रोमी 2 - पश्चिम तामाङपर्मेस्वर्की न्याय 1 होत्तज्यीम् र्होत दोस् ल्हइतीबे म्हीमा, एङ्यीमा खजु य्हीन्लेनो तइ ङ्युङ्एनो लबे ग्ला अरे, तलेपङ्सम् एङ्यीमाचे र्होत तइ तम्री दोस् ल्हइतीब हुजु तम्री एङ्यीमाएनो दोसी तस्ये मुब, तलेपङ्सम् एङ्यीमाचेएनो होतेबे लक् स्य्हेङ्ब। 2 चोतेबे अज्यबे लक् स्य्हेङ्बे म्हीमात पर्मेस्वर्चे ठीक् न्याय स्य्हेङ्जेत्प पङ्बे तम् ङ्य्हङ्माचे स्येब। 3 एङ्यीमाचे चोतेबे लक् स्य्हेङ्बे म्हीमात दोस् ल्हइतीब ओसेम् र्हङ्चेएनो होतेबे लक्नो स्य्हेङ्ज्यी पङ्सम् ता एङ्यीमाचे र्हङ्मी पर्मेस्वर्की न्याय ग्यम्से स्योर्म्यङ्स्ये मुब बी म्हेन्ब? 4 वुइ पर्मेस्वर्की दयचे एङ्यीमात पस्चताप स्य्हेङ्ज्यीम् पर्मेस्वर्पट्टीचे दोन लब पङ्बे तम् अस्येज्यीम् थेङ्की ङ्हच्छ्यङ् दय, नाप ओसेम् धैर्यत तुच्छ म्हेन्ब? 5 तर एङ्यीमाकी सेम् कोङ्बल ओसेम् पस्चताप् अस्य्हेङ्बल तज्यीम् एङ्यीमाचे पर्मेस्वर्की बोमोइ दीन्री य्हक्को ङ्हच्छ्यङ् सजाय यङ्स्ये मुब। हुजु बेलोरी पर्मेस्वर्चे जम्मनो म्हीमाकी न्याय ठीक्-ठीक्ले स्य्हेङ्जेत्स्ये मुब। 6 पर्मेस्वर्चेनो जम्मनो म्हीमात थेङ्यीमाचे स्य्हेङ्बे लक् अनुसार्की न्याय न्हङ्जेत्स्ये मुब। 7 ज्यबे लक् स्य्हेङ्स्यीनो टीज्यीम् पर्मेस्वर्की महीमा, स्य्हेस ओसेम् खेमेनो अबेबे जीवन् म्हइबे म्हीमात पर्मेस्वर्चे खेमेनो अबेबे जीवन् न्हङ्जेत्स्ये मुब। 8 तर र्हङ्चे र्हङ्तकीनो म्होइबे, देमेन्त अङ्येन्बे ओसेम् अज्यबे लक्मा स्य्हेङ्बे म्हीमाइ जोरीमी पर्मेस्वर्चे थेङ्की ङ्हच्छ्यङ् बोमो साजेत्स्ये मुब। 9 दुस्ट लक्मा स्य्हेङ्बलमा जम्मइ जोरी ङ्हच्छ्यङ् दुखतेङ् पीर्मा खनलजेत्स्ये मुब, ङोन्ग्यम् यहुदीमाकी जोरी ओसेम् यहुदी अय्हीन्बे म्हीमाइ जोरीएनो खस्ये मुब। 10 तर ज्यबे लक् स्य्हेङ्बलमा जम्मतनो पर्मेस्वर्चे महीमा, स्य्हेस ओसेम् सान्ती न्हङ्जेत्स्ये मुब, ङोन्ग्यम् यहुदीमात ओसेम् यहुदी अय्हीन्बे म्हीमात न्हङ्जेत्स्ये मुब। 11 तलेपङ्सम् पर्मेस्वर्चे खल्लेनो लीः च्याज्यीम् न्याय स्य्हेङ्अजेत्। 12 मोसाचे ब्रीबे नीयम् अयङ्ज्यीम् पाप स्य्हेङ्बे यहुदी अय्हीन्बे म्हीमा, मोसाचे ब्रीबे नीयम् अयङ्लेनो नास् तस्ये मुब। मोसाचे ब्रीबे नीयम् यङ्ज्यीमएनो पाप् स्य्हेङ्बे यहुदीमातमी हुजु नीयम् ग्यम्चेनो न्याय स्य्हेङ्स्ये मुब। 13 तलेपङ्सम् मोसाचे ब्रीबे नीयम् थ्येःकीनो थ्येःबलमा पर्मेस्वर्की ङोन्री धर्मी अत, तर मोसाचे ब्रीबे नीयम् ङ्येन्ज्यीम् ब्रबे म्हीमा धर्मी तस्ये मुब। 14 यहुदी अय्हीन्बे म्हीमातेङ्मी मोसाचे ब्रीबे नीयम् अरे। तर थेङ्यीमाकी स्वभाब्चेनो मोसाचे ब्रीबे नीयम्की डेत्डेत् तम् ङ्येन्ब। चोले थेङ्यीमातेङ् मोसाचे ब्रीबे नीयम् अरेलएनो थेङ्यीमाचे हुजु नीयम्चे पङ्ब र्हङ्ले स्य्हेङ्ज्यीम् थेङ्यीमातेङ् हुजु नीयम् मुब पङ्ज्यीम् ङोन्ब। 15 थेङ्यीमाचे स्य्हेङ्बे ब्यबहार्चेनो थेङ्यीमाकी सेम्री मोसाचे ब्रीबे नीयम्चे कुल्बे तम्मा ब्रीबल मुब पङ्बे तम् ङोन्ब, ओसेम् थेङ्यीमाकी बीबेक्चे खेमम् ज्यब स्य्हेङ्ज्यी बी ङोन्ब, ओसेम् खेमम् अज्यब स्य्हेङ्ज्यी बी ङोन्ब। 16 चु तम्मा ङचे प्रचार स्य्हेङ्बे ज्यबे सम्तर् अनुसार पर्मेस्वर्चे म्हीमाचे छुम्ज्यीम् स्य्हेङ्बे लक्की न्याय येसु ख्रीस्ट् ग्यम्से स्य्हेङ्जेत्स्येकी दीन्री म्रङ्स्ये मुब। मोसाचे ब्रीबे नीयम्तेङ् यहुदीमा 17 एङ्यीमा कोइ-कोइचे र्हङ्चे र्हङ्तनो यहुदी य्हीन्ब पङ्ब ओसेम् मोसाचे ब्रीबे नीयम्री भर् लब, ओसेम् पर्मेस्वर्त स्येब पङ्ज्यीम् घमन्ड लब। 18 एङ्यीमाचे र्हङ्चे र्हङ्तनो पर्मेस्वर्की थुः एङ्यीमातेङ् ता मुब बी स्येबे म्ही य्हीन्ब बी म्हेन्ब, तलेपङ्सम् एङ्यीमाचे खचु तम् ठीक् य्हीन्ब बी नीयम् ग्यम्से लोप्पल मुब। 19 एङ्यीमाचे र्हङ्चे र्हङ्तनो पर्मेस्वर्त अस्येःबे म्हीमात ग्यम् ङोन्बे म्ही य्हीन्ब बी म्हेन्ब, ओसेम् म्हुन्दुङ्री मुबलमाकी लागीरी एङ्यीमा र्हङ्नो य्हल् य्हीन्ब बी म्हेन्ब। 20 ओसेम् एङ्यीमाचे र्हङ्चे र्हङ्तनो मुर्ख म्हीमात ज्यबे म्ही तनलबे म्ही य्हीन्ब बी म्हेन्ब, ओसेम् अस्येबे कोलमात लोप्पीन्बे म्ही य्हीन्ब बी म्हेन्ब, तलेपङ्सम् एङ्यीमाचे र्हङ्चे र्हङ्तनो पर्मेस्वर्की नीयम्रीनो जम्मनो ज्ञान्तेङ् देमेन् यङ्बल मुब बी म्हेन्ब। 21 एङ्यी ल्हो-ल्होत लोप्पलमाचे तले र्हङ्चे र्हङ्तमी अलोप्? ल्हो-ल्होत य्हो लब अत पङ्ज्यीम् लोप्प तर एङ्यीमा र्हङ्चेमी य्हो लब। 22 एङ्यीमाचे ल्हो-ल्होत ब्यभीचार् स्य्हेङ्ब अत पङ्ज्यीम् लोप्प तर एङ्यीमाचे र्हङ्चेमी तले ब्यभीचार स्य्हेङ्ब? ख्लमात तेन्ब अत पङ्ब तर एङ्यीमाचेमी ख्लइ दीम्की स्हेमा तले य्हो लब? 23 एङ्यीमाचे मोसाचे ब्रीबे नीयम् एङ्यीमातेङ् मुब पङ्ज्यीम् घमन्ड स्य्हेङ्ब तर एङ्यीमाचे हुजु नीयम् अङ्येन्ज्यीम् तले पर्मेस्वर्त स्य्हेस अस्य्हेङ्? 24 धर्म छ्येःचे चोले पङ्ब, “एङ्यी यहुदीमाचे लज्यीम्नो यहुदी अय्हीन्बे म्हीमाइ गुङ्री पर्मेस्वर्की छेन्की नीन्द तबल मुब।” 25 पर्मेस्वर्की नीयम् ङ्येन्ज्यी पङ्सम् एङ्यीमाचे स्य्हेङ्बे खतन ठीक्नो य्हीन्ब, तर पर्मेस्वर्की नीयम् अङ्येन्ज्यी पङ्सम् एङ्यीमा खतन अस्य्हेङ्बे म्हीमा र्हङ्बनो तब। 26 ओसेम् खतन अस्य्हेङ्बे म्हीचे पर्मेस्वर्की नीयम् ङ्येन्ज्यीम् ब्रसम् पर्मेस्वर्चे थेङ्यीमात र्हङ्की म्हीमा य्हीन्ब बी म्हेन्जेत्स्ये मुब। 27 ओसेम् पर्मेस्वर्की नीयम् ङ्येन्बे खतन अस्य्हेङ्बे म्हीमाचे एङयी खतन स्य्हेङ्बे मोसाचे ब्रीबे पर्मेस्वर्की नीयम् मुज्यीमएनो अङ्येन्बे यहुदीमात दोसी ङोन्स्ये मुब। 28 खल्चे पङ्लेनो फीर्च्योर्चे ल्हीरीकीनो यहुदी य्हीन्ब पङ्ज्यीम् थे देमेन्की यहुदी अत। होलेनो ल्हीरी स्य्हेङ्बे खतनाएनो देमेन्की खतन अय्हीन्। 29 तर सेम्न्हङ् य्हङ्सेनो यहुदी तज्यी पङ्सम्कीनो थेत देमेन्की यहुदी पङ्ब खम्ब। देमेन्की खतनमी पर्मेस्वर्की नीयम अनुसार् ल्हीरीकीनो तबे तम् अय्हीन् तर सेम्री पबीत्र आत्माचे स्य्हेङ्बे तम् य्हीन्ब। चोतेबे देमेन्की खतन तबे म्हीइ तोप्प म्हीमा ग्यम्से अय्हीन् तर पर्मेस्वर् ग्यम्से तब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.