प्रकास 4 - पश्चिम तामाङस्वर्गरी तेन्बल 1 हुजु लीप्चे ङचे च्याज्यी, ओसेम् स्वर्गरी म्रप् गीः ठोङ्बल म्रङ्ज्यी। ओसेम् ङचे ङोन्ग्यम् थेःबे केत् तुरहील र्हङ्बे केत्री ङतेङ् चोले तम् पङ्टीबल मुबल, “चोलेचे तोर् खोउ, ओसेम् देरेम् चु लीप्चे तनोथोस्येकी तम्मा ङ एत ङोन्स्ये मुब।” 2 चोले पङ्बुत्प साच्चेनो ङ पबीत्र आत्माचे प्लीङ्ज्यी। ङचे स्वर्गरी ठी गीः म्रङ्ज्यी, ओसेम् हुजु ठीरी म्ही गीः स्य्हुजेत्टीब मुबल। 3 थेङ् य्हक्को सइ ङ्यीबे बील्लौरतेङ् लालमनी पङ्बे युङ्बमा र्हङ्ले सर्पल मुबल, ओसेम् ठीइ कोरोरोमी य्हक्को सइ ङ्यीबे सर्पे पन्ना पङ्बे पीङ् युङ्ब र्हङ्बे लर्क्युङ् मुबल। 4 हुजु ठीइ कोरोरो खल् गीःस्यी ब्ली ल्हो-ल्हो ठीःमा मुबल। ओसेम् क्ररी म्हर्की क्रेःकीमा कुःबल ओसेम् तर् येन्मा येन्बे खल् गीःस्यी ब्ली एल्डर्मा हुजु ठीमारी टीबल मुबल। 5 हुजु ठी ग्यम्से तीप्लीक् फ्लीक्टीब मुबल ओसेम् लाबलुङ् खब र्हङ्बे केत्, ओसेम् मु गुरुङ्बल र्हङ्बे केत्मा खटीब मुबल, ओसेम् हुजु ठीइ ङोन्री मेतङ् ङ्यीस् लुम्टीब मुबल। चुमामी पर्मेस्वर्की आत्मामा ङ्यीस् य्हीन्ब। 6 ठीइ ङोन्पट्टी फोलो युङ्ब र्हङ्ले म्रङ्बे सीसइ समुन्द्र र्हङ्ब मुबल। ठीइ कोरोरो ङोन्पट्टीतेङ् ग्यप्पट्टीनो मीःमाचे प्लीङ्बे सोम्बो सेम्ज्येन् ब्ली मुबल। 7 ङोन्ग्यम्की सोम्बो सेम्ज्येन्मी ता र्हङ्ब मुबल, दोस्रो सेम्ज्येन् ग्लब र्हङ्ब मुबल, तेस्रो सोम्बो सेम्ज्येन्की लीः म्हील र्हङ्ब मुबल, ओसेम् चौथो सोम्बो सेम्ज्येन्मी फ्यङ्टीबे य्हेत् र्हङ्ब मुबल। 8 हुजु सोम्बो सेम्ज्येन् ब्लील ब्यप्मा डु-डु मुबल, ओसेम् हुजु ब्यप्माकी फेपट्टीतेङ् न्हङ्पट्टी पट्टी ङ्य्हीनो मीःमाचे प्लीङ्बल मुबल। थेङ्यीमाचे दीन् म्हुन्नो य्हम्एनो थेन् अतनले चोले व्हइ कोटीब मुबल, “पबीत्र, पबीत्र, पबीत्र परमप्रभु सक्तीसाली पर्मेस्वर् थेङ् मुबल ओसेम् मुब ओसेम् खेम पङ्लेनो तजेत्स्ये मुब।” 9 खेमपङ्लेनो सोस्यीनो टीजेत्पलतेङ् ठीरी स्य्हुजेत्पलत हुजु सोम्बो सेम्ज्येन् ब्लीचे महीमा, स्य्हेस ओसेम् व्होर्छ्ये पीन्बे व्हइ कोटीब मुबल। 10 हुजु खल् गीः स्यी ब्ली एल्डर्माचे ठीरी स्य्हुजेत्टीबलइ ङोन्री पुइ जुःज्यी, ओसेम् खेमपङ्लेनो सोम्बो स्य्हुजेत्पलत तेन्ज्यी। ओसेम् थेङ्यीमाचे र्हङ्-र्हङ्की क्रेःकी थेङ्की ठीइ ङोन्री थेन्ज्यीम् चोले पङ्ज्यी, 11 “ङ्यीमाकी प्रभुतेङ् पर्मेस्वर्, थेङ् महीमा, स्य्हेस, ओसेम् सक्ती ग्रहन् स्य्हेङ्बरी जेःबल मुब, तलेपङ्सम् जम्मनो स्हेःमा थेङ्चेनो स्य्हेङ्जेत्पल य्हीन्ब, ओसेम् थेङ्की थुः अनुसार् हुजुमा स्य्हेङ्जेत्ज्यी ओसेम् हुजुमाचे जीवन् यङ्ज्यी।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.