रोमी 1 - पश्चिम तामाङ1 ङ पावल, येसु ख्रीस्ट्की योक्पोचे चु चीठी ब्रीटीब, ओसेम् पर्मेस्वर्चे ङत प्रेरीत् तबरी ङ्होत्जेत्ज्यीम् थेङ्की ज्यबे सम्तर् स्येत्परी दम्जेत्ज्यी। 2 चु ज्यबे सम्तर् य्हक्को बर्स ङोन्ग्यम् पर्मेस्वर्चे अगम्बक्तमा ग्यम्से पबीत्र धर्म छ्येःरी बाचा स्य्हेङ्जेत्ज्यी। 3-4 हुजु ज्यबे सम्तर्मी थेङ्की ज ङ्य्हङ्की प्रभु येसु ख्रीस्ट्की बारेरी य्हीन्ब। थेङ् म्हीइ ल्हीरी ग्यल्बो दाऊदकी खलक्रीनो न्हजेत्ज्यी। ओसेम् थेङ् पबीत्र आत्माचे ङोन्जेत्प अनुसार पर्मेस्वर्की सक्तीसाली ज य्हीन्ब। चु तम् थेङ् स्यीजेत्ज्यीम् सोजेत्पे तम्चेएनो ङोन्ब। 5 ख्रीस्ट् ग्यम्से पर्मेस्वर्चे ङ्य्हङ्मात थेङ्की अनुग्रह ग्यम्से यहुदी अय्हीन्बे जम्मा म्हीमाचे ख्रीस्ट्त स्य्हेस लबरी बीस्वास् स्य्हेङ्ज्यीम् थेङ्की फ्रोइ ङ्येन्खइ पङ्ज्यीम् प्रेरीत्की लक् स्य्हेङ्बरी दम्जेत्ज्यी। 6 पर्मेस्वर्चे एङ्यीमाएनो थेङ्यीमातेङ् बक्च्य येसु ख्रीस्टल तबरी ङ्होत्जेत्पल मुब। 7 रोम्री मुबे एङ्यीमा जम्मनो पर्मेस्वर्चे म्होइजेत्ज्यीम् थेङ्की पबीत्र म्हीमा तबरी ङ्होत्जेत्पलमात चु चीठी ब्रीटीब। एङ्यीमा जम्मतनो ङ्य्हङ्की अप पर्मेस्वर्तेङ् प्रभु येसु ख्रीस्ट्चे अनुग्रहतेङ् सान्ती न्हङ्खइ। व्होर्छ्ये पीन्बे प्रार्थना 8 ङोन्ग्यम् ङ एङ्यीमा जम्मइ लागीरी ङइ पर्मेस्वर्त येसु ख्रीस्ट् ग्यम्से व्होर्छ्ये पीन्ब, तलेपङ्सम् एङ्यीमाइ बीस्वास्की बारेरी जम्बुलीङ्की जम्मनो ग्लामारी थ्येःटीब। 9 ङ ङइ सेम् य्हङ्सेनो पर्मेस्वर्की जइ ज्यबे सम्तर् स्येत्ज्यीम् पर्मेस्वर्की सेव स्य्हेङ्ब, ओसेम् ङचे एङ्यीमात खले ङइ प्रार्थनारी खेम पङ्लेनो व्हल् स्य्हेङ्ब पङ्ज्यीम् पर्मेस्वर् ङइ साक्षी मुब। 10 थेङ्की थु तसम् ज्युरी एङ्यीमात खतु लब खम्खइ पङ्ज्यीम् ङ खेम पङ्लेनो पर्मेस्वर्तेङ् प्रार्थना स्य्हेङ्ब। 11 तलेपङ्सम् आत्मीक् मोलम्मा स्येत्ज्यीम् बीस्वास्री कोङ्न लब खम्खइ पङ्ज्यीम् ङ एङ्यीमात खतु लबरी य्हक्को सेम् लब। 12 ङइ बीस्वास्चे एङ्यीमात ओसेम् एङ्यीमाकी बीस्वास्चे ङत आर् पीन्खइ पङ्बे सेम् ङल य्हीन्ब। 13 ङइ बीस्वासी र्होमा, एङ्यीमाचे चु तम् स्येको की ङ एङ्यीमात खतु लबरी य्हक्को ख्यप् खब म्हइज्यी तर देरेसम्मएनो थो गी अय्हीन् थो गीःचे लज्यीम् ङ खब अखम्। ङचे ल्हो-ल्हो ग्लारी यहुदी अय्हीन्बे म्हीमात ख्रीस्ट्री बब र्हङ्ले एङ्यीमाकी ग्लारीएनो यहुदी अय्हीन्बे म्हीमात ख्रीस्ट्री बम्यङ्खइ पङ्बे सेम् लब। 14 तलेपङ्सम् ङचे यहुदी अय्हीन्बे ग्रीक् ग्योत्तेङ् पेठीम् स्येबतेङ् अस्येबे, खेत्पतेङ् अखेत्पे म्हीमा जम्मतनो ज्यबे सम्तर् स्येत्नो थोबल मुब। 15 होत्तज्यीम् एङ्यी रोम्री टीबे म्हीमात चु ज्यबे सम्तर् स्येत्परीएनो ङत य्हक्को सेम् मुब। 16 ङ चु ज्यबे सम्तर् स्येत्परी अपेत्। तलेपङ्सम् चु बीस्वास् स्य्हेङ्बलमा जम्मइ मुक्तीइ लागीरी पर्मेस्वर्की सक्ती य्हीन्ब, ङोन्ग्यम् यहुदीमाकी लागीरी ओसेम् यहुदी अय्हीन्बे म्हीमाइ लागीरीएनो य्हीन्ब। 17 म्हीत पर्मेस्वर्चे खले धर्मी तनलजेत्प बी ज्यबे सम्तर्चे ङोन्ब, ओसेम् पर्मेस्वर्की ङोन्री धर्मी ङोन्बे तम् बीस्वास् ग्यम्से तीप्ज्यीम् बीस्वास् ग्यम्सेनो बुत्प। धर्म छ्येःचेएनो चोले पङ्ब, “धर्मी म्ही बीस्वास् ग्यम्से सोस्ये मुब।” ज्यबे सम्तर्की सक्ती 18 स्वर्ग ग्यम्से पर्मेस्वर्की बोमो म्हीमाकी जम्मनो पाप्तेङ् दुस्ट लक्माकी बीरुद्दरी म्रङ्खबल मुब, हुजु म्हीमाचे र्हङ्की दुस्ट लक्माचे देमेन्त प्लेटीबल मुब। 19 थेङ्यीमाचे पर्मेस्वर्की बारेरी देमेन्त स्येबल मुब, तलेपङ्सम् पर्मेस्वर्चेनो थेङ्यीमात स्येनले ङोन्जेत्पल मुब। 20 चु जम्बुलीङ् ठुङ्ब य्हङ्सेनो पर्मेस्वर्चे स्य्हेङ्जेत्पे जम्मनो स्हेःमा म्रङ्ज्यीम् पर्मेस्वर्त स्येःब खम्ब। पर्मेस्वर्की खेम पङ्लेनो तबे सक्तीतेङ् इस्वरीय स्वभाब र्हङ्बे म्रङ्ब अखम्बे पर्मेस्वर्की गुन्मा म्हीमाचे ज्यनले स्येब खम्ब। होत्तज्यीम् थेङ्यीमाचे पर्मेस्वर्त अस्ये पङ्बरी ताकी प्लाएनो लम्यङ्स्ये अरे। 21 तलेपङ्सम् थेङ्यीमाचे पर्मेस्वर्त स्येज्यी तर थेङ्त स्य्हेस अस्य्हेङ्, ओसेम् व्होर्छ्येएनो अपीन्। बरु झेन् थेङ्यीमाकी म्हेन्बमी तएनो लक् अतबल तज्यी, ओसेम् थेङ्यीमाकी मुर्ख सेम् म्हुन्दुङ्से प्लीङ्ज्यी। 22 थेङ्यीमा र्हङ्चे र्हङ्त बुद्दी मुबे म्ही पङ्ब, तर थेङ्यीमा मुर्ख तज्यी। 23 थेङ्यीमाचे खेमेएनो नास् अतबे पर्मेस्वर्त तेन्थोस्येकी देब्री नास् तज्यीम् य्हर्बे म्हीमा, ङ्यम्ङ्यमा, जन्तुमा ओसेम् फोचे स्य्होलोक्ज्यीम् ब्रबे जन्तुमाकी ख्लमातक तेन्ज्यी। 24 होत्तज्यीम् पर्मेस्वर्चे थेङ्यीमात थेङ्यीमाकी सेम्चे म्हेन्बे नइबे तम्मारीनो ख्लेथेन्जेत्ज्यी, ओसेम् थेङ्यीमाचे र्हङ्न्हङ्रीनो गीचे गीतेङ् पेत्पे लक्मा स्य्हेङ्ज्यी। 25 थेङ्यीमाचे पर्मेस्वर्की देमेन्त भ्युतेङ् देब्ज्यीम् पर्मेस्वर्चे स्य्हेङ्जेत्पे स्हेःमात तेन्ज्यीम सेवा स्य्हेङ्ज्यी, तर जम्मनो स्हेःमा स्य्हेङ्जेत्पे पर्मेस्वर्त अतेन्। परमेस्वरत खेम पङ्लेनो तेन्थोब, आमेन्। 26 होत्तज्यीम् पर्मेस्वर्चे थेङ्यीमात थेङ्यीमाकी सेम्चे म्हेन्बे नइबे लक्मा स्य्हेङ्बरी पीत्थेन्जेत्ज्यी। थेङ्यीमाइ अमकोलमाचे र्हङ् र्हङ्की र्हेम्बोमातेङ् अन्हुनले अमकोल अमकोलमान्हङ्नो न्हुज्यी। 27 होलेनो र्हेम्बोमाचेएनो र्हङ्-र्हङ्की म्रीङ्मातेङ् न्हुब पीत्ज्यीम् र्हेम्बोमा र्हङ्न्हङ्रीनो न्हुःबरी य्हक्को सेम् लज्यी। ओसेम् थेङ्यीमाचे र्हङ्न्हङ् पेत्नलबे लक् स्य्हेङ्ज्यीम् थेङ्यीमाकी ल्हीचे स्य्हेङ्बे दुस्ट लक्माकी लागीरी यङ्थोबे सजाय थेङ्यीमाचे नाज्यी। 28 थेङ्यीमाचे पर्मेस्वर्त स्य्हेस स्य्हेङ्ब मुर्ख य्हीन्ब म्हेन्ज्यी, होत्तज्यीम् पर्मेस्वर्चे थेङ्यीमात थेङ्यीमाकी मुर्ख म्हेन्बरी ख्लेथेन्जेत्ज्यी, ओसेम् थेङ्यीमाचे खेमेएनो स्य्हेङ्ब अतबे लक्मा स्य्हेङ्ज्यी। 29 थेङ्यीमा जम्मनो थोइ अधार्मीक्, दुस्टता, लोभतेङ् ल्हो-ल्होत हेल लबचे प्लीङ्बल मुब। थेङ्यीमाचे र्होत स्हेर्ब, सेत्प, छेत्प बङ्ब, लुब, र्होइ बारेरी अज्यब म्हेन्ब, र्होकी तङ्मेन् लब, 30 र्होत दुस्ट तम्मा पङ्ब। थेङ्यीमाचे पर्मेस्वर्तएनो अखो, र्होत स्य्हेस अल, र्हङ्चे र्हङ्त ङ्हच्छ्यङ् म्हेन्ब, घमन्ड स्य्हेङ्ब, दुस्ट लक्मा स्य्हेङ्बे तम्म तेत्प ओसेम् अप अमइ अर्ती अङ्येन्। 31 थेङ्यीमा मुर्ख मुब ओसेम् थेङ्यीमाचे बाचा लज्यीम् टोप अल, ल्हो-ल्होत अम्होइ, थेङ्यीमाकी सेम्री दय अत। 32 चोतेबे लक् स्य्हेङ्बे म्हीमाचेमी पर्मेस्वर्की नीयम् अनुसार स्यीबे सजाय नाथोस्ये मुब बी स्येज्यीमएनो थेङ्यीमाचे चोतेबे लक्मा स्य्हेङ्स्यीनो टीब। होदेकीनो अय्हीन् थेङ्यीमाचेमी ल्हो-ल्हो म्हीमात चोतेबे लक् स्य्हेङ्बरी झेन् सोत्प मुबल। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.