रोमी 7 - पश्चिम तामाङभ्याइ उदहरन् 1 ङइ बीस्वासी र्होमा, ङ चु तम् एङ्यीमा मोसाचे ब्रीबे पर्मेस्वर्की नीयम् स्येबलमात पङ्टीब। चु तम् एङ्यीमाचे स्येबलनो मुब, म्ही सोगतेकीनो मोसाचे ब्रीबे पर्मेस्वर्की नीयम्चे थेइ जोरी सासन् स्य्हेङ्ब। 2 उदहरन्की लागीरी, खल पङ्लेनो भ्या स्य्हेङ्बे अमकोल थेइ र्हेम्बो सोगदे नीयम् अनुसार थे र्हेम्बोइ अधीन्री टीथोब। तर र्हेम्बो स्यीज्यी पङ्सम् म्रीङ् हुजु नीयम् ग्यम्से स्वतन्त्र तब। 3 होत्तज्यीम् अमकोलचे र्हङ्की र्हेम्बो सोम्बो मुमनो ल्हो-ल्हो अपकोलतेङ् भ्या स्य्हेङ्ज्यी पङ्सम् हुजु अमकोलचे ब्यभीचार् स्य्हेङ्ब। तर र्हेम्बो स्यीज्यी पङ्सम् थे हुजु नीयम् ग्यम्से स्वतन्त्र तब, ओसेम् ल्हो-ल्हो अपकोलतेङ् भ्या स्य्हेङ्लेनो थेचे ब्यभीचार स्य्हेङ्बल अत। 4 होलेनो ङइ बीस्वासी र्होमा, ख्रीस्ट्तेङ् बक्च्य एङ्यीमाएनो मोसाचे ब्रीबे पर्मेस्वर्की नीयम्की लागीरी स्यीबल मुब, देरेम् एङ्यीमा स्यीब ग्यम्से सोजेत्पे ख्रीस्ट्तेङ् गीः तबल मुब। होत्तज्यीम् ङ्य्हङ्माचे पर्मेस्वर्की लागीरी ज्यबे लक्मा स्य्हेङ्ब खम्ब। 5 तलेपङ्सम् ङ्य्हङमा ङोन्ग्यम्की पापी स्वभाब अनुसार सोबे बेलोरी हुजु नीयम्चे ङ्य्हङ्मात झेन् य्हक्को पाप् स्य्हेङ्गे म्हेन्न लज्यीम् ङ्य्हङ्माचे य्हक्को पाप्मा स्य्हेङ्ब मुबल, ओसेम् स्यीब बबे रोरो रोःन लब मुबल। 6 तर देरेम् ङ्य्हङ्मा मोसाचे ब्रीबे पर्मेस्वर्की नीयम्की लागीरी स्यीबल तज्यीम् हुजु नीयम् ग्यम्से छुटकारा यङ्बल मुब, ओसेम् देरे य्हङ्से ङ्य्हङ्मा हुजु नीयम्की सक्तीइ दुङ्री अरे। देरेम् ङ्य्हङ्माचे मोसाचे ब्रीबे पर्मेस्वर्की नीयम् अनुसार अय्हीन्, तर पबीत्र आत्माइ छार् जीवन् अनुसार पर्मेस्वर्की सेव स्य्हेङ्ब। मोसाचे ब्रीबे पर्मेस्वर्की नीयम्तेङ् पाप् 7 होलेपङ्सम् ङ्य्हङ्माचे ता पङ्स्ये? ता मोसाचे ब्रीबे पर्मेस्वर्की नीयम्नो पाप् य्हीन्ब? होतेबमी य्हीन्नो अय्हीन्! मोसाचे ब्रीबे पर्मेस्वर्की नीयम्चे लज्यीम् ङचे पाप् स्येज्यी, तलेपङ्सम् मोसाचे ब्रीबे पर्मेस्वर्की नीयम्चे, “लोभ थलउ” बी पङ्बल अरेसम् ङचे लोभ स्य्हेङ्ब अत पङ्ज्यीम् स्येस्येनो अरेबल। 8 मोसाचे ब्रीबे पर्मेस्वर्की नीयम् ग्यम्से पाप्चे मौक कीन्ज्यीम् ङत जम्मनो थोइ लोभ स्य्हेङ्पुङ्ज्यी। मोसाचे ब्रीबे पर्मेस्वर्की नीयम् अरेबल य्हीन्सम् पाप्चे ङ्य्हङ्माकी जीवन्री अधीकार स्य्हेङ्स्ये अरेबल। 9 ङोन्ग्यम् ङ मोसाचे ब्रीबे पर्मेस्वर्की नीयम् अरेबे बेलोरी ङ सोबल मुबल, तर मोसाचे ब्रीबे पर्मेस्वर्की नीयम् यङ्ब साच्चेनो ङचे पाप् स्य्हेङ्टीबल टीम् बी स्येज्यी, 10 ओसेम् चु पाप्चे लज्यीम् ङचे ङ स्यीथोब बी स्येज्यी। जीवन् बथोबे मोसाचे ब्रीबे पर्मेस्वर्की नीयम्चेम् ङइ लागीरीम् स्यीबक बज्यी। 11 तलेपङ्सम् मोसाचे ब्रीबे पर्मेस्वर्की नीयम् ग्यम्से पाप्चे मौक कीन्ज्यीम् ङत लुज्यी, ओसेम् नीयम्तनो हतीयार् स्य्हेङ्ज्यीम् ङत सेत्ज्यी। 12 होलेतलेनो मोसाचे ब्रीबे पर्मेस्वर्की नीयम् र्हङनो पबीत्र मुब, ओसेम् चुन्हङ् मुबे कुल्जेत्पे अर्तीएनो पबीत्र, धार्मीक् ओसेम् ज्यब मुब। 13 होलेपङ्सम् त चोते ज्यबे मोसाचे ब्रीबे पर्मेस्वर्की नीयम्चे ङत सेत्ज्यी स्यीम्? चुचे अय्हीन् तर ङत पाप्चे सेत्पल य्हीन्ब। पाप्चे चोते ज्यबे मोसाचे ब्रीबे पर्मेस्वर्की नीयम्त हतीयार्ले कोल्ज्यीम् थेइ देमेन्की रुप् ङोन्बरी ङत सेत्ज्यी। होत्तज्यीम् मोसाचे ब्रीबे पर्मेस्वर्की ज्यबे नीयम्की हतीयार् कोल्ज्यीम् पाप् झेन् लोङ्बे दुस्ट तज्यी। म्हीइ स्वभाब् ङ्य्ही 14 तलेपङ्सम् मोसाचे ब्रीबे पर्मेस्वर्की नीयम् पर्मेस्वर्की आत्माचे न्हङ्बल य्हीन्ब पङ्बे तम् ङ्य्हङ्माचे स्येब, तर ङमी ल्हीकी स्वभाब्री मुब ओसेम् हुजु स्वभाब्चेनो ङत पाप् स्य्हेङ्न लब। 15 ङचे ता स्य्हेङ्ब बी ङ्चे अगो। तलेपङ्सम् ङचे ता स्य्हेङ्गे म्हेन्ज्यी हुजु अस्य्हेङ् तर ङचे तात हेल लब हुजु स्य्हेङ्ब। 16 चोले ङचे अज्यब पङ्ज्यीम् स्येःबे लक्मा स्य्हेङ्ज्यी पङ्सम् मोसाचे ब्रीबे पर्मेस्वर्की नीयम् ठीक् मुब बी ङचे स्वीकार् लब। 17 होत्तज्यीम् हुजु पाप् स्य्हेङ्बल ङ अय्हीन्, तर ङन्हङ् मुबे पाप्चे स्य्हेङ्नलब य्हीन्ब। 18 तलेपङ्सम् तइ ज्यबएनो ङन्हङ् अरे पङ्बे तम् ङचे स्येब। ङचे पङ्बलमी ङइ ल्हीकी स्वभाब् य्हीन्ब, तलेपङ्सम् ङतेङ् ज्यब स्य्हेङ्बे सेम् मुब, तर ङचे हुजु स्य्हेङ्ब अखम्। 19 तलेपङ्सम् ङचे स्य्हेङ्बे सेम् लबे ज्यब ङचे अस्य्हेङ्, तर ङचे स्य्हेङ्बे सेम् अलबे दुस्ट लक्मा ङचे स्य्हेङ्ब। 20 देरेम् ङचे सेम अलन अलननो हुजु लक्मा स्य्हेङ्ज्यी पङ्सम् हुजु लक्मा स्य्हेङ्बल ङ अय्हीन् तर ङन्हङ् टीबे पाप् य्हीन्ब। 21 होत्तज्यीम् ङचे ज्यबे लक्मा स्य्हेङ्ब म्हइबे बेलोरीएनो हुजुरी ङचे ङतेङ् बक्च्य अज्यबे लक्मात यङ्ब। चु नीयम्चे ङइ जीवन्री लक् स्य्हेङ्बल ङचे छोर्ब। 22 ङ ङइ सेम्न्हङ् पर्मेस्वर्की नीयम्री तङ्ब। 23 तर ङचे ङइ ल्हीरीमी ल्हो-ल्हो नीयम्चे लक् स्य्हेङ्बटीबल म्रङ्ब, ओसेम् हुजु नीयम्चे ङइ सेम्न्हङ् मुबे नीयम्तेङ् छेत्प, ओसेम् ङइ ल्हीकी अङ्गमारी टीबे पाप्की नीयम्चे ङत थेइ बाना स्य्हेङ्ब। 24 ओन्छ्यङ्, ङ गत्ते दुखी म्ही! पाप्तेङ् स्यीबचे च्युप्पे चु ल्हीः ग्यम्से ङत खल्चे फेःपीन्ल? 25 तर पर्मेस्वर्त व्होर्छ्ये तखइ, ङ्य्हङ्की प्रभु येसु ख्रीस्ट्चेनो चु ग्यम्से ङत फेःपीन्जेत्बल मुब! होत्तज्यीम् एङ्यीमाचे म्रङ्ब, ङमी सेम्य्हङ्सेनो पर्मेस्वर्की नीयम्की सेव स्य्हेङ्ब, तर ङन्हङ् मुबे पापी स्वभाब्चेएनो ङत पाप्की नीयम्की बाना तनलब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.