रोमी 10 - पश्चिम तामाङ1 ङइ र्होमा, इस्राएलीमात पर्मेस्वर्चे थर्ब न्हङ्खइ पङ्ज्यीम् ङ सेम् य्हङ्सेनो म्हेन्ब, ओसेम् पर्मेस्वर्तेङ् प्रार्थना स्य्हेङ्ब। 2 चु तम्की साक्षी ङनो मुब, थेङ्यीमाचे पर्मेस्वर्त य्हक्को म्हन्दीब म्हइब, तर खले देमेन्लेनो म्हन्दीथोब थेङ्यीमाचे स्येबल अरे। 3 तलेपङ्सम् पर्मेस्वर्चे थेङ्की ङोन्री धर्मी ङोन्न लजेत्बे ग्यम्त थेङ्यीमाचे अस्येज्यीम् र्हङ् ग्यम्चेनो धर्मी ङोन्ब म्हइब, होलेतज्यीम् थेङ्यीमा पर्मेस्वर्चे धर्मी ङोन्बे ग्यम्री अब्र। 4 तलेपङ्सम् बीस्वास् स्य्हेङ्बलमा जम्मतनो पर्मेस्वर्की ङोन्री धर्मी ङोन्खइ पङ्ज्यीम् ख्रीस्ट्नो मोसाचे ब्रीबे नीयम्की ज्यु तजेत्ज्यी। जम्मइ लागीरी थर्ब 5 मोसाचे पर्मेस्वर्की ङोन्री धर्मी तबे बारेरी पर्मेस्वर्की नीयम्री चोले ब्रीब, “पर्मेस्वर्की नीयम् ज्यनले ङ्येन्बे म्ही हुजु नीयम् ग्यम्चेनो सोस्ये मुब” 6 तर बीस्वास् ग्यम्से पर्मेस्वर्की ङोन्री धर्मी तबे बारेरी धर्म छ्येचे चोले पङ्ब, “एचे र्हङ्की सेम्न्हङ् चोले थपङो, ‘खल तोर् स्वार्गरी ङ्यीस्ये?’” (ख्रीस्ट्त दुङ्री बइबरी)। 7 ओसेम् सेम्न्हङ् चोलेएनो थपङो, “स्यीबलमा टीबे ग्लारी, दुङ्री खल ङ्यीस्ये?” (ख्रीस्ट्त स्यीब ग्यम्से जोरी बबरी)। 8 तर चुचे ता पङ्ब? “पर्मेस्वर्की फ्रोइ एङ्यीमाकी ज्यदङ् मुब। चु एङ्यीमाकी सुङ्तेङ् सेम्री मुब।” ङ्यीमाचे बीस्वास्की बारेरी प्रचार् स्य्हेङ्टीबे ज्यबे सम्तर् चुनो य्हीन्ब। 9 एङ्यीमाचे येसुनो प्रभु य्हीन्ब बी र्हङ्की सुङ्चेनो स्वीकार् स्य्हेङ्सम् ओसेम् पर्मेस्वर्चे येसुत स्यीब ग्यम्से सोनलजेत्ज्यी बी सेम्री बीस्वास् स्य्हेङ्सम् एङ्यीमा थर्स्ये मुब। 10 तलेपङ्सम् ङ्य्हङ्माकी सेम्चे बीस्वास् स्य्हेङ्ज्यीम् ङ्य्हङ्मा पर्मेस्वर्की ङोन्री धर्मी तब, ओसेम् ङ्य्हङ्की सुङ्चे स्वीकार् स्य्हेङ्ज्यीम् ङ्य्हङ्मा थर्ब। 11 धर्म छ्येःचे पङ्ब, “थेङ्री बीस्वास् स्य्हेङ्बलचे खेमेएनो पेत्थोस्ये अरे।” 12 तलेपङ्सम् पर्मेस्वर्की लागीरी यहुदीतेङ् यहुदी अय्हीन्बे म्हीमाइ गुङ्री तइ फरकएनो अरे। थेङ् गीकीनो प्रभु जम्मलनो प्रभु य्हीन्ब। प्रभुइ छेन् कीन्बलमा जम्मतनो थेङ्चे य्हक्को मोलम्मा न्हङ्जेत्प। 13 धर्म छ्येःचे पङ्ब, “प्रभुइ छेन् कीन्बलमा जम्मचेनो थर्ब यङ्स्ये मुब।” 14 तर थेङ्त बीस्वास्नो अस्य्हेङ्बे म्हीमाचे खले थेङ्की छेन् कीन्ब? थेङ्की बारेरी थ्येनो अथेबे म्हीमाचे खले थेङ्री बीस्वास् स्य्हेङ्ब? खल्चेएनो अस्येत्सम् थेङ्की बारेरी खले थेङ्यीमाचे थ्येःब? 15 सम्तर् स्येत्पे म्हीमा अपीत्सम् थेङ्यीमाचे खले स्येत्स्ये? धर्म छ्येःचे पङ्ब, “ज्यबे सम्तर् स्येत्पलमा खबमी, य्हक्को तङ्बे तम् य्हीन्ब।” 16 तर ज्यबे सम्तर्त थ्येःबलमा जम्मचेनोमी बीस्वास् अस्य्हेङ्। यसैया अगम्बक्तचे पङ्ब, “प्रभु, ङ्यीमाचे स्येत्पे सम्तर्त खल्चे बीस्वास् स्य्हेङ्ज्यी स्यीम्?” 17 होत्तज्यीम् बीस्वास् थ्येःब ग्यम्से खब, ओसेम् थ्येःबमी ख्रीस्ट्की बारेइ प्रचार् ग्यम्से खब। 18 तर ङ ङ्योत्प, ता इस्राएलीमाचे थ्येः अम्यङ्? अय्हीन्, थेङ्यीमाचे थ्येःज्यी। “ज्यबे सम्तर् स्येत्पलमाकी सम्तर् जम्बुलीङ्की जम्मनो ग्लारी ठम्ज्यी, ओसेम् थेङ्यीमाचे पङ्बे तम् जम्बुलीङ्की जम्मनो ग्लामारी दोःज्यी।” 19 ङ देबेनो ङ्योत्प, “ता इस्राएलीमाचे हुजु तम् अगो?” अय्हीन्, गोज्यी। पर्मेस्वर्चे ङोन्ग्यम्नो मोसा ग्यम्से थेङ्यीमात सुङ्जेत्पल मुबल, “ङचे यहुदी अय्हीन्बे म्हीमात म्होइज्यीम्, एङ्यीमाचे थेङ्यीमात स्हेःर्न लस्ये मुब, ङचे मुर्ख जाती गीत कोल्ज्यीम्, एङ्यीमात बोमो रप्न लस्ये मुब।” 20 पर्मेस्वर्चे सुङ्जेत्पे तम् यसैया अगम्बक्तचे अलोङ्नले ब्रीब, “ङत म्हइनो अम्हइबलमाचे ङत यङ्ज्यी, ओसेम् ङइ बारेरी ङ्योत्नो अङ्योत्पे म्हीमाज ङ र्हङ्चेनो थेङ्यीमाचे म्रङ्न लज्यी।” 21 तर इस्रएल्की बारेरी पर्मेस्वर्चे सुङ्जेत्ज्यी, “ङइ तम् अङ्येन्ज्यीम् बीरोद् स्य्हेङ्बलत ङ्होत्परी, ङचे दीन् र्हङ्स्यीनो ङइ या फेर् लज्यी।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.