प्रकास 15 - पश्चिम तामाङस्वर्गदुत्मा ङ्यीस्तेङ् ज्युःकी बीपत्तीमा ङ्यीस् 1 हुजुलीप्चे ङचे स्वर्गरी ल्हो-ल्हो ङ्हच्छ्यङ्तेङ् अचम्मइ चीनो गीः म्रङ्ज्यी। स्वर्गदुत्मा ङ्यीस्चे बीपत्तीमा का-कर् थोःबल मुबल। हुजु ज्युःकी बीपत्तीमा बुत्पतेङ् पर्मेस्वर्की बोमोएनो स्यीस्ये मुब। 2 हुजु लीप्चे ङचे मेतेङ् सीस छ्योप्पे समुन्द्र र्हङ्ब म्रङ्ज्यी। हुजुरी दुस्ट सेम्ज्येन्तेङ् थेइ ख्ल ओसेम् थेइ मीन्की सङ्ख्याइ जोरी डाबलमा जम्मतनो ङचे म्रङ्ज्यी। पर्मेस्वर्चे थेङ्यीमात न्हङ्जेत्पे बीनामा यारी थोःज्यीम् थेङ्यीमा हुजु समुन्द्रइ यरी रप्टीबल मुबल। 3 थेङ्यीमाचे चोले पर्मेस्वर्की योक्पो मोसाइ व्हइतेङ् थुमाकी व्हइ कोटीब मुबल, “प्रभु पर्मेस्वर् गोदोब्न्हङ्की सक्तीसाली पर्मेस्वर्, थेङ्की लक् य्हक्को ङ्हच्छ्यङ्तेङ् अचम्मल मुब। जाती-जातीमाकी ग्यल्बो, थेङ्की ग्यम्मा धार्मीक्तेङ् देमेन् मुब। 4 ओ परमप्रभु, थेङ्तेङ् अलोङ्बल खल मुब? ओसेम् थेङ्की छेन्की महीमा अस्य्हेङ्बल खल मुब? तलेपङ्सम् थेङ् गीकीनो पबीत्र मुब। जम्मनो जातीमा खज्यीम् थेङ्त तेन्स्ये मुब। तलेपङ्सम् थेङ्की धार्मीक् लक्मा जम्मचेनो म्रङ्बल मुब।” 5 हुजु लीप्चे ङचे स्वर्गरी मुबे पर्मेस्वर्की दीम् ठोङ्बल ओसेम् हुजुन्हङ्की पर्मेस्वर्की ज्यीद दीम्एनो म्रङ्ज्यी। 6 ओसेम् बीपत्ती ङ्यीस् थोःबे स्वर्गदुत्मा ङ्यीस् हुजु पर्मेस्वर्की दीम् ग्यम्से डोङ्ज्यी। थेङ्यीमाचे गत्तेएनो ख्रीदी अरेबे सर्पे तर् येन् येन्बल मुबल, ओसेम् कुत्तोरी म्हर्की फीत्त खीःबल मुबल। 7 हुजु लीप्चे हुजु सोम्बो सेम्ज्येन् ब्ली न्हङ्री गीःचे म्हर्की खोरे ङ्यीस् हुजु स्वर्गदुत्मा ङ्यीस्त काकर् पीन्ज्यी। हुजु खोरे ङ्यीस्री खेमपङ्लेनो सोस्यीनो टीजेत्पे पर्मेस्वर्की बोमो मुबल। 8 ओसेम् पर्मेस्वर्की महीमातेङ् थेङ्की सक्ती ग्यम्से डोङ्बे मीङ्गुचे पर्मेस्वर्की दीम् प्लीङ्ज्यी, ओसेम् हुजु स्वर्गदुत् ङ्यीस्की बीपत्ती ङ्यीस् अबेगदे खलएनो पर्मेस्वर्की दीम् न्हङ् वङ्ब अखम्। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.