प्रकास 14 - पश्चिम तामाङथुमातेङ् लाख् गीः स्यी चवालीस हजार 1 हुजुलीप्चे ङचे सीयोन गङ्री थुमा रप्जेत्टीबल म्रङ्ज्यी। थेङ्तेङ् बक्च्य थेङ्की छेन्तेङ् थेङ्की अपइ छेन् र्हङ्-र्हङ्की ङ्होरी ब्रीबे लाख् गीः स्यी चवालीस् हजार म्हीमा मुबल। 2 ओसेम् ङचे छ्याङ्गचे यी तइब र्हङ्बतेङ् मु गुरुबल र्हङ्बे ङ्हच्छ्यङ् केत् गीः स्वर्ग ग्यम्से युबल थेःज्यी। हुजु केत् बीना र्हप्पलमाचे य्हक्को बीनामा र्हप्पल र्हङ्ब थेःब मुबल। 3 हुजु लाख गीः स्यी चवालीस् हजार् म्हीमामी पर्मेस्वर्की ठी ओसेम् हुजु सोम्बो सेम्ज्येन्मा ब्ली ओसेम् एल्डर्माकी ङोन्री रप्ज्यीम् छार् व्हइ गीः कोटीब मुबल। हुजु व्हइमी थेङ्यीमाचेकीनो लोप्म्यङ्बल मुबल, तलेपङ्सम् पर्मेस्वर्चे थेङ्यीमात जम्बुलीङ् ग्यम्से सइ फाज्यीम् फेःपीन्जेत्पल मुबल। 4 थेङ्यीमा अमकोलमातेङ् अन्हुब मुबल, ओसेम् कङ्य अपकोलमा मुबल। थेङ्यीमा थुमाकी लीप्चेकीनो ब्रबल मुबल। थेङ्यीमात पर्मेस्वर्चे जम्बुलीङ्की म्हीमा ग्यम्से सइ फाजेत्ज्यीम् फेःपीन्जेत्पल मुबल, ओसेम् थेङ्यीमा पर्मेस्वर्तेङ् थुमाकी लागीरी गोदोब्न्हङ् ङोन्ग्यम् पीन्बे भेटी मुबल। 5 थेङ्यीमाचे तेएनो भ्यु अपङ्, थेङ्यीमा तइ दोस्एनो अरेबल मुब। स्वर्गदुत्मा सोम् 6 हुजु लीप्चे ङचे मुरी फ्यङ्टीबे ल्हो-ल्हो स्वर्गदुत् गीः म्रङ्ज्यी। थेतेङ् जम्बुलीङ्री मुबे जम्मनो जातीमा, खलक्, ग्योत् ओसेम् जम्मनो य्हुल्त स्येत्परी खेमेएनो अपोबे ज्यबे सम्तर् मुबल। 7 थेचे ङ्हच्छ्यङ् केत् तेत्ज्यीम् पङ्ज्यी, “पर्मेस्वर्तेङ् लोङो, ओसेम् थेङ्त महीमा पीनो। तलेपङ्सम् थेङ्चे न्याय स्य्हेङ्बे बेलो खबल मुब। स्वर्ग, जम्बुलीङ्, समुद्र ओसेम् यीइ म्रुःमा स्य्हेङ्जेत्पे पर्मेस्वर्त तेनो।” 8 ओसेम् ल्हो-ल्हो स्वर्गदुत गीःएनो हुजु ङोन्ग्यम्की स्वर्गदुत्की लीप्चे चोले पङ्ज्यीम् खज्यी, “ङ्हच्छ्यङ् सहर् बेबीलोन् नास् तज्यी! थेचे जम्बुलीङ्की जम्मनो जातीमात थेइ ब्यभीचार्की खोरे ग्यम्से थुङ्पुङ्ज्यीम् थेङ्यीमात ङ्य्हेन लज्यी।” 9 हुजु स्वर्गदुत् ङ्य्हीकी लीप्चे ल्हो-ल्हो स्वर्गदुत् गीः ङ्हच्छ्यङ् केत् तेत्ज्यीम् चोले पङ्ज्यीम् खज्यी, “खजु म्हीचे पङ्लेनो हुजु पहीलो दुस्ट सेम्ज्येन्तेङ् हुजुइ ख्लत तेन्ज्यी ओसेम् ङ्होरी वुइ यारी खजुरी पङ्लेनो थेइ चीनो ल्हइतीपुङ्ज्यी पङ्सम्, 10 थेचेएनो पर्मेस्वर्की ङ्हच्छ्यङ् बोमोइ खोरे ग्यम्से थुङ्ज्यीम् ङ्हच्छ्यङ् सजाय नाथोःस्ये मुब। थेत पबीत्र स्वर्गदुत्मातेङ् थुमाकी ङोन्री मेतेङ् गन्धक्री सजाय पीन्स्ये मुब। 11 थेङ्यीमात पीन्बे सजायकी मेतेङ् गन्धक्की मीङ्गु खेमपङ्लेनो तोर् रेस्यीनो टीस्ये मुब। थेङ्यीमा हुजुमानो य्हीन्ब, खल्चे हुजु दुस्ट सेम्ज्येन्तेङ् हुजुइ ख्लत तेन्ब, ओसेम् हुजुइ मीन्री चीनो ल्हइतीपुङ्ब। थेङ्यीमाचे दीन् म्हुन् खेम पङ्लेनो दुख नास्ये मुब।” 12 पर्मेस्वर्चे कुल्जेत्पे तम् ङ्येन्ज्यीम् ब्रबलमा ओसेम् येसुत बीस्वास् स्य्हेङ्बे पर्मेस्वर्की म्हीमातेङ् नापे सक्ती मुथोब। 13 ओसेम् स्वर्ग ग्यम्से चोले पङ्बे केत् गीः ङचे थेःज्यी, “चु तम् ब्रीउ, देरे य्हङ्से प्रभुरी बीस्वास् लज्यीम् स्यीबलमा मोलम् यङ्बलमा य्हीन्ब।” पबीत्र आत्माचे सुङ्ब, “य्हीन्ब, थेङ्यीमाचे र्हङ्-र्हङ्चे य्हक्को दुखले लक् स्य्हेङ्ब ग्यम्से दुःब न्हस्ये मुब, तलेपङ्सम् थेङ्यीमाचे स्य्हेङ्बे लक्माकी बक्सीस् थेङ्यीमात न्हङ्स्ये मुब।” जम्बुलीङ्की अन्न दुत्पे बेलो 14 हुजु लीप्चे ङचे च्याज्यी, ओसेम् तर् मुक्पतेङ् हुजु मुक्पइ जोरी म्हीइ ज र्हङ्ब गीः स्य्हुजेत्टीपल म्रङ्ज्यी। थेङ्की क्ररी म्हर्की क्रेःकी ओसेम् फ्यारी य्हक्को छ्यर्पे व्हरे गीः मुबल। 15 ओसेम् ल्हो-ल्हो स्वर्गदुत् गीः पर्मेस्वर्की दीम् ग्यम्से डोङ्ज्यीम् मुक्परी स्य्हुजेत्पलत ङ्हच्छ्यङ् केत् तेत्ज्यीम् पङ्ज्यी, “थेङ्की व्हरे नोम्जेतो, ओसेम् अन्न ब्रेःजेतो, तलेपङ्सम् अन्न ब्रेःबे बेलो तज्यीन्बल मुब, तलेपङ्सम् जम्बुलीङ्की अन्न मीन्ज्यीन्बल मुब।” 16 चोले मुक्पजोरी स्य्हुजेत्पलचे र्हङ्की व्हरे जम्बुलीङ्की जोरी कोल्जेत्ज्यी, ओसेम् जम्बुलीङ्की अन्न ब्रेःजेत्ज्यी। 17 हुजु लीप्चे स्वर्गरी मुबे पर्मेस्वर्की दीम् ग्यम्से ल्हो-ल्हो स्वर्गदुत् गीः डोङ्ज्यी। थेतेङ्एनो छ्यर्पे व्हरे गीः मुबल। 18 ओसेम् मेइ जोरी अधीकार् मुबे ल्हो-ल्हो स्वर्गदुत् गीः बेदी ग्यम्से खज्यी। थेचे व्हरे थोःबे स्वर्गदुत्त ङ्हच्छ्यङ् केत् तेत्ज्यीम् चोले पङ्ज्यी, “एइ छ्यर्पे व्हरेचे अङ्गुर्की म्रङ्की अङ्गुर्मा ब्रेःको, तलेपङ्सम् अङ्गुर्मा मीन्ज्यीन्बल मुब।” 19 ओसेम् हुजु स्वर्गदुत्चे र्हङ्की व्हरे कोल्ज्यीम् अङ्गुर्मा ब्रेःज्यीम् तीच्छङ् र्हुब् लज्यी। ओसेम् पर्मेस्वर्की बोमोइ ङ्हच्छ्यङ् कोल्न्हङ् पेर्परी ख्लापीत्ज्यी। 20 सहर्की फीर्च्योर् मुबे कोल्री हुजु अङ्गुर्मात पेर्बल मुबल, ओसेम् हुजु ग्यम्से तीन् सय कीलोमीटर् र्हीङ्बतेङ् तइ खारीसम्म नुप्पे काकी स्योङ् य्हर्ज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.