प्रकास 13 - पश्चिम तामाङसमुन्द्र ग्यम्से डोङ्खबे दुस्ट सेम्ज्येन् 1 हुजुलीप्चे समुन्द्र ग्यम्से दुस्ट सेम्ज्येन् गीः डोङ्खटीबल ङचे म्रङ्ज्यी। हुजुल रु च्यीः ओसेम् क्र ङ्यीस् मुबल, ओसेम् रुमा जम्मरी ग्यल्बोचे कुःब र्हङ्बे क्रेःकी कुःबल मुबल, ओसेम् क्रमा जम्मरीनो पर्मेस्वर्त नीन्द स्य्हेङ्बे मीन् मुबल। 2 ङचे म्रङ्बे हुजु दुस्ट सेम्ज्येन् गुन्ज्यी र्हङ्ब मुबल, हुजुल कङ्मा तोवम्ल र्हङ्ब मुबल, ओसेम् सुङ्मी ताःल र्हङ्ब मुबल। हुजु दुस्ट सेम्न्ज्येन्त सङ्मोचे र्हङ्की सक्ती, र्हङ्की ठी ओसेम् र्हङ्की ङ्हच्छ्यङ् अधीकार् पीन्ज्यी। 3 थेइ क्रमान्हङ्री गीःरीमी स्यील गदेनो तबे म्हग ङ्यीबल र्हङ्ब म्रङ्ब मुबल, तर थेइ हुजु म्हग फेन्ज्यी। ओसेम् जम्बुलीङ्की जम्मनो म्हीमा तेङेन् तज्यी ओसेम् हुजु दुस्ट सेम्ज्येन्की तम् ङ्येन्ज्यीम् ब्रज्यी। 4 ओसेम् हुजु सङ्मोचे र्हङ्की अधीकार् हुजु दुस्ट सेम्ज्येन्त पीन्बल तज्यीम् म्हीमाचे सङ्मोत तेन्ज्यी, ओसेम् थेङ्यीमाचे हुजु दुस्ट सेम्ज्येन्तएनो चोले पङ्ज्यीम् तेन्ज्यी, “चु दुस्ट सेम्ज्येन् र्हङ्ब ल्हो-ल्हो खल मुब? थेइ बीरुद्दरी खल्चे छेत्प खम्ब?” 5 ओसेम् हुजु दुस्ट सेम्ज्येन्त र्हङ्की घमन्डइ तम् पङ्ज्यीम् पर्मेस्वर्त नीन्द स्य्हेङ्पुङ्ज्यी, ओसेम् थेत सोम्तीङ् स्यी ल डुः सम्म सासन् स्य्हेङ्बे अधीकार पीन्ज्यी। 6 थेचे पर्मेस्वर्तेङ् पर्मेस्वर्की छेन्त, थेङ् स्य्हुजेत्पे ग्लात, ओसेम् स्वर्गरी टीबलमा जम्मइ बीरुद्दरी नीन्द स्य्हेङ्ब तीप्ज्यी। 7 ओसेम् हुजु दुस्ट सेम्ज्येन्त पर्मेस्वर्की म्हीमातेङ् छेत्ज्यीम् थेङ्यीमातेङ् डाबे अधीकार् पीन्बल मुबल। थेत जम्मनो खलक्मा, य्हुल्मा, ग्योत्मा ओसेम् जातीमाकी जोरी सासन् स्य्हेङ्बरी अधीकार् पीन्बल मुबल। 8 सेत्लाबे थुमाइ जीवन्की छ्येःरी जम्बुलीङ् स्य्हेङ्ब बीम ङोन्ग्यम्नो मीन् अब्रीबे जम्बुलीङ्की म्हीमा जम्मचेनो हुजु दुस्ट सेम्ज्येन्त तेन्स्ये मुब। 9 खल्ल न्हबीङ् मुब थेचे थ्येःखइ! 10 खल पङ्लेनो जेल्री च्युप्थोस्ये मुसम् थेत जेल्रीनो च्युप्स्ये मुब, ओसेम् खल पङ्लेनो तरवार्चे सेत्थोस्ये मुसम् तरवार्चेनो सेत्स्ये मुब। चुइ लागीरी पर्मेस्वर्की म्हीमातेङ् नाबे सक्तीतेङ् बीस्वास् मुथोःब। स ग्यम्से डोङ्बे दुस्ट सेम्ज्येन् 11 हुजु लीप्चे ङचे स ग्यम्से डोङ्खटीबे ल्हो-ल्हो दुस्ट सेम्ज्येन् गीः म्रङ्ज्यी। थेल थुमाल र्हङ्ले रु ङ्य्ही मुबल, ओसेम् हुजुचे सङ्मोचे र्हङ्ले तम् पङ्ब मुबल। 12 हुजु दोस्रो सेम्ज्येन्चे पहीलो दुस्ट सेम्ज्येन्की जम्मनो अधीकार् कोल्ज्यीम् हुजु पहीलो दुस्ट सेम्ज्येन्की लागीरीनो लक् स्य्हेङ्ज्यी। ओसेम् दोस्रो सेम्ज्येन्चे हुजु स्यील गदे तबे म्हग फेन्बे पहीलो दुस्ट सेम्ज्येन्त तेन्बरी जम्बुलीङ्की जम्मनो म्हीमात कर् लज्यी। 13 हुजु दोस्रो दुस्ट सेम्ज्येन्चे ङ्हच्छ्यङ् अचम्मइ चीनोमा ङोन्ज्यी। म्हीमाचे म्रङ्नलेनो थेचे मु ग्यम्से सरी मे तइनलज्यी। 14 दोस्रो दुस्ट सेम्ज्येन्त हुजु पहीलो दुस्ट सेम्ज्येन्की लागीरी लक् स्य्हेङ्बरी अचम्मइ चीनोमा ङोन्पुङ्ज्यी। हुजु चीनोमा ग्यम्सेनो दोस्रो दुस्ट सेम्ज्येन्चे जम्बुलीङ्की म्हीमात लुज्यी। ओसेम् तर्वाल्चे थाज्यीम् स्यीयम्ब गदेनो तज्यीम्एनो सोबे हुजु पहीलो दुस्ट सेम्ज्येन्त स्य्हेस पीन्बरी हुजु पहीलो दुस्ट सेम्ज्येन्की ख्ल स्य्हेङो पङ्ज्यीम् दोस्रो दुस्ट सेम्ज्येन्चे जम्बुलीङ्की म्हीमात हुकुम् पीन्ज्यी। 15 हुजु पहीलो दुस्ट सेम्ज्येन्की ख्लचे तम् पङ्खइ, ओसेम् हुजु ख्लत अतेन्बलमात सेत्लाखइ पङ्ज्यीम् हुजु ख्लत बुः जङ्पीन्बे सक्ती हुजु दोस्रो दुस्ट सेम्ज्येन्त पीन्बल मुबल। 16 ओसेम् दोस्रो सेम्ज्येन्चे ज्यीदतेङ् ङ्हच्छ्यङ्, बरुतेङ् प्रङ्न, बानातेङ् बान अय्हीन्बमा जम्मतनो थेङ्यीमाकी केत् यारी वुइ ङ्होरी तारी पङ्लेनो चीनो ल्हइदीपुङ्ज्यी। 17 हुजु चीनो अरेबलमा खल्चेएनो ग्लुब चुङ्ब स्य्हेङ् अम्यङ्बल तज्यी। हुजु चीनोमी पहीलो दुस्ट सेम्ज्येन्की मीन् वुइ थेइ मीन्की सङ्ख्या य्हीन्ब। 18 चु गोबरी बुद्दी तोःब, खल्ल गोब खम्बे सक्ती मुज्यी, थेचे हुजु दुस्ट सेम्ज्येन्की सङ्ख्या गोखइ, तलेपङ्सम् हुजु सङ्ख्याचे अपकोल गीःकी मीन्त ङोन्ब, ओसेम् हुजुइ सङ्ख्यामी ६६६ य्हीन्ब। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.