प्रकास 16 - पश्चिम तामाङपर्मेस्वर्की बोमोइ खोरे ङ्यीस् 1 हुजु लीप्चे पर्मेस्वर्की दीम् ग्यम्से डोङ्बे ङ्हच्छ्यङ् केत् गीःचे हुजु स्वर्गदुत्मा ङ्यीस्त चोले पङ्टीबल ङचे थेःज्यी, “एङ्यीमा ङ्यीउ, ओसेम् हुजु खोरे ङ्यीस् ग्यम्से पर्मेस्वर्की बोमो जम्बुलीङ्री तेःपीतो।” 2 ओसेम् ङोन्ग्यम्की स्वर्गदुत् ङ्यीज्यीम् र्हङ्की खोरेचे पर्मेस्वर्की बोमो जम्बुलीङ्री तेःलाज्यी, ओसेम् हुजु दुस्ट सेम्ज्येन्की चीनो ल्हइतीबमालतेङ् हुजुइ ख्लत तेन्बे जम्मा म्हीमाकी ल्हीःरी य्हक्को छ्योइबतेङ् नेइबे पोर्मा डोङ्ज्यी। 3 हुजु लीप्चे दोस्रो स्वर्गदुत्चे र्हङ्की खोरेचे पर्मेस्वर्की बोमो समुन्द्ररी तेःलाज्यी, ओसेम् समुन्द्रइ यी स्यीबे म्हीइ का र्हङ्ब तज्यी। ओसेम् समुन्द्ररी मुबे जम्मनो जन्तुमा स्यीज्यी। 4 ओसेम् तेस्रो स्वर्गदुत्चे र्हङ्की खोरेचे पर्मेस्वर्की बोमो स्योङ्मातेङ् यीइ म्रुःमारी तेःलाज्यी, ओसेम् हुजु जम्मनो का तज्यी। 5 ओसेम् जम्मनो यीइ जोरी अधीकार् मुबे स्वर्गदुत्चे चोले पङ्टीबल ङचे थेःज्यी, “ओ पबीत्र पर्मेस्वर्, थेङ् देरे मुब ओसेम् ङोन्ग्यम्एनो मुबल, थेङ्चे ठीक् न्याय स्य्हेङ्जेत्प, तलेपङ्सम् चोलेनो थेङ्चे न्याय स्य्हेङ्जेत्पल मुब। 6 तलेपङ्सम् थेङ्यीमाचे थेङ्की म्हीमातेङ् अगम्बक्तमाकी काः य्हर्नलज्यी, होत्तज्यीम् थेङ्चे थेङ्यीमात का थुङ्पुङ्जेत्पल मुब। हुजु थेङ्यीमाचे यङ्नो थोःबे सजाय य्हीन्ब।” 7 हुजु लीप्चे ङचे बेदी ग्यम्से चोले पङ्टीबे केत् गीः थेःज्यी, “ओ, गोदोब्न्हङ्की सक्तीसाली प्रभु पर्मेस्वर्, थेङ्की न्याय ठीक्तेङ् देमेन् मुब।” 8 हुजु लीप्चे चौथो स्वर्गदुत्चे र्हङ्की खोरेचे पर्मेस्वर्की बोमो दीनीइ जोरी तेःलाज्यी, ओसेम् दीनी ग्यम्से डोङ्बे मेचे म्हीमात क्रोन लपुङ्जेत्ज्यी। 9 दीनीइ मेचे म्हीमात य्हक्को क्रोज्यी, ओसेम् चोतेबे बीपत्तीमा नोम्खजेत्प खम्बे पर्मेस्वर्की छेन्त थेङ्यीमाचे केम्लङ् पीन्ज्यी। तर थेङ्यीमाचे पस्चताप् अस्य्हेङ् ओसेम् थेङ्त महीमाएनो अपीन्। 10 ओसेम् पाचौ स्वर्गदुत्चे र्हङ्की खोरेचे पर्मेस्वर्की बोमोत हुजु दुस्ट सेम्ज्येन्की ठीइ जोरी तेःलाज्यी, ओसेम् थेइ य्हुल्री म्हुन्दुङ् तज्यी, ओसेम् दुखमा तबल तज्यीम् म्हीमाचे र्हङ्-र्हङ्की ले ङ्येत्ज्यी। 11 थेङ्यीमाकी दुखमातेङ् पोर्माचे लज्यीम् थेङ्यीमाचे स्वर्गइ पर्मेस्वर्त केम्लङ् पीन्ज्यी। तर थेङ्यीमाचे र्हङ्की पाप् ग्यम्से पस्चताप् अस्य्हेङ्। 12 हुजु लीप्चे छैटौ स्वर्गदुत्चे र्हङ्की खोरेचे पर्मेस्वर्की बोमो युफ्रेटीस् पङ्बे ङ्हच्छ्यङ् स्योङ्की जोरी तेःलाज्यी, ओसेम् स्यर्चे खबे ग्यल्बोमाकी लागीरी ग्यम् टोप् तखइ पङज्यीम् हुजु ङ्हच्छ्यङ् स्योङ्की यी खर्य्हर्ज्यी। 13 ओसेम् हुजु सङ्मोइ सुङ् ग्यम्से, ओसेम् हुजु दुस्ट सेम्ज्येन्की सुङ् ग्यम्से ओसेम् भ्यु पङ्बे अगम्बक्तइ सुङ् ग्यम्से बल्ब र्हङ्ब म्रङ्बे असुद्द आत्मामा सोम् डोङ्बल ङचे म्रङ्ज्यी। 14 हुजुमा अचम्मइ चीनोमा ङोन्बे म्हङ्माइ आत्मामा य्हीन्ब। गोदोब्न्हङ्की सक्तीसाली पर्मेस्वर्चे र्हङ्की सत्तुर्मात सजाय न्हङ्जेत्पे दीन्री थेङ्तेङ् छेत्परी जम्बुलीङ्की जम्मनो ग्यल्बोमात र्हुब् स्य्हेङ्बरी हुजु आत्मामा सोम् ङ्यीब। 15 प्रभुचे सुङ्जेत्प, “च्यागो, ङ य्हो खब र्हङ्ले खल्चेएनो अछोर्नले खस्ये मुब। चोङ्ले टीबलतेङ् र्हङ्की येन् जोगइतीज्यीम् थेन्बे म्ही मोलम् यङ्बे म्ही य्हीन्ब। चोले हुजु म्ही क्लीङ्दो ब्रअथो, ओसेम् म्हीमाकी ङोन्ग्यम् पेत्अथो।” 16 ओसेम् हीब्रु ग्योत्री आर-मागेड्डोन पङ्बे ग्लारी हुजु म्हङ्माचे ग्यल्बोमात र्हुब् लज्यी। 17 हुजु लीप्चे सातौ स्वर्गदुत्चे र्हङ्की खोरेचे पर्मेस्वर्की बोमो लाबोरी तेःलाज्यी, ओसेम् पर्मेस्वर्की दीम्की ठी ग्यम्से चोले पङ्बे ङ्हच्छ्यङ् केत् गीः डोङ्ज्यी, “देरेम् बुत्ज्यी!” 18 ओसेम् तीप्लीक् फ्लीक्ज्यी, लाबलुङ् खबे केत् थेःज्यी, मु गरुङ्बे केत्मातेङ् ङ्हच्छ्यङ् सङ्गुल् खज्यी। होतेबे ङ्हच्छ्यङ् सङ्गुल्मी जम्बुलीङ्री म्हीमात स्य्हेङ्जेत्प य्हङ्से खेमेएनो खबल अरेबल। 19 ओसेम् ङ्हच्छ्यङ् सहर् बेबीलोन् बो सोम्ले थीज्यी, ओसेम् जम्मनो य्हुल्माकी सहर्मा नास् तज्यी। ओसेम् पर्मेस्वर्चे हुजु ङ्हच्छ्यङ् सहर् बेबीलोन्की पाप्त व्हल् लजेत्ज्यी, ओसेम् थेङ्की य्हक्को लोङ्बे बोमो हुजु सहर्री साजेत्ज्यी। 20 ओसेम् जम्मनो टापुमातेङ् गङ्मा म्हय्हर्ज्यी। 21 ओसेम् कीलो खल् ङ्य्ही सम्मइ सेरे मु ग्यम्से म्हीमाकी जोरी तइब तीप्ज्यी। ओसेम् सेरे युबे ङ्हच्छ्यङ् बीपत्तीचे लज्यीम् म्हीमाचे पर्मेस्वर्त केम्लङ् पीन्ब तीप्ज्यी, तलेपङ्सम् हुजु बीपत्ती य्हक्को लोङ्बल मुबल। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.