तीतस 3 - पश्चिम तामाङता ज्यब हुजु स्य्हेङो 1 सरकारतेङ् सरकारी म्हीमाइ अधीन्री टीज्यीम् थेङ्यीमाचे कुल्बल ङ्येन्थोब, ओसेम् जम्मनो ज्यबे लक् स्य्हेङ्बरी छ्येज्यीम् टीथोब पङ्बे तम् बीस्वासीमात व्हल् लपीनो। 2 थेङ्यीमाचे खेमेएनो खलइ बारेरीएनो अज्यबे तङ्मेन् लब अत ओसेम् छेत्प ब्लीङ्बएनो अत बरु ज्यबे सेम् थोज्यीम् जम्मतनो ज्यबे ब्यबहार् ङोन्थोःब। 3 तलेपङ्सम् ङोन्ग्यम् ङ्य्हङ्माएनो मुर्ख, पर्मेस्वर्त अङ्येन्बल, बराल्तीज्यीम् ब्रबल। ङ्य्हङ्मा अज्यबे सेम्तेङ् मनमोज्की बाना मुबल। ओसेम् र्होत न्होङ्न लबे सेम् थोःबतेङ् स्हेर्बल, म्हीमाचे ङ्य्हङ्त अखोबल ओसेम् ङ्य्हङ्मा न्हङ्एनो गीःचे गीःत अखोबल मुबल। 4 तर ङ्य्हङ्त मुक्ती न्हङ्बे पर्मेस्वर्चे थेङ्की दयतेङ् म्होइब ङोन्जेत्पे बेलोरी 5 ङ्य्हङ्त थर्न लजेत्ज्यी। ङ्य्हङ्माचे ज्यबे लक् स्य्हेङ्बल तज्यीम् अय्हीन् तर थेङ्चे ङ्य्हङ्त कृपा स्य्हेङ्जेत्पल तज्यीम् ङ्य्हङ्त थर्न लजेत्ज्यी। थेङ्चे ङ्य्हङ्की पापमा ख्रुजेत्ज्यीम् पबीत्र आत्मा ग्यम्से छार् जीवन न्हङ्जेत्प। 6 पर्मेस्वर्चे पबीत्र आत्मा ङ्य्हङ्त मुक्ती न्हङ्बे येसु ख्रीस्ट् ग्यम्से ङ्य्हङ्की जोरी य्हक्को ते:पीत्युजेत्ज्यी। 7 चोले ङ्य्हङ्मा थेङ्की अनुग्रहचे लज्यीम् धर्मी तज्यी, ओसेम् ङ्य्हङ्चे आस् थेन्बे खेमेएनो अबेबे जीवन्की हक्दार् तज्यी। 8 चु तम् देमेन् य्हीन्ब। पर्मेस्वर्री बीस्वास् थेन्बलमाचे ज्यबे लक् स्य्हेङ्बरी ध्यन् पीनो बी एचे आर्ले लोप्खइ पङ्बे सेम् ङल मुब। होले स्य्हेङ्ब जम्म म्हीमाइ लागीरी ज्यबतेङ् तबे तम् य्हीन्ब। 9 तर लक् अतबे तम् ज्योप्प, खेमेएनो अथुन्बे पुस्तमाइ तम्मा, ओसेम् यहुदीमाकी पेठीम्माकी बारेरी छेत्प बङ्ब ग्यम्से फेःज्यीम् टीउ। तलेपङ्सम् हुजुमा तारीएनो कोल्ब तेङ् लक् अतबे तम्मा य्हीन्ब। 10 म्हीमात थीन लबलत ङ्य्हीक्ख्यप्सम्मा चेतावनी पीनो, थेचे अङ्येन्ज्यी पङ्सम् थेतेङ् तइ लकएनो थस्य्हेङो। 11 एचे स्येःबल मुब, चोतेबे म्हीमा देमेन्की तम्त बीस्वास् अलबे पापी य्हीम्ब। थेङ्यीमाकी पापचेनो थेङ्यीमात दोसी ङोन्ब। ज्युःकी सल्लह 12 अर्तीमसतेङ् तुखीकस् ङ्य्हीरी खल पङ्लेनो गीःत ङचे एज पीत्खब साच्चेनो ए ङत खतु लबरी खले लज्यीम् पङ्लेनो नीकोपोलीस लीङ्स्री खोउ। तलेपङ्सम् चु सेर्क ल ङचे हुजुरीनो टीबे सेम् लबल मुब। 13 ओसेम् एचे जीनास पङ्बे वकीलतेङ् अपोल्लोस् पङ्बे र्हो ङ्हीत ग्यम्री ब्रबे बेलोरी तोःबे जम्मनो स्हेमा पीन्ज्यीम् र्हो लपीनो। 14 ओसेम् ङ्य्हङ्की म्हीमाचे तोःबे म्हीमात पीन्ज्यीम् ज्यबे लक् स्य्हेङ्ब लोप्थोब। थेङ्यीमा ज्यबे लक् अस्य्हेङ्नले टीब अत। 15 ओसेम् ङतेङ् मुबलमा जम्मचेनो एत लस्सो पीत्खबल मुब। हुजुरी मुबे ङ्य्हङ्मात म्होइबे र्होमाएनो गोदोब्त ङ्यीमा ग्यम्से लस्सो पङ्पीनो। पर्मेस्वर्की अनुग्रह एङ्यीमा जम्मतेङ् तखइ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.