रोमी 5 - पश्चिम तामाङपर्मेस्वर्की ङोन्री धर्मी तबल 1 ङ्य्हङ्मात पर्मेस्वर्चे बीस्वास् ग्यम्से पर्मेस्वर्की ङोन्री धर्मी तनलजेत्पल मुब, होत्तज्यीम् ङ्य्हङ्की प्रभु येसु ख्रीस्ट् ग्यम्सेनो ङ्य्हङ्मा पर्मेस्वर्तेङ् थुन्बल मुब। 2 प्रभु येसु ख्रीस्ट्चेनो ङ्य्हङ्मात बीस्वास् ग्यम्से पर्मेस्वर्की अनुग्रहरी वङ्म्यङ्न लजेत्पल मुब। देरे ङ्य्हङ्मा चु अनुग्रहरी सोटीब मुब। ओसेम् ङ्य्हङ्मा पर्मेस्वर्की महीमारी र्हुब् तस्येकी आसारी तङ्ब। 3 होदेकीनो अय्हीन्, ङ्य्हङ्मा दुख यङ्बे बेलोरीएनो तङ्ब तलेपङ्सम् ङ्य्हङ्माचे स्येःब, दुखचे दुखइ बेलोरी नाप खम्बे बङ् पीन्ब, 4 नाप खम्बे बङ्चे ङ्य्हङ्माकी चालचलन्त ज्यब तन लब, ओसेम् ज्यबे चालचलन्चे ङ्य्हङ्त आसा खन लब। 5 चु आसाचे ङ्य्हङ्मात नीरास् तन अल, तलेपङ्सम् पर्मेस्वर्चे ङ्य्हङ्मात पबीत्र आत्मा न्हङ्जेत्पल मुब, ओसेम् पबीत्र आत्माचे ङ्य्हङ्माकी सेम्री पर्मेस्वर्की म्होइबचे प्लीङ्नलजेत्पल मुब। 6 ङ्य्हङ्माचे थर्ब यङ्बे लागीरी र्हङ्चे तएनो स्य्हेङ्ब अखम्बल तज्यीम्, ख्रीस्ट् र्हङ्नो ङ्य्हङ् पापीमाकी लागीरी ठीक् बेलोरी स्यीपीन्जेत्ज्यी। 7 धर्मी म्हीइ लागीरी स्यीपीन्बे सेम् लबे म्ही यङ्बरी य्हक्को गारो तल, होलेतलेनो य्हक्कोनो ज्यबे म्हीइ लागीरीम् कोइ म्हीचे स्यीपीन्बे आर् लबएनो खम्ब। 8 तर पर्मेस्वर्चेमी थेङ्की ङ्हच्छ्यङ् म्होइब ङ्य्हङ्मात चोले ङोन्जेत्ज्यी, ङ्य्हङ्मा पापी मुमनो ख्रीस्ट् ङ्य्हङ्माकी लागीरी स्यीपीन्जेत्ज्यी। 9 ख्रीस्ट्की काः ग्यम्से ङ्य्हङ्मा पर्मेस्वर्की ङोन्ग्यम् धर्मी तन लबल मुब, झेन् हुजु बीमाएनो य्हक्को थेङ्चे ङ्य्हङ्मात पर्मेस्वर्चे पापीमात न्हङ्जेत्स्येकी सजाय ग्यम्से थर्न लजेत्स्ये मुब। 10 तलेपङ्सम् ङ्य्हङ्मा पर्मेस्वर्की सत्तुर् मुबे बेलोरीनो थेङ्की ज ख्रीस्ट्की स्यीब ग्यम्से ङ्य्हङ्मात थेङ्तेङ् थुन्न लजेत्पल मुब, देरेम् ङ्य्हङ्मा थेङ्तेङ् थुन्बल मुब, झेन् हुजु बीमाएनो य्हक्को ख्रीस्ट्की जीवन् ग्यम्से ङ्य्हङ्मा थर्स्ये मुब। 11 चोतेकीनो अय्हीन्, देरेम् ङ्य्हङ्की प्रभु येसु ख्रीस्ट्चे ङ्य्हङ्मात पर्मेस्वर्तेङ् थुन्न लजेत्पल तज्यीम् ङ्य्हङ्मा पर्मेस्वर्त तोप्ज्यीम् तङ्ब। आदम्तेङ् ख्रीस्ट् 12 आदम ग्यम्से जम्बुलीङ्री पाप् खज्यी, ओसेम् थेइ पाप्चे स्यीब बज्यी। चोले जम्मनो म्हीमान्हङ् स्यीब वङ्ज्यी तलेपङ्सम् जम्मनो म्हीमाचे पाप् स्य्हेङ्ज्यी। 13 मोसाचे ब्रीबे पर्मेस्वर्की नीयम् न्हङ्ब बीम ङोन्ग्यमएनो जम्बुलीङ्री पाप् मुबल, तर मोसाचे ब्रीबे पर्मेस्वर्की नीयम् अरेबल तज्यीम् हुजुरी पाप् ज्याएनो अज्य। 14 होलेतलेनो आदम्की बेलो य्हङ्से मोसाइ बेलोसम्मइ जम्मनो म्हीमाइ जोरी स्यीबचे सासन् स्य्हेङ्ज्यी। ल्हो-ल्हो म्हीमाचे आदम्चे र्हङ्ले पर्मेस्वर्चे कुल्जेत्पे अर्ती अङ्येन्ज्यीम् पाप् स्य्हेङ्ब र्हङ्बे पाप्नो अस्य्हेङ्लेनो जम्मनो म्हीमा स्यीज्यी। चोले आदम् लीक्यम् ब्योन्खस्येकी ख्रीस्ट्की नमुना तज्यी। 15 तर पर्मेस्वर्चे ओलेन्नो न्हङ्बे बर्दान्तेङ् आदम्की पाप्री डीःबे तम् तएनो अरे। तलेपङ्सम् आदम् पङ्बे म्ही गीःकी पाप्चे लज्यीम् य्हक्को म्हीमा स्यीज्यी, तर पर्मेस्वर्की अनुग्रहतेङ् लीप्चे ब्योन्खबे म्ही गीः येसु ख्रीस्ट्की अनुग्रह ग्यम्से म्हीमाचे ओलेनो यङ्बे बर्दान्मी य्हक्को म्हीमाइ लागीरी झेन् य्हक्को तज्यी। 16 पर्मेस्वर्चे न्हङ्बे चु बर्दान्तेङ् म्ही गीःचे स्य्हेङ्बे पाप्मी य्हक्को फरक् मुब। आदम्की पाप् गीःचे लज्यीम् जम्मनो म्हीमा दोसी तनलज्यी, तर पर्मेस्वर्चे ओलेन्नो न्हङ्बे बर्दान्चे य्हक्को पाप्मा स्य्हेङ्बे म्हीमात दोस् अरेबल तनलजेत्ज्यी। 17 म्ही गीःचे पाप् स्य्हेङ्बल तज्यीम् स्यीबचे जम्म म्हीमाइ जोरी सासन् स्य्हेङ्ज्यी। होलेनो झेन् प्रसस्त अनुग्रहतेङ् धार्मीक्ताकी ओलेन्नो यङ्बे बरदान् यङ्बलमाचे म्ही गीः येसु ख्रीस्ट् ग्यम्से जीवन्री सासन् स्य्हेङ्स्ये मुब। 18 होत्तज्यीम् आदम्चे स्य्हेङ्बे पाप् गीःचे जम्मनो म्हीमात दन्ड बब र्हङ्ले येसु ख्रीस्ट्की धार्मीक् लक् गीःचे जम्मनो म्हीमात पर्मेस्वर्की ङोन्री दोस् अरेबल तन लज्यीम् जीवन् बब। 19 तलेपङ्सम् आदम् पङ्बे म्ही गीःचे पर्मेस्वर्की अर्ती अङ्येन्ज्यीम् जम्मनो म्हीमा पापी तज्यी, होलेनो म्ही गीः ख्रीस्ट्चे पर्मेस्वर्की अर्ती ङ्येन्जेत्ज्यीम् जम्मनो म्हीमा धर्मीक् तनलबल तस्ये मुब। 20 म्हीमाचे र्हङ्की पाप्मा म्रङ्खइ पङ्ज्यीम् पर्मेस्वर्की नीयम् खज्यी। तर म्हीमाचे गदे य्हक्को पाप्मा स्य्हेङ्ज्यी, पर्मेस्वर्की अनुग्रहमी हुजु बीमएनो झेन् य्हक्को तज्यी। 21 होत्तज्यीम् पाप्चे म्हीमाइ जोरी सासन् स्य्हेङ्ज्यीम् स्यीनलब र्हङ्ले, देरेम् पर्मेस्वर्की अनुग्रहचे ङ्य्हङ्माइ जोरी सासन् स्य्हेङ्टीबल मुब। चु अनुग्रहचेनो ङ्य्हङ्मात पर्मेस्वर्की ङोन्री धर्मी तनलजेत्प, ओसेम् ङ्य्हङ्की प्रभु येसु ख्रीस्ट् ग्यम्से खेमेएनो अबेबे जीवन् न्हङ्जेत्बल मुब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.