रोमी 13 - पश्चिम तामाङसासक्माकी अधीन्री टीथोब 1 जम्मनो म्हीमा य्हुल्की सासक्माकी अधीन्री टीथोब, तलेपङ्सम् पर्मेस्वर्की थुः बीम खल्चेएनो सासन् स्य्हेङ् अखम्। जम्मनो सासक्मात पर्मेस्वर्चेनो हुजु ग्लारी थेन्जेत्पल य्हीन्ब। 2 खल्चे पङ्लेनो सासक्माकी बीरोद् स्य्हेङ्ज्यी पङ्सम् थेचे पर्मेस्वर्चे कुल्जेत्पे तम्तनो बीरोद् स्य्हेङ्ब, ओसेम् चोले बीरोद् स्य्हेङ्बलमाचे सजाय यङ्स्ये मुब। 3 तलेपङ्सम् सासक्मा ग्यम्सेमी ज्यबे लक् स्य्हेङ्बलमा अय्हीन् तर अज्यबे लक् स्य्हेङ्बलमा लोङ्थोब। ता एङ्यीमा सासक्मा ग्यम्से अलोङ्बे सेम् लब? होले पङ्सम् एङ्यीमाचे ज्यबे लक् स्य्हेङो, थेङ्यीमाचे एङ्यीमात तोप्स्ये मुब। 4 तलेपङ्सम् सासक्मा एङ्यीमात ज्यब स्य्हेङ्बे लागीरी पर्मेस्वर्की योक्पोमा य्हीन्ब। एङ्यीमाचे अज्यबे लक् स्य्हेङ्सम्कीनो सासक्मातेङ् लोङो, तलेपङ्सम् सासक्मातेङ् एङ्यीमात सजाय पीन्बे अधीकार मुब। सासक्मामी अज्यबे लक् स्य्हेङ्बलमात सजाय पीन्बे पर्मेस्वर्की योक्पोमा य्हीन्ब। 5 होत्तज्यीम् सजाय अयङ्बे लागीरीकीनो अय्हीन्, तर र्हङ्की बीबेक्की लागीरीएनो एङ्यीमाचे सासक्माकी अधीन्री टीनोथोब। 6 होत्तज्यीम् एङ्यीमाचे तीरोमा फाथोब, तलेपङ्सम् सासक्माचे र्हङ्चे स्य्हेङ्नोथोबे लक् स्य्हेङ्ज्यीम् पर्मेस्वर्की लक् स्य्हेङ्टीबल तब। 7 एङ्यीमाचे फाथोबलमात फागो। तीरो फाथोबलत तीरो फागो, भन्सार फाथोबलत भन्सार फागो, ओसेम् स्य्हु लथोबलमात स्य्हु लउ ओसेम् स्य्हेस स्य्हेङ्थोबलत स्य्हेस स्य्हेङो। गी:चे गी:त म्होइगो 8 गी:चे गी:त म्होइब बीम खल्तेङनो ल्हो-ल्हो तइ तम्रीएनो छ्या अतखइ, तलेपङ्सम् ल्हो-ल्होत म्होइबलचे पर्मेस्वर्की नीयम्त ङ्येन्बल तब। 9 थेङ्की नीयम् न्हङ्री “ब्यभीचार थस्य्हेङो, म्ही थसेतो, य्हो थलो, लोभ थलो पङ्बे अर्तीमा कुल्जेत्पल मुब।” चु जम्मनो अर्तीमातेङ् ल्हो-ल्हो अर्तीमामी “एचे र्हङ्की खीम्सेत र्हङ्त म्होइब र्हङ्लेनो म्होइगो” पङ्ज्यीम् कुल्बे अर्ती गीःरीनो टोप् तब। 10 म्होइबलचे खीम्सेत अज्यब अस्य्हेङ्। होत्तज्यीम् म्होइबनो पर्मेस्वर्की नीयम्री मुबे जम्मनो आज्ञामा टोप लब य्हीन्ब। 11 ङचे पङ्बे तम् ङ्येनो, तलेपङ्सम् देरेम् एङ्यीमाचे न्हुटपत ख्लाज्यीम् रेबे बेलो खबल मुब बी स्येःब। तलेपङ्सम् ङ्य्हङ्माचे पाप् ग्यम्से मुक्ती यङ्बे बेलो, देरेम् ङोन्ग्यम् ङ्य्हङ्माचे बीस्वास् स्य्हेङ्बे बेलो बीमएनो ज्यदङ् खबल मुब। 12 म्हुन् गल्ब म्हइज्यी, दीन् खब म्हइज्यी। होत्तज्यीम् ङ्य्हमाङ्चे म्हुन्दुङ्री स्य्हेङ्बे अज्यबे लक्मा पीत्ज्यीम्, य्हल्री ज्यबे लक्मा स्य्हेङ्बरी स्यीपइमा र्हङ्ले टोप् तज्यीम् टीइ। 13 ओसेम् दीनीरी ब्रबे म्हीमा र्हङ्ले ज्यबे लक्मा स्य्हेङ्ज्यीम् ब्रइ। म्हुन्दुङ्री ब्रबलमाचे स्य्हेङ्बल र्हङ्बे मनमोज्यी लबे लक्, ङ्य्हेनले थुङ्बे लक्, बेस्य स्य्हेङ्बे लक्, सेम्री ता म्हेन्ज्यी हुजु स्य्हेङ्बे लक्, छेत्प बङ्बतेङ् स्हेर्बे लक्मा पीत्थोब। 14 तर एङ्यीमा प्रभु येसु ख्रीस्ट् र्हङ्ब तज्यीम् ब्रउ। ओसेम् एङ्यीमाकी ल्हीःकी पापी स्वभाब् अनुसार् लक् स्य्हेङ्बे सेम्त ख्लागो। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.