1 Corĩtu 1 - ꞌRe Ihâimana Uꞌâsi Mono Zadawa Wasuꞌu

Paulu te te idazawizé wasu'u

^1-2 Wa hã Paulu, wa ãma aima rob'ui'éré za'ra wa'wa, Corĩtu na 'ri nho'õmo nhisi ãma, 'Re ihâimana u'âsi mono nhib'a'uwẽ 're i'aihâimana za'ra wa'aba mono norĩ ma. Wasisãnawã Sotẽni hã te duré ãma asawi za'ra wa'wa. 'Re ihâimana u'âsi mono hã ma tô ĩpisutu, te te sima iwẽzéb zarina, Cristu Zezusihi zadawa wasu'u'wa, 're ĩhâimana mono da, isadawa para. A norĩ wa'aba zama, ma tô te te 're aipisutu za'ra wa'wa, isib'a'uwẽ si oto ãma 're anomro wẽ wa'aba mono da, Cristu Zezusihi ãma. Daro mono bâ, uburé Wanhib'apito Zezu Cristuhu ãma 're aiwata za'ra wa'aba mono norĩ ma zama, wa ãne aima rob'ui'éré za'ra wa'wa. Aiwa, wa tô Wanhib'apito na wa te 're sisi za'ra, simisutu.

³ Wamama ma, wa ai'ãma 're ĩmreme u'âsi za'ra wa'wa, 'Re ihâimana u'âsi mono ma, duré Wanhib'apito Zezu Cristuhu ma zama, isimizawizé hã ai'ãma 're hâimana u'âsi za'ra wa'aba mono da, taha paramhã duré rowẽ u'âsi, ãma 're anomro aba mono da.

'Re ihâimana u'âsi mono, tinhoprubzéb zarina, iwẽ si te te dama 're i'anhomri mono zé wasu'u

⁴ 'Re ihâimana u'âsi mono ãma, wa 're ĩwata u'âsi, iwẽ hã te te aima 're sõmri za'ra wa'aba mono wa, Cristu Zezusihi ãma si oto 're i'anomro aba mono zéb zarina.

⁵ Cristuhu ãma 're anomro aba mono wa, ma tô 'Re ihâimana u'âsi mono hã iwẽ si te te aima 're sõmri za'ra wa'wa. Ma tô duré te te 're aipawaptob za'ra wa'wa, iwasu'uwẽ na dama 're rowasu'u za'ra wa'aba mono da, duré 're ihâimana mono zém na, 're waihu'u pese za'ra wa'aba mono da.

⁶ Cristuhu wasu'uwẽ hã ma tô 're isazei pese za'ra wa'aba mo. Taha zarina, te oto asiptete sina ãma 're anomro aba mo.

⁷ Tahawa, Wanhib'apito Zezu Cristu apâ we imorĩzéb zô, 're asimipari za'ra wa'aba mono ré, 'Re ihâimana u'âsi mono, tinhoprubzéb zarina iwẽ hã te te aima 're isõmri za'ra wa'aba mono zéb zô, aiwi 're rowaptâ'â za'ra wa'aba mono õ di za oto.

⁸ Wanhib'apito Zezu Cristu te za duré te te 're aipawaptob u'âsi za'ra wa'wa, asiptete sina ãma 're anomro aba mono da. Nimahã bâtâ na za we apâ imorĩzéb u, tiwi 're aipizari za'ra wa'aba mono tõ da, te za te te 're aipawaptob u'âsi za'ra wa'wa, ti'ab ré Zezusi hã 're udâ za'ra wa'aba mono wa, tô taha bâtâ na aiwasédé hã te te ai'ãma sa'ra za'ra wa'aba tõ da.

⁹ 'Re ihâimana u'âsi mono hã wama umnhasi za'ra di, uburé te te wama 're i'aropisutu mono zéb zarina, te te wama ãma 're i'a'uwaimrami mono zéb da hã. Ta hã ma tô te te 're aipisutu za'ra wa'wa, i'ra siré 're anomro aba mono da, Wanhib'apito Zezu Cristuhu siré.

Isazei'wa norĩ, siwanhizari 're ihâimana za'ra mono zé wasu'u

^10-11 Ĩsisãnawã norĩ, Corowihi nhorõwa ãma 're ihâimana za'ra mono norĩ hã ma tô we ĩma aiwasu'u za'ra wa'wa, 're asisada'âbâ u'âsi za'ra wa'aba mono na hã, asiwanhizari ãma 're aihâimana za'ra wa'aba mono da. Tahawa, Wanhib'apito Zezu Cristuhu zadawa para, wa za oto aima ãma roti pese za'ra wa'wa, simisutu ãma 're asisazei pese za'ra wa'aba mono da, asiwanhizari, ãma 're aihâimana za'ra wa'aba mono tõ da. Misi haré te za oto 're ipisutu za'ra wa'aba mo, simisutu asiré ãma 're aihâimana za'ra wa'aba mono da oto.

¹² Ãne wa za aima waihu'u za'ra wa'wa. Ni'wam norĩ me asiré 're aihâimana za'ra wa'aba mono nherẽ, te ãne dama 're asiwasu'u za'ra wa'aba mo: “Wa norĩ hã Pauluhu nhimiroti si, wa za wa te 're 'madâ'â za'ra.” Duré ni'wam norĩ hã te 're siwasu'u za'ra, ãne: “Wa norĩ hã Apoluhu nhimiroti si, wa za wa te 're 'madâ'â za'ra.” Duré ni'wam norĩ hã te 're siwasu'u za'ra, ãne: “Wa norĩ hã Pedruhu nhimiroti si, wa za wa te 're 'madâ'â za'ra.” Duré ni'wam norĩ hã te ãne 're siwasu'u za'ra: “Wa norĩ hã Cristuhu nhimiroti si, wa za wa te 're 'madâ'â za'ra.” Ãne te dama 're asiwasu'u za'ra wa'aba mo, aimreme si'ahâ za'ra wa'aba na.

¹³ Tane nherẽ, Cristuhu zazei'wa norĩ hã te oto simisutu 're hâimana za'ra. Siwanhizari ãma 're hâimana waihu'u za'ra mono õ di. Baba uptabi di. E wa hã Paulu, wa tô asada ĩdâ'â za'ra wa'wa, wedepo'o nhonhi'rãmi na. Mare di. Wa hãi õ di. E ĩnhisi na ma tô â dawabzuri hã da te aima 're 'manharĩ za'ra wa'wa, Zezusihi nhisi upana. Mare di. Ĩnhisi na hãi õ di.

^14-15 Ai'rata 're ĩhâimana za'ra wa'aba mono ré, ai'ãma 're ĩnhib'a'uwẽ za'ra wa'aba mono da, te ĩsima 're aiwẽ za'ra wa'aba mono 'wa'âhã, ai'ahâ na wa aré â dawabzuri hã te aima 're 'manharĩ za'ra wa'wa, ĩnhisi na. Tane nherẽ, ai'ahâ na te aima 're ab'manharĩ aba mono õ di. Crispu norĩ ma si, wa tô â dawabzuri hã tãma 'manharĩ zahuré, Gaiuhu me. Ãne wa, wa tô 'Re ihâimana u'âsi mono ãma 're ĩwata u'âsi. Tahawa, a norĩ wa'wa hã ĩnhisi na â dawabzuri hã te aima 're i'manharĩ za'ra wa'aba mono na, dama 're asiwasu'u za'ra wa'aba mono õ di za.

¹⁶ Ãne na wa tô duré ĩsina po're puru, Estéfanasihi ma zama, â dawabzuri te i'manharĩzém na hã. Duré isõrõwa ãma isiré 're ihâimana za'ra mono norĩ ma zama, wa tô tãma 'manharĩ za'ra isiré. Ãma ĩpo're pu'u za'ra õ di oto, ni'wam norĩ ãma hã, â dawabzuri te tãma 're i'manharĩ za'ra mono zém na hã. Ta norĩ ma si, wa tô 'manharĩ za'ra.

¹⁷ Â dawabzuri hã te dama 're ab'manharĩ mono da, te te datẽme ĩzatõrĩ õ di, Cristu hã. Iwasu'uwẽ si te dama 're wasu'u mono da, ma tô datẽme ĩzatõ. Tahawa, ti'ai ãma danhimirowaihu'u na da te dama 're iroti za'ra mono nei õ di wa hã, te dama 're irowasu'u mono zé hã. Ti'ai ãma danhimirowaihu'u na Cristu te dama 're wasu'u mono 'wa'âhã, wedepo'o nhonhi'rãmi na dazada idâ'âzé wasu'u hã te aré wapu na dama 're hâimana. Tane 'wa'âhã, Cristuhu wasu'uwẽ hã marĩ dai õ di aré, da te ãma 're saze za'ra mono wa, 'Re ihâimana u'âsi mono te te ãma 're ida'anho'reptui mono da hã.

'Re ihâimana u'âsi mono waihu'u pese na rowasu'u

¹⁸ 'Re ihâimana u'âsi mono, za te te i'uprosi za'ra norĩ hã, wedepo'o nhonhi'rãmi na Cristuhu dâ'âzé wasu'u na te te ãma 're rosa'rata upa za'ra, sima, taré newa. Wa norĩ si uburé 'Re ihâimana u'âsi mono te te 're iwa'anho'reptui mono norĩ si, wa tô wa te 're waihu'u za'ra, Cristuhu dâ'âzé hã ipire na hã. Taha wasu'u hã, 'Re ihâimana u'âsi mono waihu'u pe, te wasu'u. Taha si waihu'u pese uptabi di, te te 're ida'anho'reptui mono da hã, Cristu hã dazada idâ'âzéb zarina.

¹⁹ Ãne duréihã 'Re ihâimana u'âsi mono mreme na isadawa wasu'u'wa nhimi'ui'éré hã: “Ni'wam norĩ hã ĩnhimirowaihu'u pese na te 're pawaptob za'ra mono õ nherẽ, tinhimirowaihu'u pese na 'râwi 're si'madâ'â ze za'ra mono wamhã, wa za isimirowaihu'u pese zé hã te tiwi 're a'uprosi, ta norĩ wi, ti'ab ré danhimirosa'rata waihu'u pese na 're idahâimana za'ra mono zé hã marĩ dai õ na 'râwi da te dasina 're iwaihu'u pese za'ra mono zéb da hã oto.”

²⁰ E niha tawamhã ti'ai ãma rowaihu'u pese 'wa norĩ nhimirowaihu hã. Ta hã 'Re ihâimana u'âsi mono ma hã tarére. Duré danhimiroti waihu'u nhipese na, 'râwi da te dasima ãma 're iroti za'ra mono zé hã tarére tãma hã. Uburé danhimirowaihu'u nhipese na dahâimanazé hã wapure di tãma hã, 'Re ihâimana u'âsi mono waihu'u pese ma hã. Ãne, 'Re ihâimana u'âsi mono hã tiwaihu'u pese na te te dama 're i'ab'manharĩ mono zéb zarina, wa tô waihu'u za'ra ni.

²¹ Tinhimirosa'rata waihu'u pese na ma tô 'Re ihâimana u'âsi mono hã sima pisutu, dasi'uihâ na danhimirosa'rata waihu'u pese na 'râwi da te 're waihu'u za'ra mono tõ da, 'Re ihâimana u'âsi mono hã. Zezusi hã dazada idâ'âzé wasu'u hã, wa te dama 're iwasu'u za'ra mono hã taré newa te dasima da te ãma 're rosa'rata upai u'âsi za'ra. Tane nherẽ, 'Re ihâimana u'âsi mono, ma tô sima pisutu, taha wasu'u na si te te 're anho'reptui mono da, te te sina 're i'umnhasi za'ra mono norĩ hã.

²² Zudeu norĩ hã marĩ dama i'manharĩ waihu'u'õ hã, 'Re ihâimana u'âsi mono te te 're i'ab'manharĩ mono zéb zô si, te 're sõpré. Duré zudeu'õ norĩ hã uburé marĩ te te 're iwaihu'u pese za'ra mono zéb da si, te sima te te 're wẽ u'âsi za'ra.

²³ Tane nherẽ, wa norĩ hã Cristu, wedepo'o nhonhi'rãmi na dazada idâ'âzé wasu'u si, wa tô wa te dama 're wasu'u za'ra. Tane nherẽ, ma tô taha wasu'uwẽ hã zudeu norĩ hã te te siwi 're wẽ'õ za'ra. Zudeu'õ norĩ zama ma tô duré te te sima ãma 're rosa'rata upai u'âsi za'ra, taré newa, marĩ da ihâimana õ newa, iwasu'uwẽ hã.

²⁴ Ni'wam norĩ si ma tô 'Re ihâimana u'âsi mono hã te te sima 're pisutu za'ra, tinhib'a'uwẽ da, ni'wam norĩ hã zudeu, duré ni'wam norĩ hã zudeu'õ. Ta norĩ si te Cristuhu dâ'âzé wasu'u, te te 're wapari za'ra. Tawamhã ãne hã, e marĩ te tãma wasu'u za'ra, Cristu, wedepo'o nhonhi'rãmi na idâ'âzé wasu'u hã. Danhipai u 'Re ihâimana u'âsi mono waihu'u pe, te tãma wasu'u za'ra. Duré isimiroti wẽ uptabi, te tãma wasu'u za'ra.

²⁵ 'Re ihâimana u'âsi mono nhimiroti si, danhipai u iwẽ uptabi hã tô. Duré danhipai u waihu'u pese uptabi di.

²⁶ Ĩsisãnawã norĩ, ma'ãpé asina aipo're pu'u za'ra wa'aba, 'Re ihâimana u'âsi mono, tinhib'a'uwẽ da, te te 're aipisutu za'ra wa'aba mono õ ré, 're aihâimana 'rata za'ra wa'aba mono zém na. Ai'umro wa'aba na si ma tô asiré norĩ ma, asimirosa'rata waihu'u pese na si, aré 're aihâimana za'ra wa'aba mo. Ai'umro wa'aba na si, ma tô asima aipire na aré 're aihâimana za'ra wa'aba mo. Ai'umro wa'aba na si, ma tô dama ipire norĩ 'ra na 're aihâimana za'ra wa'aba mo aré. Ai'ahâ wa'aba na ma tô dama aiwapu na dama 're aihâimana za'ra wa'aba mo.

²⁷ Tane nherẽ, ni'wam norĩ hã dama hâimana nhimiza'rese'õ na, isazei'õ'wa norĩ te te ãma 're irosa'rata za'ra mono norĩ hã ta norĩ si ma tô 'Re ihâimana u'âsi mono hã te te sima 're pisutu za'ra, isib'a'uwẽ si 're nomro mono da. E marĩ da, ma tô ta norĩ si te te sima 're pisutu za'ra, 'Re ihâimana u'âsi mono hã. Isazei'õ'wa norĩ hã simirosa'rata waihu'u pese newa 're isi'madâ'â ze za'ra mono norĩ hã, oto sisém na 're hâimana za'ra mono da. Duré isazei'õ'wa norĩ ma iwapu za'ra hã, ma tô duré te te 're pisutu za'ra, isib'a'uwẽ 're nomro mono da. Isazei'õ'wa norĩ ma, ipire za'ra hã oto sisém na 're hâimana za'ra mono da, ma tô dama iwapu norĩ si te te 're pisutu za'ra, isib'a'uwẽ 're nomro mono da.

²⁸ Isazei'õ'wa norĩ ma 're ihâimana wapu za'ra mono norĩ hã ma tô 'Re ihâimana u'âsi mono hã te te 're pisutu za'ra, isib'a'uwẽ si 're nomro mono da, isazei'õ'wa norĩ te te siwi 're iwẽ'õ pese za'ra mono norĩ hã. Isazei'õ'wa norĩ ma, pire na 're ihâimana za'ra mono zé hã te te tiwi 're a'uprosi mono da, ma tô dama iwapu norĩ si te te 're pisutu za'ra, isib'a'uwẽ si oto 're nomro mono da.

²⁹ E marĩ da, ma tô ãne hã te te dama 're ab'manharĩ, 'Re ihâimana u'âsi mono hã. Ni'wam norĩ hã tinhimirosa'rata waihu'u pese na 'râwi isõ'a, sina 're wata tõ za'ra mono da, ma tô ãne te te dama 're ab'manharĩ, duré dama pire wẽ te, 'râwi dama sina 're wata tõ za'ra mono da.

³⁰ 'Re ihâimana u'âsi mono nhimipisutuzéb zarina si, te oto Cristu Zezusihi ãma 're anomro aba mo. Cristuhu ãma si oto 're anomro aba mono wa, te tinhimirowaihu iwẽ hã te te aima 're waihu'u u'âsi za'ra wa'wa. Cristuhu dâ'âzém na si, ma tô 'Re ihâimana u'âsi mono hã te te 're wa'awẽsãmri, wawasédé hã te te oto wa'ãma 're i'ab'madâ'â mono õ zarina. Taha zarina si, ma tô duré te te 're wa'apisutu, isib'a'uwẽ si oto tãma 're wahâimana wẽ za'ra mono da. Taha zarina si, ma tô duré wawasété hawi wa'anho'reptu, sitẽme te te 're wa'awaibui mono da.

³¹ Tahawa, wa norĩ hã isazei'wa oto 're wanomro mono wa, wato sina 're iwahâimana za'ra mono zém na dama 're wasiwasu'u za'ra mono wamhã, Wanhib'apito nhimipawaptobzém na si, wa za tô dama 're wasiwasu'u wẽ za'ra, wato sina 're iwahâimana za'ra mono na hã. Duréihã 'Re ihâimana u'âsi mono zadawa 'mahârâ'wa hã ma tô ãne na ãma rob'ui'éré: “Ni'wam norĩ hã to sina oto 're hâimana za'ra mono wamhã, Wanhib'apito te te 're ipawaptob za'ra mono zém na si, te za tô dama 're siwasu'u wẽ za'ra, to sina oto 're ihâimana za'ra mono zém na hã.”