प्रकास 22 - पश्चिम तामाङ1 हुजु लीप्चे स्वर्गदुत्चे ङत फोलो युङ्ब र्हङ्ले सर्पे जीवन्की यीइ ग्येन्दी ङोन्ज्यी। हुजु ग्येन्दी पर्मेस्वर्तेङ् थुमाइ ठी ग्यम्से डोङ्ब मुबल। 2 हुजु ग्येन्दी सहर्की ग्यम्की गुङ्चे तज्यीम् य्हर्टीब मुबल। हुजु ग्येन्दीइ य ङ्हीःरीनो जीवन् पीन्बे दोङ्बो मुबल, हुजु दोङ्बोचे तीत्तीङ्री चुङ्ङ्ही थोइ रोःरो ल र्हङ्स्यीनो रोःब मुबल। हुजुइ बामामी जाती-जातीमात फेन्नलबे मेन् मुबल। 3 देरे य्हङ्से हुजुरी खेमेएनो केम्लङ् तस्ये अरे। पर्मेस्वर्तेङ् थुमाइ ठी हुजुरी तस्ये मुब, ओसेम् थेङ्की योक्पोमाचे हुजुरी थेङ्त तेन्स्ये मुब। 4 ओसेम् थेङ्यीमाचे पर्मेस्वर्की स्य्हल् म्रङ्स्ये मुब, ओसेम् थेङ्की छेन् थेङ्यीमाकी ङ्होरी तस्ये मुब। 5 हुजुरी खेमेएनो म्हुन तस्ये अरे, थेङ्यीमात बत्तीतेङ् दीनीइ य्हल् तोःस्ये अरे, तलेपङ्सम् परमप्रभु पर्मेस्वर्नो थेङ्यीमाकी य्हल् तजेत्स्ये मुब, ओसेम् थेङ्यीमाचे खेम पङ्लेनो सासन् स्य्हेङ्स्ये मुब। प्रभु येसु ग्योःनेनो ब्योन्युजेत्टीब 6 हुजु लीप्चे स्वर्गदुत्चे ङत पङ्ज्यी, “एङ्यीमाचे थे:बे चु जम्मनो तम्मा बीस्वासीलोतेङ् देमेन् मुब। अगम्बक्तमात पबीत्र आत्मा न्हङ्जेत्पे प्रभु पर्मेस्वर्चे र्हङ्की योक्पोमातमी ग्योःनेनो तस्येकी तम्मा ङोन्बरी र्हङ्की स्वर्गदुत् पीत्युजेत्पल मुब।” 7 ओसेम् येसुचे सुङ्ज्यी, “च्यागो, ङ ग्योनेनो युटीब मुब। चु छयेःरी ब्रीबे अगम्बानीइ तम्मा ङ्येन्ज्यीम् ब्रबलमा मोलम् यङ्बलमा य्हीन्ब।” 8 ङ युहन्नाचे चु तम्मा थेःबलतेङ् म्रङ्बल य्हीन्ब। ओसेम् ङचे चु तम्मा थेःबतेङ् म्रङ्ब बीसेम्, ङत चु तम्मा ङोन्बे स्वर्गदुत्त तेन्बरी स्वार्गदुत्की कङ् रेइरी ङचे पुइ जुःज्यी। 9 तर थेचे ङत पङ्ज्यी, “ङत होले थलउ। ङमी एतेङ्, एइ ल्हो-ल्हो बीस्वासी र्हो अगम्बक्तमा ओसेम् चु छ्येःरी ब्रीबे तम्मा ङ्येन्बे जम्मनो म्हीमा र्हङ्बे पर्मेस्वर्की योक्पोकीनो य्हीन्ब। पर्मेस्वर्तकीनो तेनो!” 10 ओसेम् थेचे ङत चोले पङ्ज्यी, “चु छ्येःकी अगम्बानीइ तम्मात छुम्ज्यीम् थथेनो, तलेपङ्सम् चु जम्मनो तम्मा तस्येकी बेलो ज्यदङ् मुब। 11 दुस्ट लक् स्य्हेङ्बलचे दुस्ट लक्नो स्य्हेङ्टीखइ, नेइबे सेम् थोःज्यीम् नेइबे लक् स्य्हेङ्बलचे होलेनो स्य्हेङ्टीखइ, धर्मीचे धार्मीक् लक्नो स्य्हेङ्टीखइ, ओसेम् पबीत्र म्ही पबीत्रनो तटीखइ।” 12 ओसेम् येसुचे सुङ्ज्यी, “च्यागो, ङ ग्योःनेनो युटीब मुब। जम्मनो म्हीमात थेङ्यीमाचे स्य्हेङ्बे लक् अनुसार् इनाम्तेङ् सजाय पीन्स्ये मुब। 13 ङ अल्फातेङ् ओमेगा, ङोन्ग्यम्तेङ् लीक्यम्, तीप्पतेङ् ज्यु य्हीन्ब।” 14 र्हङ्की येन् ख्रुज्यीम् ज्यनले थेन्बलमा मोलम् यङ्बलमा य्हीन्ब। थेङ्यीमाचे हुजु सहर्की म्रप् ग्यम्से न्हङ्री वङ्म्यङ्स्ये मुब ओसेम् जीवन्की दोङ्बोइ रोःरो ग्यम्चे चबे हक् यङ्स्ये मुब। 15 तर सहर्की फीर्च्योर्मी नीकील र्हङ्बे बानी थोबे म्हीमा, जादु ङोन्बलमा, बेस्या स्य्हेङ्बलमा, म्ही सेत्पलमा, ख्लत तेन्बलमा ओसेम् भ्युकी तम् ङ्येन्बलमातेङ् हुजु अनुसार् ब्रबलमा तब। 16 “ङ येसुचे मन्डलीमारी मुबलमा जम्मतनो चु तम्माकी गबाही पीन्बरी ङइ स्वर्गदुत्त एज पीत्खबल मुब। ङ दाऊद ग्यल्बोइ सन्तान् य्हीन्ब। ङ स्य्होरी सर्बे सार् य्हीन्ब।” 17 पबीत्र आत्मातेङ् दुलहीचे सुङ्जेत्ब, “ब्योन्खजेतो।” खल्चे थेःज्यी थेचेएनो, “ब्योन्खजेतो” बी पङ्खइ। खल्त यी फीःब हुजु खखइ, खल्चे सेम् लब थेचे जीवन्की यी ओलेन्नो थुङ्खइ। 18 चु छ्येःकी अगम्बानीइ तम्मा थेःबे जम्मनो म्हीमात ङ युहन्नाचे चेतावनी पीन्ब, खल्चे पङ्लेनो चु छ्येःरी ब्रीबे तम्री ल्हो-ल्हो तम् कप्ज्यी पङ्सम् चु छ्येःरी ब्रीबे बीपत्तीमा पर्मेस्वर्चे थेत कप्पीन्जेत्स्ये मुब। 19 ओसेम् खल्चे पङ्लेनो चु छ्येःरी ब्रीबे अगम्बानीइ तम्मा स्याज्यी पङ्सम्, चु छ्येःरी ब्रीबे जीवन्की दोङ्बोइ रोःरो चम्यङ्बे थेइ हक्एनो पर्मेस्वर्चे स्यालजेत्स्ये मुब, ओसेम् पबीत्र सहर्री वङ्बे हक्एनो पर्मेस्वर्चे स्यालाजेत्स्ये मुब। 20 चु तम्की गवाही न्हङ्बलचे सुङ्जेत्प, “देमेन्नो, ङ ग्योने युटीब।” आमेन्। ब्योन्युजेतो, ओ प्रभु येसु! 21 प्रभु येसुइ अनुग्रह एङ्यीमा जम्मतेङ् तस्यीनो टीखइ। आमेन्। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.