प्रकास 7 - पश्चिम तामाङइस्राएलीमान्हङ्की लाख गी:स्यी चवालीस हजार म्हीमा 1 हुजु लीप्चे ङचे जम्बुलीङ्री वुइ समुन्द्ररी वुइ दोङ्बोरी तारीएनो लाब अखखइ बी स्वर्गदुत् ब्ली जम्बुलीङ्की कुन ब्ली ग्यम्से खबे लाबत र्होत्ज्यीम् रप्टीबल म्रङ्ज्यी। 2 ओसेम् ल्हो-ल्हो स्वर्गदुत् गी सोम्बो पर्मेस्वर्की छाप् नाज्यीम् स्यर् पट्टीचे खन्टो खटीबल ङचे म्रङ्ज्यी। ओसेम् थेचे जम्बुलीङ्तेङ् समुन्द्रत न्होङ्न लबे अधीकार यङ्बे स्वर्गदुत् ब्लीत केत् ङ्हच्छ्यङ् तेत्ज्यीम् चोले पङ्ज्यी, 3 “ङ्य्हङ्माइ पर्मेस्वर्की योक्पोमाइ ङ्होमारी ङ्यीमाचे छाप् ल्हइअतीगदे जम्बुलीङ् वुइ समुन्द्र वुइ दोङ्बोमात न्होङ्न थलउ।” 4 ओसेम् चोले छाप् ल्हइदीबलमा इस्राएलकी खलक् चुङ्ङ्यी ग्यम्से लाख गी:स्यी चवालीस् हजार् म्हीमा मुबल बी ङचे थ्येःज्यी। 5 इस्राएलकी खलक् र्हङ्स्यीनो हजार चुङ्ङ्य्हीत छाप् ल्हइतीबल मुबल: यहुदाकी खलक् ग्यम्से हजार् चुङ्ङ्य्हीत, रुबेन्की खलक् ग्यम्से हजार् चुङ्ङ्य्हीत, गादकी खलक् ग्यम्से हजार् चुङ्ङ्य्हीत, 6 आसेर्की खलक् ग्यम्से हजार् चुङ्ङ्य्हीत, नप्तलीइ खलक् ग्यम्से हजार् चुङ्ङ्य्हीत, मनस्सेइ खलक् ग्यम्से हजार् चुङ्ङ्य्हीत, 7 सीमीयोनकी खलक् ग्यम्से हजार् चुङ्ङ्य्हीत, लेबीइ खलक् ग्यम्से हजार् चुङ्ङ्य्हीत, इस्साखार्की खलक् ग्यम्से हजार् चुङ्ङ्य्हीत, 8 जबुलुन्की खलक् ग्यम्से हजार् चुङ्ङ्य्हीत, योसेफ्की खलक् ग्यम्से हजार् चुङ्ङ्य्हीत, बेन्यमीनकी खलक् ग्यम्से हजार् चुङ्ङ्य्हीत। य्हक्को म्हीमाकी बदेन् 9 हुजु लीप्चे खल्चेएनो ज्याब अखम्बे य्हक्को म्हीमाइ बदेन् ङचे म्रङ्ज्यी। थेङ्यीमा जम्मनो जाती ग्यम्से, जम्मनो खलक् ग्यम्से, जम्मनो य्हुल् ग्यम्से ओसेम् जम्मनो ग्योत् ग्यम्से मुबल। थेङ्यीमाचे तर् येन् येन्ज्यीम् यारी खजुर् पङ्बे दोङ्बोइ य्हर्ङमा थोज्यीम् ठीतेङ् थुमाइ ङोन्री रप्टीब मुबल। 10 ओसेम् थेङ्यीमाचे ङ्हच्छ्यङ् केत्री क्रीङ्ज्यीम् पङ्ज्यी, “ठीरी स्य्हुजेत्पे ङ्य्हङ्की पर्मेस्वर्तेङ् थुमा ग्यम्सेनो ङ्य्हमाङ्चे थर्ब यङ्ब।” 11 ओसेम् ठीतेङ् एल्डर्मा, ओसेम् सोम्बो सेम्ज्येन्मा ब्लीइ कोरोरो जम्मनो स्वर्गदुत्मा रप्टीब मुबल। ओसेम् थेङ्यीमाचे ठीइ ङोन्ग्यम् पब्लु लज्यीम् पर्मेस्वर्त तोप्परी 12 चोले पङ्ज्यी, “आमेन्! तोप्प, महीमा, बुद्दी, व्होर्छ्ये, स्य्हेस ओसेम् सक्तीतेङ् बङ् खेमपङ्लेनो ङ्य्हङ्की पर्मेस्वर्ल य्हीन्ब! आमेन्!” 13 हुजुलीप्चे एल्डर्मा न्हङ्री गीचे ङत, “चु तर् येन् येन्बलमा खल ओसेम् खनचे खबल?” बी ङ्योत्ज्यी। 14 ङचे थेत पङ्ज्यी, “ङचे स्येःबल अरे। थेङ्चेनो खेम्बल मुब।” थेचे ङत पङ्ज्यी, “थेङ्यीमामी ङ्हच्छ्यङ् दुख नाज्यीम् खबल मुब, ओसेम् थेङ्यीमाचे र्हङ्-र्हङ्की येन् थुमाकी काचे ख्रुज्यीम् तर् तन लबल मुब। 15 होत्तज्यीम् थेङ्यीमा पर्मेस्वर्की ठीइ ङोन्ग्यम् मुब, ओसेम् दीन्म्हुन् थेङ्की दीम्री थेङ्की सेव स्य्हेङ्ब। ओसेम् ठीरी स्य्हुजेत्पलचे थेङ्यीमातेङ् तजेत्ज्यीम् थेङ्यीमाकी वास्त स्य्हेङ्जेत्स्ये मुब। 16 थेङ्यीमा खेमेएनो ख्रेन्बतेङ् फीस्ये अरे। ओसेम् दीनीतेङ् खतेबे लेप्चेएनो थेङ्यीमात क्रोस्ये अरे। 17 तलेपङ्सम् ठीइ गुङ्री स्य्हुजेत्पे थुमानो थेङ्यीमाकी गोर्तेन् तजेत्स्ये मुब। थेङ्चेनो थेङ्यीमात जीवन् यङ्बे यीइ म्रुरी नोम्जेत्स्ये मुब, ओसेम् पर्मेस्वर्चेनो थेङ्यीमाकी मीःकी मीख्ली जम्मनो फ्याजेत्स्ये मुब।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.