प्रकास 2 - पश्चिम तामाङएफीसस्की मन्डलीत सम्तर् 1 “एफीसस्की मन्डलीइ स्य्हप्तो स्य्हेङ्बे चवत चु तम् ब्रीउ: “चु तम् सार् ङ्यीस्त र्हङ्की केत् फ्यारी थोःजेत्पलतेङ् म्हर्की साम्दान् ङ्यीस्की गुङ्से ब्रजेत्पलचे सुङ्जेत्प। 2 एचे स्य्हेङ्बे लक्मा, एचे य्हक्को दुखले स्य्हेङ्बे लक् ओसेम् एचे नापे तम् ङचे स्येःब। एचे दुस्ट म्हीमात स्वीकार् स्य्हेङ्ब अखम् पङ्बे तम्एनो ङचे स्येःब। ओसेम् प्रेरीत् अय्हीन्ज्यीम्एनो प्रेरीत् य्हीन्ब पङ्बलमात एचे जाच्तीज्यीम् थेङ्यीमा भ्यु टीम् बी स्येःबल मुब पङ्ज्यीम्एनो ङचे स्येःब। 3 एङ्यीमाचे ङइ लागीरी नाज्यीम् दुख नाबल मुब, ओसेम् एङ्यीमाचे ङत पीत्पल अरे। 4 तर एइ बीरुद्दरी ङतेङ् तम् गीः मुब एचे ङोन्ग्यम् म्होइब र्हङ्ले म्होइब पीत्पल मुब। 5 होत्तज्यीम् एचे ङोन्ग्यम् गत्ते य्हक्को म्होइब मुबल, हुजु तम् एचे व्हल् लउ। ओसेम् पस्चताप स्य्हेङो, ओसेम् एचे ङोन्ग्यम् म्होइब र्हङ्ले म्होइगो। एचे पस्चताप् अस्य्हेङ्ज्यी पङ्सम्, ङ एज खज्यीम् एइ साम्दान् हुजुइ ग्ला ग्यम्से तेत्लास्ये मुब। 6 तर एतेङ् ज्यबे तम्एनो गीः मुब, एचे ङचे र्हङ्ले नीकोलाइटस् पङ्बलमाकी दुस्ट लक्त हेल लब। 7 “खल्ल थेःबे न्हबीङ् मुब, पबीत्र आत्माचे मन्डलीमात ता सुङ्जेत्प हुजु ङ्येनो। “खल्चे डाब, थेत पर्मेस्वर्की स्वर्गरी मुबे जीवन्की दोङ्बो ग्यम्से रोःरो चबुङ्स्ये मुब। स्मुर्नाकी मन्डलीत सम्तर् 8 “ओसेम् स्मुर्नाकी मन्डलीत स्य्हप्तो स्य्हेङ्बे चवत चु तम् ब्रीउ: “चु तम् तीप्जेत्पलतेङ् ज्युः तजेत्पलचे सुङ्ब, थेङ् स्यीबल मुबल, तर देरेम् सोबल मुब। 9 एचे नाबे दुखमा ङचे स्येःब, ओसेम् ए प्रङ्न मुब पङ्बे तम्एनो ङचे स्येःब, तर एमी पर्मेस्वर्की ङोन्री बरु मुब! यहुदी अय्हीन्लेएनो र्हङ् यहुदी य्हीन्ब पङ्बलमाचे एइ बीरुद्दरी स्य्हेङ्बे नीन्द ङचे स्येःब, थेङ्यीमामी सैतान्की तम् ङ्येन्बे समुह य्हीन्ब। 10 एत खय्हम्बे दुखमातेङ् थलोङो। एइ बीस्वास्त जाच्तीबरी सैतान्चे एङ्यीमान्हङ्री डेत्डेत्त जेल्री युस्ये मुब, ओसेम् एङ्यीमाचे च्यीरेत् सम्म दुख नाथोःस्ये मुब। ए स्यीथोःलेनो ङत बीस्वास् स्य्हेङ्ब थपीतो, ओसेम् ङचे एत खेमेएनो अबेबे जीवन्की इनाम् पीन्स्ये मुब। 11 “खल्ल थेःबे न्हबीङ् मुब, पबीत्र आत्माचे मन्डलीमात ता सुङ्जेत्प हुजु ङ्येनो। “खल्चे डाब, थेत खेम पङ्लेनो दोस्रो स्यीबे सक्तीचे तेएनो लब खम्स्ये अरे। पर्गामम्की मन्डलीत सम्तर् 12 “ओसेम् पर्गामम्की मन्डलीत स्य्हप्तो स्य्हेङ्बे चवत चु तम् ब्रीउ: “चु तम् पट्टी ङ्य्हीचेनो छ्यर्पे स मुबे तर्वार् मुबलचे सुङ्जेत्प, 13 ए सैतान्की ठी मुबे ग्लारी टीब पङ्बे तम् ङचे स्येःब, तर एङ्यीमाचे ङत बीस्वास् स्य्हेङ्ब पीत्पल अरे। ङइ बीस्वासीलो साक्षी एन्टीपास्त सैतान् टीबे एङ्यीमाकी सहर्री सेत्पे बेलोरीएनो एङ्यीमाचे ङत बीस्वास् स्य्हेङ्ब अपीत्। 14 तर एइ बीरुद्दरी ङचे पङ्थोबे तम् चेक् मुब। एङ्यीमाकी गुङ्री बालाम्की तम् ङ्येन्बमा डेत्डेत् मुब। ख्लमात पीन्बे चब चज्यीम् ओसेम् बेस्या स्य्हेङ्ज्यीम् इस्राएलीमात पाप् स्य्हेङ्नलबरी बालाम्चे बालाक ग्यल्बोत लोप्ज्यी। 15 होलेनो नीकोलाइटस्की तम् ङ्येन्बे म्हीमाएनो एङ्यीमाकी गुङ्री मुब। 16 होत्तज्यीम् पस्चताप् स्य्हेङो, अय्हीन् पङ्सम् ङ एज ग्योनेनो खस्ये मुब, ओसेम् ङ थेङ्यीमातेङ् ङइ सुङ्चे डोङ्बे तर्वार्चे छेत्स्ये मुब। 17 “खल्ल थेबे न्हबीङ् मुब, पबीत्र आत्माचे मन्डलीमात ता सुङ्जेत्प हुजु ङ्येनो। “खल्चे डाब, ङ थेत छुम्ज्यीम् थेन्बे मन्न पीन्स्ये मुब। ओसेम् थेत ङ छार् मीन् ब्रीबे तर् युङ्ब गीः पीन्स्ये मुब। हुजु युङ्ब यङ्बलचे बीम ल्हो-ल्होचे हुजु मीन् स्येःस्ये अरे। थीआटीराकी मन्डलीत सम्तर् 18 “ओसेम् थीआटीराकी मन्डलीत स्य्हप्तो स्य्हेङ्बे चवत चु तम् ब्रीउ: “मे ल्हम् र्हङ्ले लुम्बे फेन् ओसेम् मेरी ख्रङ्ज्यीम् सर्बे कास र्हङ्ले सर्बे स्य्हब् मुबे पर्मेस्वर्की जचे चोले सुङ्ब। 19 “एइ लक्मा ङचे स्येःब। एचे स्य्हेङ्बे म्होइब, बीस्वास्, सेवा ओसेम् धैर्य लज्यीम् नापे तम् ङचे स्येःब। ङोन्ग्यम् बीम एचे देरे य्हक्को लक्मा स्य्हेङ्ब पङ्बे तम् ङचे स्येःब। 20 तर एइ बीरुद्दरी ङचे चु तम् पङ्नोथोःब: एचे इजेबेल पङ्बे अमकोलचे पङ्बे तम्त ङ्येन्ब। थेचे थे अगम्बादीनी य्हीन्ब पङ्ब तर र्हङ्की तम्माचे ङइ सेवा स्य्हेङ्बे म्हीमात बेस्या स्य्हेङ्बरी ओसेम् ख्लमात पीन्बे चब चबरी लोप्ज्यीम् फसइतीब। 21 ङचे थेत पस्चताप् स्य्हेङ्बे मौक पीन्ज्यी, तर थेचे बेस्या स्य्हेङ्बे लक् पीत्परी ङ्येन्नो अङ्येन्। 22 च्यागो, ङ थेत य्हक्को नबछब तनलस्ये मुब, ओसेम् थेतेङ् बेस्या स्य्हेङ्बलमाचे थेङ्यीमाचे स्य्हेङ्बे लक्मा ग्यम्स्ये पस्चताप् अस्य्हेङ्ज्यी पङ्सम् ङ थेङ्यीमात य्हक्को दुख तनलस्ये मुब। 23 थेइ तम् ङ्येन्ज्यीम् ब्रबलमात ङचे सेत्स्ये मुब, ओसेम् जम्मइ सेम्तेङ् लोत जाच्तीबल ङनो य्हीन्ब बी जम्मनो मन्डलीमाचे स्येःस्ये मुब। ओसेम् ङ एङ्यीमा जम्मतनो एङ्यीमाकी लक् अनुसार् पीन्स्ये मुब। 24 “तर चोतेबे भ्युकी तम् अङ्येन्बे ओसेम् कोइ कोइचे पङ्बे सैतान्की र्हस्यइ तम्मा अलोप्पे थीआटीराकी मन्डलीरी मुबे ल्हो-ल्होमात ङ पङ्ब, ङ एङ्यीमात ल्हो-ल्हो य्हक्को तम्मा ङ्येनो पङ्स्ये अरे। 25 तर ङ अखगदे एङ्यीमाचे लोप्पे तम्मा कोङ्नले चुङ्ज्यीम् टीउ। 26 खल्चे डाब ओसेम् ज्यु सम्मनो ङइ अर्तीमा ङ्येन्ज्यीम् ब्रब, ङ थेत जाती-जातीमाकी जोरी अधीकार् पीन्स्ये मुब। 27 ओसेम् थेचे थेङ्यीमाकी जोरी फइकी बेर्कचे सासन् स्य्हेङ्स्ये मुब, ओसेम् थेङ्यीमात सेप्रइ तङ्लोमात र्हङ्ले थीनलस्ये मुब। ङचे ङइ अप ग्यम्से यङ्बे चु अधीकार् ङ थेत पीन्स्ये मुब। 28 ङ थेत स्य्होःकी सार् पीन्स्ये मुब। 29 “खल्ल थेबे न्हबीङ् मुब, पबीत्र आत्माचे मन्डलीमात ता सुङ्जेत्प हुजु ङ्येनो। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.