प्रकास 9 - पश्चिम तामाङ1 हुजुलीप्चे पाचौ स्वर्गदुत्चे थेइ तुरही र्हप्ज्यी ओसेम् ङचे मुग्यम्से सार् गी सरी तइयुबल म्रङ्ज्यी। हुजु सार्त दप्ज्यीम् दप्प अखम्बे नुप्पे व्हङ्की साचो पीन्ज्यी। 2 हुजु सार्चे दप्ज्यीम् दप्प अखम्बे नुप्पे व्हङ् ठोङ्ज्यी ओसेम् ङ्हच्छ्यङ् मेइ ल्हम् न्हङ्चे डोङ्ब र्हङ्ले मीङ्गु डोङ्ज्यी, ओसेम् हुजु मीङ्गुचे दीनीइ य्हल्तेङ् मुएनो म्हुन्दुङ् तज्यी। 3 हुजु मीङ्गु ग्यम्से जम्बुलीङ्री तीरीमा डोङ्ज्यी ओसेम् हुजु तीरीमात दीक्पराजल र्हङ्बे ज्यीःबे सक्ती पीन्ज्यी। 4 थेङ्यीमात जम्बुलीङ्री छ्यीमातेङ् दोङ्बोमात तएनो न्होङ्न थलउ, तर ङ्होरी पर्मेस्वर्की छाप् अरेबे म्हीमातकीनो दुख पीनो पङ्बल मुबल। 5 हुजु म्हीमात सेत्मी अपुङ्, तर ल ङ्ह सम्मा य्हक्को दुख पीन्बे अधीकार् तीरीमाचे यङ्ज्यी। हुजुमाचे दुख पीन्बे बेलोरी म्हीमात दीक्पराजाचे ज्यीःबतेङ् छ्योइब र्हङ्बे दुख तबल मुबल। 6 हुजु ल ङ्हरी म्हीमाचे स्यीबमी म्हइस्ये मुब, तर स्यीम्यङ्स्ये अरे। थेङ्यीमाचे स्यीबे सेम् लस्ये मुब तर थेङ्यीमा स्यीस्ये अरे। 7 हुजु तीरीमा लडाइरी ङ्यीबरी टोब तबे तमा र्हङ्ब म्रङ्ब मुबल। थेङ्यीमाकी क्ररी म्हर्की क्रेःकी र्हङ्बे स्हेः मुबल, ओसेम् थेङ्यीमाकी लीमी म्हीइ ली र्हङ्ब मुबल। 8 थेङ्यीमाकी क्र बा अमकोलाल र्हङ्ले र्हीङ्ब मुबल, ओसेम् थेङ्यीमाकी स ता की स र्हङ्ब मुबल। 9 हुजु तीरीमाकी कुत्तोरी कवच पङ्बे फइकी गोइल येन्बल मुबल, ओसेम् थेङ्यीमाकी ब्यब्चे डोङ्बे केत्मी लडाइरी तमाचे छेङ्बे य्हक्को रथमाकी केत् र्हङ्ब मुबल। 10 हुजु तीरीमाकी मेःतेङ् मेःकी जो दीक्पराजाल र्हङ्ब मुबल, ओसेम् ल ङ्ह सम्म दुख पीन्बे सक्ती थेङ्यीमाकी मेःरी मुबल। 11 दप्ज्यीम् दप्प अखम्बे नुप्पे व्हङ्की दुस्ट दुत् थेङ्यीमाकी ग्यल्बो मुबल। हीब्रु ग्योत्री हुजुइ मीन् “एबाड्डोन” ओसेम् ग्रीक् ग्योत्री “अपोल्लीयोन्” य्हीन्ब। हुजुइ अर्थ “नास् लब” य्हीन्ब। 12 पहीलो बीपत्ती य्हर्ज्यीन्ज्यी। चु लीप्चे दवम् बीपत्ती ङ्य्ही खबरी बाकी मुब। 13 हुजुलीप्चे छैटौ स्वर्गदुत्चे थेइ तुरही र्हप्ज्यी ओसेम् पर्मेस्वर्की ङोन्ग्यम् मुबे म्हर्की बेदीइ स्हुर् ब्ली ग्यम्सेनो केत् खबल ङचे थ्येःज्यी। 14 चु केत्चे छैटौ स्वर्गदुत्त चोले पङ्ज्यी, “युफ्रेटीस् पङ्बे ङ्हच्छ्यङ् ग्येन्दीरी खीबे स्वर्गदुत् ब्लीत पीत्लाको।” 15 ओसेम् हुजु स्वर्गदुत् ब्लीत जम्बुलीङ्की म्हीमाइ बो सोम्री बो गीत सेत्परी पीत्लाज्यी। हुजु स्वर्गदुत् ब्लीत हुजु तेत् लबे घन्टा, तेत् लबे दीन्, तेत् लबे ल ओसेम् तेत् लबे बर्सइ लागीरी टोप् लबल मुबल। 16 हुजुरी करोड् खल्गी त क्रेत्पे स्यीपइमा मुब पङ्बल ङचे थ्येःज्यी। 17 ओसेम् ङचे ङइ दर्सन्री तमातेङ् तरी क्रेत्पे म्हीमा म्रङ्ज्यी। तमारी क्रेत्पे म्हीमाचे कुत्तोरी येन्बे कवज मे र्हङ्बे वल, म्लङ् म्लङ्थेबे पीङ् ओसेम् गन्धक् र्हङ्बे उर् मुबल। हुजु तमाकी क्र ताःल र्हङ्ब मुबल, ओसेम् हुजुमाकी सुङ्ग्यम्से मे, मीङ्गु ओसेम् गन्धक् डोङ्ब मुबल। 18 हुजु तमाकी सुङ्ग्यम्से डोङ्बे मे, मीङ्गु ओसेम् गन्धक्की महामारीचे जम्बुलीङ्की बो सोम्की बो गी म्हीमा स्यीज्यी। 19 तलेपङ्सम् हुजु तमाकी सक्ती थेङ्यीमाकी सुङ्री ओसेम् मेःरीएनो मुबल। हुजुमाकी मेः पुख्रीइ क्र र्हङ्ब मुबल, ओसेम् म्हीमात न्हेब्बो तन लबरी हुजु मेः कोल्ब मुबल। 20 हुजु महामारीरी अस्यीबे म्हीमाचे र्हङ्की दुस्ट लक्मा ग्यम्से पस्चताप् अस्य्हेङ्। थेङ्यीमाचे म्हङ्मात तेन्ब अपीत्, ओसेम् थेङ्यीमाचे म्रङ्ब, थ्येःब ओसेम् ब्रब अखम्बे म्हर्, म्हुइ, स्हङ्मो, युङ्बतेङ् स्यीङ्माकी ख्लमात तेन्ब अपीत्। 21 थेङ्यीमाचे म्हीमा सेत्प, भेद् ङ्य्हेन् क्लङ्ब, ब्यभीचार् स्य्हेङ्ब ओसेम् य्हो लबे लक् ग्यम्सेएनो पस्चताप् अस्य्हेङ्। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.