प्रकास 5 - पश्चिम तामाङडीइ छयेःतेङ् थुमा 1 हुजुलीप्चे ठीरी स्य्हुजेत्पलइ केत् फ्यारी गुइज्यीम् थेन्बे डीइ छ्येः ङचे म्रङ्ज्यी। हुजु डीइ छ्येःरी फेपट्टीतेङ् न्हङ्पट्टीचेनो ब्रीबल मुबल, ओसेम् हुजुत ङ्यीस् छङ् छाप् ठोक्ज्यीम् दुङ्बल मुबल। 2 ओसेम् सक्तीसाली स्वर्गदुत् गीःचे ङ्हच्छ्यङ् केत् तेत्ज्यीम् चोले पङ्टीबल ङचे म्रङ्ज्यी, “चु डीइ छ्येःकी छाप्मा ठोङ्ज्यीम् फे:बरी जेःबल खल मुब?” 3 तर स्वर्गरी, जम्बुलीङ्री ओसेम् जम्बुलीङ्की दुङ्री हुजु गुइज्यीम् थेन्बे डीइ छ्येःत फे:ज्यीम् च्याब खम्बल खलेएनो अरेबल। 4 हुजु गुइज्यीम थेन्बे डीइ छ्येःत फेःज्यीम् च्याबरी योग्यल खलेएनो अयङ्ज्यीम् ङ य्हक्को क्राज्यी। 5 हुजु लीप्चे एल्डर् गीःचे ङत पङ्ज्यी, “थक्राको! च्यागो, यहुदाकी खलक्की ता, थेङ् दाऊद ग्यल्बोइ ङ्हच्छ्यङ् सन्तान य्हीन्ब, थेङ्चे डाजेत्पल मुब। ओसेम् थेङ्चे ङ्यीस् छङ् ठोक्पे छाप्मा ठोङ्ज्यीम् डीइ छ्येःत फेःब खम्जेत्प।” 6 हुजु लीप्चे ङचे ठीइ रेइरी थुमा गीः रप्जेत्टीबल म्रङ्ज्यी, हुजु ठीतेङ् थुमाकी कोरोरो सोम्बो सेम्ज्येन्मा ब्ली मुबल, ओसेम् थेङ्यीमा जम्मइ कोरोरो खल् गीः स्यी ब्ली एल्डर्मा मुबल। हुजु थुमामी ङोन्ग्यम् सेत्ज्यीम् सोबल र्हङ्ब म्रङ्ब मुबल। थेङ्ल रुमा ङ्यीस्तेङ् फेन्मा ङ्यीस् मुबल, हुजुमामी जम्बुलीङ्की जम्मनो ग्लामारी पीत्जेत्पे पर्मेस्वर्की आत्मामा ङ्यीस् य्हीन्ब। 7 ओसेम् थेङ् स्येःजेत्ज्यीम् ठीरी स्य्हुजेत्टीबलइ केत् फ्या ग्यम्से हुजु गुइज्यीम् थेन्बे डीइ छ्येः कीन्जेत्ज्यी। 8 हुजु गुइज्यीम् थेन्बे डीइ छ्येः थेङ्चे कीन्जेत्प साच्चेनो हुजु सोम्बो सेम्ज्येन् ब्लीतेङ् खल् गीः स्यी ब्ली एल्डर्माचे थुमाकी ङोन्री पुइ जुःज्यीम् फ्या लज्यी। थेङ्यीमा जम्मइ यारीनो बीनातेङ् ङोर् थङ् खबे सङ्स्युचे प्लीङ्बे म्हर्की खोरेमा मुबल। हुजु ङोर् थङ् खबे सङ्स्युमी पर्मेस्वर्की म्हीमाकी प्रार्थना य्हीन्ब। 9 थेङ्यीमाचे चोले छार् व्हइ गीः कोटीब मुबल- “थेङ् चु गुइज्यीम् थेन्बे डीइ छ्येः कीन्जेत्परी ओसेम् हुजुरी ठोक्पे छाप्मा ठोङ्बरी जेःबल मुब, तलेपङ्सम् थेङ्त सेत्ज्यी ओसेम् थेङ्चे र्हङ्की काचे जम्म खलक्, ग्योत्, य्हुल् ओसेम् जाती ग्यम्से पर्मेस्वर्की लागीरी म्हीमात ग्लुजेत्ज्यी। 10 ओसेम् थेङ्चेनो थेङ्यीमात ङ्य्हङ्की पर्मेस्वर्की सेव स्य्हेङ्बे य्हुल्तेङ् लम्बु स्य्हेङ्जेत्पल मुब, ओसेम् थेङ्यीमाचे जम्बुलीङ्री सासन् स्य्हेङ्स्ये मुब।” 11 हुजु लीप्चे ङचे देबेएनो च्यामम्, ओसेम् लाखउ, करोडउ स्वर्गदुत्माकी केत् ठीतेङ् सोम्बो सेम्ज्येन्मा ओसेम् एल्डर्माकी कोरोरो कोटीबल ङचे थेःज्यी। 12 थेङ्यीमा ङ्हच्छ्यङ् केत् तेत्ज्यीम् चोले कोटीबल मुबल, “म्हीमाचे सेत्पे थुमा सक्ती, सम्पत्ती, बुद्दी, बङ् स्हेस, महीमा, ओसेम् तोप्प यङ्बरी जेःबल मुब।” 13 ओसेम् स्वर्गरी, जम्बुलीङ्री, जम्बुलीङ् दुङ्री, समुन्द्ररी ओसेम् हुजुरी मुबे जम्मनो जन्तुमाचे चोले कोटीबल ङचे थेःज्यी, “ठीरी स्य्हुजेत्टीपलतेङ् थुमात तोप्प, स्हेस, महीमा, ओसेम् सक्ती खेमपङ्लेनो तस्यीनोटीखइ!” 14 ओसेम् हुजु सोम्बो सेम्ज्येन् ब्लीचे पङ्ज्यी, “आमेन्!” ओसेम् हुजु एल्डर्माचे पुइ जुःज्यीम् तेन्ज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.