प्रकास 6 - पश्चिम तामाङछाप्मा ठोङ्बल 1 हुजु लीप्चे थुमाचे छाप् ङ्यीस् न्हङ्की ङोन्ग्यम्की छाप् गीः ठोङ्जेत्पल ङचे म्रङ्ज्यी, ओसेम् हुजु सोम्बो सेम्ज्येन्मा ब्लीन्हङ्की गीःचे मु गुरुङ्ब र्हङ्बे केत् तेत्ज्यीम् “खोउ!” बी पङ्बल ङचे थेःज्यी। 2 हुजुलीप्चे ङचे च्यामम् तर् त गीः म्रङ्ज्यी, हुजु त क्रेत्पे म्हीचे म्यतेङ् दली नाबल मुबल, ओसेम् थेत क्रेःकी गीः पीन्बल मुबल, ओसेम् थे ल्हो-ल्होमात छेत्ज्यीम् डाबे लागीरी य्हर्ज्यी। 3 हुजु लीप्चे थुमाचे दोस्रो छाप्एनो ठोङ्जेत्ज्यी, ओसेम् दोस्रो सोम्बो सेम्ज्येन्चे “खोउ!” पङ्बल ङचे थेःज्यी। 4 हुजुलीप्चे मे ग्रो र्हङ्बे वल त गीः डोङ्ज्यी, ओसेम् म्हीमाचे गीःचे गीःत सेत्खइ पङ्ज्यीम् हुजु त क्रेत्पलत जम्बुलीङ् ग्यम्से सान्ती म्हनलबे अधीकार् पीन्ज्यी। ओसेम् थेत ङ्हच्छ्यङ् तरवार्एनो गीः पीन्बल मुबल। 5 हुजु लीप्चे थुमाचे तेस्रो छाप् ठोङ्जेत्ज्यी, ओसेम् तेस्रो सोम्बो सेम्ज्येन्चे “खोउ!” पङ्बल ङचे थेःज्यी। हुजुलीप्चे ङचे म्लङ् त गीः म्रङ्ज्यी। हुजु त क्रेत्पे म्हीइ यारी पर् गीः मुबल। 6 हुजु सोम्बो सेम्ज्येन्मा ब्लीइ गुङ्चे चोले पङ्बे केत् ङचे थेःज्यी, “दीन् गीःकी म्हेलचे कीलोनङ् व्ह वुइ कीलो सोम् जौ ग्लुब खम्ब, तर जैतुन्की छ्युकुतेङ् अङ्गुर्की नीङ्गुत न्होङ्न थलउ।” 7 ओसेम् थुमाचे चौथो छाप्तएनो ठोङ्जेत्ज्यी, ओसेम् चौथो सोम्बो सेम्ज्येन्चे “खोउ!” पङ्बल ङचे थेःज्यी। 8 ङचे च्यामम् खउर् त गीः म्रङ्ज्यी, ओसेम् हुजु त क्रेत्पलइ मीन्मी “स्यीब” मुबल, ओसेम् स्यीबे म्हीमाकी आत्मामा टीबे ग्लाएनो थेइ लीप्चे ब्रबल मुबल। ओसेम् थेङ्यीमात जम्बुलीङ्की म्हीमा बो ब्ली न्हङ्की बो गीःत तरवार्, अनीकल, महामारी ओसेम् जम्बुलीङ्की र्हीइ सेम्ज्येन्मा ग्यम्से सेत्पे अधीकार् पीन्बल मुबल। 9 हुजु लीप्चे थुमाचे पाचौ छाप् ठोङ्जेत्ज्यी, ओसेम् पर्मेस्वर्की फ्रोइतेङ् थेङ्यीमाचे र्हङ्की बीस्वास्त कोङ्नले थेन्बल तज्यीम् सेत्पे म्हीमाकी आत्मामा बेदीइ दुङ्री ङचे म्रङ्ज्यी। 10 थेङ्यीमाचे चोले पङ्ज्यीम् ङ्हच्छ्यङ् केत्चे क्रीङ्ज्यी, “ओ पबीत्र, देमेन् ओसेम् सक्तीसाली परम्प्रभु, ङ्यीमात सेत्पे जम्बुलीङ्की म्हीमात न्याय स्य्हेङ्जेत्ज्यीम् खेम सजाय न्हङ्जेत्प?” 11 थेङ्यीमात म्ही र्हङ्स्यीनो काकर् कङ् सम्म दोःबे तर् येन् पीन्बल मुबल, ओसेम् थेङ्यीमात सेत्प र्हङ्ले थेङ्यीमाकी र्होःमातेङ् अलेमा सेत्थोबे सङ्ख्य अयोगदे सम्म थेङ्यीमाचे दुःब न्हउ बी पङ्बल मुबल। 12 हुजुलीप्चे थुमाचे छैटौ छाप् ठोङ्जेत्पल ङचे म्रङ्ज्यी। ओसेम् ङ्हच्छ्यङ् सङ्गुल् य्हर्ज्यी, दीनी म्हुन्दुङ् र्हङ्बे म्लङ् तज्यी, ओसेम् लनी का र्हङ्बे वल तज्यी। 13 ओसेम् अन्जीर्की दोङ्बोत ङ्हच्छ्यङ् लाबलुङ्चे य्होङ्बतेङ् अम्हीम्बे रोःरोमा तइब र्हङ्ले मुरी मुबे सार्मा जम्बुलीङ्री तइज्यी। 14 मुमी ब्यो गुइब र्हङ्ले गुइज्यीम् म्हय्हर्ज्यी, ओसेम् जम्मनो गङ्मातेङ् टापुमा र्हङ्-र्हङ्की ग्ला ग्यम्से म्हय्हर्ज्यी। 15 हुजु लीप्चे जम्बुलीङ्की ग्यल्बोमा, सासक्मा, स्यीपाइमाकी कप्तान्मा, बरुमा, सक्ती मुबे म्हीमा, ओसेम् बानमातेङ् बान अय्हीन्बलमा जम्मनो ऊमारी ओसेम् गङ्माकी ङ्हच्छ्यङ् युङ्बइ खुङ्मारी लाज्यी। 16 थेङ्यीमाचे गङ्मातेङ् ङ्हच्छ्यङ् युङ्बामात पङ्ज्यी, “ङ्यीमाकी जोरी तइयुउ, ओसेम् ठीरी स्य्हुजेत्टीबलइ लीः ग्यम्से, ओसेम् थुमाकी बोमो ग्यम्से ङ्यीमात छुमो! 17 तलेपङ्सम् थेङ् ङ्य्हीकी बोमोइ ङ्हच्छ्यङ् दीन् खबल मुब, ओसेम् हुजु दीन् खल्चे नाब खम्ल?” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.