प्रकास 11 - पश्चिम तामाङसाक्षीमा ङ्य्ही 1 हुजु लीप्चे दप्परी कोल्बे बेर्क र्हङ्बे म बेर्क गी ङत न्हङ्जेत्ज्यी, ओसेम् ङत चोले सुङ्जेत्ज्यी, “ङ्यीज्यीम् पर्मेस्वर्की दीम्तेङ् बेदी दबो, ओसेम् हुजुरी पर्मेस्वर्त तेन्बे म्हीमात ज्यागो। 2 तर पर्मेस्वर्की दीम्की फीर्च्योर्की दोमी थदपो, तलेपङ्सम् हुजुमी यहुदी अय्हीन्बे म्हीमात पीन्बल मुब, ओसेम् थेङ्यीमाचे ल खल् ङ्य्ही स्यी ङ्य्ही सम्म पबीत्र सहर्त कङ्चे न्हइस्ये मुब। 3 ओसेम् ङइ साक्षीमा ङ्य्हीत गल्दइ येन् येन्ज्यीम् हुजु हजार् गीः स्यी दुइ सय साठी दीन् सम्म अगम्बानी पङ्बे अधीकार् ङचे पीन्स्ये मुब।” 4 हुजु साक्षी ङ्य्हीमी जम्बुलीङ्की प्रभुइ ङोन्री रप्टीबे जैतुन्की दोङ्बो ङ्य्हीतेङ् साम्दान् ङ्य्ही य्हीन्ब। 5 खल्चे पङ्लेनो थेङ्यीमात न्होङ्नलब म्हइज्यी पङ्सम्, थेङ्यीमाकी सुङ् ग्यम्से डोङ्बे मेचे थेङ्यीमाकी सत्तुर्मात नास् लस्ये मुब। खल्चे पङ्लेनो थेङ्यीमात न्होङ्न लबे सेम् लज्यी पङ्सम् थेतएनो होलेनो सेत्स्ये मुब। 6 थेङ्यीमाचे अगम्बानी पङ्बे बेलोमारी नम् अयुखइ पङ्ज्यीम् मु दुङ्बे सक्ती थेङ्यीमातेङ् मुब। ओसेम् जम्मा ग्लाकी यीमात का तनलबरी ओसेम् जम्बुलीङ्री थेङ्यीमाचे म्हेन्ब अनुसार् य्हक्को थोइ य्हम्मा बबे सक्ती थेङ्यीमातेङ् मुब। 7 थेङ्यीमाचे र्हङ्की गबाहीकी लक् बुत्प बीसेम् दप्ज्यीम् दप्प अखम्बे नुप्पे व्हङ् न्हङ् ग्यम्से डोङ्खस्येकी दुस्ट सेम्ज्येन्चे थेङ्य्हीतेङ् छेत्ज्यीम् थेङ्य्हीतनो डास्ये मुब, ओसेम् थेङ्य्हीतनो सेत्स्ये मुब। 8 थेङ्य्हीकी स्यीबे ल्हीःमा हुजु ङ्हच्छ्यङ् सहर्की ग्यम्रीनो थेन्स्ये मुब। हुजुरीनो थेङ्यीमाकी प्रभुत क्रुस्री च्योलाबल मुबल। हुजु सहर्मी दुस्ट सहर् सदोम्तेङ् दुस्ट य्हुल् मीस्र र्हङ्ब य्हीन्ब। 9 सोम्रेत् स्यी दीन् डेत् सम्म थेङ्यीमाकी स्यीबे ल्हीःत जम्मनो य्हुल्मा, खलक्मा, ग्योत्मा ओसेम् जातीमाचे च्यास्ये मुब, ओसेम् खल्तेएनो हुजु स्यीबे ल्हीःमा बुप्लापुङ्स्ये अरे। 10 थेङ्य्हीत सेत्पल तज्यीम् जम्बुलीङ्की म्हीमा तङ्स्ये मुब, ओसेम् गीःचे गीःत केःकमा पीन्ब कीन्ब स्य्हेङ्स्ये मुब। तलेपङ्सम् हुजु अगम्बक्त ङ्य्हीचे जम्बुलीङ्की म्हीमात य्हक्को दुख पीन्बल मुबल। 11 तर सोम्रेत् स्यी दीन् डेत् लीप्चे पर्मेस्वर् ग्यम्से युबे जीवन्की सा थेङ्य्हीन्हङ् वङ्ज्यी, ओसेम् थेङ्य्ही र्हङ्की कङ् जुःज्यीम् रप्ज्यी, ओसेम् थेङ्य्हीत म्रङ्बलमा जम्मनो य्हक्को लोङ्ज्यी। 12 ओसेम् हुजु अगम्बक्त ङ्य्हीचे स्वर्ग ग्यम्से चोले पङ्बे ङ्हच्छ्यङ् केत् थ्येःज्यी, “चुरी तोर् खोउ।” ओसेम् थेङ्य्हीकी सत्तुर्माचे च्यान च्याननो थेङ्य्हीत मुक्परी स्वर्गतोर् नोम्ज्यी। 13 हुजु बेलोरीनो जेप्प सङ्गुल् खज्यी, ओसेम् हुजु ङ्हच्छ्यङ् सहर्की बो च्यीरी बो गी फुप्य्हर्ज्यी। हुजु सङ्गुल्चे लज्यीम् हजार् ङ्यीस् म्हीमा स्यीज्यी, ओसेम् अस्यीबे म्हीमाचेमी य्हक्को लोङ्ज्यीम् स्वर्गरी स्य्हुजेत्टीबे पर्मेस्वर्त स्य्हेस लज्यी। 14 दोस्रो बीपत्ती य्हर्ज्यी, तर च्यागो, तेस्रो बीपत्ती ग्योःनेनो खटीब। सातौ तुरही 15 हुजु लीप्चे सातौ स्वर्गदुत्चे र्हङ्की तुरही र्हप्ज्यी, ओसेम् स्वर्ग ग्यम्से ङ्हच्छ्यङ्-ङ्हच्छयङ् केत्माचे चोले पङ्ज्यी, “देरे य्हङ्से जम्बुलीङ्री सासन् स्य्हेङ्बे अधीकार् ङ्य्हङ्की प्रभुतेङ् थेङ्की मुक्ती न्हङ्बे ख्रीस्ट्ल य्हीन्ब, ओसेम् थेङ्चे खेमपङ्लेनो सासन् स्य्हेङ्जेत्स्ये मुब।” 16 ओसेम् पर्मेस्वर्की ङोन्री र्हङ्-र्हङ्की ठीरी टीबे हुजु खल् गीःस्यी ब्ली एल्डर्माचे पब्लु लज्यीम् पर्मेस्वर्त तेन्ज्यी, 17 ओसेम् थेङ्यीमाचे चोले पङ्ज्यी, “ओ परमप्रभु सक्तीसाली पर्मेस्वर्, थेङ् ङोन्ग्यम्नो मुबल ओसेम् देरेएनो मुब, ङ्यीमा थेङ्त व्होर्छ्ये पीन्ब, तलेपङ्सम् थेङ्चे र्हङ्की ङ्हच्छ्यङ् अधीकार् कीन्जेत्पल मुब, ओसेम् सासन् स्य्हेङ्ब तीप्जेत्पल मुब। 18 जाती-जातीमा य्हक्को बोमो लबल मुब, देरेम् थेङ्लएनो बोमो लबे बेलो खबल मुब। स्यीबलमाकी न्याय स्य्हेङ्बे बेलो खबल मुब, ओसेम् थेङ्की योक्पो अगम्बक्तमातेङ् थेङ्की म्हीमात ओसेम् थेङ्की छेन्त स्य्हेस लबलमा ज्यीद-ङ्हच्छ्यङ् जम्मतनो बक्सीस् न्हङ्बे बेलो खबल मुब, ओसेम् जम्बुलीङ्की नास् स्य्हेङ्बलमात नास् स्य्हेङ्बे बेलो खबल मुब।” 19 ओसेम् स्वर्गरी मुबे पर्मेस्वर्की पबीत्र दीम् ठोङ्ज्यी, ओसेम् हुजुरी थेङ्की करार्की डोम् म्रङ्ज्यी। हुजुलीप्चे तीप्लीक् फ्लीक्ज्यी, लाबलुङ् खब र्हङ्बे केत्मा ओसेम् मु गुरुङ्बल र्हङ्बे ङ्हच्छ्यङ् केत्मा थेःज्यी, सङ्गुल् य्हर्ज्यी ओसेम् जेप्प-जेप्प सेरमा युज्यी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.