रोमी 8 - पश्चिम तामाङपबीत्र आत्मा ग्यम्से यङ्बे जीवन् 1 होत्तज्यीम् देरेम् येसु ख्रीस्ट्री तबलमात दोस् ङोन्अजेत्। 2 येसु ख्रीस्ट् ग्यम्से जीवन् न्हङ्बे आत्माइ सक्तीचे ङ्य्हङ्मात पाप्तेङ् स्यीबइ सक्ती ग्यम्से फेःपीन्जेत्पल मुब। 3 म्हीइ पाप स्वभाब्चे लज्यीम् मोसाचे ब्रीबे नीयम्चे म्हीमात पाप् ग्यम्से फेःपीन्ब अखम्बे लक् पर्मेस्वर्चे स्य्हेङ्जेत्ज्यी। पर्मेस्वर्चे र्हङ्की जत पापी स्वभाब् मुबे म्हील र्हङ्बे ल्हीःरी पीत्युजेत्ज्यी। ओसेम् म्हीइ पाप्की लागीरी थेङ्त सजाय न्हङ्जेत्ज्यी, ओसेम् थेङ्की ल्हीः ग्यम्से पाप्की सक्तीत नास् स्य्हेङ्जेत्ज्यी। 4 होत्तज्यीम् देरेम् ङ्य्हङ्माचे पर्मेस्वर्की नीयम्चे पङ्बे तम् टोप् लब खम्ब, तलेपङ्सम् ङ्य्हङ्मा ल्हीःकी पाप् स्वभाव अनुसार अय्हीन् तर पबीत्र आत्मा अनुसार सोब। 5 खल पङ्लेनो र्हङ्की ल्हीःकी पाप् स्वभाब अनुसार सोबे म्हीचे ल्हीःकी पाप् स्वभाब्चे म्हेन्बे तम्री सेम् पीन्ब, तर पबीत्र आत्मा अनुसार् सोबे म्हीचे आत्माचे म्हेन्बे तम्री सेम् पीन्ब। 6 ल्हीःकी पाप् स्वभाब्चे म्हेन्बे तम्री सेम् पीन्बमी स्यीबरी दोःब य्हीन्ब, तर पबीत्र आत्माचे म्हेन्बे तम्री सेम् पीन्बमी खेमेनो अबेबे जीवन्तेङ् सान्तीरी दोःब य्हीन्ब। 7 ल्हीःकी पाप् स्वभाब् अनुसार ब्रबे म्हीम् पर्मेस्वर्की बीरोधी तब, तलेपङ्सम् थेचे पर्मेस्वर्की नीयम् ङ्येन्बल अत ओसेम् थेचे ङ्येन्बएनो अखम्। 8 ल्हीःकी पाप् स्वभाब् अनुसार ब्रबे म्हीचे पर्मेस्वर्त तङ्न लब अखम्। 9 पर्मेस्वर्की आत्मा एङ्यीमातेङ् देमेन्नो स्य्हुजेत्पल य्हीन्सम् एङ्यीमा र्हङ्की ल्हीःकी पाप् स्वभाब्की अधीन्री अय्हीन् तर पबीत्र आत्माइ अधीन्री तब। खल्तेङ् पङ्लेनो ख्रीस्ट्की आत्मा अरेसम् थे ख्रीस्ट्ल अय्हीन्। 10 तर ख्रीस्ट् एङ्यीमातेङ् मुज्यी पङ्सम् पाप्चे लज्यीम् एङ्यीमाकी ल्हीः स्यीथोलेनो पर्मेस्वर्की ङोन्री धर्मी ठार्तीबल तज्यीम् पबीत्र आत्मा ग्यम्से एङ्यीमा सोस्ये मुब। 11 येसुत स्यीब ग्यम्से सोन लजेत्पे पर्मेस्वर्की आत्मा एङ्यीमातेङ् स्य्हुजेत्पल मुसम्, पर्मेस्वर्चे एङ्यीमातेङ् स्य्हुजेत्पे थेङ्की आत्मा ग्यम्से ख्रीस्ट्त सोन लजेत्प र्हङ्ले एङ्यीमाकी स्यीबे ल्हीःतएनो सोम्बो तन लजेत्स्ये मुब। 12 होत्तज्यीम् ङइ र्होमा, ङ्य्हङ्माचे ङ्य्हङकी ल्हीःकी पाप् स्वभाब्चे म्हेन्ब र्हङ्ले सोनोथोब पङ्बे तम् अरे। 13 तलेपङ्सम् एङ्यीमा ल्हीःकी पाप् स्वभाब्चे म्हेन्ब अनुसार ब्रसम् एङ्यीमा स्यीस्ये मुब, तर एङ्यीमाचे आत्माइ सक्ती ग्यम्से ल्हीःकी पाप् लक्मात नास् लज्यी पङ्सम् एङ्यीमा सोस्ये मुब। 14 पर्मेस्वर्की आत्माचे ङोन्जेत्पे ग्यम्चे ब्रबलमा पर्मेस्वर्की ज जमेमा य्हीन्ब। 15 तलेपङ्सम् ङ्य्हङ्मात देबेनो बाना स्य्हेङ्ज्यीम् लोङ्बरी थेन्बे आत्मा अय्हीन् तर ङ्य्हङ्मात पर्मेस्वर्की ज जमे तन लबे आत्मा ङ्य्हङ्माचे यङ्बल मुब, होत्तज्यीम् ङ्य्हङ्माचे पर्मेस्वर्त “अब्बा, अप” पङ्ज्यीम् ङ्होत्प। 16 पबीत्र आत्माचेनो ङ्य्हङ्मा पर्मेस्वर्की ज जमे य्हीन्ब बी ङ्य्हङ्माकी आत्मत गबही न्हङ्जेत्प। 17 ओसेम् ङ्य्हङ्मा थेङ्की ज जमे तबल तज्यीम् हक् यङ्बलमाएनो य्हीन्ब। देमेन्नो, ङ्य्हङ्मा ख्रीस्ट्तेङ् बक्च्य पर्मेस्वर्की महीमीत् हक् यङ्स्येलमा य्हीन्ब। तलेपङ्सम् ङ्य्हङ्माचे ख्रीस्ट्तेङ् बक्च्य दुख नासम् ङ्य्हङ्माचेएनो थेङ्तेङ् बक्च्य थेङ्की महीमा यङ्स्ये मुब। लीक्यम् यङ्स्येकी महीमा 18 ङचे स्येःब, चु जीवन्री ङ्य्हङ्माचे नाबे दुखमामी ङ्य्हङ्मात लीक्यम् पर्मेस्वर्चे ङोन्जेत्स्येकी महीमातेङ् व्हबरी जेबल अरे। 19 पर्मेस्वर्चे थेङ्की ज जमे ङोन्जेत्पे दीन् च्याबरी पर्मेस्वर्चे स्य्हेङ्जेत्पलमा जम्मनो य्हक्को सेम् लज्यीम् ब्रेन्टीबल मुब। 20 तलेपङ्सम् थेङ्चे स्य्हेङ्जेत्पलमा लक् अतबल तबल मुबल। थेङ्यीमा चोले र्हङ्की सेम्चे म्हेन्ज्यीम् लक् अतबल तबल अय्हीन्ब मुबल, तर पर्मेस्वर्चे स्य्हेङ्जेत्पलमाचे आस् थेन्स्यीनो टीखइ पङ्ज्यीम् पर्मेस्वर्चेनो चोले स्य्हेङ्जेत्पल मुबल। 21 हुजु आस्मी पर्मेस्वर्चे स्य्हेङ्जेत्पलमाएनो क्रम्ब ग्यम्से तीरेत् छुट्कारा यङ्ज्यीम् पर्मेस्वर्की ज जमेइ महीमीत् छुट्कारा यङ्स्ये मुब। 22 तलेपङ्सम् ङ्य्हङ्माचे स्येःब, जम्मनो पर्मेस्वर्चे स्य्हेङ्जेत्पलमा देरेसम्म कोल न्हबे बेलोरी अमकोल पोतोक् पोतोक् तब र्हङ्ले तटीब। 23 तर पर्मेस्वर्चे स्य्हेङ्जेत्पलमाकीनो अय्हीन्, ङ्य्हङ्माएनो न्हङ्न्हङ्री दुखचे पोतोक् पोतोक् तटीब। लीक्यम् न्हङ्जेत्स्येकी महीमाकी ङोन्ग्यम्की रोरो पबीत्र आत्मा ङ्य्हङ्माचे यङ्बल मुब। होलेतलेनो ङ्य्हङ्माएनो खेमा थेङ्चे ङ्य्हङ्मात थेङ्की ज जमे स्य्हेङ्जेत्प ओसेम् जम्मनो अज्यबे लक्मा ग्यम्से ङ्य्हङ्माकी ल्हीःत छुटकारा न्हङ्ब बी ब्रेन्ज्यीम् टीटीब। 24 तलेपङ्सम् ङ्य्हङ्मात चु ङ्हच्छ्यङ् आसाइ लागीरी पर्मेस्वर्चे थर्नलजेत्पल य्हीन्ब। आसा पङ्बलमी ङ्य्हङ्माचे अम्रङ्बे स्हेःकी लागीरी ब्रेन्ब य्हीन्ब। खल म्हीचेएनो ङोन्ग्यम्नो यङ्ज्यीन्बे स्हेःकी आसा अथेन्। 25 तर ङ्य्हङ्माचे देरेसम्म अम्रङ्बे स्हेःकी आसा थेन्ज्यी पङ्सम् ङ्य्हङ्माचे हुजुइ लागीरी धैर्यले ब्रेन्ब। 26 होलेनो ङ्य्हङ्मा बीस्वास्री कम्जोर् तबे बेलोरी पबीत्र आत्माचे र्हो लजेत्प। खले प्रार्थना स्य्हेङ्थोब ङ्य्हङ्माचे अस्ये तर पबीत्र आत्माचे य्हक्को कस्ट नाज्यीम् छीःमारी पङ्ब अखम्बे तम्री ङ्य्हङ्माकी लागीरी प्रार्थना स्य्हेङ्पीन्जेत्प। 27 म्हीमाकी सेम् खेम्जेत्पे पर्मेस्वर्चे पबीत्र आत्माचे ता सुङ्जेत्प बी खेम्जेत्प, तलेपङ्सम् पर्मेस्वर्की थुः अनुसार् पबीत्र आत्माचे बीस्वासीमाकी लागीरी फ्या लपीन्जेत्प। 28 ओसेम् ङ्य्हङ्माचे स्येःब, पर्मेस्वर्त म्होइबतेङ् थेङ्की थुः टोप् लबरी थेङ्चे ङ्होत्जेत्पे जम्मनो म्हीइ लागीरी जम्मनो तम्मारी पर्मेस्वर्चे ज्यब स्य्हेङ्जेत्प। 29 ख्रीस्ट् य्हक्को अले अङमाइ अज्यो ग्रेन् तखइ पङ्ज्यीम् पर्मेस्वर्चे ङोन्ग्यम्नो खेम्जेत्पलमात र्हङ्की ज र्हङ्ब तबरी दम्जेत्ज्यी। 30 पर्मेस्वर्चे ङोन्ग्यम्नो दम्जेत्पलमात ङ्होत्एनो ङ्होत्जेत्ज्यी, ङ्होत्जेत्पलमात थेङ्की ङोन्री धर्मीनो ठार्तीजेत्ज्यी, ओसेम् धर्मी ठार्तीजेत्पलमात स्य्हेसएनो न्हङ्जेत्ज्यी। येसु ख्रीस्ट्री पर्मेस्वर्की म्होइब 31 होत्तज्यीम् ङ्य्हङ्माचे चु तम्माकी बारेरी ता पङ्स्ये स्यीम्? पर्मेस्वर् ङ्य्हङ्मा पट्टीचे मुब पङ्सम् ङ्य्हङ्माइ बीरुद्दरी खल तब? 32 पर्मेस्वर्चे र्हङ्की जतएनो जोगइतीअजेत् तर ङ्य्हङ्मा जम्मइ लागीरी र्हङ्की जत न्हङ्जेत्ज्यी। ङ्य्हङ्माइ लागीरी र्हङ्की ज धरी न्हङ्जेत्पलचे ल्हो-ल्हो जम्मनो स्हेःमा ङ्य्हङ्मात न्हङ्अजेत् स्यीम्? 33 पर्मेस्वर्चे दम्जेत्पे म्हीमात खल्चे दोस् ल्हइतीब खम्ब? खल्चेएनो अखम्, तलेपङ्सम् पर्मेस्वर्चेनो थेङ्यीमात दोस् अरेबे म्हीमा ठार्तीजेत्पल मुब। 34 होले तज्यीम् ङ्य्हङ्मात खल्चे दन्ड पीन्ब? खल्चेएनो अपीन्, तलेपङ्सम् येसु ख्रीस्ट् ङ्य्हङ्माकी लागीरी स्यीजेत्ज्यी। थेङ् स्यीबकीएनो अय्हीन् ङ्य्हङ्माकी लागीरी स्यीब ग्यम्से सोएनो सोजेत्ज्यी, ओसेम् पर्मेस्वर्की केत् फ्या पट्टीचे स्य्हुटीब मुब, ओसेम् ङ्य्हङ्माकी लागीरी पर्मेस्वर्तेङ् फ्याएनो लपीन्जेत्टीप। 35 देरेम् ङ्य्हङ्मात तइ तम्चे ख्रीस्ट्की म्होइब ग्यम्से फेपीन्ब खम्ब? ताकी तम्चेएनो अखम्। ङ्य्हङ्मा दुखरी, गारोरी, सतावट्री, फोइथेन्री, येन्बे येन् अयोःबरी, ओसेम् ङ्हच्छ्यङ् आपत्री दोःल वुइ स्यीबरीएनो दोःल, तर चु तम्माचे ङ्य्हङ्मात ख्रीस्ट्की म्होइब ग्यम्से फेःन लब अखम्। 36 धर्म छ्येःचे चोले पङ्ब, “ङ्यीमाचे थेङ्री बीस्वास् स्य्हेङ्बल तज्यीम् दीन् र्हङ्स्यीनो म्हीमाचे ङ्यीमात सेत्प म्हइब, ङ्यीमात सेत्परी टोप् लबे ग्युत र्हङ् लब।” 37 चु जम्मनो तम्मा मुलेएनो ङ्य्हङ्मात म्होइजेत्पे ख्रीस्ट् ग्यम्सेनो ङ्य्हङ्माचे चु जम्मनो तम्माइ जोरी डाबल मुब। 38 तलेपङ्सम् ङचे स्येब, तइ तम्चेएनो ङ्य्हङ्मात पर्मेस्वर्की म्होइब ग्यम्से फेःब अखम्। न्ह स्यीबचे न्ह जीवन्चे, न्ह स्वर्गदुतमाचे न्ह म्हङ्माचे, न्ह देरेइ तम्माचे न्ह लीक्यम्की तम्माचे, न्ह सक्तीमाचे 39 न्ह जोइ सक्तीमाचे, न्ह दुङ्की सक्तीमाचे न्ह पर्मेस्वर्चे स्य्हेङ्जेत्पे तइ स्हेःमाचे, ताचेएनो ङ्य्हङ्मात पर्मेस्वर्की म्होइब ग्यम्से फेःब अखम्, तलेपङ्सम् पर्मेस्वर्चे ङ्य्हङ्मात ङ्य्हङ्की प्रभु येसु ख्रीस्ट् ग्यम्से म्होइजेत्पल मुब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.