Biblia Todo Logo
Bìoball air-loidhne

- Sanasan -

रोमी 16 - पश्‍चिम तामाङ


ज्‍युःकी लस्‍सो

1 देरेम् ङ ङ्‍य्‍हङ्‍की अङ फीबीत एङ्‍यीमातेङ् स्‍येःनलपीन्‍ब, थेचे कीङ्‌क्रीयारी मुबे मन्‍डलीरी डीकन्‍की लक् स्‍य्‍हेङ्‍ब।

2 थेचे य्‍हक्‍कोत र्‌हो लज्‍यी, ओसेम् ङतएनो य्‍हक्‍को र्‌हो लबल मुब। होत्‍तज्‍यीम् एङ्‌यीमाचे पर्‌मेस्‍वर्‌की जम्‍मनो म्‍हीमात स्‍वागत् स्‍य्‍हेङ्‌ब र्‌हङ्‌ले प्रभुइ छेन्‍री थेतएनो स्‍वागत स्‍य्‍हेङो, ओसेम् थेत तोःबे स्‍हेमारी खम्‍ब गदे र्‌हो: लउ।

3 ङतेङ् बक्‍च्‍य येसु ख्रीस्‍ट्‍की लक् स्‍य्‍हेङ्‌बे प्रीस्‍कीलातेङ् अकीलास्‍त लस्‍सो मुब।

4 थेङ्‍यीमाचे ङइ लागीरी र्‌हङ्‍की जीवन् पीन्‍बरी टोप् तज्‍यी। थेङ्‍यीमात ङचेकीनो अय्‍हीन्, तर यहुदी अय्‍हीन्‍बे म्‍हीमाइ मन्‍डलीमा जम्‍मचेनो व्‍होर्‌छ्‌ये पीन्‍ब।

5 थेङ्‍यीमाकी दीम्‍री र्‌हुब् तबे मन्‍डलीतएनो ङइ लस्‍सो मुब। एसीया प्रदेस्‍की जम्‍मन्‍हङ्‍की ङोन्‍ग्‍यम् ख्रीस्‍त बीस्‍वास् स्‍य्‍हेङ्‌बे ङइ म्‍होइबे र्‌हो इपेनीस्‍त लस्‍सो मुब।

6 एङ्‌यीमाकी लागीरी य्‍हक्‍को लक् स्‍य्‍हेङ्‌बे मरीयमतएनो लस्‍सो मुब।

7 एन्‍ड्रोनीकस्‍तेङ् युनीयस, ओसेम् ङतेङ् बक्‍च्‍य जेल्‍री मुबे यहुदी र्‌होमातएनो लस्‍सो मुब। थेङ्‌यीमात प्रेरीत्‍माचे ज्‍यनले स्‍येःब। थेङ्‍यीमाचे ङचे बीम ङोन्‍ग्‍यम् ख्रीस्‍ट्‍री बीस्‍वास् स्‍य्‍हेङ्‍बल मुबल।

8 प्रभुरी ङइ म्‍होइबे र्‌हो, एम्‍प्‍लीआतस्‍त ङइ लस्‍सो मुब।

9 ख्रीस्‍ट्‍की लागीरी ङतेङ् बक्‍च्‍य लक् स्‍य्‍हेङ्‌बे उर्‌बनास, ओसेम् ङइ म्‍होइबे र्‌हो स्‍ताखुस्‍तएनो लस्‍सो मुब।

10 ख्रीस्‍ट्‍की लागीरी योग्‍य तबल ङोन्‍बे अपेल्‍लेस्‍तएनो ङइ लस्‍सो मुब। अरीस्‍तोबुलस्‍तेङ् थेइ दीम्‍की म्‍हेम्‍यमातएनो लस्‍सो मुब।

11 ङइ यहुदी र्‌हो हेरोदीयन्‍त लस्‍सो मुब। प्रभुरी बीस्‍वास् स्‍य्‍हेङ्‌बे नर्‌कीसस्‍की दीम्‍री मुबलमा जम्‍मतनो लस्‍सो मुब।

12 प्रभुरी य्‍हक्‍को लक् स्‍य्‍हेङ्‌बे ननअङमा त्रुफेनातेङ् त्रोफोसात लस्‍सो मुब। प्रभुइ लागीरी य्‍हक्‍को लक् स्‍य्‍हेङ्‌बे म्‍होइबे अङ पर्‌सीस्‍त लस्‍सो मुब।

13 प्रभुचे दम्‍जेत्‍पे रुफस्‍त लस्‍सो मुब, ओसेम् ङत र्‌हङ्‍की ज र्‌हङ्‍बनो म्‍हेन्‍बे थेइ अमत लस्‍सो मुब।

14 असीङ्‌क्रीतस्, फ्‍लेगन्, हेर्‌मेस्, पत्रोबास्, हर्‌मास्, ओसेम् थेङ्‌यीमातेङ् मुबे बीस्‍वासी र्‌होमात लस्‍सो मुब।

15 फीलोलोगस्, युलीया, नेरीयस्‍तेङ् थेइ अङ, ओसेम् ओलीम्‍पास्, ओसेम् थेङ्‌यीमातेङ् मुबे जम्‍मनो पर्‌मेस्‍वर्‌की म्‍हीमात ङइ लस्‍सो मुब।

16 गीःचे गीःत म्‍होइज्‍यीम् लस्‍सो लउ। ख्रीस्‍ट्‍री जम्‍मनो मन्‍डलीमाचे एङ्‌यीमात लस्‍सो पीत्‍खबल मुब।


पावलचे ज्‍युःरी लोप्‍पे तम्‍तेङ् पीन्‍बे सल्‍लह

17 बीस्‍वासी र्‌होमा, ङ एङ्‌यीमात फ्‍या लब, एङ्‌यीमाकी गुङ्‍री थीनलबतेङ् एङ्‌यीमाकी बीस्‍वास्‍त थोक्‍नलबे म्‍हीमा ग्‍यम्‍से होसीयार्‌ले टीउ। एङ्‌यीमाचे ङ्‌यीमा ग्‍यम्‍से लोप्‍पे तम्‍माकी बीरोद् थेङ्‍यीमाचे स्‍य्‍हेङ्‍ब। होतेबे म्‍हीमा ग्‍यम्‍से थारीङ्‍नो टीउ।

18 तलेपङ्‍सम् होतेबे म्‍हीमाचे ख्रीस्‍ट् ङ्‍य्‍हङ्‍की प्रभुइ लागीरी अय्‍हीन्, तर थेङ्‌यीमाचे र्‌हङ्‍तकीनो ज्‍यब तबे लागीरी सेवा स्‍य्‍हेङ्‌ब, ओसेम् थेङ्‌यीमाकी ज्‍यब-ज्‍यबे छीःमातेङ् तम्‍माचे सोजो म्‍हीमात धोका पीन्‍ब।

19 एङ्‍यीमा पर्‌मेस्‍वर्‌की फ्रोइ ङ्‌येन्‍ज्‍यीम् ब्रबल मुब पङ्‍बे तम् जम्‍मनो म्‍हीमाचे थ्‍येःबल मुब, ओसेम् चु तम्‍चे लज्‍यीमा ङ य्‍हक्‍को तङ्‍ब। एङ्‍यीमा ज्‍यबे लक्‍की लागीरी बुद्‍दी मुबे म्‍हीमा ओसेम् दुस्‍ट लक्‍की लागीरी दोस् अरेबे म्‍हीमा तखइ पङ्‍बे सेम् ङल मुब।

20 ओसेम् सान्‍ती न्‍हङ्‌बे पर्‌मेस्‍वर्‌चे ग्‍योःनेनो सैतान्‍त एङ्‌यीमाकी कङ् थीङ् दुङ्‌री प्‍लेःनलपुङ्‍जेत्‍स्‍ये मुब। ङ्‍य्‍हङ्‍की प्रभु येसुइ अनुग्रह एङ्‍यीमातेङ् तखइ।

21 ङतेङ् बक्‍च्‍य लक् स्‍य्‍हेङ्‌बे तीमोथीचे एङ्‌यीमात लस्‍सो पीत्‍खबल मुब। होलेनो यहुदी अलेमा लुकीया, यासोन् ओसेम् सोसीपात्रोसचेएनो एङ्‍यीमात लस्‍सो पङ्‍बल मुब।

22 पावलचे पङ्‍ब अनुसार् चु चीठी ब्रीपीन्‍बे ङ तर्‌तीयस्‍चे प्रभुइ छेन्‍री एङ्‍यीमात लस्‍सो पीत्‍खबल मुब।

23 ङ टीबे दीम्‍की न्‍याबो गायसचे एङ्‌यीमात लस्‍सो पङ्‍बल मुब। थेइ दीम्‍री बीस्‍वासीमा र्‌हुब् तब। चु सहर्‌की कोस् अध्‍यक्ष इरास्‍तस् ओसेम् ङ्‍य्‍हङ्‍की अले क्‍वार्‌टस्‍चेएनो एङ्‍यीमात लस्‍सो पङ्‍बल मुब।

24 [ङ्‍य्‍हङ्‍की प्रभु येसु ख्रीस्‍ट्‍की अनुग्रह एङ्‌यीमा जम्‍मतेङ्‍नो तखइ। आमेन्।]


पावलकी ज्‍युःकी प्रार्‌थना

25 ङ्‍य्‍हङ्‍मा जम्‍मचेनो पर्‌मेस्‍वर्‌त महीमा पीन्‍गे! पर्‌मेस्‍वर्‌चे एङ्‍यीमात येसु ख्रीस्‍ट्‍त कोङ्‍नले बीस्‍वास् स्‍य्‍हेङ्‍नलजेत्‍प। ओसेम् ङचे ख्रीष्‍ट्‍की बारेरी प्रचार स्‍य्‍हेङ्‌बे ज्‍यबे सम्‍तर् ग्‍यम्‍सेएनो चु तम् स्‍येत्‍प। चु तम् दङ्‌बो य्‍हङ्‌सेनो छुम्‍ज्‍यीम् थेन्‍बल मुबल,

26 तर देरेम् चु जम्‍मनो तम्‍मा दङ्‍बोनो अगम्‍बक्‍तमाचे पर्‌मेस्‍वर्‌चे कुल्‍जेत्‍प अनुसार् ब्रीबे तम्‍मा ग्‍यम्‍से स्‍येःनलजेत्‍पल मुब। ओसेम् जम्‍मनो यहुदी अय्‍हीन्‍बे म्‍हीमाचे बीस्‍वास् लज्‍यीम् पर्‌मेस्‍वर्‌की तम्‍मा ङ्‍येन्‍खइ पङ्‍ज्‍यीम् खेम पङ्‌लेनो मुजेत्‍पे पर्‌मेस्‍वर्‌की फ्रोइ अनुसार् चु ज्‍यबे सम्‍तर् म्‍हीमात स्‍येत्‍पल मुब।

27 जम्‍मनो तम्‍मा खेम्‍जेत्‍पे गीःकीनो पर्‌मेस्‍वर्‌त येसु ख्रीस्‍ट् ग्‍यम्‍से खेम पङ्‌लेनो महीमा तस्‍यीनोटीखइ। आमेन्।

© 2024 (Active), Wycliffe Bible Translators, Inc. All rights reserved.

Wycliffe Bible Translators, Inc.
Lean sinn:



Sanasan