रोमी 14 - पश्चिम तामाङबीस्वासी र्होमात दोस् ल्हइतीब अत 1 बीस्वास्री अकोङ्बे बीस्वासीमात थेङ्यीमाकी बीचार्मारी तम् अज्योप्नले सङ्गतीरी स्वागत् स्य्हेङो। 2 डेत् डेत् बीस्वासीमाचे जम्मनो स्हेमा चब तब बी बीस्वास् स्य्हेङ्ब, तर बीस्वास्री अकोङ्बलमाचेमी डब्कीनो चब। 3 जम्मनो थोइ स्हेःमा चबलचे डब्डुब्माकीनो चबलत दोस् थपीनो, ओसेम् डब्डुब्माकीनो चबलचे जम्मनो थोइ स्हेःमा चबलत दोस् थपीनो। तलेपङ्सम् थेङ्यीमा जम्मतनो पर्मेस्वर्चे स्वीकार् स्य्हेङ्जेत्पल मुब। 4 ल्हो-ल्होइ योक्पोत दोस् ल्हइतीबल ए खल? थेइ मालीक्चेनो थेचे ज्यबे लक् स्य्हेङ्ज्यी वुइ अज्यबे लक् स्य्हेङ्ज्यी पङ्स्ये मुब। प्रभुचेनो कम्जोर् योक्पोमात ज्यबे लक् स्य्हेङ्बरी र्हो लजेत्स्ये मुब, तलेपङ्सम् थेङ्यीमात र्हो लबे सक्ती प्रभुतेङ् मुब। 5 डेत् डेत् बीस्वासीमाचे दीन् गीःत ल्हो-ल्हो दीन्मा बीम ज्यबे दीन् पङ्ब, ओसेम् डेत् डेत् बीस्वासीमाचेम् जम्मनो दीन्मा गीःनो य्हीन्ब पङ्ब। जम्मनो म्हीमा र्हङ्र्हङ्की सेम्री चु तम्माकी बारेरी पक्का तथोब। 6 ल्हो-ल्हो दीन्मा बीम दीन् गीः ज्यबल मुब पङ्बलमाचे प्रभुत स्य्हेस स्य्हेङ्बरी होले पङ्ब। जम्मनो स्हेमा चबलमाचे प्रभुत स्य्हेस स्य्हेङ्बरी चब, तलेपङ्सम् थेचे पर्मेस्वर्त व्होर्छ्ये पीन्ज्यीम् चब। ओसेम् डब्डुब्कीनो चबलचेएनो प्रभुत स्य्हेस स्य्हेङ्बरी चब, तलेपङ्सम् थेचे पर्मेस्वर्त व्होर्छ्ये पीन्ज्यीम् चब। 7 ङ्य्हङ्मा खलएनो र्हङ्की लागीरीनो असो ओसेम् र्हङ्की लागीरीनो अस्यी। 8 ङ्य्हङ्मा सोलएनो प्रभुइ लागीरी सोब ओसेम् स्यीलएनो प्रभुइ लागीरी स्यीब। होत्तज्यीम् ङ्य्हङ्मा सोलएनो स्यीलएनो प्रभुलनो य्हीम्ब। 9 तलेपङ्सम् ख्रीस्ट् स्यीब ग्यम्से देबेएनो सोजेत्ज्यी, होत्तज्यीम् थेङ् स्यीबलमातेङ् सोबलमा जम्मइ प्रभु तजेत्ज्यी। 10 होलेपङ्सम् एङ्यीमाचे तले ल्हो-ल्हो बीस्वासी र्होमात दोस् ल्हइतीब स्यीम्? ओसेम् एङ्यीमाचे तले थेङ्यीमात अज्यब म्हेन्ब? तलेपङ्सम् तीरेत् ङ्य्हङ्मा जम्मनो पर्मेस्वर्चे न्याय स्य्हेङ्बे ग्लारी रप्नोथोब। 11 धर्म छ्येःरी ब्रीबल मुब, “पर्मप्रभुचे सुङ्जेत्प, ‘ङ सोम्बो पर्मेस्वर् य्हीम्ब, जम्मनो म्हीमाचे ङइ ङोन्री पुइ जुःस्ये मुब, ओसेम् जम्मनो म्हीमाइ लेचे पर्मेस्वर्त तोप्स्ये मुब।’” 12 होत्तज्यीम् ङ्य्हङ्मा जम्मचेनो र्हङ्र्हङ्चे स्य्हेङ्बे लक्माकी हीसब् पर्मेस्वर्त पीन्नोथोब। ल्हो-ल्होत सेम नन थलो 13 होत्तज्यीम् ङ्य्हङ्माचे गी:चे गी:त दोस् ल्हइतीब पीत्थोब। बरु ङ्य्हङ्माचे ल्हो-ल्हो बीस्वासी र्होमात थोक्न लबे लक्तेङ् पाप्री दो:न लबे लक् खेमेएनो अस्य्हेङ् पङ्ज्यीम् पक्क लइ। 14 प्रभु येसुचे ङत ज्यनले ङोन्जेत्पल मुब, चबे स्हेःमा र्हङ्नो असुद्द अत। तर खल्चे पङ्लेनो तेए चबे स्हेत असुद्द मुब बी म्हेन्सम् हुजु थेइ लागीरी असुद्दनो तब। 15 एचे चबे चब ग्यम्से ल्हो-ल्हो बीस्वासी र्होमात सेम् नन लब पङ्सम् एचे थेङ्यीमात म्होइबल अत। एचे चबे चबचे ल्हो-ल्हो बीस्वासी र्होमात नास् अलखइ, तलेपङ्सम् थेङ्यीमाकी लागीरीएनो ख्रीस्ट् स्यीजेत्पल य्हीन्ब। 16 होत्तज्यीम् एचे ता ज्यब बी म्हेन्ब हुजुत ल्होल्होचे अज्यब पङ्अम्यङ्खइ। 17 तलेपङ्सम् पर्मेस्वर्की य्हुल्मी चबतेङ् थुङ्ब अय्हीन्, तर चुमी पवीत्र आत्माचे न्हङ्जेत्पे धार्मीक्त, सान्ती ओसेम् तङ्ब य्हीन्ब। 18 चोले ख्रीस्ट्की स्य्हब्तो स्य्हेङ्बलमाचे पर्मेस्वर्त तङ्न लब, ओसेम् म्हीमा ग्यम्सेएनो स्याबास् यङ्ब। 19 होत्तज्यीम् ङ्य्हङ्माचे सान्ती पीन्बतेङ् गी:चे गी:त बीस्वास्री कोङनलबे तम्रीकीनो सेम् पीन्गे। 20 चबे स्हेचे लज्यीम् पर्मेस्वर्की लक्त नास् थस्य्हेङो। जम्मनो चबे स्हे चब तब, तर एचे चबे चबचे ल्हो-ल्होत पाप्री दो:नलबमी अज्यब य्हीन्ब। 21 एङ्यीमाचे चबे स्यचे, थुङ्बे ज्यीचे ओसेम् एङ्यीमाचे स्य्हेङ्बे लक्मा ताचे पङ्लेनो ल्हो-ल्हो बीस्वासी र्होमात पाप्री दो:न लब पङ्सम् हुजु अचबनो, अथुङ्बनो ओसेम् अस्य्हेङ्बनो ज्यब य्हीन्ब। 22 होलेतज्यीम् चु तम्मारी मुबे एइ बीस्वास् एतेङ् पर्मेस्वर्की गुङ्रीकीनो थेनो। र्हङ्चे ठीक् म्हेन्बे तम्चे र्हङ्त दोसी अतनलबे म्ही मोलम् यङ्बे म्ही य्हीन्ब। 23 तर र्हङ्चे चबे स्हेरी र्हङ्चेनो सङ्क लज्यीम् चज्यी पङ्सम् पर्मेस्वर्चे थेत दोसी ठहर्तीस्ये मुब, तलेपङ्सम् थेचे बीस्वास् अस्य्हेङ्नले चज्यी। तलेपङ्सम् बीस्वास् बीन तइ लक् स्य्हेङ्लएनो पाप् य्हीन्ब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.