रोमी 9 - पश्चिम तामाङपर्मेस्वर्चे दम्जेत्पे जाती 1 देरे ङ ख्रीस्ट्ल य्हीन्ब, ओसेम् ङचे भ्यु अपङ्। पबीत्र आत्माइ अधीन्री मुबे ङइ बीबेक्चेएनो ङचे भ्यु अपङ् पङ्बे साक्षी पीन्ब। होत्तज्यीम् ङचे पङ्ब छ्येटीबे तम् देमेन् य्हीन्ब। 2 ङइ एस्राएली म्हीमाकी लागीरी ङइ सेम्री ङ्हच्छ्यङ् दुखतेङ् खेमेएनो अबेबे पीर् मुब। 3 ङचे ख्रीस्ट् ग्यम्से थारीङ् तबे केम्लङ् नाज्यीम् ङइ इस्रएली म्हीमाचे थर्ब यङ्ब खम्सम् ङ हुजु केम्लङ् नाबे सेम् लस्ये मुबल। 4 थेङ्यीमा इस्रएलीमा य्हीन्ब, पर्मेस्वर्चे थेङ्यीमात र्हङ्की ज जमेमा स्य्हेङ्जेत्ज्यी। थेङ्चे र्हङ्की महीमा थेङ्यीमात ङोन्जेत्ज्यी, थेङ्यीमातेङ् करार्मा स्य्हेङ्जेत्ज्यी, थेङ्यीमात मोसाचे ब्रीबे पर्मेस्वर्की नीयम् न्हङ्जेत्ज्यी, थेङ्त तेन्ब लोप्पीन्जेत्ज्यी, ओसेम् थेङ्यीमाचे पर्मेस्वर्की बाचामा यङ्ज्यी। 5 इस्रएलीमा ङ्य्हङ्की म्हेम्हेमा अब्राहाम, इसहाक्तेङ् याकुबकी ज जमेमा य्हीन्ब। ख्रीस्ट्एनो चु खलक् न्हङ्रीनो न्हजेत्ज्यी। थेङ्मी जम्मइ जोरी सासन् स्य्हेङ्जेत्पे पर्मेस्वर् य्हीन्ब। थेङ्त खेम पङ्लेनो तोप्प तस्यीनोटीखइ! आमेन्। 6 तर पर्मेस्वर्चे इस्राएलीमात स्य्हेङ्जेत्पे बाचा टोप् अतबलमी अय्हीन्, तलेपङ्सम् इस्रएल्की खलक्री न्हज्यी पङ्मम् जम्मनो इस्रएलीमा पर्मेस्वर्की म्ही तब अखम्। 7 तलेपङ्सम् अब्रहामकी जम्मनो ज जमेमा थेइ देमेन्की ज जमेमा अय्हीन्, तलेपङ्सम् पर्मेस्वर्चे अब्रहाम्त सुङ्जेत्ज्यी, “एइ ज इसहाक् ग्यम्से न्हस्येकी ज जमेकीनो एइ ज जमेमा तस्ये मुब।” 8 चु पङ्बलमी अब्रहामकी ल्हीः ग्यम्से न्हबे जम्मनो ज जमेमा पर्मेस्वर्की ज जमेमा अय्हीन्, तर पर्मेस्वर्चे न्हङ्जेत्प बी बाचा स्य्हेङ्जेत्पे ज जमेमाकीनो अब्रहामकी ज जमेमा य्हीन्ब। 9 तलेपङ्सम् पर्मेस्वर्चे चोले बाचा स्य्हेङ्जेत्पल मुबल, “गुरीङ् चु बेलोरीनो ङ दोःज्यीम् खस्ये मुब, ओसेम् हुजु बेलोरी साराचे ज गीः न्हज्यीन्बल तस्ये मुब।” 10 चोदेकीनो अय्हीन्, रीबेकाचेएनो ङ्य्हङ्की म्हेम्हे इसहाक् ग्यम्सेनो जउले ज ङ्य्ही न्हज्यी। 11-13 तर जउले कोल ङ्य्ही अमइ फोन्हङ् मुमनो, थेङ्य्हीचे ज्यबतेङ् अज्यब स्य्हेङ्ब बीम ङोन्नो, पर्मेस्वर्चे जउले ङ्य्ही न्हङ्री गीःत दम्जेत्ज्यीम् रीबेकात, “अज्योचेमी अलेइ सेव स्य्हेङ्स्ये मुब” बी सुङ्जेत्ज्यी। पर्मेस्वर्चे सुङ्जेत्प र्हङ्ले धर्म छ्येःरी, “ङचे याकुब्त म्होइज्यी, तर एसाब्त हेल लज्यी” बी ब्रीबल मुब। चोले पर्मेस्वर्चे दम्जेत्पे लक् म्हीमाकी लक् च्याज्यीम् अय्हीन् तर थेङ्की थुः अनुसार् थेङ्चे दम्जेत्प बी थेङ्चे पक्क लजेत्ज्यी। 14 होलेपङ्सम् ङ्य्हङ्माचे ता पङ्स्ये? पर्मेस्वर्चे अन्याय स्य्हेङ्जेत्ज्यी स्यीम्? होतेब अय्हीन्! 15 तलेपङ्सम् पर्मेस्वर्चे मोसत सुङ्जेत्ज्यी, “ङचे खलमात क्रीपा स्य्हेङ्गे म्हेन्ब, ङ हुजुमात क्रीपा स्य्हेङ्स्ये मुब, ओसेम् ङचे खलमात दय स्य्हेङ्गे म्हेन्ज्यी, ङ हुजुमात दय स्य्हेङ्स्ये मुब।” 16 होत्तज्यीम् पर्मेस्वर्की कृपा म्हीचे म्हेन्ब वुइ लक् स्य्हेङ्ब अनुसार अय्हङ्, तर पर्मेस्वर्चे र्हङ्की क्रीपा खल्त ङोन्बे थुःलजेत्प हुजुचेनो यङ्ब। 17 तलेपङ्सम् धर्म छ्येःचे मीस्र य्हुल्की ग्यल्बो फारोइ बारेरी चोले पङ्ब, “ङचे एत ङइ सक्ती ङोन्बरी ओसेम् ङइ मीन् जम्बुलीङ्की जम्मनो ग्लामारी ठम्बरी ग्यल्बो स्य्हेङ्ज्यी।” 18 होले तज्यीम् पर्मेस्वर्चे खलमात क्रीपा स्य्हेङ्बे थुः लजेत्प हुजुमात क्रीपा स्य्हेङ्जेत्प, ओसेम् खलमाकी सेम् कोङ्न लबे थुः लजेत्प हुजुमाकी सेम् कोङ्न लजेत्प। सेप्रइ तङ्लोतेङ् हुजुत स्य्हेङ्बे म्ही 19 खल्चे पङ्लेनो ङत पङ्ल, “होले पङ्सम् पर्मेस्वर्चे तले म्हीत दोस् ल्हइदीजेत्प? तलेपङ्सम् थेङ्की थुःत खल्चे र्होद्प खम्ब स्यीम्?” 20 ओ म्ही, पर्मेस्वर्तेङ् सुङ् ताबल ए खल य्हीन्ब? ता सेप्रकी तङ्लोचे थेत स्य्हेङ्बे म्हीत “एचे तले ङत चोले स्य्हेङ्बल” पङ्ब स्यीम्? 21 सेप्रचे तङ्लो स्य्हेङ्बे म्हीचे थेचे र्हङ्चे म्हेन्ब अनुसार्की तङ्लोमा स्य्हेङ्ब। ज्योप्पे सेप्प्रइ बो गीःचे थो ङ्य्हीकी तङ्लो स्य्हेङ्ब, गीः य्हक्को स्य्हेस यङ्बे लक्री कोल्बरी, गी चेक् स्य्हेस यङ्बे लक्री कोल्बरी स्य्हेङ्ब। 22 होलेनो पर्मेस्वर्तएनो र्हङ्की बोमोतेङ् सक्ती ङोन्जेत्पे हक् मुब, तर थेङ्त बोमो रप्न लबे, नास् लबरी जेःबे म्हीमातएनो थेङ्चे य्हक्को नाजेत्ज्यीम् स्य्हुज्यी। 23 ओसेम् थेङ्चे ङ्य्हङ्मात य्हक्को ङ्हच्छ्यङ् महीमाकी सम्पती ङोन्जेत्पे थुः लजेत्ज्यी। ङ्य्हङ्मा थेङ् ग्यम्से क्रीपा यङ्बे तङ्लो तज्यी। थेङ्चे ङोन्ग्यम्नो ङ्य्हङ्मात थेङ्की ङ्हच्छ्यङ् महीमाकी लागीरी टोप् लजेत्पल मुब। 24 तलेपङ्सम् थेङ्चे ङ्होत्जेत्पे ङ्य्हङ्मात यहुदी म्हीमा न्हङ्सेकीनो अय्हीन् तर यहुदी अय्हीन्बे म्हीमा न्हङ्सेएनो ङ्होत्जेत्ज्यी। 25 पर्मेस्वर्चे सुङ्जेत्पे तम् होसे पङ्बे अगम्बक्तचे चोले ब्रीब, “थेङ्यीमा ङोन्ग्यम् ङइ म्हीमा अय्हीन्बल मुलेएनो ङ थेङ्यीमात ‘ङइ म्हीमा’ पङ्ज्यीम् ङ्होत्स्ये मुब। ङचे ङोन्ग्यम् अम्होइबलमात ङचे म्हइस्ये मुब।” 26 “ओसेम् खजु ग्लारी थेङ्यीमात ‘एङ्यीमा ङइ म्हीमा अय्हीन्’ बी पङ्बल मुबल, हुजुरीनो थेङ्यीमात ‘एङ्यीमा सोम्बो पर्मेस्वर्की ज जमे य्हीन्ब’ बी पङ्बल तस्ये मुब।” 27 ओसेम् यसैया अगम्बक्तचे इस्रएल्की बारेरी चोले केत् ङ्हच्छ्यङ् तेत्ज्यीम् पङ्ब, “इस्रएल्की म्हीमा समुन्द्रइ बल्व गते मुलेएनो, थेङ्यीमा न्हङ्री चेक्कीनो थर्स्ये मुब। 28 तलेपङ्सम् प्रभुचे जम्बुलीङ्त सजाय न्हङ्बे लक् ग्योनेनो टोप् लजेत्स्ये मुब।” 29 यसैयाचे चु अगम्बानीएनो लबल मुब, “सक्तीसाली परमप्रभुचे ङ्य्हङ्माकी लागीरी कोइ कोइ सन्तानमात अख्लेथेन्जेत्पल य्हीन्सम् ङ्य्हङ्मा सदोम् सहर् र्हङ्ले नास् तस्येल, ओसेम् गमोरा सहर् र्हङ्ले नास् तस्येल।” इस्रएल्की अबीस्वास् 30 देरेम् ङ्य्हङ्मा ता पङ्स्ये? यहुदी अय्हीन्बे म्हीमाचेमी पर्मेस्वर्की ङोन्री धर्मी तब अम्हइ, तर बीस्वास् ग्यम्से थेङ्यीमा धर्मी तज्यी। 31 तर इस्राएलीमाचेमी मोसाचे ब्रीबे नीयम् ङ्येन्ज्यीम् पर्मेस्वर्की ङोन्री धर्मी तब म्हइलेनो थेङ्यीमा धर्मी तअखम्। 32 तले तब अखम्? तलेपङ्सम् थेङ्यीमाचे बीस्वास् अस्य्हेङ्नले लक्माकीनो स्य्हेङ्ज्यीम् पर्मेस्वर्की ङोन्री धर्मी तब म्हइब मुबल। थेङ्यीमा थोक्पे युङ्बरी थोक्ज्यीम् गुर्बल मुब। 33 धर्म छ्येःरी ख्रीस्ट्की बारेरी चोले ब्रीबल मुब, “च्याको, ङ सीयोन्री युङ्ब गी थेन्ब, हुजुरी म्हीमा थोक्प, थेङ्री थोक्ज्यीम् म्हीमा गुर्स्ये मुब, तर थेङ्री बीस्वास् स्य्हेङ्बे म्हीमामी पेत्थोस्ये अरे।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.