प्रकास 8 - पश्चिम तामाङसातौ छाप् 1 थुमाचे सातौ छाप् ठोङ्जेत्पे बेलोरी आधा घन्ट सम्मा स्वर्गरी तइ केत्एनो अथे। 2 हुजुलीप्चे ङचे पर्मेस्वर्की ङोन्ग्यम् स्वर्गदुत्मा ङ्यीस् रप्टीबल म्रङ्ज्यी, ओसेम् थेङ्यीमात तुरही ङ्यीस् पीन्बल मुबल। 3 ओसेम् सङ्स्यु म्रबे म्हर्की तङ्लो नाबे ल्हो-ल्हो स्वर्गदुत् गी खज्यीम् बेदी मुबे ग्लारी रप्ज्यी। ओसेम् पर्मेस्वर्की म्हीमाइ प्रार्थनातेङ् बक्च्य ठीइ ङोन्ग्यम् मुबे म्हर्की बेदीरी युबरी थेत य्हक्को सङ्स्युमा पीन्बल मुबल। 4 स्वर्गदुत्चे दीबे सङ्स्युचे डोङ्बे मीङ्गु पर्मेस्वर्की म्हीमाचे स्य्हेङ्बे प्रार्थनातेङ् बक्च्य पर्मेस्वर्की ङोन्री य्हर्टीब मुबल। 5 हुजु लीप्चे हुजु स्वर्गदुत्चे सङ्स्यु म्रबे म्हर्की तङ्लो कीन्ज्यीम् हुजुरी बेदीइ मे युःज्यी ओसेम् जम्बुलीङ्की जोरी ख्लापीत्ज्यी। ओसेम् लाबलुङ्की केत् थेःज्यी, मु गुरुङ्ज्यी, तीप्लीक् फ्लीक्ज्यी ओसेम् सङ्गुल् य्हर्ज्यी। तुरही ङ्यीस् 6 हुजुलीप्चे तुरही ङ्यीस् मुबे स्वर्गदुत् ङ्यीस् तुरहीमा र्हप्परी टोप् तज्यी। 7 गोदोब्न्हङ् ङोन्ग्यम्की स्वर्गदुत्चे थेइ तुरही र्हप्ज्यी, ओसेम् का:तेङ् छ्योप्पे सेरतेङ् मे जम्बुलीङ्री तइज्यी। ओसेम् हुजुचे लज्यीम् जम्बुलीङ् बो सोम्री बो गी, दोङ्बोमा बो सोम्री बो गीः ओसेम् जम्मनो पीङ् छ्यीमा क्रोय्हर्ज्यी। 8 हुजु लीप्चे दोस्रो स्वर्गदुत्चे थेइ तुरही र्हप्ज्यी, ओसेम् मेचे क्रोटीबे ङ्हच्छ्यङ् गङ् र्हङ्बे स्हे:गी समुन्द्रन्हङ् ख्लाज्यी, ओसेम् समुन्द्रइ बो सोम्री बो गीः का तय्हर्ज्यी। 9 ओसेम् समुन्द्ररी मुबे बो सोम्री बो गी सोम्बो जन्तुमा स्यीय्हर्ज्यी, ओसेम् बो सोम्री बो गी ङ्हच्छ्यङ् दोङ्गमा नास् तज्यी। 10 हुजु लीप्चे तेस्रो स्वर्गदुत्चे थेइ तुरही र्हप्ज्यी, ओसेम् मुग्यम्से लुम्टीबे मेतङ् र्हङ्बे ङ्हच्छ्यङ् सार् गी तइज्यी, हुजु बो सोम्री बो गी स्योङ्मातेङ् यीइ म्रुमारी तइज्यी। 11 हुजु सार्की मीन् “कम्ब” मुबल। हुजुचे लज्यीम् यीइ बो सोम्री बो गी कम्ज्यी, ओसेम् हुजु कम्बे यीचे लज्यीम् य्हक्को म्हीमा स्यीज्यी। 12 हुजु लीप्चे चौथो स्वर्गदुत्चे थेइ तुरही र्हप्ज्यी, ओसेम् दीनी, लनीतेङ् सार्माकी बो सोम्री बो गीःत ग्यङ्ज्यी, ओसेम् हुजुमाकी य्हल् बो सोम्री बो गी म्हज्यी। ओसेम् दीन्तेङ् म्हुन्री बो सोम्री बो गी म्हुन्दुङ् तज्यी। 13 हुजुलीप्चे ङचे च्यामम् मुरी फ्यङ्टीबे य्हेत् गीचे चोले पङ्ज्यीम् क्रीङ्बल थ्येःज्यी, “अम्मइ! गत्ते लोङ्बे तम्! तलेपङ्सम् ल्हो-ल्हो बाकी स्वर्गदुत् सोम्चे तुरही र्हप्पे केत् थ्येःबतेङ् जम्बुलीङ्की म्हीमात नापनो अखम्बे य्हक्को दुख खस्ये मुब!” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.