प्रकास 18 - पश्चिम तामाङबेबीलोन् नास् तबल 1 हुजु लीप्चे ङचे ङ्हच्छ्यङ् अधीकार् मुबे ल्हो-ल्हो स्वर्गदुत् गीः स्वर्ग ग्यम्से दुङ्री युटीबल म्रङ्ज्यी। थेइ सर्बचे जम्बुलीङ् य्हल् तज्यी। 2 हुजु स्वर्गदुत्चे क्रीङ्ज्यीम् चोले पङ्ज्यी, “ङ्हच्छ्यङ् सहर् बेबीलोन् नास् तज्यी! देरेम् हुजु सहर् म्हङ्मातेङ् दुस्ट आत्मामा टीबे ग्ला तबल मुब। ओसेम् हुजुरी जम्म खाल्की नेइबतेङ् असुद्द ङ्यम्ङ्यमातेङ् सेम्ज्यन्मा टीब। 3 तलेपङ्सम् जम्मनो जातीमा थेइ बेस्या स्य्हेङ्बे अज्यबे लक्चे ज्यी थुङ्ज्यीम् ङ्य्हेब र्हङ्ले ङ्य्हेबल मुब। जम्बुलीङ्की ग्यल्बोमाचे थेतेङ् बक्च्य बेस्य स्य्हेङ्बल मुब, ओसेम् थेचे मनमोज्यी लबरी य्हक्को सइ ङ्यीबे स्हेःमा ग्लुबल तज्यीम् जम्बुलीङ्की छोङ् स्य्हेङ्बे म्हीमा य्हक्कोनो बरु तबल मुब।” 4 हुजु लीप्चे स्वर्ग ग्यम्से चोले पङ्टीबे ल्हो-ल्हो केत् ङचे थेःज्यी, “ङइ म्हीमा, हुजु दुस्ट अमकोलत पीत्थेन्ज्यीम् खोउ, थेचे स्य्हेङ्ब र्हङ्बे पाप्मा थस्य्हेङो, अय्हीन् पङ्सम् थेचे यङ्स्येल र्हङ्बे सजाय एङ्यीमाचे नाथोस्ये मुब। 5 तलेपङ्सम् थेइ पाप्माकी चाङ् स्वर्ग सम्मनो दोःबल मुब, ओसेम् पर्मेस्वर्चे थेइ दुस्ट लक्मा जम्मनो व्हल् लजेत्पल मुब। 6 थेचे एङ्यीमात खतेब स्य्हेङ्ज्यी, थेतएनो होतेबनो स्य्हेङो। थेचे एङ्यीमात ता-त स्य्हेङ्ज्यी, हुजुत ङ्य्हीख्यप् नङ् फाको। एङ्यीमाकी लागीरी थेचे पीन्बे दुख बीमा ङ्य्हीख्यप् य्हक्को दुख थेइ खोरेरी युपीनो। 7 ओसेम् थेचे गदे घमन्डतेङ् मनमोज्यी लज्यीम् टीज्यी, थेत होदेनो कस्टतेङ् दुख पीनो। तलेपङ्सम् थेचे सेम्न्हङ्रीनो पङ्ब, ‘ङमी ङ्हच्छ्यङ् ग्यल्मो तज्यीम् टीबल मुब, ङ र्हेम्बो स्यीबे अमकोल अय्हीन्, ङचे खेमेएनो दुख लथोस्ये अरे।’ 8 होत्तज्यीम् दीन्गीःरीनो थेत स्यीब, दुख ओसेम् अनीकल्की बीपत्तीमा खस्ये मुब। ओसेम् थेत मेचे ख्रङ्लास्ये मुब, तलेपङ्सम् थेत न्याय स्य्हेङ्जेत्पे परमप्रभु पर्मेस्वर् सक्तीसाली मुब।” 9 “थेतेङ् बक्च्या बेस्या स्य्हेङ्बलतेङ् मनमोज्यी लबे जम्बुलीङ्की ग्यल्बोमा थेत क्रोबे मेइ मीङ्गु म्रङ्ज्यीम् य्हक्को क्राज्यीम् दुख म्हन्दीस्ये मुब। 10 थेङ्यीमाचेएनो थेत पीन्बे सजाय नाथोल बी लोङ्ज्यीम् थेङ्यीमा थारीङ्नो रप्ज्यीम् चोले पङ्स्ये मुब, ‘अम्मइ! हुजु ङ्हच्छ्यङ्तेङ् सक्तीसाली बेबीलोन् सहर्, य्हम्ब गीःरीनो एचे सजाय यङ्ज्यी!’” 11 जम्बुलीङ्की छोङ् स्य्हेङ्बलमा थेइ लागीरी य्हक्को क्राज्यीम् दुख म्हन्दीस्ये मुब, तलेपङ्सम् थेङ्यीमाचे चुङ्बे स्हेःमा ग्लुबरी खलएनो तस्ये अरे। 12 खल्चेएनो थेङ्यीमाकी म्हर्, म्हुइ, रत्न, मोती, ज्यबे सुतीइ येन्मा, खवल खपीङ् येन्, रेसम्की येन्, वल येन्, जम्म थोइ ज्यबे थङ् खबे स्यीङ् ओसेम् हत्तीइ स्ये ग्यम्से स्य्हेङ्बे जम्म थोइ स्हेःमा, ओसेम् य्हक्को सइ ङ्यीबे स्यीङ्की जम्म थोइ स्हेःमा, कास ग्यम्से स्य्हेङ्बे स्हे:मा, फइतेङ् सीङ्गमर्मर्चे स्य्हेङ्बे स्हेःमा ग्लुस्ये अरे। 13 ओसेम् दालचीनी, मसला, ज्यबे थङ् खबे सङ्स्युमा, मुर्र ओसेम् तर् सङ्स्यु, नीङ्गु, जैतुन्की छ्युकु, मैद ब्रा, व्ह, ग्लब्-मइ, ग्युमा, तमा, रथमा, बानामा ओसेम् लडाइरी डाज्यीम् बबे बानमातेङ् म्हीमाएनो ग्लुस्ये अरे। 14 हुजु छोङ् स्य्हेङ्बलमाचे चोले पङ्स्ये मुब, “ओ बेबीलोन्, एचे र्हङ्ल स्य्हेङ्की म्हेन्बे ज्यबे स्हेःमा जम्मनो म्हज्यीम् य्हर्बल मुब। एइ धन-सम्पत्तीतेङ् य्हक्को सर्बे स्हेःमा जम्मनो नास् तज्यीन्बल मुब। ओसेम् एचे हुजुमा जम्मनो दोःज्यीम् खेमेनो यङ्स्ये अरे।” 15 हुजु सहर्री छोङ् स्य्हेङ्ज्यीम् बरु तबे म्हीमा थेत पीन्बे ङ्हच्छ्यङ् सजाय म्रङ्ज्यीम् लोङ्ज्यीम् थारीङ्नो रप्स्ये मुब। थेङ्यीमा क्राज्यीम् दुख म्हन्दीस्ये मुब। 16 ओसेम् थेङ्यीमाचे पङ्स्ये मुब, “अम्मइ! हुजु ङ्हच्छ्यङ् सहर्, थेमी ज्यबे सुतीइ येन्, खवल खपीङ्तेङ् वल येन् येन्ज्यीम् य्हक्को सेइ फाबे म्हर्, रत्नमा ओसेम् मोतीमा येन्ज्यीम् छ्येःबे अमकोल र्हङ्ब मुबल। 17 तलेपङ्सम् घन्ट गीःरीनो सहर्की चोत्ते य्हक्को सम्पतीमा नास् तबल मुब।” “जम्मनो दोङ्ग स्यङ्बलमा, दोङ्गरी ब्रबलमा, दोङ्गरी लक् स्य्हेङ्बलमा, समुन्द्ररी लक् स्य्हेङ्ज्यीम् फो न्हबलमा जम्मनो थारीङ् रप्ज्यी। 18 ओसेम् सहर् क्रोज्यीम् डोङ्बे मीङ्गु म्रङ्ज्यीम् थेङ्यीमा चोले पङ्ज्यीम् क्रीङ्ज्यी, ‘चु र्हङ्बे ङ्हच्छ्यङ् सहर् ल्हो-ल्हो खजुएनो अरेबल!’ 19 ओसेम् थेङ्यीमाचे र्हङ्की क्ररी दुलु युज्यीम् य्हक्को क्राज्यी ओसेम् दुख म्हन्दीज्यीम् चोले पङ्ज्यी, ‘अम्मइ! चु सहर्त गत्ते लोङ्बे ङ्हच्छ्यङ् दुख खज्यी। चु सहर्की धन-सम्पत्ती ग्यम्से दोङ्गइ न्याबोमा बरु तबल मुबल। तर घन्ट गीःरीनो थेल जम्मनो स्हेमा नास् तज्यी!’ 20 ओ स्वर्गरी मुबलमा, हुजु सहर् नास् तबल तज्यीम् तङो। पर्मेस्वर्की म्हीमा, प्रेरीत्मा ओसेम् अगम्बक्तमा जम्मनो तङो, तलेपङ्सम् थेचे एङ्यीमात ता लज्यी हुजुइ लागीरी पर्मेस्वर्चे थेत सजाय न्हङ्जेत्पल मुब।” 21 हुजुलीप्चे सक्तीसाली स्वर्गदुत् गीःचे ङ्हच्छ्यङ् र्हन्द र्हङ्बे युङ्ब गीः कोत्ज्यीम् चोले पङ्ज्यीम् समुन्द्ररी ख्लापीत्ज्यी, “चु ङ्हच्छ्यङ् सहर् बेबीलोन्तएनो चोलेनो बङ्लेनो ख्लपीत्स्ये मुब, ओसेम् देबेएनो दोःज्यीम् खेमेएनो म्रङ्खस्ये अरे। 22 ओसेम् बीना, पुली ओसेम् तुरही र्हप्पमातेङ् व्हइ कोबमाकी केत् देरे य्हङ्से खेमेएनो हुजुरी थेःस्ये अरे। ओसेम् थोचे थोइ लक् स्य्हेङ्बे स्यीप् मुबे म्हीमाएनो हुजुरी खेमेएनो यङ्स्ये अरे। र्हन्द स्यङ्बे केत्एनो हुजुरी खेमेएनो थेःम्यङ्स्ये अरे। 23 बत्तीइ य्हल् देरे य्हङ्से हुजुरी खेमेएनो म्रङ्स्ये अरे। ओसेम् छार् म्रीङ् र्हेम्बोइ केत्तएनो हुजुरी खेमेएनो थेःस्ये अरे। तलेपङ्सम् हुजु सहर्री छोङ् स्य्हेङ्बे म्हीमा जम्बुलीङ्की ङ्हच्छ्यङ्-ङ्हच्छ्यङ् म्हीमा मुबल, ओसेम् थेइ जादुमाचे जम्बुलीङ्की जम्मनो म्हीमात छल् स्य्हेङ्ज्यी। 24 हुजु सहर्टीनो अगम्बक्तमातेङ् पर्मेस्वर्की म्हीमा ओसेम् जम्बुलीङ्री सेत्लाबे जम्म म्हीमाइ का यङ्बल मुबल।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.