1 Corĩtu 11 - ꞌRe Ihâimana Uꞌâsi Mono Zadawa Wasuꞌu

Aibâ norĩ hã timro nhipai u 're ihâimana za'ra mono zé wasu'u

¹ Wa hã 're ĩmorĩzém na aima ãma 're ĩsisanho za'ra wa'aba mono zéb zarina, te za 're anomro wẽ wa'aba mo. Cristu hã ti'ai ãma 're morĩ ré, wama ãma 're isisanho za'ra mono zéb zarina, wa hã 're ĩhâimana mono ne, te za duré 're anomro wẽ wa'aba mo.

² A norĩ wa'wa hã te oto ĩ'ãma 're aipo're pu'u u'âsi za'ra wa'aba mo, 're ĩhâimana mono zém na hã, duré uburé te aima ãma 're irowasu'u za'ra wa'aba mono zém na zama. Isazei'wa norĩ 're ihâimana za'ra mono zém na roti hã da te ĩma 're iwaihu'u za'ra mono zéb zarina, te oto 're anomro u'âsi aba mo, te aima ãma 're iroti za'ra wa'aba mono zéb zarina si. Tahawa, wa ai'ãma 're ĩwata u'âsi za'ra wa'wa.

³ Tane nherẽ, wa ĩsima wẽ, waihu'u za'ra wa'aba da, ãne: Cristu hã uburé aibâ norĩ nhib'apito, te 're hâimana. Duré aibâ norĩ hã uburé timro norĩ nhib'apito, te 're hâimana za'ra. Duré 'Re ihâimana u'âsi mono hã, te Cristuhu nhib'apito na hã 're hâimana.

⁴ A norĩ wa'wa hã, zudeu'õ na te 're aihâimana za'ra wa'aba mo. Tahawa, zudeu'õ na 're aihâimana za'ra wa'aba mono zéb zarina, te za tô uburé marĩ hã 're i'manharĩ za'ra wa'aba mo. Isazei'wa norĩ hã asiré 're ai'rã'õtõ aba mono ré, aibâ norĩ hã 'rã ubu ré, 'Re ihâimana u'âsi mono ma, 're mreme zusi mono wamhã, duré 'rã ubu ré, 'Re ihâimana u'âsi mono zadawa wasu'u na te te dama 're rowasu'u za'ra mono wamhã, e marĩ te ta norĩ hâimanazé hã wama wasu'u za'ra. Ta norĩ hã Cristu te te siwi 're iwazéb za'ra mono õ zé, te wama wasu'u za'ra, zudeu'õ norĩ hâimanazéb uwaibaba õ wa, ãne hã.

⁵ Duré pi'õ norĩ hã 'rãi ubu ãna, 'Re ihâimana u'âsi mono ma, 're mreme zusi mono wamhã, duré 'rãi ubu ãna, 'Re ihâimana u'âsi mono zadawa wasu'u na te te dama 're romhuri za'ra mono wamhã, ta norĩ ma, imro hã tãma wazéb za'ra õ di. E marĩ wa. Pi'õ 'rãi ubuzé hã timro zapari 're ihâimana za'ra mono zé, te te dama wasu'u wa, zudeu'õ norĩ hâimanazéb zarina. Pi'õ norĩ hã marĩ iwasédé hã te te 're 'manharĩ za'ra mono wa, te za da te 're 'rãpari za'ra, sisém na 're hâimana za'ra mono da a'â. Tane duré, pi'õ norĩ hã 'rãi ubu ãna, 'Re ihâimana u'âsi mono ma, 're mreme zusi mono wamhã, pi'õ, da te 're i'rãpari za'ra mono ne, te za a'â 're hâimana za'ra ta norĩ hã, sisém na.

⁶ Ãne hã pi'õ norĩ, 'rã ubu ãna 're hâimana za'ra mono wamhã, ãne hã wẽ te bâ, te za tô 're si'rãpari za'ra, sisém na dama 're ihâimana za'ra mono zéb da hã oto. Tawamhã 're si'rãpari za'ra mono wa, duré taré 're siséré nhihâri za'ra mono wa, dama sisém na 're hâimana za'ra mono tõ da, te za 'rã ubu ré, dame 're hâimana za'ra, isazei'wa norĩ hã 're si'rã'õtõ mono ré.

⁷ Tane nherẽ, isazei'wa norĩ, siré 're si'rã'õtõ mono ré, aibâ norĩ hã 'rã ubu ré, dasiré 're hâimana za'ra mono õ di za. E marĩ wa. 'Re ihâimana u'âsi mono ne, 're hâimana za'ra mono wa, ta norĩ hã. Tane nherẽ, pi'õ norĩ hã aibâ norĩ zapari 're ihâimana za'ra mono zé hã, pi'õi ma, aibâ ipirezé, te wasu'u.

⁸ Duréihã 'Re ihâimana u'âsi mono hã, pi'õi hâiba na aibâ hã te te poto õ di. Aibâ hâiba na si, ma tô pi'õ hã poto.

⁹ Duré aibâ hã pi'õi ma, 're hâimana mono da, te te poto õ di, 'Re ihâimana u'âsi mono hã. Pi'õ si, ma tô tãma poto, aibâ ma, 're ihâimana mono da hã.

¹⁰ Tahawa, isazei'wa norĩ hã rowahutu u 're si'rã'õtõ mono wamhã, pi'õ norĩ hã te za tô 'rã ubu ré dasiré 're hâimana za'ra. E marĩ wa. Timro norĩ zapari 're ihâimana za'ra mono zém na, da te ãma 're waihu'u za'ra mono da, duré hâiwa ãma 'Re ihâimana u'âsi mono ma romhuri'wa norĩ hã te te iré 're 'madâ'â za'ra mono wa, te te siwi 're wẽ'õ za'ra mono tõ da, zudeu'õ norĩ hâimanazé hã te te sina 're uwaimrami za'ra mono da.

¹¹ Tane nherẽ, wa norĩ hã Wanhib'apito ãma oto 're wanomro mono wa, aibâ norĩ hã pi'õi ãna 're hâimana waihu'u za'ra mono õ di za oto. Duré pi'õ norĩ zama hã, aibâ ãna 're hâimana waihu'u za'ra mono õ di za. Ãne hã aiwa te wama wasu'u za'ra.

¹² Duréihã 'Re ihâimana u'âsi mono hã aibâ hâiba na ma tô pi'õ hã poto 'rata tô. Tane nherẽ, te oto ta hawim haré aibâ norĩ hã pi'õi hâiba hawi dama 're poto u'âsi za'ra. 'Re ihâimana u'âsi mono si, ma tô uburé marĩ hã te te apoto, aibâ na, duré pi'õ na.

¹³ E tawamhã i'uwaibaba, te za pi'õ norĩ hã 'rãi ubu ãna, 'Re ihâimana u'âsi mono ma, 're mreme zusi, isazei'wa norĩ hã siré 're si'rã'õtõ mono wamhã. Ma'ãpé, a norĩ wa'wa hã asi'uihâ na ãma waihu'u za'ra wa'aba, ãne na hã.

¹⁴ Aibâ norĩ hã séré pa ré, 're nomro mono wamhã, wẽ'õ nherẽ, te siséb ãna iré 're hâimana za'ra, tihâimanazéb zarinai õ nherẽ. Ãne hã 'râwi wapẽ'ẽ na dahâimanazém na, wa te wasina 're iwaihu'u za'ra mono zéb zarina, wa ãne na aima ãma roti za'ra wa'wa.

¹⁵ Tane nherẽ, pi'õ norĩ hã séré pa ré, 're hâimana za'ra mono wamhã, dama 'madâ'â ze ti. E marĩ wa. 'Re ihâimana u'âsi mono si, ma tô iséré pa hã te te tãma 're pisutu za'ra, pi'õ norĩ ma hã, i'rãzuwazéb da hã.

¹⁶ Ãté ni'wam norĩ hã asiré 're ihâimana za'ra wa'aba mono norĩ hã te za ãne na sina ĩzadawa 'ru za'ra, pi'õ norĩ hã 'rã ubu ré 're ihâimana za'ra mono wasu'u na hã, te te ĩzaze za'ra õ wa. Ãne wamhã, wa za ãne na si ĩzadawa na tãma ãma wa'rãmi za'ra. Wa norĩ hã aimawi na, wa te dama 're roti za'ra mono õ di. Mare di. Duré 'Re ihâimana u'âsi mono nhib'a'uwẽ, siré 're isi'rã'õtõ mono norĩ hã te duré õhõ na si te te ãma 're rosa'rata za'ra, pi'õ norĩ hã 'rã ubu ré, 're ihâimana za'ra mono wasu'u na si.

Zezusi hã dazada idâ'âzém na ãma 're dasipo're pu'u za'ra mono da, dasiré 're idasaihuri mono zé wasu'u

¹⁷ Aimawi na wa za oto aima ãma roti za'ra wa'wa, aihâimanazém na 're i'upa za'ra wa'aba mono zém na hã. Tahawa, ai'ãma ĩwata za'ra wa'aba õ di za, ãhã na hã. Rowahutu u asiré 're asi'rã'õtõ aba mono wamhã, asiptete sina Cristuhu ãma 're anomro aba mono zéb da, 're asipawaptob za'ra wa'aba mono õ di. Marĩ na si, ma tô i'upana asiwi 're iro'wa'rutu za'ra wa'aba mo.

¹⁸ Ãne uimrehẽne, wa za a'â ai'ãma za'ra wa'aba rob'ui'éré. Ma tô we ĩma aiwasu'u za'ra wa'aba ni, asiré 're asi'rã'õtõ aba mono nherẽ, asima aipo'o aba na hã, 're asisada'âbâ za'ra wa'aba mono 'ru te. Ãne na suru na wa tô dazaze, da te we ĩma aiwasu'u wasété za'ra wa'aba zém na hã. Ãté tô sena, ãne na hã.

¹⁹ Ãne hã wẽ'õ nherẽ, ãté wẽ di tô. E marĩ wa. Asiwi aipo'o aba nherẽ, ni'wam norĩ hã wa za wa te 're waihu'u za'ra, tô sena, Zezusihi zazei uptabi 'wa, 're ihâimana za'ra mono na hã.

²⁰ Asiré 're asaihuri aba mono da, 're asi'rã'õtõ aba mono wamhã, Wanhib'apito hã wazada idâ'âzém na 're asipo're pu'u za'ra wa'aba mono zéb da, tãma ãma 're uwaimrami za'ra wa'aba mono õ di. Marĩ aimawi hã 're i'manharĩ za'ra wa'aba mono da si, te 're asi'rã'õtõ aba mo, siwa'ru.

²¹ Aihĩni, asitẽme 're aihutu aba mono õ ré, te za ni'wam norĩ si dawana tisa hã te te 're huri, si'aba'ré na. Tahawa, te za ni'wam norĩ hã tisa hã te te 're simini za'ra, iwana 're dasihutu mono wa. Tahawa, te za tô iwana da te 're uprosi za'ra. Ni'wam norĩ hã te za duré ãma 're si'rãiwamnarĩ za'ra, uwa 'rãi wa'u isé hã sa'ẽtẽ na te te 're âhuri mono wa.

²² E niha. E asõrõwa hã aima 're hâimana za'ra wa'aba mono ã bâ, asapa'abâ asa hã iwa 're ihuri aba mono zéb da hã. Asiré 're asi'rã'õtõ aba mono ré, ãne hã asiwi 're 'manharĩ wasété za'ra wa'aba mono wamhã, asiré 'Re ihâimana u'âsi mono nhib'a'uwẽ, 're i'ruiwapari za'ra wa'aba mono zé, te aima wasu'u za'ra wa'wa. Ãne hã asima 're 'manharĩ wasété za'ra wa'aba mono wa, te duré isimarĩ'õ norĩ hã 're wazéb za'ra wa'aba mono ãna, 're aihâimana za'ra wa'aba mo. Ãne wamhã, e niha wa za ai'ãma waihu'u za'ra wa'wa. E ãne zarina, wa za duré ai'ãma 're ĩwata za'ra wa'wa. Mare uptabi di, ai'ãma 're ĩwata za'ra wa'aba mono da hã.

²³ Duréihã Wanhib'apito te te ĩma iwaihu'uzém na, wa tô ãne na aima waihu'u pari za'ra wa'wa: Zuda hã Zezusi te te dama ihâiba nhomrizém na, tô taha bara na ma tô Wanhib'apito Zezusi hã i'u'ẽne hã ti'â.

²⁴ Tawamhã 'Re ihâimana u'âsi mono ãma te tiwata, sõpru wa. Taha pari, ma tô te te wẽ'ẽ, i'u'ẽne hã. Ãne te tãma nharĩ za'ra, tisiré 're inomro mono norĩ ma: “Ã hã i'u'ẽne hã ĩhâiba te wasu'u, asada ĩsisõmri za'ra wa'aba zé hã. Ã hã te za 're ihuri aba mo, ĩ'ãma 're asipo're pu'u u'âsi za'ra wa'aba mono zéb da hã.” Ãne ma tô sina tãma rowasu'u za'ra, Zezusi hã.

²⁵ Tawamhã saihuri pari, tô õne ma tô duré hâsizé hã ti'â, uwa 'rãi wa'ui ré hã. Ãne te duré tãma nharĩ za'ra: “Ã hã rob'rãi wa'u hã, ĩwapru asada za'ra wa'aba ĩwi pu'u wa, 'Re ihâimana u'âsi mono te te dama iropisutuzép té, tô sena za te te dama ãma 're i'a'uwaimrami mono zé, te wasu'u. Ã hã 're âhuri aba mono sidâpâsi, te za ĩ'ãma 're asipo're pu'u u'âsi za'ra wa'aba mono zéb da, 're i'manharĩ za'ra wa'aba mo, õne u'âsi.” Ãne ma tô duré sina tãma nharĩ za'ra, Zezusi hã.

²⁶ Tawamhã i'u'ẽne hã 're huri aba mono wamhã, duré rob'rãi wa'u hã 're âhuri aba mono wamhã, ta hã, Wanhib'apito dazada idâ'âzém na 're asipo're pu'u za'ra wa'aba mono zé, te aima wasu'u za'ra wa'wa, za we apâ imorĩzéb u hã.

²⁷ Tahawa, ni'wam norĩ hã Wanhib'apito ãma 're isipo're pu'u za'ra mono zéb da, i'u'ẽne hã te te siré 're huri mono wamhã, duré rob'rãi wa'u hã te te siré 're âhuri mono wamhã, siséb ãna siré 're si'rã'õtõ mono wamhã, ta norĩ hã te za Wanhib'apito hâiba na, tiwasédé hã te te ãma 're 'manharĩ za'ra, iwapru na zama, dazada idâ'âzé hã taré newa, siwa'ru te te 're huri mono wa, i'u'ẽne hã, duré siwa'ru te te 're âhuri mono wa, rob'rãi wa'u hã.

^28-29 Ni'wam norĩ hã Wanhib'apito dazada dâ'â da, isihâiba nhomrizém na, te te 're rosa'rata za'ra mono ãna, i'u'ẽne hã te te 're huri mono wamhã, duré rob'rãi wa'u hã te te 're âhuri mono wamhã, taha zarina, te za 'Re ihâimana u'âsi mono hã ta norĩ te te 're hâ za'ra. Taha õ'umnhasite, te za a'â aipẽ'ẽ na 'râwi 're asi'madâ'â za'ra wa'aba mo, asimirosa'rata wasédé hã aima 're hâimana za'ra wa'aba mono zô, taha uimrehẽne, a'â asima 're pari za'ra wa'aba mono da. Taha parip si, te za oto i'u'ẽne hã asiré 're ihuri aba mo. Duré taha parip si, te za oto rob'rãi wa'u hã asiré 're i'âhuri aba mo.

³⁰ Tahawa, ni'wam norĩ hã ãne hã te te a'â 're 'manharĩ za'ra mono õ wa, te ta norĩ hã hâzé u'âsi 're hâimana za'ra ahâ na, asiré 're ihâimana za'ra wa'aba mono norĩ hã. Ni'wam norĩ hã te duré sib'uwa u'âsi 're hâimana za'ra. Ni'wam norĩ hã ma tô duré 're dâ'â za'ra, ãne wa.

³¹ Wasiré 're wasaihuri mono õ ré, wanhimirosa'rata wasédé hã wama 're hâimana za'ra mono zô, a'â wapẽ'ẽ na 'râwi 're wasi'madâ'â za'ra mono wamhã, 'Re ihâimana u'âsi mono hã te te 're wa'ahâ za'ra mono õ di za. E marĩ wa. 'Re wasiwẽ'õ za'ra mono wa, 're iwahâimana za'ra mono na, marĩ na, wa te 're i'upa za'ra mono na hã.

³² Tane nherẽ, ti'ab ré te za tô wawasédé hã te te wa'ãma 're i'awaihu'u mono zéb zarina, te te 're wa'ahâ za'ra, 'Re ihâimana u'âsi mono hã. E marĩ wa. Te te 're wa'azawi pese mono wa, taha zarina, apâ wa te ãma 're sasõmri pese za'ra mono da. Nimahã na, uburé isazei'õ'wa norĩ zu, za te te siwi wa'awẽ'õ tõ da, te za tô ãne wa, te te 're wa'ahâ za'ra, ti'ai ãma 're wanomro mono ré.

³³ Ĩsisãnawã norĩ, ãne na wa za oto aima ãma 'rãsutu za'ra wa'wa, Wanhib'apito dâ'âzém na 're asipo're pu'u za'ra wa'aba mono zéb da, asiré 're asaihuri aba mono zém na hã. Tahawa, te za a'â asisô 're asimipari za'ra wa'aba mo, aihĩni asitẽme 're aihutu aba mono wapsi, asiré ãma 're asaihuri aba mono da. Ãne hã wẽ di.

³⁴ Ni'wam norĩ hã asiré 're ihâimana za'ra wa'aba mono norĩ hã, mra te te 're simroi mono wamhã, tinhorõwa ãma si te za a'â tisa hã te te 're huri. Taha parip si, te za oto asitẽme 're aihutu aba mo, asiré 're asi'rã'õtõ aba mono da. 'Re ihâimana u'âsi mono hã te te siwi 're aiwẽ'õ za'ra wa'aba mono tõ da, te za ãne si i'uwaibaba 're i'manharĩ za'ra wa'aba mo. Nimahã na, ãma atẽme ĩmorĩ aba wapsi, wa za aimawi na aima ãma roti za'ra wa'wa, rob'ui'éré na we asiwi ĩzadanharĩ za'ra wa'aba zém na hã.