तीतस 2 - पश्चिम तामाङदेमेन्की तम् लोप्पे बारेरी 1 तर एचेम् देमेन्की फ्रोइरी मुबे तम् लोप्थोब। 2 खेक्प म्हीमा सान्त तथोब, स्य्हेस यङ्बरी जेःनले ब्रथोब, र्हङ्चे र्हङ्त दुल्थोब, पर्मेस्वर्री बीस्वासी तथोब, ओसेम् म्होइबतेङ् नाप खम्बल तथोब बी लोपो। 3 होलेनो खुयु अममात पर्मेस्वर्त स्य्हेस स्य्हेङ्ज्यीम् ब्रबरी लोपो। ओसेम् थेङ्यीमाचे अज्यबे तङ्मेन् पङ्ब अत, य्हक्को ज्यी थुङ्ब अत ओसेम् ज्यबे तम्मा लोप्थोब बी कुलो। 4 चोले थेङ्यीमाचे छमे अमकोलमात र्हङ्की र्हेम्बोतेङ् कोलमात म्होइथोब बी लोप्प खम्स्ये मुब। 5 ओसेम् थेङ्यीमाचे र्हङ्चे र्हङ्त दुल्थोब, पबीत्र तथोब, दयलु तथोब ओसेम् दीम् नम् ज्यनले जुःज्यीम् र्हङ्की र्हेम्बोइ अधीन्री टीथोब बी लोपो। होले स्य्हेङ्ज्यी पङ्सम् खल्चेएनो पर्मेस्वर्की फ्रोइकी बीरोद् लस्ये अरे। 6 होलेनो ब्योन् म्हीमात र्हङ्चे र्हङ्त दुल्थोब बी आर् पीन्ज्यीम् लोपो। 7 जम्मनो तम्मारी ए नमुन तज्यीम् र्हङ्चे र्हङ्तनो ङोनो, ए र्हङ्चे लोप्पे तम्री इमान्दार्तेङ् स्य्हेस यङ्बरी जेःनले ब्रथोब। 8 ओसेम् खल्चेएनो थाप अखम्बे देमेन्की फ्रोइ लोपो। हुजु लीप्चे ङ्य्हङ्की बारेरी अज्यब तएनो पङ्ब अखम्ज्यीम् ङ्य्हङ्की तम्की बीरोद् लबलमा पेत्स्ये मुब। 9 जम्मनो तम्री र्हङ्की न्याबोमाकी अधीन्री टीज्यीम् न्यबोमात तङ्न लउ पङ्ज्यीम् बानमात लोपो। थेङ्यीमाचे न्याबोमातेङ् सुङ् ताब अत। 10 ओसेम् थेङ्यीमाचे न्याबोमाकी स्हेः तएनो य्हो लब अत। बरु खेम पङ्लेनो ज्यब स्य्हेङ्ज्यीम् न्याबोचे थेङ्यीमात पतइतीबल तथोब। चोले थेङ्यीमाचे जम्मनो लक्री ङ्य्हङ्त मुक्ती न्हङ्बे पर्मेस्वर्की बारेरी लोप्पे तम् ज्यब बी ङोन्स्ये मुब 11 तलेपङ्सम् जम्म म्हीमात मुक्ती न्हङ्बे लागीरी पर्मेस्वर्चे र्हङ्की अनुग्रह ङोन्जेत्पल मुब। 12 चु अनुग्रहचे ङ्य्हङ्त पर्मेस्वर्त सेम्री अङ्यीबे लक्तेङ् जम्बुलीङ्की स्हेःत म्होइज्यीम् थेङ्त तङ्न अलबे लक् स्य्हेङ्ब पीत्प लोप्प। ओसेम् चु अनुग्रहचे जम्बुलीङ्री र्हङ्चे र्हङ्त दुल्ज्यीम् ठीक् न्याय स्य्हेङ्बतेङ् पर्मेस्वर्त सेम्री ङ्यीबे ब्यबहार् स्य्हेङ्ज्यीम् ब्रब लोप्प। 13 ओसेम् ङ्य्हङ्माचे आस् लबे मोलम् यङ्बे दीन् ब्रेन्टीब। हुजु दीन् ङ्य्हङ्की ङ्हच्छ्यङ् पर्मेस्वर्तेङ् ङ्य्हङ्त मुक्ती न्हङ्बे येसु ख्रीस्ट्की महीमा म्रङ्स्ये मुब। 14 येसु ख्रीस्ट्चे ङ्य्हङ्मात जम्मनो थोइ पाप ग्यम्से फेःपीन्जेत्परी र्हङ्की बुः न्हङ्न्जेत्ज्यी। थेङ्चे ङ्य्हङ्मात चोखो स्य्हेङ्जेत्परी र्हङ्की म्ही स्य्हेङ्जेत्ज्यी, ओसेम् ङ्य्हङ्मात ज्यबे लक् स्य्हेङ्बरी आर् पीन्बे लागीरी चोले स्य्हेङ्जेत्ज्यी। 15 एचे चु तम्मा बीस्वासीमात लोपो, अधीकार् लज्यीम् आर् पीनो ओसेम् बराको। खल्चेएनो एत हेल अलखइ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.