तीतस 1 - पश्चिम तामाङ1 ङ पावल पर्मेस्वर्की योक्पो ओसेम् येसु ख्रीस्ट्की प्रेरीत ग्यम्से चु चीठी ब्रीटीब। पर्मेस्वर्चे दम्जेत्पलमाचे पर्मेस्वर्त तङ्न लबे ब्यबहार् स्य्हेङ्खइ पङ्ज्यीम् थेङ्यीमाकी बीस्वास् कोङ्न लबरी ओसेम् थेङ्यीमात पर्मेस्वर्की देमेन्की बारेरी लोप्परी ङत थेङ्चे दम्जेत्पल य्हीन्ब। 2 हुजु देमेन्चे पर्मेस्वर्की म्हीमातेङ् खेमेएनो अबेबे जीवन मुब पङ्ज्यीम् आस् पीन्ब। ओसेम् खेमेनो भ्यु असुङ्बे पर्मेस्वर्चे जम्बुलीङ् ठुङ्ब बीमा ङोन्ग्यम्नो हुजु जीवन न्हङ्ब बी बाचा स्य्हेङ्जेत्पल मुबल। 3 ओसेम् थेङ्चे तेत् लजेत्पे बेलोरीनो थेङ्चे र्हङ्की ज्यबे सम्तर् ङोन्जेत्ज्यी। चु ज्यबे सम्तर् स्येत्पे जीम्मा ङ्य्हङ्त मुक्ती न्हङ्बे पर्मेस्वर्चे कुल्जेत्प र्हङ्लेनो ङत न्हङ्जेत्ज्यी। 4 ङतेङ् थो गीःरीनो बीस्वास् स्य्हेङ्बे ङइ देमेन्की ज र्हङ्बे तीतसत चु चीठी ब्रीटीब। पर्मेस्वर् अपतेङ् ङ्य्हङ्की मुक्तीदाता येसु ख्रीस्ट्चे एत अनुग्रहतेङ् सान्ती न्हङ्खइ। क्रेट टापुरी तीतसकी लक् 5 क्रेट टापुरी अबुत्पे लक् बुत्न लबरी ङचे एत हुजुरीनो ख्लेथेन्ज्यी, ङचे एत पङ्ब र्हङ्लेनो लीङ्स र्हङ्स्यीनो मन्डलीइ एल्डरमा दम्ज्यीम् थेनो। 6 हुजु एल्डर्माम् तइ दोस्एनो अरेबल तथोब, थेङ्यीमा म्रीङ् काकर्कीनो भ्या स्य्हेङ्बे म्हीमा तथोब, थेङ्यीमाकी कोलमा बीस्वासी तथोब, ओसेम् अज्यबे बानी बेहोर् अरेबलतेङ् अप अमइ तम् ङ्येन्बे कोलमा तथोब। 7 मन्डलीइ एल्डर्चे पर्मेस्वर्की लक्की जीम्मा कीन्बल तब, होत्तज्यीम् थे तारीएनो दोस् अरेबे म्ही तथोब। थे र्हङ्चे र्हङ्त ङ्हच्छ्यङ् म्हेन्बे म्ही, ग्योने बोमो रप्पे म्ही, ज्यी थुङ्बे म्ही, र्होतेङ् अथुन्बे म्ही, ओसेम् अज्यबे लक् स्य्हेङ्ज्यीम् टङ छाबरी लोभ लबे म्ही तब अत। 8 तर थे डोम्बोमात स्य्हेस स्य्हेङ्बे म्ही, ज्यबे लक् स्य्हेङ्बरी तङ्बे म्ही, र्हङ्चे र्हङ्त दुल्बे म्ही, ज्यनले न्याय स्य्हेङ्बे म्ही, पबीत्र म्ही ओसेम् अनुसासन्री टीबे म्ही तथोब। 9 थेत लोप्पे बीस्वास् स्य्हेङ्ब खम्बे देमेन्की फ्रोइत थेचे कोङ्नले बीस्वास् स्य्हेङ्थोब। ओसेम् ङ्य्हङ्माचे थेत लोप्प र्हङ्लेनो थेचेएनो ल्हो-ल्होत देमेन्की फ्रोइ ज्यनले लोप्ज्यीम् आर् पीन्ब खम्थोब, ओसेम् हुजु फ्रोइत बीरोद् स्य्हेङ्बलमाकी तम् भ्यु य्हीन्ब बी ङोन्पीन्ब खम्थोब। 10 तलेपङ्सम् य्हक्को म्हीमा र्होइ अधीन्री अटीबलमा, अतोःबे तम् लबलमा ओसेम् लुबलमा तब। होतेबमा न्हङ्रीएनो झेन् मुक्ती यङ्बे लागीरी खतना स्य्हेङ्थोब पङ्बलमा मुब। 11 थेङ्यीमाकी सुङ् म्रुथोःब, तलेपङ्सम् थेङ्यीमाचे टङ छाबे लागीरीकीनो लोप्पनो अतबे तम्मा लोप्ज्यीम् दीम्की जम्मनो म्हेम्यमात अथुन्न लबल मुब। 12 क्रेट टापुइ म्हीमाकी ङ्हच्छ्यङ् लोप्पोन् गीःचे पङ्बल मुब, “क्रेटकी म्हीमा खेमा पङ्लेनो भ्यु पङ्ब, र्हीइ सेम्ज्येन्मा र्हङ्ब तब, ओसेम् चपकीनो चबे ब्लेकुमा तब।” 13 चु तम् देमेन् य्हीन्ब। होत्तज्यीम् थेङ्यीमाकी बीस्वास् कोङ्खइ पङ्ज्यीम् बङ्ले बराको। 14 ओसेम् देमेन्त अङ्येन्बे म्हीमाचे कुल्बे अर्तीतेङ् यहुदीमाकी दङ्बोइ अर्तमा थेङ्यीमाचे ङ्येन्बनो अत। 15 सुद्द म्हीमाकी लागीरी जम्मनो स्हेःमा सुद्द तब। तर असुद्दतेङ् बीस्वास् अस्य्हेङ्बलमाकी लागीरी तएनो सुद्द अत, तलेपङ्सम् थेङ्यीमाकी सेम्तेङ् थेङ्यीमाचे म्हेन्बे तम् दुस्ट तब। 16 होलेतलेनो थेङ्यीमाचे पर्मेस्वर्त स्येःब पङ्ब, तर थेङ्यीमाकी लक् ग्यम्चेम् पर्मेस्वर्त इन्कार् स्य्हेङ्ब। थेङ्यीमाम् नइबतेङ् कुल्बे तम् अङ्येन्बलमा तब, ओसेम् तएनो ज्यबे लक् स्य्हेङ्बरी अजेःबल तब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.