प्रकास 3 - पश्चिम तामाङसार्डीस्की मन्डलीत सम्तर् 1 “ओसेम् सार्डीस्की मन्डलीत स्य्हप्तो स्य्हेङ्बे चवत चु तम् ब्रीउ: “चु तम् पर्मेस्वर्की आत्मा ङ्यीस् ओसेम् सार् ङ्यीस् मुबलचे सुङ्ब। एइ लक् ङचे स्येःब। जम्मचेनो ए सोम्बो मुब बी पङ्ब, तर एङ्यीमामी स्यीबल मुब। 2 होत्तज्यीम् होसीयार् लउ, ओसेम् स्यीब म्हइटीबे एङ्यीमातेङ् चेत्पे चेक्पजकी तम्मात कोङ्न लउ, तलेपङ्सम् ङइ पर्मेस्वर्की ङोन्री एइ लक्मा बुत्पल ङचे यङ्बल अरे। 3 एचे ता थेःबलतेङ् लोप्पल मुब हुजुत व्हल् लउ। हुजुत ङ्येन्ज्यीम् ब्रउ ओसेम् पस्चताप् स्य्हेङो। ए होसीयार् तज्यीम् अटीज्यी पङ्सम् ङ य्हो खब र्हङ्ले खस्ये मुब, ओसेम् ङ गदे बेलो खस्ये मुब, हुजु एचे स्येःस्ये अरे। 4 तर सार्डीस्की मन्डलीरी गदे म्हीमा मुब, थेङ्यीमाचे र्हङ्की येन्त नेइनलबल अरे। थेङ्यीमा ङतेङ् तर् येन् येन्ज्यीम् ब्रस्ये मुब, तलेपङ्सम् थेङ्यीमा ङतेङ् ब्रबरी योग्यल मुब। 5 खल्चे डाब, थेत चोले तर् येन् येन्पीन्स्ये मुब, ओसेम् ङ जीवन्की छ्येः ग्यम्से थेइ मीन् खेमेएनो मेर्तीस्ये अरे। ङ थेत ङइ अपतेङ् थेङ्की स्वर्गदुत्माकी ङोन्री ङइ म्ही पङ्स्ये मुब। 6 “खल्ल थेबे न्हबीङ् मुब, पबीत्र आत्माचे मन्डलीमात ता सुङ्जेत्प हुजु ङ्येनो। फीलाडेल्फीयाकी मन्डलीत सम्तर् 7 “ओसेम् फीलाडेल्फीयाकी मन्डलीत स्य्हप्तो स्य्हेङ्बे चवत चु तम् ब्रीउ: “चु तम्मा पबीत्रतेङ् देमेन् ओसेम् दाऊद ग्यल्बोइ साचो मुबलचे सुङ्जेत्प, ओसेम् थेङ्चे ठोङ्जेत्पल खल्चेएनो दुङ्ब अखम्, ओसेम् थेङ्चे दुङ्जेत्पल खल्चेएनो ठोङ्ब अखम्। 8 एइ लक्मा ङचे स्येःब। च्यागो, एइ ङोन्ग्यम् ङचे म्रप् गीः ठोङ्ज्यीम् थेन्बल मुब, हुजु म्रप खल्चेएनो दुङ्ब अखम्। एतेङ् बङ् य्हक्को अरे पङ्बे तम् ङचे स्येःब, होलेतलेनो एचे ङइ तम् ङ्येन्बल मुब, ओसेम् ङइ मीन्त इन्कार् लबल अरे। 9 च्यागो, यहुदी य्हीन्ब पङ्ज्यीम् भ्यु पङ्बे सैतान्की म्हीमात ङ एइ कङ्री स्य्हु लबुङ्स्ये मुब, ओसेम् ङचे एत म्होइब पङ्बे तम् थेङ्यीमात गोनलस्ये मुब। 10 एचे धर्यले नाज्यीम् ङचे कुल्बे तम् ङ्येन्ज्यीम् ब्रबल तज्यीम्, जम्बुलीङ्की जम्मनो म्हीमात जाच्तीबरी चु जम्बुलीङ्री खस्येकी य्हक्को दुख ग्यम्से ङ एत थर्नलस्ये मुब। 11 ङ ग्योनेनो खटीब। एतेङ् ता मुब हुजुत कोङ्नले चुङ्ज्यीम् टीउ, ओसेम् एइ इनाम् खल्चेएनो ब्येन्ब खम्स्ये अरे। 12 खल्चे डाब, थेत ङ ङइ पर्मेस्वर्की दीम्की थाम् गीः स्य्हेङ्स्ये मुब, ओसेम् थे हुजु ग्यम्से खेमेएनो फीर्च्योर् डोङ्स्ये अरे। ङ थेइ जोरी ङइ पर्मेस्वर्की छेन् ब्रीस्ये मुब, ओसेम् थेइ जोरी ङइ पर्मेस्वर् ग्यम्से स्वर्गचे फप्ज्यीम् युस्येकी छार् यरुस्लेम्की मीन् ब्रीस्ये मुब, ओसेम् थेइ जोरी ङइ छार् मीनेएनो ब्रीस्ये मुब। 13 “खल्ल थेबे न्हबीङ् मुब, पबीत्र आत्माचे मन्डलीमात ता सुङ्जेत्प हुजु ङ्येनो। लाउडीकीयाकी मन्डलीत सम्तर् 14 “ओसेम् लाउडीकीयाकी मन्डलीइ स्य्हप्तो स्य्हेङ्बे चवत चु तम् ब्रीउ: “चु तम् आमेन् सुङ्बे, बीस्वास्योग्य, देमेन्की साक्षीचे सुङ्जेत्प, थेङ्नो पर्मेस्वर्चे स्य्हेङ्जेत्पे जम्मनो स्हेःमाकी म्रुः य्हीन्ब। 15 एइ लक्मा ङचे स्येःब। एमी न्ह लेप्प न्ह स्यीम्ब मुब। एमी लेप्प वुइ स्यीम्ब खजु पङ्लेनो गीः तबल य्हीन्सम् ज्यब तस्येल। 16 तर एङ्यीमा न्ह लेप्प न्ह स्यीम्ब, खलेप् तबल तज्यीम् ङ एङ्यीमात ङइ सुङ् ग्यम्से थोः ख्लाब र्हङ्ले ख्लास्ये मुब। 17 एचे पङ्ब, ‘ङ बरु मुब, ओसेम् ङतेङ् य्हक्को धन् सम्पत्ती मुब, ओसेम् ङत अयोब तएनो अरे।’ तर ए गत्ते दुखीतेङ् गत्ते दय खबल, प्रङ्न, कन, ओसेम् क्लीङ्दो मुब पङ्बे तम् एचे स्येःबलनो अरे। 18 होत्तज्यीम् बरु तबरी मेरी ख्रङ्ज्यीम् खार्तीबे म्हर् ओसेम् एत पेत्नलबे क्लीङ्दो ल्हीः गप्परी तर् येन् ओसेम् एइ मीः म्रङ्बरी मलम् ङ ग्यम्से ग्लुबरी ङ एत सल्लह पीन्ब। 19 खजु म्हीत ङचे म्होइब, थेत ङ बराब, ओसेम् दुल्ब। होत्तज्यीम् पाप् स्य्हेङ्ब पीत्ज्यीम् ज्यबे लक्मा स्य्हेङ्बरी आर् लउ। 20 ङ्येनो! ङ म्रप्री रप्ज्यीम् डोङ्-डोङ् लब। खल्चे पङ्लेनो ङइ केत् थेःज्यीम् म्रप् ठोङ्पीन्ज्यी पङ्सम्, ङ न्हङ्री वङ्स्ये मुब ओसेम् थेतेङ् चब चस्ये मुब, ओसेम् थेचे ङतेङ् बक्च्य चस्ये मुब। 21 खल्चे डाब, थेत ङ ङइ ठीरी ङतेङ् बक्च्य टीबुङ्स्ये मुब, खले ङ र्हङ्चेएनो डाबल तज्यीम् ङइ अपतेङ् बक्च्य थेङ्की ठीरी टीबल मुब। 22 “खल्ल थेबे न्हबीङ् मुब, पबीत्र आत्माचे मन्डलीमात ता सुङ्जेत्प हुजु ङ्येनो।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.