari u'âsi za'ra wa'aba mo, asiré isazei'wa norĩ hã ãma 're asipawaptob za'ra wa'aba mono zéb da hã. Aimawi na, wa za oto aima ãma rowasu'u za'ra wa'wa, ã norĩ wasu'u nhipai u iwasu'u wẽ uptabi na hã, ãma 're i'anomro wẽ uptabi aba mono zéb da na hã.