रोमी 3 - पश्चिम तामाङ1 होलेपङ्सम् यहुदी म्हीत यहुदी अय्हीन्बे म्हीत बीम तए ज्यब तब? वुइ खतन स्य्हेङ्ज्यीम् तए ज्यब तब? 2 य्हीन्बनो, यहुदी म्हीमात जम्मनो थोरी फाइद तब। पर्मेस्वर्चे थेङ्की फ्रोइ गोदोब्न्हङ् ङोन्ग्यम् यहुदीमात सोप्तीजेत्ज्यी। 3 तर कोइ कोइ यहुदीमाचे पर्मेस्वर्तेङ् स्य्हेङ्बे बाचारी बीस्वासीलो अतमम् ता थेङ्यीमाकी अबीस्वास्चे पर्मेस्वर्की बीस्वासीलोत न्होङ्न लब स्यीम? 4 होले अत, म्हीमा भ्यु तलेएनो पर्मेस्वर्मी देमेन् य्हीन्ब। धर्म छ्येःचे थेङ्की बारेरी चोले पङ्ब, “थेङ्चे सुङ्जेत्पे फ्रोइरी थेङ् ठीक् बी ङोन्जेत्प, ओसेम् म्हीमाचे थेङ्की न्याय स्य्हेङ्बतेङ् थेङ् डाजेत्स्ये मुब।” 5 तर ङ्य्हङ्माचे स्य्हेङ्बे अज्यबे लक्चे ङ्हङ्मामी अधर्मी ओसेम् पर्मेस्वरमी झेन् धर्मी बी ङोन्ब पङ्सम्, ङ्य्हङ्माचे ता पङ्ब? ता पर्मेस्वर् बोमो लजेत्ज्यीम् ङ्य्हङ्मात सजाय न्हङ्ब अन्याय य्हीन्ब स्यीम्? (ङचे म्हीचे म्हेन्बे तम् पङ्बल य्हीन्ब।) 6 होले अय्हीन्! होले य्हीन्सम् पर्मेस्वर्चे जम्बुलीङ्की न्याय खले स्य्हेङ्जेत्प? 7 तर ङइ भ्य्हुचे पर्मेस्वर्की देमेन्त झेन् य्हक्को तन लज्यीम् म्हीमाचे थेङ्त स्य्हेस तनलब पङ्सम्, तले ङचे देरे सम्मएनो पापीचे र्हङ्ले सजाय यङ्टीब? 8 कोइ कोइ म्हीमाचेम्, “ज्यब तखइ पङ्ज्यीम् अज्यब तले अस्य्हेङ्स्ये?” बी ङ्यीमाचे पङ्ज्यीरो पङ्ज्यीम् ङ्यीमात दोस् ल्हइतीब। चोतेबे दोस् ल्हइतीबे म्हीमातमी पर्मेस्वर्चे थेङ्यीमात जे:बे सजाय न्हङ्स्ये मुब। धर्मी खलएनो अरे 9 होले पङ्सम् ता ङ्यी यहुदीमा यहुदी अय्हीन्बे म्हीमा बीम ज्यब मुब? ज्यब अरे, तलेपङ्सम् ङचे यहुदीतेङ् यहुदी अय्हीन्बे म्हीमा ङ्य्हीनो पापीमा य्हीन्ब पङ्ज्यीम् ङोन्नो ङोन्ज्यीन्बल मुब। 10 धर्म छ्येःरी चोले ब्रीबल मुब, “धर्मी खलएनो अरे, गीएनो अरे। 11 पर्मेस्वर्की बारेरी गोबे म्ही खलएनो अरे, पर्मेस्वर्त म्हइबे म्ही खलएनो अरे। 12 जम्मनो म्हीमा पर्मेस्वर् ग्यम्से थारीङ् य्हर्बल मुब, थेङ्यीमा जम्मनो लक् अतबे म्ही तबल मुब। ज्यब स्य्हेङ्बे म्ही खलएनो अरे, गीःएनो अरे।” 13 “थेङ्यीमाकी म्लङ् अगप्पे दुर्स र्हङ्ब मुब, थेङ्यीमाचे र्हङ्की लेचेनो भ्य्हुकी तम्मा पङ्बल मुब।” “थेङ्यीमाकी तम् पुख्रीइ बीस् र्हङ्ब मुब।” 14 “थेङ्यीमाकी सुङ् नइबे केःम्लङ्तेङ् अज्यबे तम्माचे प्लीङ्बल मुब।” 15 “थेङ्यीमा म्ही सेत्परी ग्योःबल मुब। 16 थेङ्यीमा ङ्यीबे ग्लामारी जम्मतनो नास्तेङ् दुख तनलब। 17 ओसेम् थेङ्यीमाचे सान्तीइ ग्यम् स्येबल अरे।” 18 “थेङ्यीमा पर्मेस्वर्तेङ् लोङ्बलएनो अरे।” 19 मोसाचे ब्रीबे नीयम्की तम् हुजु नीयम्की दुङ्री टीबे म्हीमाइ लागीरी ब्रीबल य्हीन्ब बी ङ्य्हङ्माचे स्येःब। होत्तज्यीम् खल्चेएनो तएनो पङ्ब खम्स्ये अरे, ओसेम् जम्बुलीङ्की जम्मनो म्हीमा दोसी ङोन्बरी पर्मेस्वर्की ङोन्ग्यम् रप्पुङ्स्ये मुब। 20 तलेपङ्सम् मोसाचे ब्रीबे नीयम् ङ्येन्ज्यीम् खलएनो पर्मेस्वर्की ङोन्री धर्मी तस्ये अरे, बरु मोसाचे ब्रीबे नीयम्चेमी ङ्य्हङ्माचे स्य्हेङ्बे पाप्मा ङोन्पीन्ब। बीस्वास् ग्यम्से धार्मीक्ता 21 तर देरेम् मोसाचे ब्रीबे नीयम् ङ्येन्ज्यीम् अय्हीन्, पर्मेस्वर्चे म्हीत थेङ्की ङोन्री ल्हो-ल्हो ग्यम्चे धर्मी स्य्हेङ्जेत्प बी ङोन्जेत्पल मुब। हुजु तम्की गबाही मोसाचे ब्रीबे नीयम्तेङ् अगम्बक्तमाचे पीन्बल मुब। 22 येसु ख्रीस्ट्री बीस्वास् स्य्हेङ्बलमा जम्मतनो पर्मेस्वर्चे धर्मी स्य्हेङ्जेत्प। थेङ्चे खलतएनो ज्यीद ङ्हच्छ्यङ् म्हेन्अजेत्। 23 तलेपङ्सम् जम्मचेनो पाप् स्य्हेङ्बल मुब, ओसेम् पर्मेस्वर्की महीमा ग्यम्से थारीङ् तबल मुब। 24 तर पर्मेस्वर् दयलु मुब, ओसेम् थेङ्चे अनुग्रह स्य्हेङ्जेत्ज्यीम् येसु ख्रीस्ट् ग्यम्से म्हीमात ओलेन्नो धर्मी स्य्हेङ्पीन्जेत्ब, तलेपङ्सम् येसु ख्रीस्ट्चे पाप ग्यम्से म्हीत फेःपीन्जेत्पल मुब। 25 तलेपङ्सम् पर्मेस्वर्चे येसु ख्रीस्ट्त ठाकी रुप्री पीत्युजेत्ज्यीम् थेङ्की काः ङ्य्हङ्माकी लागीरी य्हर्पुङ्जेत्ज्यी पङ्ज्यीम् बीस्वास् स्य्हेङ्बे म्हीमाकी पाप् म्हन लजेत्पल मुब। पर्मेस्वर्चे र्हङ्चे र्हङ्त धर्मी य्हीन्ब बी ङोन्जेत्परी चोले स्य्हेङ्जेत्ज्यी। तलेपङ्सम् पर्मेस्वर्चे ख्रीस्ट् ब्योन्युब बीम ङोन्ग्यम् बोमो नाजेत्ज्यीम् म्हीमात पाप्की सजाय न्हङ्अजेत्। 26 पर्मेस्वर्चे चु बेलोरी र्हङ् धर्मी य्हीन्ब बी ङोन्जेत्परी ओसेम् येसुरी बीस्वास् स्य्हेङ्बलमा जम्मत धर्मी तनलजेत्परी चोले स्य्हेङ्जेत्पल य्हीन्ब। 27 होलेपङ्सम् तारी घमन्ड स्य्हेङ्ब? घमन्ड स्य्हेङ्बे तम्नो अरे। ङ्य्हङ्माचे नीयम् ङ्येन्ज्यीम् धर्मी अत तर ङ्य्हङ्माचे ख्रीस्ट्री बीस्वास् स्य्हेङ्ज्यीम्कीनो धर्मी तब। 28 होत्तज्यीम् ङ्य्हङ्मा नीयम् ङ्येन्ज्यीम् अय्हीन् तर ख्रीस्ट्री बीस्वास् स्य्हेङ्ज्यीम्कीनो पर्मेस्वर्की ङोन्री धर्मी तब खम्ब। 29 ता पर्मेस्वर् यहुदीमालकीनो य्हीन्ब? ता थेङ् यहुदी अय्हीन्बे म्हीमालमी पर्मेस्वर् अय्हीन्? देमेन्नो, थेङ्मी जम्मलनो पर्मेस्वर् य्हीन्ब। 30 पर्मेस्वर् गीकीनो य्हीन्ब। थेङ्चे यहुदी य्हीन्लेनो वुइ अय्हीन्लेएनो जम्मतनो थेङ्यीमाइ बीस्वास् ग्यम्सेनो थेङ्की ङोन्री धर्मी ठार्तीजेत्प। 31 पर्मेस्वर्की ङोन्री बीस्वास् ग्यम्से धर्मी ठार्तीसम् ता पर्मेस्वर्की नीयम्मी लक् अतबल तब? अय्हीन्। बरु ङ्य्हङ्माचेम् थेङ्की नीयम्त देमेन्ले टोप लब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.