प्रकास 20 - पश्चिम तामाङहजार् बर्स 1 हुजु लीप्चे दब्ज्यीम् दब्ब अखम्बे नुप्पे व्हङ्की साचोतेङ् ङ्हच्छ्यङ् च्यल्द गीः र्हङ्की यारी थोःबे स्वर्गदुत् गीः स्वर्ग ग्यम्से दुङ्री फप्टीबल ङचे म्रङ्ज्यी। 2 ओसेम् थेचे हुजु सङ्मोत चुङ्ज्यीम् हजार् गीः बर्स सम्मइ लागीरी खीःज्यीम् थेन्ज्यी। हुजु सङ्मोमी दङ्बोइ पुख्री म्हङ्माकी ग्यल्बोतेङ् सैतान् य्हीन्ब। 3 हुजु सङ्मोचे देरे य्हङ्से जाती-जातीमात छल् अलखइ पङ्ज्यीम् हजार् गीः बर्स सम्मइ लागीरी हुजु स्वर्गदुत्चे दब्ज्यीम् दब्ब अखम्बे नुप्पे व्हङ्न्हङ् ख्लापीत्ज्यी, ओसेम् हुजु व्हङ्की म्रप्री साचो जङ्ज्यीम् छाप् ठोक्ज्यी। हजार् गीः बर्स बेब लीप्चे तोव बेलो सम्मइ लागीरीकीनो थेत पीत्थोब। 4 ओसेम् ङचे ठीमातेङ् हुजुमारी टीबलमात म्रङ्ज्यी, थेङ्यीमात न्याय स्य्हेङ्बे अधीकार् पीन्बल मुबल। ओसेम् येसुइ बारेरी स्येत्पलतेङ् पर्मेस्वर्की फ्रोइ स्येत्पल तज्यीम् क्र थाज्यीम् सेत्लाबे म्हीमाकी आत्मामातएनो ङचे म्रङ्ज्यी। थेङ्यीमाचे हुजु दुस्ट सेम्ज्येन्तेङ् थेइ ख्लत तेन्बल अरेबल, ओसेम् थेङ्यीमाचे र्हङ्की ङ्होरी वुइ यारी थेइ छाप् ल्हइदीपुङ्बलएनो अरेबल। थेङ्यीमा देबेएनो सोज्यीम् रेःज्यी ओसेम् हजार् गीः बर्स सम्म ख्रीस्ट्तेङ् बक्च्य सासन् लज्यी। 5 चुनो ङोन्ग्यम्की पुनरुत्थान य्हीन्ब। तर ल्हो-ल्हो स्यीबलमामी हजार बर्स अबुत्गदे सोज्यीम् रेःस्ये अरे। 6 ङोन्ग्यम्की पुनरुत्थान्री सोज्यीम् रेःबलमा मोलम् यङ्बलमातेङ् पबीत्र तबलमा य्हीन्ब। थेङ्यीमात दोस्रो स्यीबे सक्तीचे तेएनो लब अखम्। तर थेङ्यीमा पर्मेस्वर्तेङ् ख्रीस्ट्की लम्बु तज्यीम् थेङ्तेङ् बक्च्य हजार् गीः बर्स सम्म सासन् स्य्हेङ्स्ये मुब। सैतान् ब्रेःबल 7 हजार् बर्स बेब बीसेम् सैतान्त च्युप्पे ग्लाचे पीत्लास्ये मुब। 8 ओसेम् थे जम्बुलीङ्की जम्मनो य्हुल्माकी म्हीमात छल् लबरी ङ्यीस्ये मुब। हुजु य्हुल्माकी म्हीमात गोग्तेङ् मागोग् पङ्ब। ओसेम् सैतान्चे थेङ्यीमात छेत्पे लक् स्य्हेङ्बरी र्हुब् लस्ये मुब। ओसेम् थेङ्यीमामी समुन्द्रइ यरी मुबे बलुवमा र्हङ्ले ज्याब अखम्ब सम्म तस्ये मुब। 9 थेङ्यीमा जम्बुलीङ्की जम्मनो ग्लामारी य्हर्ज्यीम् पर्मेस्वर्की म्हीमा टीबे ग्लातेङ् थेङ्चे म्होइजेत्पे सहर्त कोरोरो र्होत्ज्यी, तर स्वर्ग ग्यम्से मे तइज्यीम् थेङ्यीमात नास् लज्यी। 10 जम्मनो य्हुल्की म्हीमात छल् लबे हुजु सैतान्त लुम्टीबे मेतेङ् गन्धक्की ग्येन्हङ् ख्लापीत्ज्यी, हुजुरी दुस्ट सेम्ज्येन्तेङ् भ्युकी अगम्बक्तएनो ङोन्ग्यम्नो ख्लापीत्पल मुबल। थेङ्यीमाचे हुजुरी खेमपङ्लेनोइ लागीरी दीन्म्हुन्नो दुख नास्ये मुब। ज्युःकी न्याय 11 ओसेम् ङचे तर्तर्पे ङ्हच्छ्यङ् ठी गीःतेङ् हुजुइ जोरी स्य्हुजेत्टीबल गीःत म्रङ्ज्यी। थेङ्की ङ्होन्सङ्चे मुतेङ् जम्बुलीङ् म्हय्हर्ज्यी ओसेम् दोःज्यीम खनएनो अम्रङ्। 12 ओसेम् ङ्हच्छ्यङ् ज्यीद स्यीबलमा जम्मनो ठीइ ङोन्री रप्टीबल ङचे म्रङ्ज्यी, ओसेम् छ्येःमा फेःबल मुबल। ओसेम् ल्हो-ल्हो छ्येः गीएनो फेःज्यी, हुजुमी जीवन्की छ्येः य्हीन्ब। हुजु छ्येःमारी ब्रीबे थेङ्यीमाकी लक् अनुसार् स्यीबलमाकी न्याय स्य्हेङ्जेत्ज्यी। 13 समुन्द्रचे हुजुरी मुबे स्यीबलमा दोःपीन्ज्यी, ओसेम् स्यीबतेङ् स्यीबे म्हीमाकी आत्मामा टीबे ग्लाचेएनो थेङ्यीमातेङ् मुबे स्यीबलमात दोःपीन्ज्यी। थेङ्यीमा जम्मलनो र्हङ्-र्हङ्की लक् अनुसार् न्याय तज्यी। 14 हुजुलीप्चे स्यीबतेङ् स्यीबे म्हीमाकी आत्मामा टीबे ग्लातएनो लुम्टीबे मेइ ग्येन्हङ् ख्लापीत्ज्यी। चु मेइ ग्येमी दोस्रो स्यीब य्हीन्ब। 15 ओसेम् खजु म्हीमाकी मीन् जीवन्की छ्येःन्हङ् ब्रीबल अयङ् थेङ्यीमात हुजु लुम्टीबे मेइ ग्येन्हङ् ख्लापीत्ज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.