रोमी 15 - पश्चिम तामाङल्होल्होतएनो वास्त स्य्हेङो 1 ङ्य्हङ्मा बीस्वास्री कोङ्बलमाचे र्हङ्तकीनो तङ्न लब अय्हीन्, बीस्वास्री अकोङ्बलमातएनो र्हो लथोब। 2 ङ्य्हङ्मा जम्मचेनो र्हङ्की खीम्सेत ज्यब तखइ ओसेम् बीस्वास्री कोङ्खइ पङ्ज्यीम् थेङ्यीमात र्हो लथोब। 3 तलेपङ्सम् ख्रीस्टचेएनो र्हङ्त तङ्न लबे लक् स्य्हेङ्अजेत्। होलेनो धर्म छ्येःरी, “ओ पर्मेस्वर्, थेङ्त नीन्द स्य्हेङ्बलमाचे ङतएनो नीन्द स्य्हेङ्ज्यी” बी ब्रीबल मुब। 4 तलेपङ्सम् धर्म छ्येरी ङोन्ग्यम्की दीन्मारी ब्रीबे तम्मा ङ्य्हङ्मात लोप्परी ब्रीबल य्हीन्ब। हुजु तम्माचे ङ्य्हङ्मात नाबे सक्तीतेङ् आर् पीन्ब, होत्तज्यीम् ङ्य्हङ्माचे आस् यङ्स्ये मुब। 5 नाबे सक्तीतेङ् आर् न्हङ्जेत्बे पर्मेस्वर्चेनो एङ्यीमात येसु ख्रीस्ट्की थुः अनुसार गीःचे गीःतेङ् सान्तीरी टीबे सक्ती न्हङ्जेत्खइ। 6 चोले एङ्यीमा जम्म ग्यम्से सेम् गी: तज्यीम् केत् गी:री ङ्य्हङ्की प्रभु येसु ख्रीष्टकी अप पर्मेस्वर्त महीमा तखइ। यहुदी अय्हीन्बे म्हीमाकी लागीरी ज्यबे सम्तर् 7 होत्तज्यीम् पर्मेस्वर्की महीमाकी लागीरी ख्रीस्ट्चे एङ्यीमात ग्रहन् स्य्हेङ्ब र्हङ्ले एङ्यीमाचे गीःचे गीःत ग्रहन् स्य्हेङो। 8-9 तलेपङ्सम् ङ एङ्यीमात पङ्ब, पर्मेस्वर्चे यहुदीमाकी म्हेम्हेमातेङ् स्य्हेङ्जेत्पे बाचात देमेन् य्हीन्ब बी ङोन्बरी, ओसेम् यहुदी अय्हीन्बे म्हीमाचेएनो पर्मेस्वर्की क्रीपाइ लागीरी पर्मेस्वर्त तोप्खइ पङ्ज्यीम् ख्रीस्ट् यहुदीमाकी स्य्हप्तो स्य्हेङ्जेत्परी योक्पो तज्यीम् ब्योन्युजेत्ज्यी। धर्म छ्येःरी चोले ब्रीबल मुब, “होत्तज्यीम् ङ यहुदी अय्हीन्बे म्हीमाइ गुङ्री थेङ्त तोप्स्ये मुब, ओसेम् ङ थेङ्की छेन्त तोप्पे व्हइ कोस्ये मुब।” 10 ओसेम् देबेएनो ब्रीबल मुब, “ओ यहुदी अय्हीन्बे म्हीमा, पर्मेस्वर्की म्हीमातेङ् तङो।” 11 ओसेम् देबेएनो ब्रीबल मुब, “यहुदी अय्हीन्बे म्हीमा, प्रभुत तोपो, जम्म जातीइ म्हीमा, प्रभुत तोपो।” 12 ओसेम् यसैया अगम्बक्तचेएनो ल्हो-ल्हो ग्लारी चोले पङ्बल मुब, “यीसैकी सन्तान् ग्यम्से म्ही गी खस्ये मुब, थेङ्चे यहुदी अय्हीन्बे म्हीमाइ जोरी सासन् स्य्हेङ्जेत्स्ये मुब, ओसेम् यहुदी अय्हीन्बे म्हीमाचे थेङ्यीमाकी आस् थेङ्री थेन्स्ये मुब।” 13 एङ्यीमाचे पर्मेस्वर्री बीस्वास् स्य्हेङ्बल तज्यीम् आसा न्हङ्बे पर्मेस्वर्चेनो एङ्यीमात तङ्बतेङ् सान्तीचे प्लीङ्न लजेत्खइ पङ्ज्यीम् ङ प्रार्थना स्य्हेङ्ब। होले पबीत्र आत्माइ सक्ती ग्यम्से एङ्यीमाकी आसा प्लीङ्खइ। यहुदी अय्हीन्बे म्हीमात ज्यबे सम्तर् स्येत्प 14 बीस्वासी र्होमा, ङचे ज्यनले स्येब एङ्यीमाचे म्हीमात ज्यबे ब्यबहार् स्य्हेङ्टीब मुब, ओसेम् एङ्यीमा ज्ञान्चे प्लीङ्ज्यीम् गी:चे गी:त लोप्प खम्ब। 15 होलेतलेनो ङचे चु स्येब, ङ चु चीठीरी एङ्यीमात गते तम्मामी व्हल् लपीन्बरी आर् लज्यीम् ब्रीटीब। तलेपङ्सम् पर्मेस्वर्चे ङत अनुग्रह ग्यम्से यहुदी अय्हीन्बे म्हीमाकी लागीरी 16 येसु ख्रीस्ट्की योक्पो स्य्हेङ्जेत्पल मुब। लम्बुचे पर्मेस्वर्की ङोन्ग्यम् सेम्री ङ्यीबे भेटी बब र्हङ्ले, ङ पर्मेस्वर्की ज्यबे सम्तर् यहुदी अय्हीन्बे म्हीमात स्येत्प। होत्तज्यीम् थेङ्यीमा पवीत्र आत्माचे सुद्द स्य्हेङ्ज्यीम् पर्मेस्वर्त सेम्री ङ्यीबे भेटी तखम्खइ। 17 होत्तज्यीम् पर्मेस्वर्की लागीरी येसु ख्रीस्ट्तेङ् गीः तज्यीम् ङचे स्य्हेङ्बे लक्री ङ घमन्ड स्य्हेङ्ब। 18 ख्रीस्ट्चे ङइ जीवन ग्यम्से स्य्हेङ्जेत्बे लक्माकी बारेरीकीनो ङचे पङ्बे आर् लब। पर्मेस्वर्की फ्रोइ ङ्येन्बरी ङचे यहुदी अय्हीन्बे म्हीमात ङइ लक्तेङ् प्रचार ग्यम्से 19 ओसेम् अचम्मइ लक्मा ग्यम्से, सक्तीसाली चीन्हमा ग्यम्से ओसेम् पर्मेस्वर्की आत्माइ सक्ती ग्यम्से लोप्पल मुब। चोले यरुसलेम् य्हङ्से इल्लुरीकन् पङ्बे य्हुल्की जम्मनो ग्लामारी ङचे ख्रीस्ट्की ज्यबे सम्तर् प्रचार् स्य्हेङ्बल मुब। 20 ल्होल्होचे तीप्पे जग्री दीम् स्य्हेङ्ब र्हङ्ले ल्होल्होचे ङोन्नो प्रचार् स्य्हेङ्बे ग्लारी ङचे प्रचार स्य्हेङ्बे सेम् अल। ख्रीस्ट्की बारेरी थ्येनो अथ्येबतेङ् ल्होल्होचे ङोन्नो प्रचार् अस्य्हेङ्बे ग्लारीकीनो ज्यबे सम्तर् स्येत्पे सेम् ङल य्हक्को मुब। 21 होलेनो धर्म छ्येरीएनो पङ्बल मुब, “खजु म्हीमात थेङ्की बारेरी अस्येत्ज्यी हुजु म्हीमाचे थेङ्त म्रङ्स्ये मुब, ओसेम् खजु म्हीमाचे थेङ्की बारेरी अथ्येज्यी हुजु म्हीमाचे थेङ्त गोस्ये मुब।” पावलचे रोम्री ङ्यीबे योजना स्य्हेङ्बल 22 चोले ङचे छार् ग्लामारी ख्रीस्ट्की प्रचार स्य्हेङ्बल तज्यीम् एङ्यीमाज खबरी य्हक्को ख्यप्नो रोक्तीज्यी। 23 तर देरेम् ङचे हुजु ग्लामारी प्रचार् स्य्हेङ्बे लक् ज्यीन्बल मुब। ङल य्हक्को बर्स ङोन्ग्यम् य्हङ्सेनो एङ्यीमातेङ् खतु लबे सेम् य्हक्को मुबल। 24 ङ एङ्यीमाकी ग्ला ग्यम्से तज्यीम् स्पेन् पङ्बे य्हुल्री ङ्यीब म्हइटीब, हुजु बेलोरी एङ्यीमातेङ् दोबे आस् मुब। य्हम्बकी एङ्यीमातेङ् बक्च्य तङ्ज्यीम् टीबे सेम् मुब, ओसेम् ङ स्पेन् य्हुल्री य्हर्बे बेलोरी एङ्यीमाचे ङत र्हो लपीन्स्ये पङ्बे आस् मुब। 25 तर देरेमी ङ यरुलेम्री मुबे परमेस्वरकी म्हीमात र्हो लबरी ङ्यीब म्हइटीब। 26 तलेपङ्सम् माकेडोनीयतेङ् अखैया प्रदेस्की बीस्वासीमाचे यरुसलेम्की प्रङ्न बीस्वासीमात भेटी रेःज्यीम् पीत्पे सेम् लबल मुब। 27 थेङ्यीमाचे चु भेटी तङ्तङ्ज्यीम् र्हुब्ज्यी, य्हीन्बरीम् थेङ्यीमाचे यहुदी बीस्वासीमात र्हो स्य्हेङ्नोथोब मुबल, तलेपङ्सम् यहुदीमा ग्यम्सेनो यहुदी अय्हीन्बे म्हीमाचे आत्मीक् मोलम् यङ्ज्यी। होलेनो यहुदी अय्हीन्बे म्हीमाचेएनो यहुदीमात तोःबरी र्हो लथोब। 28 होत्तज्यीम् थेङ्यीमात चु भेटी सथेन्ङ्यीज्यीम् ङ एङ्यीमाज खस्ये मुब। ओसेम् हुजुलीप्चे ङ स्पेन् य्हुल्री ङ्यीस्ये मुब। 29 ङ रोम्री एङ्यीमाज खबे बेलोरी ख्रीस्ट्चे न्हङ्जेत्पे मोलम्चे प्लीङ्ज्यीम् खस्ये मुब। 30 बीस्वासी र्होमा, ङ्य्हङ्की प्रभु येसु ख्रीष्ट्तेङ् थेङ्की आत्माचे न्हङ्बे म्होइबचे लज्यीम् ङतेङ् बक्च्य पर्मेस्वर्री एङ्यीमाचेएनो ङइ लागीरी सेम् य्हङ्सेनो प्रार्थना स्य्हेङ्पीनो पङ्ज्यीम् ङ एङ्यीमात फ्यालब। 31 यहुदीयारी मुबे बीस्वास् अस्य्हेङ्बे म्हीमा ग्याम्से थर्ब खम्खइ, ओसेम् ङचे यरुसलेम्री बोर्टीबे टङ पर्मेस्वर्की म्हीमाचे कीन्ज्यीम् सेम्री ङ्यीखइ पङ्ज्यीमएनो प्रार्थना स्य्हेङ्पीनो। 32 ओसेम् पर्मेस्वर्की थुः मुसम् ङ तङ्तङ्ज्यीम् एङ्यीमाज खस्ये मुब। ओसेम् ङ्य्हङ्मा र्हुब्ले टीज्यीम् तङ्स्ये मुब। 33 सान्ती न्हङ्जेत्पे पर्मेस्वर् एङ्यीमा जम्मतेङ्नो स्य्हुजेत्खइ। आमेन्। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.