प्रकास 17 - पश्चिम तामाङय्हक्को अज्यबे बेस्य स्य्हेङ्बल 1 खोरे ङ्यीस् थोःबे स्वर्गदुत्मा ङ्यीस्न्हङ्री गीः ङइ रेइरी खज्यीम् पङ्ज्यी, “खोउ, ओसेम् पर्मेस्वर्चे हुजु य्हक्को अज्यबे बेस्य स्य्हेङ्बे अमकोलत खले सजाय न्हङ्जेत्स्ये मुब बी ङ एत ङोन्स्ये मुब। हुजु य्हक्को अज्यबे बेस्य स्य्हेङ्बे अमकोलमी य्हक्को स्योङ्माकी रेइरी स्य्हेङ्बे ङ्हच्छ्यङ् सहर् य्हीन्ब। 2 जम्बुलीङ्की ग्यल्बोमाचे हुजु अमकोलतेङ् ब्यभीचार् स्य्हेङ्बल मुब, ओसेम् जम्बुलीङ्की म्हीमा ज्यीचे ङ्य्हेःब र्हङ्ले थेतेङ् स्य्हेङ्बे ब्यभीचार् ग्यम्से ङ्य्हेःबल मुब।” 3 ओसेम् ङ पबीत्र आत्माचे प्लीङ्ज्यी, ओसेम् स्वर्गदुत्चे ङत उजाड-ग्लारी बोर्ज्यी। ङचे हुजुरी वल दुस्ट सेम्ज्येन्की जोरी क्रेत्ज्यीम् टीटीबे अमकोल गीः म्रङ्ज्यी। हुजु दुस्ट सेम्ज्येन्ल क्र ङ्यीस् ओसेम् रु च्यीः मुबल, ओसेम् पर्मेस्वर्त नीन्द स्य्हेङ्बे मीन्मा थेइ ल्हीः ल्हुङ्बनो ब्रीबल मुबल। 4 हुजु अमकोलचे खवल खपीङ्तेङ् सर्पे वल येन् येन्बल मुबल, ओसेम् थे म्हर्तेङ् रत्नमा ओसेम् मोतीमा येन्ज्यीम् छ्येःबल मुबल। थेचे यारी म्हर्की खोरे गीः थोःटीब मुबल। हुजु खोरेमी थेचे स्य्हेङ्बे नेइबे तम्मातेङ् ब्यभीचार्की असुद्द तम्माचे प्लीङ्बल मुबल। 5 ओसेम् थेइ ङ्होरी रहस्यइ मीन् गीः ब्रीबल मुबल, हुजुरी चोले ब्रीबल मुबल, “ङ्हच्छ्यङ् बेबीलोन्, जम्बुलीङ्की जम्मनो बेस्यामातेङ् नेइबे लक् स्य्हेङ्बलमाकी अम!” 6 ओसेम् हुजु अमकोलचे येसु ख्रीस्ट्की बारेरी साक्षी पीन्बल तज्यीम् म्हीमाचे सेत्पे पर्मेस्वर्की म्हीमाकी का थुङ्ज्यीम् ङ्य्हेबल ङचे म्रङ्ज्यी। हुजु अमकोलत म्रङ्ज्यीम् ङ य्हक्को अचम्म तज्यी। 7 ओसेम् हुजु स्वर्गदुत्चे ङत पङ्ज्यी, “ए तले अचम्म तबल? हुजु अमकोलतेङ् थेत नाबे क्र ङ्यीस्तेङ् रु च्यी मुबे दुस्ट सेम्ज्येन्की र्हस्य ङ एत स्येत्स्ये मुब। 8 एचे म्रङ्बे हुजु दुस्ट सेम्ज्येन् ङोन्ग्यम् सोम्बो मुबल, तर देरेम् अरे। हुजुमी दप्ज्यीम् दप्प अखम्बे नुप्पे व्हङ्न्हङ् ग्यम्से डोङ्खज्यीम् खेम पङ्लेनोइ लागीरी नास् तबरी य्हर्स्ये मुब। ओसेम् जम्बुलीङ् स्य्हेङ्जेत्पे बेलो य्हङ्से जीवन्की छ्येःरी मीन् अब्रीबे जम्बुलीङ्की म्हीमा हुजु दुस्ट सेम्ज्येन्त म्रङ्ज्यीम् अचम्म तस्ये मुब, तलेपङ्सम् हुजु ङोन्ग्यम् सोम्बो मुबल, देरेम् स्यीबल मुब, तर हुजु देबेएनो म्रङ्खस्ये मुब। 9 “चु तम् गोबरी ज्ञान् बुद्दी तोब। दुस्ट सेम्ज्येन्की क्र ङ्यीस्मी गङ् ङ्यीस् य्हीन्ब, हुजुरी हुजु अमकोल टीबल मुब। हुजुमामी ग्यल्बो ङ्यीस्एनो य्हीन्ब। 10 ग्यल्बो ङ्हमी स्यीजीन्ज्यी। गीःचेमी सासन् स्य्हेङ्टीबल मुब, ओसेम् गीःमी दवम् खथोस्ये मुब। थे खज्यीम् य्हम्की लागीरीकीनो सासन् स्य्हेङ्स्ये मुब। 11 हुजु दुस्ट सेम्ज्येन् ङोन्ग्यम् सोम्बो मुबल तर देरेम् अरे, हुजुमी आठौ ग्यल्बो य्हीन्ब। थेएनो ग्यल्बो ङ्यीस्मा र्हङ्बनो य्हीन्ब, ओसेम् थेएनो नास् तस्ये मुब। 12 “एचे म्रङ्बे हुजु रु च्यीमी ग्यल्बोमा च्यी य्हीन्ब, देरे सम्म थेङ्यीमाचे सासन् स्य्हेङ्म्यङ्बल अरे। थेङ्यीमाचे हुजु दुस्ट सेम्ज्येन्तेङ् बक्च्य घन्ट का-कर्कीनो सासन् स्य्हेङ्बे अधीकार् यङ्स्ये मुब। 13 थेङ्यीमाल उदेस्य गीःकीनो मुब, ओसेम् थेङ्यीमाचे र्हङ्की साक्तीतेङ् अधीकार् हुजु सेम्ज्येन्त पीन्स्ये मुब। 14 थेङ्यीमाचे थुमाकी बीरुद्दरी छेत्स्ये मुब, ओसेम् थुमा थेङ्यीमातेङ् डाजेत्स्ये मुब, तलेपङ्सम् थेङ् जम्मनो प्रभुमाकी प्रभु ओसेम् जम्मनो ग्यल्बोमाकी ग्यल्बो य्हीन्ब। थेङ्तेङ् बक्च्य मुबलमामी ङ्होत्जेत्पल, दम्जेत्पल ओसेम् बीस्वास् स्य्हेङ्स्यीनो टीबलमा य्हीन्ब।” 15 ओसेम् हुजु स्वर्गदुत्चे ङत पङ्ज्यी, “एचे म्रङ्बे हुजु बेस्या अमकोल टीबे स्योङ्मामी, य्हुल्मा, खलक्मा, जातीमा ओसेम् ग्योत्मा य्हीन्ब। 16 एचे म्रङ्बे हुजु रु ङ्यीस्तेङ् दुस्ट सेम्ज्येन्चे हुजु बेस्या अमकोलत अखोस्ये मुब। ओसेम् थेङ्यीमाचे थेतेङ् मुबे जम्मनो स्हेःमा ब्येन्ज्यीम् थेत क्लीङ्दो स्य्हेङ्स्ये मुब। थेङ्यीमाचे थेइ स्य चस्ये मुब, ओसेम् थेङ्यीमाचे अचपलतमी मेरी ख्रङ्लास्ये मुब। 17 तलेपङ्सम् पर्मेस्वर्चे थेङ्चे थुः लजेत्प अनुसार्की लक् पुरा स्य्हेङ्बे सेम् थेङ्यीमात न्हङ्जेत्पल मुब। ओसेम् पर्मेस्वर्चे सुङ्जेत्पे फ्रोइ टोप् अतगदेसम्म थेङ्यीमाचे सेम् गीः तज्यीम् सासन् स्य्हेङ्बे र्हङ्की सक्तीतेङ् अधीकार् हुजु दुस्ट सेम्ज्येन्त पीन्स्ये मुब। 18 एचे म्रङ्बे बेस्य अमकोलमी हुजु ङ्हच्छ्यङ् सहर् य्हीन्ब। हुजुचे जम्बुलीङ्की ग्यल्बोमाकी जोरी सासन् स्य्हेङ्ब।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.