प्रकास 12 - पश्चिम तामाङअमकोलतेङ् सङ्मो 1 हुजु लीप्चे स्वर्गरी तेङ्येन्की चीनो गीः म्रङ्खज्यी। ङचे अमकोल गीःचे दीनी र्हङ्ले सर्बे येन् येन्बलतेङ् थेइ कङ् थीङ् दुङ्री लनी ओसेम् क्ररी सार्मा चुङ् ङ्य्ही मुबे क्रेःकी कुःबल म्रङ्ज्यी। 2 थेइ फोरी कोल मुबल, ओसेम् कोल न्हबे ल्हङ्दु खबल तज्यीम् नज्यीम् क्राटीब मुबल। 3 हुजु लीप्चे स्वर्गरी ल्होल्होएनो अचम्मइ चीनो गीः म्रङ्खज्यी, क्र ङ्यीस्तेङ् रु च्यी मुबे ङ्हच्छ्यङ् वल सङ्मो गीः म्रङ्खज्यी। हुजु सङ्मोइ क्र ङ्यीस्रीनो क्रेःकी काकर् कुःबल मुबल। 4 हुजु सङ्मोइ मेःचे स्वर्गइ सार्माकी बो सोम्न्हङ्री बो गीःत फ्याज्यीम् जम्बुलीङ्री ख्लापीत्ज्यी। ओसेम् कोल न्हब साच्चेनो चबरी हुजु सङ्मो अमकोलइ ङोन्री रप्ज्यी। 5 हुजु अमकोलचे जम्मनो जातीमात फइकी बेर्कचे सासन् स्य्हेङ्स्येकी ज गीः न्हज्यी। न्हब साच्चेनो थेइ जत कोत्ज्यीम् पर्मेस्वर्ज ओसेम् थेङ्की ठीरी नोम्ज्यी। 6 ओसेम् हुजु अमकोलमी उजाड्-ग्लाक्योर् छ्योङ्य्हर्ज्यी। पर्मेस्वर्चे हजार गीः स्यी दुइ सय साठी दीन्सम्म थेत स्य्हप्तो लबरी हुजुरी ग्ला टोप् लजेत्पल मुबल। 7 हुजु लीप्चे स्वर्गरी छेत्प तीप्ज्यी। मीखाएल् स्वर्गदुत्तेङ् थेइ ल्हो-ल्हो स्वर्गदुत्माचे हुजु सङ्मोइ बीरुद्दरी छेत्ज्यी, ओसेम् हुजु सङ्मोतेङ् सङ्मोइ दुत्माचेएनो मीखाइलतेङ् थेइ स्वर्गदुत्माकी बीरुद्दरी छेत्ज्यी। 8 तर सङ्मोतेङ् थेइ दुत्मा ब्रेःज्यी, ओसेम् थेङ्यीमात स्वर्गरी टीअबुङ्। 9 हुजु ङ्हच्छ्यङ् सङ्मोमी दङ्बोइ पुख्री य्हीन्ब, थेत सैतान्तेङ् म्हङ् पङ्ब। थेचे जम्बुलीङ्की जम्मनो म्हीमात लुटीबल मुबल। हुजुत थेइ दुत्मातेङ् बक्च्य स्वर्ग ग्यम्से जम्बुलीङ्री ख्लापीत्पल मुब। 10 हुजु लीप्चे ङचे स्वर्गरी चोले पङ्टीबे ङ्हच्छ्यङ् केत् थेःज्यी, “देरेम् ङ्य्हङ्की पर्मेस्वर्चे मुक्ती न्हङ्जेत्प, थेङ्चे र्हङ्की सासन् स्य्हेङ्बे सक्ती ङोन्जेत्पल मुब। थेङ्की मुक्ती न्हङ्बे ख्रीस्ट्की अधीकार् खबल मुब। तलेपङ्सम् ङ्य्हङ्की बीस्वासी र्होमात दीन्म्हुन्नो पर्मेस्वर्की ङोन्री दोस् पीन्बे, सैतान् स्वर्ग ग्यम्से ख्लापीत्पल मुब। 11 ङ्य्हङ्की बीस्वासी र्होमाचे थुमाकी कातेङ् थेङ्यीमाचे स्येत्पे देमेन्की गबाहीचे लज्यीम् सैतान्त डाबल मुब, ओसेम् थेङ्यीमा र्हङ् स्यीबरीएनो टोप् तबल मुबल। 12 होत्तज्यीम् स्वर्गतेङ् स्वर्गरी मुबलमा जम्मनो तङो! तर जम्बुलीङ्तेङ् समुन्द्ररी मुबलमात धीक्कार! तलेपङ्सम् र्हङ्की बेलो चेक्कीनो मुब बी स्येःज्यीम् सैतान् य्हक्को बोमो रप्ज्यीम् एङ्यीमाज दुङ्री युबल मुब।” 13 ओसेम् हुजु सङ्मोचे र्हङ् दुङ्री जम्बुलीङ्री ख्लापीत्पल स्येःज्यीम् हुजु ज न्हबे अमकोलत ल्हब्ज्यी। 14 तर हुजु अमकोलत सङ्मो ग्यम्से थर्खइ पङ्ज्यीम् उजाड-ग्लारी फ्यङ्ज्यीम् ङ्यीबे लागीरी जेप्प य्हेत्की ब्यप् ङ्य्ही पीन्बल मुबल। हुजु उजाड-ग्ला सोम्तीङ् स्यी ल डु सम्म हुजु अमकोलत स्य्हप्तो स्य्हेङ्बरी टोप् लबल मुबल। 15 हुजु अमकोलत भल्चे नाबोर्खइ पङ्ज्यीम् हुजु सङ्मोचे र्हङ्की सुङ् ग्यम्से स्योङ् गदे थेबे यी तेत्ज्यी। 16 तर हुजु अमकोलत भल्चे अनाबोर्खइ बी र्हो लबरी जम्बुलीङ्चे र्हङ्की सुङ् आ लज्यीम् हुजु सङ्मोइ सुङ् ग्यम्से डोङ्बे यीत ग्लोङ्ज्यी। 17 ओसेम् हुजु सङ्मो हुजु अमकोलतेङ् झेन् य्हक्को बोमो रप्ज्यी, ओसेम् हुजु सङ्मो अमकोलइ ल्हो-ल्हो कोलमातेङ् छेत्परी य्हर्ज्यी, थेङ्यीमा पर्मेस्वर्की अर्तीमा ङ्येन्ज्यीम् ब्रबमा ओसेम् येसुचे लोप्जेत्पे तम्त बीस्वास् स्य्हेङ्बलमा य्हीन्ब। 18 ओसेम् हुजु सङ्मो समुन्द्रइ यरी रप्ज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.