रोमी 4 - पश्चिम तामाङअब्राहामकी बीस्वास् 1 होले पङ्सम् ङ्य्हङ्माइ म्हेम्हे अब्राहामचे पर्मेस्वर्की ङोन्री धर्मी तबे बारेरी ता लोप्ज्यी स्यीम्? 2 अब्राहाम र्हङ्चे स्य्हेङ्बे लक्मा ग्यम्से धर्मी ठार्तीबल य्हीन्सम् थेचे घमन्ड स्य्हेङ्बे ग्ला तस्येल, तर थेतेङ् पर्मेस्वर्की ङोन्री घमन्ड स्य्हेङ्बे ग्यम् अरे। 3 धर्मछ्येःरी ब्रीबल मुब, “अब्रहामचे पर्मेस्वर्त बीस्वास् स्य्हेङ्ज्यी, होत्तज्यीम् पर्मेस्वर्चे थेत धर्मी म्ही पङ्ज्यीम् ग्रहन् स्य्हेङ्जेत्ज्यी।” 4 लक् स्य्हेङ्बलचे यङ्बे म्हेला दान् अय्हीन् तर हुजु थेचे यङ्नोथोबे म्हेला य्हीन्ब। 5 खल्चे पङ्लेनो र्हङ्की लक्मा ग्यम्से धर्मी तब म्हइब अय्हीन्, तर अधर्मीतएनो धर्मी तनलजेत्पे पर्मेस्वर्री बीस्वास् स्य्हेङ्सम् थेत पर्मेस्वर्चे थेङ्की ङोन्री धर्मी ङोन्जेत्स्ये मुब। चोले पर्मेस्वर्चे म्हीमात बीस्वास् ग्यम्से धर्मी ठार्तीन लजेत्प। 6 दाउद्चेएनो लक् ग्यम्से अय्हीन् तर पर्मेस्वर् ग्यम्से धर्मी ठार्तीज्यीम् मोलम् यङ्बे म्हीइ बारेरी चोले पङ्ब, 7 “मोलम् यङ्बलमा थेङ्यीमा य्हीन्ब, खलमाल अपराधमा क्षमा तबल मुब, ओसेम् पाप्मा गप्लबल मुब। 8 मोलम् यङ्बे म्ही थे य्हीन्ब, खल म्हीइ पाप्की हीसब् परमप्रभुचे कीन्अजेत्।” 9 चु मोलम् खतना स्य्हेङ्बलमाकी लागीरीकीनो अय्हीन् चुमी खतना अस्य्हेङ्बलमाकी लागीरीएनो य्हीन्ब, तलेपङ्सम् ङ्य्हङ्माचे धर्म छ्ये अनुसार देबेएनो पङ्ब, “अब्राहामचे पर्मेस्वर्त बीस्वास् स्य्हेङ्ज्यी, होत्तज्यीम् पर्मेस्वर्चे थेत धर्मी म्ही पङ्ज्यीम् ग्रहन् स्य्हेङ्जेत्ज्यी।” 10 चु खेमा तज्यी? चु अब्राहामचे खतना स्य्हेङ्ज्यीम् लीक्यम् वुइ खतना स्य्हेङ्ब बीम ङोन्नो? अब्रहामचे खतना स्य्हेङ्ब बीम ङोन्नो पर्मेस्वर्चे थेत धर्मी ठार्तीजेत्पल य्हीन्ब। 11 खतनामी पर्मेस्वर्चे अब्रहाम्त थेइ खतन तब बीम ङोन्नो बीस्वास् ग्यम्से धर्मी तज्यी पङ्ज्यीम् न्हङ्बे चीनो मुबल। चोले खतना अस्य्हेङ्बलमा तर पर्मेस्वर्त बीस्वास्कीनो स्य्हेङ्ज्यीम् धर्मी ठार्तीबे यहुदी अय्हीन्बे म्हीमालएनो अब्राहाम आत्मीक् अप तज्यी। 12 ओसेम् अब्राहाम खतना स्य्हेङ्बलमालएनो अप य्हीन्ब, थेङ्यीमाचे खतन स्य्हेङ्बल तज्यीम्कीनो अय्हीन् तर खतना स्य्हेङ्ब बीम ङोन्ग्यम् अब्रहाम्ल र्हङ्बे बीस्वास् थेङ्यीमातेङ् मुबल तज्यीम् य्हीन्ब। पर्मेस्वर्की बाचा बीस्वास् ग्यम्से यङ्ब 13 पर्मेस्वर्चे अब्रहाम्तेङ् थेइ सन्तान्मात जम्बुलीङ्की हक् न्हङ्स्ये मुब बी बाचा स्य्हेङ्जेत्ज्यी। पर्मेस्वर्चे अब्रहाम्त मोसाचे ब्रीबे नीयम् ङ्येन्बल तज्यीम् अय्हीन् तर थेचे पर्मेस्वर्री स्य्हेङ्बे बीस्वास् ग्यम्से थे धर्मी ठार्तीबल तज्यीम् चु बाचा थेत न्हङ्जेत्पल य्हीन्ब। 14 मोसाचे ब्रीबे नीयम् ङ्येन्बलमाचेकीनो हक् यङ्सम् बीस्वास्तेङ् थेङ्की बाचा तइ लकएनो अतस्ये मुबल। 15 तलेपङ्सम् मोसाचे ब्रीबे नीयम्चे पर्मेस्वर्की बोमो बब। तर मोसाचे ब्रीबे नीयम् अरेबल य्हीन्सम् हुजुरी पापएनो अत। 16 होत्तज्यीम् चु बाचा बीस्वास् ग्यम्से यङ्ब। चु पर्मेस्वर्चे ओलेन्नो न्हङ्बे बर्दान् य्हीन्ब। ओसेम् ङ्य्हङ्मातेङ् अब्रहाम्ल र्हङ्बे बीस्वास् मुज्यी पङ्सम् ङ्य्हङ्माचे मोसाचे ब्रीबे नीयम् ङ्येन्लएनो वुइ अङ्येन्लएनो चु बाचा ङ्य्हङ्मा जम्मचे पक्कनो यङ्ब। तलेपङ्सम् अब्राहाम बीस्वास् स्य्हेङ्बलमा जम्मइ लागीरी आत्मीक् अप य्हीन्ब। 17 धर्म छ्येःरी पर्मेस्वर्चे अब्रहाम्त, “ङचे एत य्हक्को जातीमाकी अप स्य्हेङ्बल मुब” बी सुङ्जेत्पल मुब। अब्रहामचे बीस्वास् स्य्हेङ्बे पर्मेस्वर्की ङ्होन्सङ् थे ङ्य्हङ्मा जम्मइ अप य्हीन्ब। पर्मेस्वर्चे स्यीबलमात जीवन न्हङ्जेत्प ओसेम् अस्तीत्वरी अरेबे स्हेःमात सुङ्जेत्ज्यीम् अस्तीत्वरी नोम्खजेत्प। 18 पर्मेस्वर्चे अब्राहामत, “एइ कोलमा सारमा र्हङले य्हक्को तस्ये मुब” बी सुङ्ब र्हङ्ले थे सन्तान यङ्ब खम्बरी आस्नो अरेबे बेलोरीएनो अब्रहामचे बीस्वास् स्य्हेङ्ज्यीम् आसा थेन्ज्यी, होत्तज्यीम् थे य्हक्को जातीमाकी अप तज्यी। 19 अब्राहाम ल्हेगोर् ब्रेत्स्यी ब्लीतीङ् योयम्बल मुबल, तर थेइ खेक्प ल्ही ग्यम्से कोल तबअखम्बलतेङ् सारा बाझो तबल गोज्यीमएनो थे बीस्वास्री य्हङ्य्होङ् अत। 20 पर्मेस्वर्चे थेत न्हङ्बे बाचारी थेचे गत्तेएनो सङ्क अस्य्हेङ् तर बीस्वास्री झेन् कोङ्ज्यीम् पर्मेस्वर्त तोप्ज्यी। 21 तलेपङ्सम् पर्मेस्वर्चे स्य्हेङ्जेत्पे बाचा थेङ्चे टोप् लजेत्प पङ्बे तम्री अब्राहाम ढुक्क मुबल। 22 चोले अब्रहामचे पर्मेस्वर्त बीस्वास् स्य्हेङ्ज्यी, होत्तज्यीम् पर्मेस्वर्चे थेत धर्मी म्ही पङ्ज्यीम् ग्रहन् स्य्हेङ्जेत्ज्यी। 23 पर्मेस्वर्चे थेत धर्मी म्ही पङ्ज्यीम् ग्रहन् स्य्हेङ्जेत्ज्यी पङ्बे तम् अब्रहामकी लागीरीकीनो ब्रीबल अय्हीन्, 24 तर ङ्य्हङ्माकी लागीरीएनो ब्रीबल य्हीन्ब। ङ्य्हङ्मा खल खलचे ङ्य्हङ्की प्रभु येसुत स्यीब ग्यम्से सोनलजेत्पे पर्मेस्वर्री बीस्वास् स्य्हेङ्ब थेङ्चे ङ्य्हङ्मात धर्मी म्ही पङ्ज्यीम् ग्रहन् स्य्हेङ्जेत्प। 25 पर्मेस्वर्चे येसुत ङ्य्हङ्माकी पाप्की लागीरी स्यीपुङ्जेत्ज्यी, ओसेम् ङ्य्हङ्मात पर्मेस्वर्की ङोन्री धर्मी तन लबरी येसुत दोःज्यीम् सोम्बो तनलजेत्ज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.