प्रकास 19 - पश्चिम तामाङस्वर्गरी परमेस्वर्त तोप्पल 1 हुजुलीप्चे ङचे स्वर्गरी य्हक्को म्हीमाचे ङ्हच्छ्यङ् केत्री चोले पङ्टीबल थेःज्यी, “हल्लेलुयाह! मुक्ती, महीमा ओसेम् सक्ती ङ्य्हङ्की पर्मेस्वर्ल य्हीन्ब, 2 तलेपङ्सम् थेङ्की न्याय देमेन्तेङ् ठीक् मुब। र्हङ्की बेस्या स्य्हेङ्बे लक्चे जम्मनो जम्बुलीङ्त न्होङ्नलबे य्हक्को अज्यबे बेस्यत थेङ्चे ठीक् सजाय न्हङ्जेत्पल मुब। हुजु बेस्यचे पर्मेस्वर्की योक्पोमात सेत्पल तज्यीम् पर्मेस्वर्चे हुजुइ खीत् फाजेत्पल मुब।” 3 ओसेम् थेङ्यीमाचे देबेएनो तीख्यप् चोले पङ्ज्यीम् क्रीङ्ज्यी, “हल्लेलयाह! हुजु ङ्हच्छ्यङ् सहर्त क्रोबे मीङ्गु हुजु ग्यम्से खेमपङ्लेनो नम्तीङ् य्हर्स्यीनो टीब।” 4 ओसेम् हुजु खल् गीः स्यी ब्ली एल्डर्मातेङ् सोम्बो सेम्ज्येन् ब्लीचे ठीरी स्य्हुजेत्टीबे पर्मेस्वर्त पब्लु लज्यीम् तेन्ज्यी, ओसेम् चोले पङ्ज्यी, “आमेन्, हल्लेलुयाह!” थुमाइ भ्याकी डोन् 5 ओसेम् ठी ग्यम्से चोले पङ्टीबे केत् गीः युज्यी, “थेङ्की जम्मनो योक्पोमातेङ् ज्यीद ङ्हच्छ्यङ् जम्मनो थेङ्तेङ् लोङ्बलमाचे ङ्य्हङ्की पर्मेस्वर्त तोपो।” 6 हुजुलीप्चे य्हक्को म्हीमाकी केत् र्हङ्ब वुइ छ्याङ्गचे यी तइब र्हङ्बे केत्तेङ् ङ्हच्छ्यङ् मु गुरुङ्ब र्हङ्बे केत्चे चोले पङ्टीबल ङचे थ्येःज्यी, “हल्लेलुयाह! तलेपङ्सम् परमप्रभु ङ्य्हङ्की सक्तीसाली पर्मेस्वर्चे सासन् स्य्हेङ्जेत्प। 7 ङ्य्हङ्मा य्हक्को तङ्के ओसेम् थेङ्त महीमा पीन्गे! तलेपङ्सम् थुमाइ भ्याकी दीन् खबल मुब, ओसेम् थेङ्की दुलही र्हङ्नो टोप् तबल मुब। 8 थेत येन्बरी सुतीइ ज्यबे सर्पे येन् पीन्ज्यी।” (सुतीइ ज्यबे सर्पे येन्मी पर्मेस्वर्की म्हीमाचे स्य्हेङ्बे ज्यबे लक्मा य्हीन्ब।) 9 ओसेम् स्वर्गदुत्चे ङत पङ्ज्यी, “चु तम् ब्रीउ- थुमाइ भ्याकी डोन् चबरी ङ्होत्पलमा जम्मनो मोलम् यङ्बलमा य्हीन्ब।” देबेएनो हुजु स्वर्गदुत्चे ङत पङ्ज्यी, “चुमानो पर्मेस्वर्की देमेन्की फ्रोइ य्हीन्ब।” 10 ओसेम् हुजु स्वर्गदुत्त तेन्बरी ङचे पुइ जुःज्यी, तर थेचे ङत पङ्ज्यी, “ङत होले थलउ। ङएनो एतेङ् ल्हो-ल्हो बीस्वासीमा र्हङ्बे येसुइ बारेरी गबाही पीन्बे योक्पोकीनो य्हीन्ब। पर्मेस्वर्तकीनो तेनो। तलेपङ्सम् पर्मेस्वर् ग्यम्से देमेन्की अगम्बानी पङ्बलमाचे येसुइ बारेरी गवाही पीन्ब।” तर् तइ जोरी क्रेत्जेत्पल 11 ओसेम् ङचे स्वर्ग ठोङ्बल म्रङ्ज्यी, ओसेम् हुजुरी तर् त गीः मुबल। हुजु तइ जोरी क्रेत्जेत्पलत “बीस्वासीलोतेङ् देमेन्” पङ्ब। थेङ्चे न्यायतेङ् छेत्पे लक् ठीक्ले स्य्हेङ्जेत्प। 12 थेङ्की फ्येन् मेइ ल्हम् र्हङ्ब मुबल, ओसेम् थेङ्की क्ररी ग्यल्बोचे कुःब र्हङ्बे य्हक्को क्रेःकीमा कुःजेत्पल मुबल। थेङ्की छेन् थेङ्की ल्हीःरी ब्रीबल मुबल, तर हुजु छेन् थेङ्चे बीम खल्चेएनो अस्येब मुबल। 13 थेङ्चे काःरी ब्लुम्बे न्हम्ज येन्जेत्पल मुबल, ओसेम् थेङ्की छेन् “पर्मेस्वर्की फ्रोइ” मुबल। 14 स्वर्गइ स्यीपाइमा ज्यबे तर् सुतीइ येन् येन्ज्यीम् तर् तमाइ जोरी क्रेत्ज्यीम् थेङ्की लीप्-लीप् ब्रज्यी। 15 थेङ्की स्य्हल् ग्यम्से छ्यर्पे तर्वार् गीः डोङ्ज्यी। हुजु तर्वार् थोःजेत्ज्यीम् थेङ्चे जम्बुलीङ्की जाती-जातीमात डाजेत्स्ये मुब, ओसेम् थेङ्चे फइकी बेर्कचे थेङ्यीमाकी जोरी सासन् स्य्हेङ्जेत्स्ये मुब। ओसेम् कोल्री अङ्गुर् पेर्ज्यीम् खुकु तेत्प र्हङ्ले थेङ्चे सक्तीसाली पर्मेस्वर्की बोमोइ कोल्री थेङ्यीमात पेर्जेत्स्ये मुब। 16 थेङ्की न्हम्जतेङ् स्हुःरी “ग्यल्बोमाकी ग्यल्बो ओसेम् प्रभुमाकी प्रभु” पङ्बे छेन् ब्रीबल मुबल। 17 हुजुलीप्चे ङचे स्वर्गदुत् गीः दीनी जोरी रप्टीबल म्रङ्ज्यी। थेचे मुरी फ्यङ्टीबे ङ्यम्ङ्यमा जम्मतनो केत् ङ्हच्छ्यङ् तेत्ज्यीम् चोले क्रीङ्ज्यी, “खोउ, पर्मेस्वर्की ङ्हच्छ्यङ् डोन् चबरी र्हुब्ले खोउ। 18 ओसेम् एङ्यीमाचे ग्यल्बोमा, कप्तान्मा, सक्तीसाली म्हीमा ओसेम् तमातेङ् हुजुइ जोरी क्रेत्पलमा, बाना अय्हीन्बलमातेङ् बानामा, ज्यीदतेङ् ङ्हच्छ्यङ् जम्मलनो स्य चस्ये मुब।” 19 ओसेम् हुजु दुस्ट सेम्ज्येन्तेङ् जम्बुलीङ्की ग्यल्बोमा र्हङ् र्हङ्की स्यीपाइमा बज्यीम् तर् तइ जोरी क्रेत्जेत्पलतेङ् थेङ्की स्यीपाइमाकी बीरुद्दरी छेत्परी र्हुब् तबल ङचे म्रङ्ज्यी। 20 हुजु दुस्ट सेम्ज्येन्तेङ् हुजु भ्युकी अगम्बक्त थेङ्हीतनो चुङ्ज्यी। हुजु भ्युकी अगम्बक्तचे दुस्ट सेम्ज्येन्की लागीरी अचम्मइ लक्मा ङोन्ज्यी। थेचे हुजु लक्मा ग्यम्सेनो हुजु दुस्ट सेम्ज्येन्की छाप् कीन्बलतेङ् हुजुइ ख्लत तेन्बलमात छल् लबल मुबल। हुजु ङ्हीतनो लुम्टीबे मेतेङ् गन्धक्की ग्येन्हङ् सोम्बोनो ख्लापीत्ज्यी। 21 ओसेम् थेङ्यीमाकी जम्मनो स्यीपइमातमी तइ जोरी क्रेत्जेत्पलइ स्य्हल् ग्यम्से डोङ्बे तर्वार्चे सेत्ज्यी, ओसेम् थेङ्यीमाकी स्य जम्मनो ङ्यम्ङ्यमाचे म्रेन्ब सम्म चज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.