रोमी 12 - पश्चिम तामाङसोम्बो ठा 1 होत्तज्यीम् ङइ र्होमा, पर्मेस्वर्की ङ्हच्छ्यङ् क्रीपा ङ्य्हङ्माइ जोरी मुबल तज्यीम् ङ एङ्यीमात फ्या लब, एङ्यीमाचे र्हङ्की ल्हीःत पर्मेस्वर्की ङोन्री पबीत्रातेङ् थेङ्त तङ्न लबे सोम्बो ठाकी रुप्री सोप्तीउ। एङ्यीमाचे चु देमेन्की तेन्ब एङ्यीमाचे स्य्हेङ्थोब। 2 एङ्यीमा चु जम्बुलीङ्की म्हीमा च्याज्यीम् थेङ्यीमा र्हङ्ले थब्रउ, तर पर्मेस्वर्त एङ्यीमाकी सेम छार् स्य्हेङ्पुङ्ज्यीम् एङ्यीमा टोप्ले पोउ। हुजुलीप्चे एङ्यीमाचे पर्मेस्वर्की ज्यबतेङ् तङ्न लबे ओसेम् सीद्द थुः ता टीम् बी ज्यनले स्येब खम्स्ये मुब। 3 तलेपङ्सम् ङत न्हङ्बे अनुग्रह ग्यम्से ङ एङ्यीमा जम्मतनो पङ्ब, एङ्यीमा र्हङ्चे र्हङ्त म्हेन्थोब बीम य्हक्को ङ्हच्छ्यङ् थम्हेनो, तर पर्मेस्वर्चे एङ्यीमात न्हङ्जेत्पे बीस्वास्की नाप् अनुसार र्हङ् खतेब मुब, एङ्यीमाचे र्हङ्की बारेरी होसीयार्ले म्हेनो। 4 ङ्य्हङ्की ल्हीःरी य्हक्को अङ्गमा मुलेएनो हुजु अङ्गमाल र्हङ् र्हङ्की लक् तब। 5 होलेनो ङ्य्हङ्मा य्हक्को तलेएनो ख्रीस्ट्री ल्हीः गी:नो य्हीन्ब, ओसेम् ङ्य्हङ्मा जम्मतनो गीःत गीः तोब। 6 होत्तज्यीम् पर्मेस्वर्चे र्हङ्की अनुग्रह अनुसार ङ्य्हङ्मात न्हङ्जेत्पे थोचे थोइ बरदान्मा अनुसार थेङ्की लक् स्य्हेङ्गे। अगम्बानी पङ्बे बर्दान् यङ्बलमाचे थेङ्यीमाकी बीस्वास् अनुसार अगम्बानी पङ्खइ, 7 सेवा स्हेङ्बे बर्दान् यङ्बलचे ज्यनले सेवा स्य्हेङ्खइ, लोप्पोन्की बर्दान् यङ्बलमाचे लोप्खइ, 8 आर् पीन्बे बर्दान् यङ्बलमाचे आर् पीन्खइ, पीन्बे बर्दान् यङ्बलमाचे सेम् य्हङ्से पीन्खइ। अगुवाइ स्य्हेङ्बे बर्दान् यङ्बलमाचे सेम् य्हङ्सेनो अगुवाइ स्य्हेङ्खइ, ओसेम् दय स्य्हेङ्बे बर्दान् यङ्बलमाचे तङ्तङ्ज्यीम् दय स्य्हेङ्खइ। 9 एङ्यीमाचे म्हीमात सुङ् ग्यम्सेकीनो अय्हीन् सेम् य्हङ्सेनो म्होइगो। दुस्ट लक्री सेम् अपीन्नले ज्यबे लक्री सेम् पीन्स्यीनो टीउ। 10 दीम् गी:की अज्यो अलेमात र्हङ्ले गी:चे गी:त म्होइगो, र्हङ्त बीमम् ल्हो-ल्होत य्हक्को स्य्हेस स्य्हेङो। 11 ब्लेकु अलनले लक् स्य्हेङो, सेम् य्हङ्सेनो प्रभुइ लक् स्य्हेङो। 12 एङ्यीमातेङ् मुबे आसारी आनन्द लउ, दुखइ बेलोरी नाको, ओसेम् प्रार्थना स्य्हेङ्स्यीनो टीउ। 13 पर्मेस्वर्की म्हीमाकी अयोब अख्युप्पमारी र्हो स्य्हेङो, दीम्री खबे डोम्बोमात ज्यनले क्योङ्बे सेम् लस्यीनो टीउ। 14 एङ्यीमात दु:ख पीन्बलमात केम्लङ् अय्हीन्, मोलम् पीनो। 15 तङ्बलमातेङ् तङो, क्राबलमातेङ् क्राको। 16 जम्मतेङ् थुन्ज्यीम् टीउ, र्हङ्चे र्हङ्त ङ्हच्छ्यङ् थम्हेनो, ल्हो-ल्हो म्हीमाचे म्ही पङ्ज्यीम् अज्याबे म्हीमातेङ् र्हो स्य्हेङो। ओसेम् जम्म तम्मानो स्येबल मुब थम्हेनो। 17 एत खल्चे पङ्लेनो अज्यब स्य्हेङ्लेनो एचे थेत अज्यब थस्य्हेङो। जम्मनो म्हीमाचे ज्यबल मुब पङ्बे तम्मारी सेम् पीनो। 18 खम्ब सम्म जम्मनो म्हीमातेङ् थुन्ज्यीम् टीउ। 19 म्होइबे र्होमा, खेमेएनो खल्तएनो खीत् थफागो। तर खीत् फाबे लक् पर्मेस्वर्की बोमोरीनो सोप्तीपीनो, तलेपङ्सम् धर्म छ्येःरी परमप्रभुचे चोले सुङ्बल मुब, “खीत् फाबे लक् ङल य्हीन्ब। ङचेनो खीत् फास्ये मुब।” 20 धर्म छ्येकी ल्हो-ल्हो ग्लारी चोले ब्रीबल मुब, “एइ सत्रुमा ख्रेन्बल मुसम् एचे चब पीनो, यी फीःबल मुसम् यी पीनो। चोले स्य्हेङ्सम् एचे एइ सत्रुइ क्ररी मे ग्रो युःब र्हङ्ब तस्ये मुब।” 21 दुस्टचे एङ्यीमात थडापुङो, तर ज्यब स्य्हेङ्ज्यीम् दुस्टत डागो। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.