रोमी 11 - पश्चिम तामाङइस्राएलीमाकी पाप्तेङ् पर्मेस्वर्की दय 1 होले पङ्सम् ङ ङ्योत्प, ता पर्मेस्वर्चे इस्राएलीमात ख्लाजेत्पल य्हीन्ब? ख्लाजेत्पल अय्हीन्! ङएनो अब्राहामकी सन्तान्, बेन्यामीन्की खलक्की इस्राएली य्हीन्ब। 2 परमेस्वरचे ङोन्ग्यम्नो खेम्जेत्पे र्हङ्की म्हीमात ख्लाअजेत्। ता एलीयाकी बारेरी पवीत्र धर्म छ्येचे पङ्बे तम् एङ्यीमाचे अस्ये? थेचे इस्राएलकी बीरोद्री पर्मेस्वर्तेङ् चोले प्रार्थना स्य्हेङ्ज्यी, 3 “ओ प्रभु, थेङ्यीमाचे थेङ्की अगम्वक्तमात सेत्पल मुब, ओसेम् थेङ्की बेदीमा फुप्लाबल मुब। ङत गीकीनो पीत्थेन्बल मुब, ओसेम् ङतएनो थेङ्यीमाचे सेत्प म्हइटीबल मुब।” 4 तर पर्मेस्वर्चे थेत सुङ्जेत्ज्यी, “बाल पङ्बे ख्लत अतेन्बे हजार ङ्यीस् अपकोलमात ङइ लागीरी ङचेनो थेन्बल मुब।” 5 चोलेनो, परमेस्वरकी अनुग्रहचे दम्बे चेक् चेक् इस्राएलीमान्हङ्रीएनो दवम् बीस्वास् स्य्हेङ्बरी बाकी मुब। 6 पर्मेस्वर्चे र्हङ्की अनुग्रहचे थेङ्यीमात दम्जेत्पल य्हीन्ब, थेङ्यीमाचे स्य्हेङ्बे ज्यबे लक्माचे लज्यीम् अय्हीन्, ज्यबे लक्मा स्य्हेङ्ज्यीम् तबल य्हीन्सम् अनुग्रह अनुग्रहनो अत। 7 देरे ता पङ्ब? इस्राएलीमाचे धर्मी तब म्हइज्यी, तर थेङ्यीमा धर्मी तब अखम्, थेङ्चे दम्जेत्पलमाकीनो धर्मी तज्यी। पर्मेस्वर्चे बाकी इस्राएलीमाकी सेम् कोङ्न लपीन्जेत्ज्यी। 8 धर्म छ्येरी ब्रीबल मुब, “पर्मेस्वर्चे थेङ्यीमात तएनो अगोबे आत्मा न्हङ्जेत्ज्यी, म्रङ्ब अखम्बे मीः न्हङ्जेत्ज्यी, थ्येःब अखम्बे न्हबीङ् न्हजेत्ज्यी। ओसेम् थेङ्यीमा देरेसम्मएनो होतेबनो तटीब।” 9 ओसेम् दाऊद ग्याल्बोचेएनो पङ्ब, “थेङ्यीमाकी डोन्मा, थेङ्यीमाकी लागीरी वतेङ् फुप् र्हङ्ब तखइ। थेङ्यीमा गुर्खइ ओसेम् थेङ्यीमाचे सजाय यङ्खइ। 10 थेङ्यीमाकी मी: म्रङ्ब अखम्बे कन तखइ, थेङ्यीमाकी चीक्प तङ्-तङ् अतनले कुक् तस्यीनो टीखइ।” 11 होत्तज्यीम् ङ पङ्ब, त थेङ्यीमा रेःबनो अखम्नले गुर्बल य्हीम्बो स्यीम्? अय्हीन्। चोले इस्राएलीमाकी अबीस्वास्चे लज्यीम् यहुदी अय्हीन्बे म्हीमाचे खेमेनो अबेबे जीवन् यङ्ज्यी, चु म्रङ्ज्यीम् इस्राएलीमा स्हेर्खइ पङ्बे थुः पर्मेस्वर्ल मुबल। 12 इस्राएलीमाकी अबीस्वास्चे लज्यीम् जम्बुलीङ्की यहुदी अय्हीन्बे म्हीमात मोलम् बब पङ्सम् इस्राएलीमा जम्मचेनो पर्मेस्वर्त बीस्वास् स्य्हेङ्बतेङ् झेन् गते मोलम् यङ्ल? ल्हो-ल्हो जम्म जातीइ मुक्ती 13 देरेम् ङ एङ्यी यहुदी अय्हीन्बे म्हीमात पङ्टीब। ङ यहुदी अय्हीन्बे म्हीमाकी लागीरी प्रेरीत तबल तज्यीम् ङचे चु लक्त ङ्हच्छ्यङ् लक् म्हेन्ज्यीम् स्य्हेङ्ब। 14 चु लक्चे लज्यीम् ङइ यहुदी जातीइ म्हीमा एङ्यीमातेङ् स्हेर्ज्यीम् थेङ्यीमान्हङ्की कोइ कोइ म्हीमात पर्मेस्वर्चे थर्नलजेत्स्ये मुब पङ्बे आस् ङल मुब। 15 तलेपङ्सम् पर्मेस्वर्चे इस्राएलीमात ख्लाजेत्मम् जम्बुलीङ्की म्हीमा थेङ्तेङ् मीलाप् तज्यी पङ्सम् इस्राएलीमात देबेएनो पर्मेस्वर्चे स्वीकार् स्य्हेङ्जेत्पतेङ् थेङ्यीमा स्यीब ग्यम्से जीवनरी दोःखब र्हङ्ब तस्ये मुब। 16 ग्येङ् स्हेङ्बरी ज्योप्पे ब्राकी छ्यम्ब ग्यम्से चेक्बजकी पर्मेस्वर्त पीन्ज्यी पङ्सम् हुजु जम्म छ्यम्बनो पर्मेस्वर्त पीन्बल र्हङ्बनो तब। होलेनो दोङ्बोइ टाःपर्मेस्वर्ल य्हीन्सम् जम्मनो य्हर्ङमाएको पर्मेस्वर्ल तब। 17 डेत् यहुदीमामी म्रङ्री सुःबे जैतुन्की दोङ्बो ग्यम्से थाज्यीम् ख्लबे य्हर्ङमा रह्ङ्ब मुब। ओसेम् एङ्यी यहुदी अय्हीन्बे म्हीमामी र्हीइ जैतुन्की दोङ्बोइ य्हर्ङमा र्हङ्ब मुब, होलेतलेनो थाज्यीम् ख्लाबे म्रङ्री सुःबे जैतुनकी य्हर्ङइ देब्री र्हीइ जैतुन्की दोङ्बोइ य्हर्ङत कलमी स्य्हेङ्बल मुब। देरेम् हुजु र्हीइ जैतुन्की दोङ्बोइ य्हर्ङचे म्रङ्री सुःबे जैतुन्की दोङ्बोइ टाः ग्यम्सेनो तोःबे सक्तीतेङ् जीवन् यङ्ब। 18 होत्तज्यीम् एङ्यीमाचे हुजु थाज्यीम् ख्लाबे य्हर्ङमा र्हङ्बे यहुदीमा बीमम् ङ्हच्छ्यङ् य्हीन्ब पङ्ज्यीम् घमन्ड थलो। घमन्डनो स्य्हेङ्ब पङ्सम् चु तम् सेम्री थेनो, एङ्यीमाचे टाःत थाम्तीबल अय्हीन्, तर टा:चे एङ्यीमात थाम्तीटीबल मुब। 19 एङ्यीमाचे, “ङत कलमी खीःब खम्खइ पङ्ज्यीम् हुजु य्हर्ङमा थालबल मुबल” पङ्ब खम्ल। 20 चु देमेन् य्हीम्ब, थेङ्यीमाचे ख्रीस्ट्री बीस्वास् अस्य्हेङ्बल तज्यीम् हुजु य्हर्ङमा थालबल य्हीन्ब, ओसेम् एङ्यीमात कलमी खीबल मुब तलेपङ्सम् एङ्यीमाचे बीस्वास् स्य्हेङ्ब। होत्तज्यीम् चु तम्री एङ्यीमा घमन्ड थलउ बरु पर्मेस्वर्तेङ् लोङो। 21 तलेपङ्सम् पर्मेस्वर्चे देमेन्की य्हर्ङमा र्हङ्बे यहुदीमात बाकी थेन्अजेत् पङ्सम् एङ्यीमातमी झेन् थेन्जेत्स्येनो अरे। 22 होत्तज्यीम् पर्मेस्वर् दयलु मुब ओसेम् कठोर्एनो मुब पङ्बे तम् बीचार स्य्हेङो। थेङ् बीस्वास् स्य्हेङ्ब पीत्पलमाकी लागीरी कठोर् मुब। तर एङ्यीमा थेङ्की अनुग्रहरी टीस्यीनो टीज्यी पङ्सम् एङ्यीमाकी लागीरी थेङ् दयलु तजेत्स्ये मुब। अय्हीन् पङ्सम् एङ्यीमातएनो थाज्यीम् ख्लाबे य्हर्ङत र्हङ्ले ख्लाजेत्स्ये मुब। 23 इस्राएलीमाचे अबीस्वास् स्य्हेङ्ब पीत्ज्यीम् बीस्वास् स्य्हेङ्ब तीप्ज्यी पङ्सम् पर्मेस्वर्चे थेङ्यीमात ङोन्ग्यम्की य्हर्ङइ ग्लारीनो कलमी स्य्हेङ्जेत्स्ये मुब, तलेपङ्सम् थेङ्चे थेङ्यीमात देबेएनो कलमी लब खम्जेत्प। 24 एङ्यी यहुदी अय्हीन्बे म्हीमा र्हीइ जैतुन्की दोङ्बो ग्यम्से थाज्यीम् बबे य्हर्ङमा र्हङ्ब य्हीम्ब। स्वभाब् अमील्तीलएनो म्रङ्री सु:बे जैतुन्की य्हर्ङरी कलमी स्य्हेङ्बल मुब। इस्राएलीमामी म्रङ्री सु:बे जैतुन्की य्हर्ङ र्हङ्ब य्हीम्ब। होले तज्यीम् थेङ्यीमात देबेएनो बज्यीम् कलमी स्य्हेङ्बरी परमेस्वर्त झेन् सजीलो तब। जम्मनो इस्राएलीमा थर्स्ये मुब 25 ङइ बीस्वासी र्होमा, चु रहस्यइ तम् गी: एङ्यीमाचे स्येखइ पङ्बे सेम् ङल मुब। हुजु एङ्यीमाचे स्येज्यी पङ्सम् एङ्यीमाचे र्हङ्की लागीरी घमन्ड स्य्हेङ्स्ये अरे। चु रहस्य चोतेब मुब- ख्रीस्ट्री खतोबे यहुदी अय्हीन्बे जम्मनो म्हीमाचे बीस्वास् अस्य्हेङ्गदे सम्मकीनो डेत् डेत् इस्राएलीमाकी सेम् कोङ्स्ये मुब। 26 चोले जम्मनो इस्राएलीमा थर्स्ये मुब। धर्म छ्येरी ब्रीबल मुब, “सीयोन य्हङ्से मुक्तीदाता ब्योन्खस्ये मुब, थेङ्चे याकुबकी खलक् ग्यम्से दुस्ट लक्मा ख्लाजेत्स्ये मुब।” 27 ओसेम् प्रभु सुङ्जेत्प, “थेङ्यीमाकी पाप्मा म्हन लज्यीम् ङचे थेङ्यीमातेङ् स्य्हेङ्बे करार् टोप् लस्ये मुब।” 28 ज्यबे सम्तर्री बीस्वास् अस्य्हेङ्बल तज्यीम् य्हक्को इस्राएलीमा परमेस्वर्की सत्तुर् तबल य्हीन्ब, चुचे एङ्यीमातमी फाइद तबल मुब। तर थेङ्यीमात पर्मेस्वर् र्हङ्चेनो दम्जेत्पल ओसेम् थेङ्यीमाकी म्हेमेमातेङ् बाचा स्य्हेङ्जेत्पल तज्यीम् पर्मेस्वर्चे थेङ्यीमात म्होइजेत्प। 29 तलेपङ्सम् पर्मेस्वर्चे र्हङ्चे न्हङ्जेत्पे बर्दान्त दोज्यीम् कीन्अजेत् ओसेम् ङ्होजेत्पलमात खेमेएनो ख्लाअजेत्। 30 ङोन्ग्यम्, एङ्यी यहुदी अय्हीन्बे म्हीमा पर्मेस्वर्चे कुल्जेत्पे अर्तीमा अङ्येन्ब मुबल, तर देरे इस्राएलीमाचे पर्मेस्वर्चे कुल्जेत्पे अर्तीमा अङ्येन्बल तज्यीम् एङ्यीमाचे पर्मेस्वर्की दय यङ्बल य्हीन्ब। 31 होलेनो तीङ्यी अटेरी स्य्हेङ्ज्यीम् टीटीबे इस्राएलीमाचेएनो तीरेत् दय यङ्खइ पङ्ज्यीम् पर्मेस्वर्चे एङ्यीमात दय ङोन्जेत्ज्यी। 32 पर्मेस्वर्चे कुल्जेत्पे अर्ती अङ्येन्बल तज्यीम् जम्मनो म्हीमात थेङ्चे जेल्री च्युप्पलमात र्हङ्ब स्य्हेङ्जेत्ज्यी। थेङ्चे थेङ्यीमात र्हङ्की दय ङोन्जेत्परी चोले स्य्हेङ्जेत्पल मुब। पर्मेस्वर्त तोप्प 33 ओहो, पर्मेस्वर्की कृपातेङ् ज्ञान ओसेम् लो गत्ते ङ्हच्छ्यङ्! थेङ्चे पक्क लजेत्बे नीर्नयतेङ् थेङ्चे स्य्हेङ्जेत्प लक् तले स्य्हेङ्जेत्बल बी खल्चेएनो स्येब अखम्। 34 धर्म छ्येःचे चोले पङ्ब, “प्रभुइ सेम्त खल्चे स्येब? वुइ थेङ्त सल्लह पीन्बे म्ही खल मुब?” 35 “पर्मेस्वर्त खल्चे ता पीन्बल मुब स्यीम्? ओसेम् थेङ्चे खल्तए तेए दो:पीन्थोब?” 36 जम्मनो थेङ्चे स्य्हेङ्जेत्बल य्हीन्ब। चु जम्मनो थेङ् ग्यम्से थेङ्की लागीरीनो य्हीन्ब। थेङ्की महीमा खेमपङ्लेनो तटीखइ! आमेन्। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.