रोमी 6 - पश्चिम तामाङस्यीबतेङ् जीवन् 1 देरेम् ङ्य्हङ्माचे ता पङ्स्ये? ता ङ्य्हङ्माचे पर्मेस्वर्की अनुग्रह य्हक्को तबोर्खइ पङ्ज्यीम् पाप् स्य्हेङ्स्यीनो टीब स्यीम्? 2 होले स्य्हेङ्ब अत! ङ्य्हङ्मामी पाप्की लागीरी स्यीज्यी, होलेपङ्सम् ङ्य्हङ्माइ जीवन्री देबेएनो खले पाप स्य्हेङ्स्यीनो टीब खम्ब? 3 एङ्यीमाचे स्येःबलनो मुब, ङ्य्हङ्माचे येसु ख्रीस्ट्री बप्तीस्मा कीन्बे बेलोरी थेङ्तेङ् गीः तज्यीम् ङ्य्हङ्माएनो स्यीज्यी। 4 तलेपङ्सम् ङ्य्हङ्माएनो बप्तीस्मा ग्यम्से येसु ख्रीस्ट्तेङ् बक्च्य स्यीज्यीम् बुब्ज्यी। होत्तज्यीम् पर्मेस्वर् अपइ महीमीत् सक्ती ग्यम्से येसु ख्रीस्ट् स्यीब ग्यम्से सोजेत्प र्हङ्ले देरेम् ङ्य्हङ्माएनो छार् जीवन् सोब। 5 तलेपङ्सम् ङ्य्हङ्मा थेङ्तेङ् थेङ्की स्यीबरी गीः तज्यी पङ्सम् देमेन्नो थेङ् स्यीब ग्यम्से सोजेत्पल र्हङ्ले ङ्य्हङ्माएनो स्यीब ग्यम्से थेङ्तेङ् सोस्ये मुब। 6 ङ्य्हङ्माचे स्येब, पाप्की सक्तीचे सासन् स्य्हेङ्बे ङ्य्हङ्माकी जीवन् नास् तखइ ओसेम् ङ्य्हङ्मा पाप्की बाना तटीअथोखइ पङ्ज्यीम् ङ्य्हङ्माकी ङोन्ग्यम्की जीवन् ख्रीस्ट्तेङ् बक्च्य क्रुस्री च्योलाज्यी। 7 तलेपङ्सम् खल पङ्लेनो स्यीबे म्ही पाप्की सक्ती ग्यम्से फेःबल तब। 8 देरेम् ङ्य्हङ्मा ख्रीस्ट्तेङ् बक्च्य स्यीबल मुसम् थेङ्तेङ् बक्च्य ङ्य्हङ्माएनो सोटीस्ये मुब बी बीस्वास् स्य्हेङ्ब। 9 ङ्य्हङ्माचे स्येःब, ख्रीस्ट् स्यीजेत्ज्यीम्एनो लीक्यम् सोम्बो तजेत्ज्यी। देरेम् थेङ् खेमेएनो दोःज्यीम् स्यीजेत्स्ये अरे, ओसेम् स्यीबचे थेङ्की जोरी खेमेएनो सासन् स्य्हेङ्स्ये अरे। 10 पाप्की सक्तीत नास् लबे लागीरी ख्रीस्ट् खेमपङ्लेनोइ लागीरी तीक्ख्यप् स्यीजेत्ज्यी। तर देरेम् थेङ्चे पर्मेस्वर्की लागीरीकीनो सोजेत्प। 11 होलेनो एङ्यीमाचेएनो र्हङ् र्हङ्की पाप्की लागीरी स्यीबल तर पर्मेस्वर्की लागीरी येसु ख्रीस्ट्री सोबल मुब बी म्हेन्थोब। 12 होत्तज्यीम् एङ्यीमाकी स्यीज्यीम् य्हर्बे ल्हीरी पाप्त सासन् थस्य्हेङ्पुङो, ओसेम् पाप्की दुस्ट म्हेन्बचे कुल्बे तम्मा थङ्येनो। 13 एङ्यीमाचे र्हङ्की ल्हीःकी खजु अङ्गमातएनो दुस्ट लक् स्य्हेङ्बरी कोल्ज्यीम् पाप् स्य्हेङ्बरी थसोप्तीउ। बरु स्यीब ग्यम्से सोम्बो तबे म्हीमाचे र्हङ्ले र्हङ्की जम्मनो जीवन् पर्मेस्वर्त सोप्तीउ, ओसेम् र्हङ्की अङ्गमात धार्मीक् लक्मा स्य्हेङ्बरी पर्मेस्वर्त सोप्तीउ। 14 पाप्चे एङ्यीमाकी जोरी सासन् स्य्हेङ्स्ये अरे, तलेपङ्सम् एङ्यीमा मोसाचे ब्रीबे पर्मेस्वर्की नीयम्की अधीन्री अय्हीन्, तर अनुग्रहइ अधीन्री मुब। धार्मीक्तइ बान 15 देरेम् ता ङ्य्हङ्मा मोसाचे ब्रीबे पर्मेस्वर्की नीयम्की अधीन्री अरे, तर अनुग्रहइ अधीन्री मुब पङ्ज्यीम् पाप स्य्हेङ्स्ये? होले खेमेएनो स्य्हेङ्ब अत! 16 एङ्यीमाचे स्येबलनो मुब, एङ्यीमाचे र्हङ्चे र्हङ्तनो खल्चे कुल्बे तम् ङ्येन्बरी सोप्तीब, एङ्यीमा हुजुइ बाननो तब। एङ्यीमाचे पाप्चे कुल्बे तम् ङ्येन्ज्यी पङ्सम् एङ्यीमा स्यीस्ये मुब, तर पर्मेस्वर्चे कुल्बल ङ्येन्ज्यी पङ्सम् एङ्यीमा थेङ्की ङोन्ग्यम् धर्मी तस्ये मुब। 17 तर पर्मेस्वर्त व्होर्छ्ये तखइ, ङोन्ग्यम् एङ्यीमा पाप्की बाना मुबलामाचे देरेम् एङ्यीमात लोप्पे पर्मेस्वर्की बारेइ तम्मा एङ्यीमाचे सेम् य्हङ्सेनो ज्यनले ङ्येन्बल मुब। 18 देरेम् एङ्यीमा पाप्की बाना तब ग्यम्से फेःज्यीम् धार्मीक्ताकी बाना तबल मुब। 19 एङ्यीमाचे गोबरी गारो तबल तज्यीम् ङ एङ्यीमाचे गोनले मालीक्तेङ् बानाइ तम् ग्यम्से पङ्टीब। ङोन्ग्यम् एङ्यीमाचे र्हङ्त असुद्दतेङ् झेन् य्हक्को दुस्ट लक्माकी बाना तबरी सोप्तीज्यी। होलेनो देरेम् पबीत्र तबे लागीरी एङ्यीमाचे र्हङ्की जीवन् धार्मीक्ताकी बाना तबरी सोप्तीउ। 20 एङ्यीमा पाप्की बाना मुबे बेलोरी एङ्यीमाचे पर्मेस्वर्की ङोन्री धर्मी तबे लक्माल वास्त अस्य्हेङ्ब मुबल। 21 हुजु बेलोरी स्य्हेङ्बे लक्मारी एङ्यीमा देरे पेत्प, हुजु लक्मा ग्यम्से एङ्यीमाचे ता यङ्ज्यी? हुजु लक्माचेमी ज्युःरी स्यीब बब। 22 तर देरेम् एङ्यीमा पाप् ग्यम्से छुटकारा यङ्ज्यीम् पर्मेस्वर्की बानामा तबल मुब। हुजुचेमी पबीत्रता ओसेम् ज्युरी खेमेएनो अबेबे जीवन्री दोनलब। 23 होत्तज्यीम् पाप्चे थेइ बानात पीन्बे म्हेलामी स्यीब य्हीन्ब, तर ङ्य्हङ्की प्रभु येसु ख्रीस्ट्री खेमेनो अबेबे जीवन् सोब मी पर्मेस्वर्चे ओलेन्नो न्हङ्बे बर्दान् य्हीन्ब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.