Biblia Todo Logo
Bìoball air-loidhne

- Sanasan -

प्रकास 21 - पश्‍चिम तामाङ


छार् स्‍वर्‌गतेङ् छार् जम्‍बुलीङ्

1 हुजु लीप्‍चे ङचे छार् स्‍वर्‌गतेङ् छार् जम्‍बुलीङ् म्रङ्‍ज्‍यी, तलेपङ्‍सम् ङोन्‍ग्‍यम्‍की स्‍वर्‌गतेङ् जम्‍बुलीङ् म्‍हज्‍यीम् य्‍हर्‌बल मुबल, ओसेम् समुन्‍द्रएनो म्‍हज्‍यीम् य्‍हर्‌बल मुबल।

2 ओसेम् ङचे पबीत्र सहर्, छार् यरुस्‍लेम, पर्‌मेस्‍वर् ग्‍यम्‍से स्‍वर्‌गचे दुङ्‌री फप्‍युटीबल म्रङ्‍ज्‍यी। हुजु यरुस्‍लेम्‍मी दुलहकी लागीरी दुलही छ्‌येःब र्‌हङ्‌ले छयेःबल मुबल।

3 ठी ग्‍यम्‍से ङ्‍हच्‍छ्‌यङ् केत्‍री चोले पङ्‍बल ङचे थेःज्‍यी, “च्‍यागो! देरेम् पर्‌मेस्‍वर् म्‍हीमातेङ् स्‍य्‍हुजेत्‍प। पर्‌मेस्‍वर् थेङ्‍यीमातेङ् स्‍य्‍हुजेत्‍स्‍ये मुब, ओसेम् थेङ्‌यीमा पर्‌मेस्‍वर्‌की म्‍हीमा तस्‍ये मुब। ओसेम् पर्‌मेस्‍वर् र्‌हङ्‌नो थेङ्‍यीमातेङ् तजेत्‍ज्‍यीम् थेङ् थेङ्‍यीमाकी पर्‌मेस्‍वर् तजेत्‍स्‍ये मुब।

4 थेङ्‍चे थेङ्‍यीमाकी जम्‍मनो मीःकी मीख्‍ली फ्‍यापीन्‍जेत्‍स्‍ये मुब, ओसेम् देरे य्‍हङ्‍स्‍ये खलएनो स्‍यीस्‍ये अरे, ओसेम् खल्‍चेएनो दुख म्‍हन्‍दीस्‍ये अरे, खलएनो क्रास्‍ये अरे, तइ नब छ्‍योइबएनो तस्‍ये अरे। तलेपङ्‍सम् ङोन्‍ग्‍यम्‍की स्‍हेःमा म्‍हज्‍यीम् य्‍हर्‌ज्‍यीन्‍बल मुब।”

5 ओसेम् ठीरी स्‍य्‍हुजेत्‍टीबलचे ङत सुङ्‌ज्‍यी, “च्‍यागो! देरेम् ङ जम्‍मनो स्‍हेःमा छार् स्‍य्‍हेङ्‌टीब।” थेङ्‍चे चोलेएनो सुङ्‌ज्‍यी, “चु तम् ब्रीउ, तलेपङ्‍सम् चु तम्‍मा बीस्‍वास् योग्‍यतेङ् देमेन् मुब।”

6 ओसेम् थेङ्‍चे ङत सुङ्‌ज्‍यी, “देरेम् बुत्‍ज्‍यी। ङ अल्‍फातेङ् ओमेगा य्‍हीन्‍ब, ओसेम् तीप्‍पतेङ् ज्‍युः ङनो य्‍हीन्‍ब। फीःबलमात ङचे जीवन्‍की यीइ म्रुः ग्‍यम्‍से ओलेनो थुङ्पुङ्‍स्‍ये मुब।

7 खल्‍चे डाज्‍यी, थेचे चु जम्‍मनो हक् यङस्‍ये मुब, ओसेम् ङ थेइ पर्‌मेस्‍वर् तस्‍ये मुब, ओसेम् थेमी ङइ कोल तस्‍ये मुब।

8 तर लोङ्‍बलमा, बीस्‍वास् अलबलमा, नेइबे लक् स्‍य्‍हेङ्‌बलमा, म्‍ही सेत्‍पलमा, बेस्‍य स्‍य्‍हेङ्‌बलमा, जादु ङोन्‍बलमा, ख्‍लत तेन्‍बलमातेङ् भ्‍यु पङ्‍बलमाकी ग्‍लामी लुम्‍टीबे मेतेङ् गन्‍धक्‍की ग्‍ये य्‍हीन्‍ब। हुजुरी दोःबमी दोस्रो स्‍यीब य्‍हीन्‍ब।”


छार् यरुस्‍लेम्

9 ओसेम् हुजु ज्‍युःकी बीपत्‍ती ङ्‍यीस्‍चे प्‍लीङ्‍बे खोरे ङ्‌यीस् थोःबे स्‍वर्‌गदुत्‍मा ङ्‌यीस् न्‍हङ्‌की गीः खज्‍यीम् ङत चोले पङ्‍ज्‍यी, “खोउ, ङ एत थुमाइ दुलही, थेङ्‍की म्रीङ्‍त ङोन्‍स्‍ये मुब।”

10 हुजुलीप्‍चे ङत पबीत्र आत्‍मारी हुजु स्‍वर्‌गदुत्‍चे य्‍हक्‍को नोबे गङ्‍री बोर्‌ज्‍यी, ओसेम् पर्‌मेस्‍वर् ग्‍यम्‍से स्‍वर्‌गचे दुङ्‌री फप्‍युटीबे पबीत्र सहर्, छार् यरुस्‍लेम् ङत ङोन्‍ज्‍यी।

11 हुजु सहर् पर्‌मेस्‍वर्‌की महीमाचे प्‍लीङ्‍बल मुबल, ओसेम् हुजुइ सर्‌बमी य्‍हक्‍को सइ ङ्‌यीबे सर्‌बे बील्‍लौर युङ;ब र्‌हङ्‍ब मुबल ओसेम् फोलो युङ्‌ब र्‌हङ्‌बे छर्‌लङ्‌क मुबल।

12 हुजुरी चुङ्‍ङ्‍हीः म्रप् मुबे ङ्‍हच्‍छ्‍यङ्तेङ् नोबे कउरु मुबल। ओसेम् चुङ्‍ङ्‍हीः म्रप्‍मारी म्रप् र्‌हङ्‍स्‍यीनो स्‍वर्‌गदुत्‍मा का-कर् मुबल। हुजु म्रप्‍मा र्‌हङ्‍स्‍यीनो इस्राएलकी चुङ्‍ङ्‌ही खलक्‍माकी मीन् काकर् ब्रीबल मुबल।

13 स्‍यर् पट्‍टीचे म्रप् सोम, न्‍हुब् पट्‍टीचे म्रप् सोम, ज्‍यङ् पट्‍टीचे म्रप् सोम, ओसेम् लो पट्‍टीचे म्रप् सोम् मुबल।

14 सहर्‌की कउरुल चुङ्‌ङ्‍य्‍हीः जग् युबल मुबल, ओसेम् हुजुइ जोरी थुमाइ चुङ्‍ङ्‍य्‍ही प्रेरीत्‍माकी मीन् ब्रीबल मुबल।

15 ङतेङ् तम् पङ्‍बे स्‍वर्‌गदुत्‍की यारी हुजु सहर्‌तेङ् हुजुइ म्रप्‍मा ओसेम् कउरु दप्‍पे म्‍हर्‌की बेर्‌क गीः मुबल।

16 हुजु सहर् चारपाटे मुबल ओसेम् हुजुल ब्‍लेक्‍पतेङ् र्‌हीङ्‍ब बराबर् मुबल। स्‍वर्‌गदुत्‍चे हुजु बेर्‌कचे दप्‍मम् चौबीस् सय कीलोमीटर् र्‌हीङ्‍ब, ब्‍लेक्‍प ओसेम् नोब मुबल।

17 ओसेम् स्‍वर्‌गदुत्‍चे सहर्‌की कउरु दप्‍ज्‍यी, ओसेम् म्‍हीमाचे दप्‍परी कोल्‍बे स्‍हेः अनुसार् दप्‍मम् हुजु पइसट्‍ठी मीटर् नोब मुबल।

18 हुजु कउरु बील्‍लौर युङ्‌बचे स्‍य्‍हेङ्‍बल मुबल, ओसेम् सहर्‌मी सुद्‍द म्‍हर्‌चे स्‍य्‍हेङ्‌बल मुबल, ओसेम् सीस र्‌हङ्‍बे छर्‌लङ्‍क मुबल।

19 कउरुइ जग्‍मा य्‍हक्‍को सेइ ङ्‌यीबे य्‍हक्‍को थोइ रत्‍नमाचे स्‍य्‍हेङ्‌बल मुबल। ङोन्‍ग्‍यम्‍की जग् बील्‍लौर पङ्‍बे युङ्‍बल, दोस्रो नीर् पङ्‍बे युङ्‍बल, तेस्रो हरीत् पङ्‍बे युङ्‍बल, चौथो पन्‍ना पङ्‍बे युङ्‍बल,

20 पाचौ आनीक्‍स् पङ्‍बे युङ्‍बल, छैटौ लालमनी पङ्‍बे युङ्‍बल, सातौ पीत्‍मनी पङ्‍बे युङ्‍बल, आठौ बेरुज पङ्‍बे युङ्‍बल, नवौ पुस्‍पराज् पङ्‍बे युङ्‍बल, दसौ लसुने पङ्‍बे युङ्‍बल, एघारौ नीलमनीपङ्‍बे युङ्‍बल ओसेम् बारौ कटेलाल् पङ्‍बे युङ्‍बल मुबल।

21 हुजु चुङ्‍ङ्‌ही म्रप्‍मामी चुङ्‍ङ्‌ही मोतीमाचे स्‍य्‍हेङ्‍बल मुबल। मोती गीःचे म्रप् गीः स्‍य्‍हेङ्‌बल मुबल। हुजु सहर्‌की ग्‍यम् सुद्‍द म्‍हर्‌चे स्‍य्‍हेङ्‌बे छर्‌लङ्‌क तबे सीसा र्‌हङ्‍ब मुबल।

22 ङचे हुजु सहर्‌री पर्‌मेस्‍वर्‌की दीम् अम्रङ्, तलेपङ्‍सम् पर्‌मेस्‍वर्‌की दीम्‍मी प्रभु सक्‍तीसाली पर्‌मेस्‍वर्‌तेङ् थुमा र्‌हङ्‌नो य्हीन्‍ब।

23 हुजु सहर्‌त य्‍हल् तनलबरी दीनीतेङ् लनी अतोब मुबल, तलेपङ्‍सम् पर्‌मेस्‍वर्‌की महीमानो हुजुरी य्‍हल् तब। ओसेम् हुजुइ बत्‍तीमी थुमानो य्‍हीन्‍ब।

24 हुजुइ य्‍हल्‍रीनो जम्‍बुलीङ्‌की जम्‍मनो जातीमा ब्रस्‍ये मुब। जम्‍बुलीङ्‌की ग्‍यल्‍बोमाचे र्‌हङ्‍की महीमा हुजुरी बस्‍ये मुब।

25 हुजु सहर्‌की म्रप्‍मा दीनीरी खेमेएनो दुङ्‌स्‍ये अरे, तलेपङ्‍सम् हुजुरी खेमेएनो म्‍हुन तस्‍ये अरे।

26 जम्‍मनो जातीमाचे थेङ्‍यीमाकी महीमातेङ् स्‍य्‍हेस हुजुरी बस्‍ये मुब।

27 तर असुद्‍द तम्‍म, नेइबे लक् स्‍य्‍हेङ्‌बलमा ओसेम् भ्‍यु तम् पङ्‍बलमा हुजु सहर्‌री वङ्म्‍यङ्‍स्‍ये अरे। थुमाइ जीवन्‍की छ्‌येःरी मीन् ब्रीबलमाकीनो हुजुरी वङ्म्‍यङ्‍स्‍ये मुब।

© 2024 (Active), Wycliffe Bible Translators, Inc. All rights reserved.

Wycliffe Bible Translators, Inc.
Lean sinn:



Sanasan